Psalms | Assyrian Bible | Mar Gewargis Cathedral

Chapter 1 ܡܙܡܘܪ̈ܐ

1ܛܘܒܘܗܝ ܠܓܒܪܐ ܕܒܐܘܪܚܐ ܕܥܘ̈ܠܐ ܠܐ ܗܠܟ ܘܒܪܥܝܢܐ ܕܚ̈ܛܝܐ ܠܐ ܩܡ ܘܥܠ ܡܘܬܒܐ ܕܡܡܝ̈ܩܢܐ ܠܐ ܝܬܒ

2ܐܠܐ ܒܢܡܘܣܗ ܕܡܪܝܐ ܨܒܝܢܗ ܘܒܢܡܘܣܗ ܢܬܗܓܐ ܐܝܡܡܐ ܘܠܠܝܐ

3ܢܗܘܐ ܐܝܟ ܐܝܠܢܐ ܕܢܨܝܒ ܥܠ ܬܦܐ ܕܡ̈ܝܐ ܕܦܐܪ̈ܘܗܝ ܝܗܒ ܒܙܒܢܗ ܘܛܪ̈ܦܘܗܝ ܠܐ ܢܬܪ̈ܝܢ ܟܠ ܕܥܒܕ ܡܫܠܡ

4ܠܐ ܗܟܢܐ ܪ̈ܫܝܥܐ ܐܠܐ ܐܝܟ ܥܘܪܐ ܕܕܪܝܐ ܪܘܚܐ

5ܡܛܠ ܗܢܐ ܠܐ ܢܩܘܡܘܢ ܪ̈ܫܝܥܐ ܒܕܝܢܐ ܐܦ ܠܐ ܚ̈ܛܝܐ ܒܟܢܘܫܬܐ ܕܙܕܝ̈ܩܐ

6ܡܛܠ ܕܝܕܥ ܗܘ ܡܪܝܐ ܐܘܪܚܐ ܕܙܕܝܩ̈ܐ ܘܐܘܪܚܐ ܕܪ̈ܫܝܥܐ ܬܐܒܕ

Chapter 2 ܡܙܡܘܪ̈ܐ

1ܠܡܢܐ ܪܓܫܘ ܥܡ̈ܡܐ ܘܐ̈ܡܘܬܐ ܪ̈ܢܝ ܣܪܝܩܘܬܐ

2ܩܡܘ ܡ̈ܠܟܐ ܕܐܪܥܐ ܘܫ̈ܠܝܛܢܐ. ܘܐܬܡܠܟܘ ܐܝܟ ܚܕܐ ܥܠ ܡܪܝܐ ܘܥܠ ܡܫܝܚܗ

3ܕܢܦܣܩ ܚܢܩ̈ܝܗܘܢ ܘܢܫܪܐ ܡܢܢ ܢܝܪܗܘܢ

4ܕܝܬܒ ܒܫܡܝܐ ܢܓܚܟ ܘܡܪܝܐ ܢܡܝܩ ܒܗܘܢ

5ܗܝ ܕܝܢ ܢܡܠܠ ܥܠܝܗܘܢ ܒܪܘܓܙܗ ܘܒܚܡܬܗ ܢܕܠܚ ܐܢܘܢ

6ܐܢܐ ܐܩܝܡܬ ܡܠܟܝ ܥܠ ܨܗܝܘܢ ܛܘܪܐ ܕܩܘܕܫܝ

7ܕܢܫܬܥܐ ܥܠ ܩܝܡܝ ܡܪܝܐ ܐܡܪ ܠܝ ܕܒܪܝ ܐܢܬ ܘܐܢܐ ܝܘܡܢܐ ܝܠܕܬܟ

8ܫܐܠ ܡܢܝ ܘܐܬܠ ܠܟ ܥܡ̈ܡܐ ܠܝܪܬܘܬܟ ܘܐܘܚ̈ܕܢܝܟ ܥܒܪ̈ܝܗ̇ ܕܐܪܥܐ

9ܬܪܥܐ ܐܢܘܢ ܒܫܒܛܐ ܕܦܪܙܠܐ ܘܐܝܟ ܡܐ̈ܢܝ ܦܚܪܐ ܬܢܦܨ ܐܢܘܢ

10ܗܫܐ ܡ̈ܠܟܐ ܐܣܬܟܠܘ ܘܐܬܪܕܘ ܕܝ̈ܢܐ ܕܐܪܥܐ

11ܦܠܘܚܘ ܠܡܪܝܐ ܒܕܚܠܬܐ ܘܐܘܚܕܘܢܝܗܝ ܒܪܬܝܬܐ

12ܐܚܘܕ ܡܪܕܘܬܐ ܕܠܐ ܢܪܓܙ ܡܪܝܐ ܘܬܐܒܕܘܢ ܡܢ ܐܘܪܚܗ ܡܛܠ ܕܥܕ ܩܠܝܠ ܝܩܕ ܪܘܓܙܗ ܘܛܘܒܝܗܘܢ ܠܟܠ ܕܬܟܝܠܝܢ ܥܠܘܗܝ

Chapter 3 ܡܙܡܘܪ̈ܐ

2ܡܪܝܐ ܡܐ ܣܓܝܘ ܐ̈ܠܘܨܝ ܣ̈ܓܝܐܐ ܕܩܡܘ ܥܠܝ

3ܣ̈ܓܝܐܐ ܕܐܡܪܝܢ ܠܗ̇ ܠܢܦܫܝ ܕܠܝܬ ܠܟܝ ܦܘܪܩܢܐ ܒܐܠܗܟܝ

4ܐܢܬ ܡܪܝܐ ܡܣܝܥܢܝ ܘܐܝܩܪܝ ܘܡܪܡܪܡܢܗ ܕܪܝܫܝ

5ܒܩܠܝ ܠܡܪܝܐ ܩܪܝܬ ܘܥܢܢܝ ܡܢ ܛܘܪܗ ܩܕܝܫܐ

6ܐܢܐ ܫܟܒܬ ܘܕܡܟܬ ܘܐܬܬܥܝܪܬ ܡܛܘܠ ܕܡܪܝܐ ܣܡܟܢܝ

7ܠܐ ܐܕܚܠ ܡܢ ܪ̈ܒܘܬܗ ܕܥܡܐ ܕܚܕܪܘܢܝ ܘܣܡܘ ܥܠܝ

8ܩܘܡ ܡܪܝܐ ܐܠܗܝ ܘܦܪܘܩܝܢܝ ܡܛܠ ܕܐܢܬ ܡܚܝܬ ܠܟܘܠܗܘܢ ܒ̈ܥܠܕܒܒܝ ܥܠ ܦܟܝ̈ܗܘܢ ܘܫ̈ܢܐ ܕܪ̈ܫܝܥܐ ܬܒܪܬ

9ܕܡܪܝܐ ܗܘ ܦܘܪܩܢܐ ܘܥܠ ܥܡܟ ܒܘܪܟܬܟ ܠܥܠܡ

Chapter 4 ܡܙܡܘܪ̈ܐ

2ܟܕ ܩܪܝܬܟ ܥܢܝܬܢܝ ܐܠܗܝ ܘܦܪܘܩܐ ܕܙܕܝܩܘܬܝ ܒܐ̈ܘܠܨܢܝ ܐܪܘܚܬ ܠܝ ܪܚܡ ܥܠܝ ܘܫܡܥ ܨܠܘܬܝ

3ܒ̈ܢܝ ܐܢܫܐ ܥܕܡܐ ܠܐܡܬܝ ܐܝܩܪܝ ܡܚܦܝܢ ܐܢܬܘܢ ܘܪܚܡܝܢ ܐܢܬܘܢ ܣܪܝܩܘܬܐ ܘܒܥܝܢ ܐܢܬܘܢ ܕܓܠܘܬܐ ܠܥܠܡܝܢ

4ܕܥܘ ܕܦܪܫ ܠܗ ܡܪܝܐ ܓܒܝܐ ܒܬܕܡܘܪܬܐ ܡܪܝܐ ܢܫܡܥ ܟܕ ܐܩܪܝܘܗܝ

5ܪܓܙܘ ܘܠܐ ܬܚܛܘܢ ܐܡܪܘ ܒ̈ܠܒܝܟܘܢ ܘܥܠ ܡܫ̈ܟܒܝܟܘܢ ܪܢܘ

6ܕܒܚܘ ܕܒܚ̈ܐ ܕܙܕܝܩܘܬܐ ܘܣܒܪܘ ܒܡܪܝܐ

7ܣܓ̈ܝܐܐ ܕܐܡܪܝܢ ܡܢܘ ܢܚܘܝܢ ܛܒܐ ܘܢܦܪܘܣ ܥܠܝܢ ܢܘܗܪܐ ܕܦܪܨܘܦܗ

8ܡܪܝܐ ܝܗܒܬ ܚܕܘܬܟ ܒܠܒܝ ܡܢ ܙܒܢܐ ܕܥܒܘܪܗܘܢ ܘܕܚܡܪܗܘܢ ܘܕܡܫܚܗܘܢ ܣܓܝܘ

9ܒܫܠܡܐ ܐܝܟ ܚܕܐ ܘܐܢܐ ܐܫܟܒ ܘܐܕܡܟ ܡܛܠ ܕܐܢܬ ܡܪܝܐ ܒܠܚܘܕܝ ܒܫܠܝܐ ܬܥܡܪܢܝ

Chapter 5 ܡܙܡܘܪ̈ܐ

2ܡ̈ܠܝ ܨܘܬ ܡܪܝܐ ܘܐܣܬܟܠ ܒܗܓܝܝ

3ܨܘܬ ܠܩܠܐ ܕܓܥܬܝ ܡܠܟܝ ܘܐܠܗܝ ܡܛܠ ܕܠܘܬܟ ܗܘ ܡܨܠܐ ܐܢܐ

4ܡܪܝܐ ܒܨܦܪܐ ܬܫܡܥ ܩܠܝ ܘܒܨܦܪܐ ܐܬܛܝܒ ܘܐܬܚܙܐ ܠܟ

5ܡܛܠ ܕܐܠܗܐ ܐܢܬ ܘܠܐ ܨܒܐ ܪܘܫܥܐ ܘܠܐ ܢܥܡܪ ܥܡܟ ܒܝܫܐ

6ܘܠܐ ܢܩܘܡܘܢ ܫܒܗܪ̈ܢܐ ܩܕܡ ܥܝܢ̈ܝܟ ܣܢܝܬ ܠܟܠ ܥܒ̈ܕܝ ܫܘܩܪܐ

7ܘܬܘܒܕ ܠܡܡ̈ܠܠܝ ܕܓܠܘܬܐ ܠܓܒܪܐ ܐܫܕ ܕܡܐ ܘܢܟܘܠܬܢܐ ܢܣܠܝܘܗܝ ܡܪܝܐ

8ܘܐܢܐ ܒܣܘܓܐܐ ܕܛܝܒܘܬܟ ܐܥܘܠ ܠܒܝܬܟ ܘܐܣܓܘܕ ܒܗܝܟܠܐ ܕܩܘܕܫܟ

9ܒܕܚܠܬܟ ܡܪܝܐ ܕܒܪܝܢܝ ܘܒܙܕܝܩܘܬܟ ܡܛܠ ܒ̈ܥܠܕܒܒܝ ܬܪܘܨ ܩܕܡܝ ܐܘܪܚܟ

10ܡܛܘܠ ܕܠܝܬ ܒܦܘܡܗܘܢ ܟܐܢܘܬܐ ܐܠܐ ܥܘܠܐ ܒܓܘܗܘܢ ܘܐܝܟ ܩܒܪ̈ܐ ܦܬ̈ܝܚܐ ܓܓܪ̈ܬܗܘܢ ܘܠܫ̈ܢܝܗܘܢ ܡܗܦܟܝܢ

11ܢܚܝܒ ܐܢܘܢ ܐܠܗܐ ܘܢܦܠܘܢ ܡܢ ܡܘ̈ܠܟܢܝܗܘܢ ܘܒܣܘܓܐܐ ܕܥܘܠܗܘܢ ܕܚܘܩ ܐܢܘܢ ܡܛܠ ܕܡܪܡܪܘܟ

12ܢܚܕܘܢ ܟܠ ܕܡܣܒܪܝܢ ܒܟ ܘܠܥܠܡ ܢܫܒܚܘܢܟ ܘܬܥܡܪ ܒܗܘܢ ܘܢܬܥܫܢܘܢ ܒܟ ܟܠ ܪ̈ܚܡܝ ܫܡܟ

13ܡܛܠ ܕܐܢܬ ܬܒܪܟ ܠܙܕܝ̈ܩܐ ܡܪܝܐ ܐܝܟ ܣܟܪܐ ܡܩܒܠܬܐ ܬܥܛܦܢܝ

Chapter 6 ܡܙܡܘܪ̈ܐ

2ܡܪܝܐ ܠܐ ܒܪܘܓܙܟ ܬܟܣܢܝ ܐܦ ܠܐ ܒܚܡܬܟ ܬܪܕܝܢܝ

3ܪܚܡ ܥܠܝ ܡܪܝܐ ܡܛܠ ܕܟܪܝܗ ܐܢܐ ܐܣܢܝ ܡܪܝܐ ܡܛܠ ܕܙܥܘ ܓܪ̈ܡܝ

4ܘܢܦܫܝ ܐܬܬܙܝܥܬ ܛܒ ܘܐܢܬ ܡܪܝܐ ܥܕܡܐ ܠܐܡܬܝ

5ܐܬܦܢ ܡܪܝܐ ܘܦܨܗ̇ ܠܢܦܫܝ ܘܦܪܘܩܝܢܝ ܡܛܠ ܛܝܒܘܬܟ

6ܡܛܘܠ ܕܠܝܬ ܒܡܘܬܐ ܕܘܟܪܢܟ ܘܒܫܝܘܠ ܡܢܘ ܡܘܕܐ ܠܟ

7ܠܐܝܬ ܒܬܐ̈ܢܚܬܝ ܘܨܒܥܬ ܒܟܠ ܠܝ̈ܠܐ ܥܪܣܝ ܘܒܕܡܥܬܝ ܬܫܘܝܬܝ ܐܡܣܝܬ

8ܟܐܒܬ ܡܢ ܪܘܓܙܐ ܥܝܢܝ ܘܐܬܕܠܚܬ ܡܢ ܟܠܗܘܢ ܒ̈ܥܠܕܒܒܝ

9ܦܪܘܩ ܡܢ ܟܠ ܥܒ̈ܕܝ ܫܘܩܪܐ ܡܛܠ ܕܫܡܥ ܡܪܝܐ ܩܠܐ ܕܒܟܬܝ

10ܫܡܥ ܡܪܝܐ ܒܥܘܬܝ ܡܪܝܐ ܨܠܘܬܝ ܩܒܠ

11ܢܒܗܬܘܢ ܘܢܬܬܒܪܘܢ ܛܒ ܟܠܗܘܢ ܒ̈ܥܠܕܒܒܝ ܢܗܦܟܘܢ ܘܢܐܒܕܘܢ ܡܢ ܫܠܝܐ

Chapter 7 ܡܙܡܘܪ̈ܐ

2ܡܪܝܐ ܐܠܗܝ ܒܟ ܣܒܪܬ ܦܪܘܩܝܢܝ ܘܡܢ ܟܠ ܪ̈ܕܘܦܝ ܦܨܢܝ

3ܕܠܡܐ ܐܝܟ ܐܪܝܐ ܠܡܬܒܪ ܠܢܦܫܝ ܘܠܝܬ ܕܦܪܩ ܘܡܦܨܐ

4ܡܪܝܐ ܐܠܗܝ ܐܢ ܥܒܕܬ ܗܕܐ ܘܐܢ ܐܝܬ ܥܘܠܐ ܒܐ̈ܝܕܝ

5ܘܐܢ ܦܪܥܬ ܠܡܢ ܕܥܒܕ ܠܝ ܒܝܫܬܐ ܘܐܢ ܐܠܨܬ ܠܒܥܠܕܒܒܝ ܣܪܝܩܐܝܬ

6ܢܪܕܘܦ ܒܥܠܕܒܒܐ ܠܢܦܫܝ ܘܢܕܪܟܝܗ̇ ܘܢܕܘܫ ܚ̈ܝܝ ܒܐܪܥܐ ܘܫܘܒܚܝ ܒܥܦܪܐ ܢܫܪܐ

7ܩܘܡ ܡܪܝܐ ܒܪܘܓܙܟ ܘܐܫܬܩܠ ܥܠ ܩܕܠܐ ܕܒ̈ܥܠܕܒܒܝ ܐܬܬܥܝܪ ܥܠܝ ܒܕܝܢܐ ܕܦܩܕܬ

8ܘܥܕܬܐ ܕܐ̈ܡܘܬܐ ܬܚܕܪܟ ܘܥܠ ܐ̈ܦܝܗ̇ ܠܡܪܘܡܐ ܬܗܦܟ

9ܡܪܝܐ ܢܕܘܢ ܥܡ̈ܡܐ ܕܘܢܝܢܝ ܡܪܝܐ ܐܝܟ ܙܕܝܩܘܬܝ ܘܐܝܟ ܬܡܝܡܘܬܝ

10ܬܓܡܪ ܒܝܫܬܐ ܥܠ ܪ̈ܫܝܥܐ ܘܬܬܩܢ ܠܙܕܝܩ̈ܐ ܒܚܪ ܠܒܐ ܘܟܘ̈ܠܝܬܐ ܐܠܗܐ ܙܕܝܩܐ

11ܡܣܝܥܢܝ ܐܠܗܐ ܕܦܪܩ ܠܬܪ̈ܝܨܝ ܠܒܐ

12ܐܠܗܐ ܕܝܢܐ ܕܩܘܫܬܐ ܠܐ ܪܓܙ ܟܠܝܘܡ

13ܐܠܐ ܗܦܟ ܣܝܦܗ ܠܛܫ ܘܩܫܬܗ ܡܬܚ ܐܬܩܢ

14ܘܡܬܩܢ ܠܗ ܡܐ̈ܢܐ ܕܪܘܓܙܐ ܓܐܪ̈ܘܗܝ ܥܒܕ ܠܕܝܩܕܝܢ

15ܡܛܠ ܕܚܒܠ ܥܘܠܐ ܘܒܛܢ ܫܘܩܪܐ ܘܝܠܕ ܥܘܠܐ

16ܒܐܪܐ ܚܦܪ ܘܚܛܗ̇ ܘܢܦܠ ܒܓܘܡܨܐ ܕܥܒܕ

17ܢܗܦܘܟ ܥܘܠܗ ܒܪܝܫܗ ܘܥܠ ܒܥܬܗ ܥܘܠܗ ܢܚܘܬ

18ܐܘܕܐ ܠܡܪܝܐ ܐܝܟ ܙܕܝܩܘܬܝ ܘܐܙܡܪ ܠܫܡܗ ܕܡܪܝܐ ܡܪܝܡܐ

Chapter 8 ܡܙܡܘܪ̈ܐ

2ܡܪܝܐ ܡܪܢ ܡܐ ܡܫܒܚ ܫܡܟ ܒܟܠܗ̇ ܐܪܥܐ ܕܝܗܒܬ ܫܘܒܚܟ ܥܠ ܫܡܝܐ

3ܡܢ ܦܘܡܐ ܕܥ̈ܠܝܡܐ ܘܕܛ̈ܠܝܐ ܬܩܢܬ ܬܫܒܘܚܬܟ ܡܛܠ ܒ̈ܥܠܕܒܒܝܟ ܢܬܒܛܠ ܒܥܠܕܒܒܐ ܕܡܬܢܩܡ

4ܡܛܠ ܕܚܙܘ ܫܡ̈ܝܟ ܥܒܕܐ ܕܨܒ̈ܥܬܟ ܣܗܪܐ ܘܟܘܟ̈ܒܐ ܬܩܢܬ

5ܡܢܘ ܓܒܪܐ ܕܐܬܕܟܪܬܝܗܝ ܘܒܪܢܫܐ ܕܦܩܕܬܝܗܝ

6ܒܨܪܬܝܗܝ ܩܠܝܠ ܡܢ ܡܠܐ̈ܟܐ ܒܐܝܩܪܐ ܘܒܫܘܒܚܐ ܐܥܛܦܬܝܗܝ

7ܘܐܫܠܛܬܝܗܝ ܒܥܒܕܐ ܕܐ̈ܝܕܝܟ ܟܠ ܣܡܬ ܬܚܝܬ ܪ̈ܓܠܘܗܝ

8ܥܢܐ ܘܒܩܪ̈ܐ ܟܠܗܝܢ ܐܦ ܚܝܘܬܐ ܕܕܒܪܐ

9ܘܨܦܪ̈ܐ ܕܒܫܡܝܐ. ܘܢܘ̈ܢܐ ܕܝܡܐ ܕܥܒܪܝܢ ܒܫܒ̈ܝܠܐ ܕܝܡ̈ܡܐ

10ܡܪܝܐ ܡܪܢ ܡܐ ܡܫܒܚ ܫܡܟ ܒܟܠܗ̇ ܐܪܥܐ

Chapter 9 ܡܙܡܘܪ̈ܐ

2ܐܘܕܐ ܠܡܪܝܐ ܡܢ ܟܠܗ ܠܒܝ ܘܐܫܬܥܐ ܟܠܗܝܢ ܬܕܡܪ̈ܬܟ

3ܐܚܕܐ ܘܐܪܘܙ ܒܟ ܘܐܙܡܪ ܠܫܡܟ ܡܪܝܡܐ

4ܟܕ ܢܗܦܟܘܢ ܒ̈ܥܠܕܒܒܝ ܠܒܣܬܪܗܘܢ ܢܬܬܩܠܘܢ ܘܢܐܒܕܘܢ ܡܢ ܩܕܡܝܟ

5ܡܛܠ ܕܥܒܕܬ ܦܘܪܥܢܝ ܘܕܝܢܝ ܘܝܬܒܬ ܥܠ ܟܘܪܣܝܐ ܕܝܢܐ ܙܕܝܩܐ

6ܟܐܝܬ ܒܥܡ̈ܡܐ ܘܐܘܒܕܬ ܠܪ̈ܫܝܥܐ. ܘܫ̈ܡܗܝܗܘܢ ܥܛܝܬ ܠܥܠܡ ܥܠܡܝܢ

7ܒ̈ܥܠܕܒܒܝ ܓܡܪܘ ܒܣܝܦܐ ܠܥܠܡ ܩܘܪ̈ܝܐ ܥܩܪܬ ܘܐܘܒܕܬ ܕܘܟܪܢܗܝܢ

8ܘܡܪܝܐ ܠܥܠܡ ܩܝܡ ܘܡܬܩܢ ܟܘܪܣܝܗ ܠܕܝܢܐ

9ܕܢܕܘܢ ܬܒܝܠ ܒܩܘܫܬܐ ܘܠܥܡ̈ܡܐ ܒܬܪܝܨܘܬܐ

10ܢܗܘܐ ܡܪܝܐ ܒܝܬ ܓܘܣܐ ܠܡܣܟ̈ܢܐ ܘܡܥܕܪܢܗܘܢ ܒܙܒ̈ܢܐ ܕܐܘܠܨܢܐ

11ܘܢܣܒܪܘܢ ܒܟ ܟܠ ܝܕܥ̈ܝ ܫܡܟ ܡܛܠ ܕܠܐ ܫܒܩ ܐܢܬ ܠܐܝܠܝܢ ܕܒܥܝܢ ܠܟ ܡܪܝܐ

12ܙܡܪܘ ܠܡܪܝܐ ܕܥܡܪ ܒܨܗܝܘܢ ܘܚܘܘ ܒܥܡ̈ܡܐ ܨܢܥ̈ܬܗ

13ܡܛܠ ܕܐܬܕܟܪ ܠܡܬܒܥ ܕܡܗܘܢ ܘܠܐ ܛܥܐ ܓܥܬܗ ܕܡܣܟܢܐ

14ܪܚܡ ܥܠܝ ܡܪܝܐ ܘܚܙܝ ܫܘܥܒܕܝ ܕܡܢ ܣ̈ܢܐܝ. ܡܪܡܪܡܢܝ ܡܢ ܬܪ̈ܥܘܗܝ ܕܡܘܬܐ

15ܡܛܠ ܕܐܫܬܥܐ ܟܠܗܝܢ ܬܕܡܪ̈ܬܟ ܒܬܪ̈ܥܝܗ̇ ܕܒܪܬ ܨܗܝܘܢ ܐܕܘܨ ܒܦܘܪܩܢܟ

16ܛܒܥܘ ܥܡ̈ܡܐ ܒܓܘܡܨܐ ܕܥܒܕܘ ܘܒܡܨܝܕܬܐ ܕܛܡܪܘ ܐܬܬܚܕܬ ܪܓܠܗܘܢ

17ܡܘܕܥ ܡܪܝܐ ܕܝܢܐ ܕܥܒܕ ܘܒܥܒܕ ܐ̈ܝܕܘܗܝ ܡܬܬܚܕ ܪܫܝܥܐ

18ܢܗܦܟܘܢ ܪ̈ܫܝܥܐ ܠܫܝܘܠ ܘܟܠܗܘܢ ܥܡ̈ܡܐ ܕܛܥܝܢ ܠܐܠܗܐ

19ܡܛܠ ܕܠܐ ܠܥܠܡ ܡܬܛܥܐ ܡܣܟܢܐ ܘܣܒܪܐ ܕܡܣ̈ܟܢܐ ܠܐ ܬܘܒܕ ܠܥܠܡ

20ܩܘܡ ܡܪܝܐ ܘܠܐ ܢܬܥܫܢ ܒܪ ܐܢܫܐ ܢܬܬܕܝܢܘܢ ܥܡ̈ܡܐ ܩܕܡ ܐ̈ܦܝܟ

21ܐܩܝܡ ܠܗܘܢ ܣܐܡ ܢܡܘܣܐ ܕܢܕܥܘܢ ܥܡ̈ܡܐ ܕܒܢ̈ܝ ܐܢܫܐ ܐܢܘܢ

Chapter 10 ܡܙܡܘܪ̈ܐ

1ܠܡܢܐ ܡܪܝܐ ܩܡܬ ܒܪܘܚܩܐ ܘܐܗܡܝܬ ܚܝܪܟ ܒܙܒܢ̈ܐ ܕܐܘܠܨܢܐ

2ܒܫܘܒܗܪܗ ܕܪܫܝܥܐ ܝܩܕ ܡܣܟܢܐ ܢܬܬܚܕܘܢ ܒܬܪܥܝܬܐ ܗܝ ܕܐܬܚܫܒܘ

3ܡܛܠ ܕܡܫܬܒܗܪ ܪܫܝܥܐ ܒܪ̈ܓܝܓܬܐ ܕܢܦܫܗ ܥܘܠܐ ܡܬܒܪܟ ܘܪܓܙ ܡܪܝܐ

4ܘܪܫܝܥܐ ܒܪܡܘܬܗ ܠܐ ܡܥܩܒ ܘܠܝܬ ܐܠܗܐ ܒܟܘܠܗܝܢ ܬܪ̈ܥܝܬܗ

5ܘܫܪ̈ܝܢ ܐܘܪ̈ܚܬܗ ܒܟܠܙܒܢ ܘܡܥܠܝ ܕܝܢܟ ܡܢ ܠܩܘܒܠܗ ܘܠܟܠܗܘܢ ܒ̈ܥܠܕܒܒܘܗܝ ܫܐܛ

6ܐܡܪ ܒܠܒܗ ܕܠܐ ܐܙܘܥ ܠܕܪܕܪܝܢ ܪܢܐ ܒܒܝܫܬܐ

7ܘܠܘܛܬܐ ܡܠܐ ܦܘܡܗ ܬܘܟܐ ܘܢܟܠܐ ܬܚܝܬ ܠܫܢܗ ܥܘܠܐ ܘܥܬܐ

8ܝܬܒ ܒܟܡܐܢܐ ܒܕܝܪܐ ܘܒܛܘܫܝܐ ܩܛܠ ܠܙܕܝܩܐ ܥܝܢ̈ܘܗܝ ܠܒܝܫ̈ܐ ܕܝܩ̈ܢ

9ܘܟܡܢ ܠܡܚܛܦ ܠܡܣܟܢܐ ܒܢܓܕܐ ܕܡܨܝܕܬܗ

10ܗܘ ܢܬܡܟܟ ܘܢܦܠ ܘܒܓܪ̈ܡܘܗܝ ܟܘܪܗܢܐ ܘܟܐܒ̈ܐ

11ܐܡܪ ܒܠܒܗ ܕܛܥܐ ܐܠܗܐ ܘܐܦܢܝ ܐ̈ܦܘܗܝ ܘܠܐ ܚܙܐ ܠܥܠܡ

12ܩܘܡ ܡܪܝܐ ܐܠܗܝ ܘܐܪܝܡ ܐܝܕܟ ܘܠܐ ܬܛܥܝܘܗܝ ܠܒܝܫܐ

13ܠܡܢܐ ܐܪܓܙ ܚܛܝܐ ܠܐܠܗܐ ܘܐܡܪ ܒܠܒܗ ܕܠܐ ܬܒܥ

14ܚܙܐ ܐܢܬ ܕܐܝܬ ܥܘܠܐ ܘܪܘܓܙܐ ܘܚܐܪ ܐܢܬ ܕܢܫܬܠܡ ܒܐ̈ܝܕܝܟ ܥܠܝܟ ܢܫܬܒܩ ܒܝܫܐ ܘܕܝܬܡܐ ܐܢܬ ܗܘ ܥܕܘܪܗ

15ܬܒܪ ܕܪܥܗ ܕܚܛܝܐ ܘܕܒܝ̇ܫܐ ܬܬܒܥܐ ܚܛܝܬܗ ܘܠܐ ܬܫܬܟܚ

16ܡܪܝܐ ܡܠܟܐ ܗܘ ܠܥܠܡ ܥܠܡܝܢ ܐܒܕܘ ܥܡ̈ܡܐ ܡܢ ܐܪܥܗ

17ܘܣܒܪܐ ܕܡܣ̈ܟܢܐ ܫܡܥ ܐܢܬ ܡܪܝܐ ܘܛܘܝܒܐ ܕܠܒܗܘܢ ܬܨܘܬ ܐܕܢܟ

18ܠܡܕܢ ܠܝܬ̈ܡܐ ܘܠܒܝܫ̈ܐ ܕܠܐ ܢܘܣܦ ܬܘܒ ܠܡܘܒܕܘ ܒܢܝܢܫ̈ܐ ܡܢ ܐܪܥܐ

Chapter 11 ܡܙܡܘܪ̈ܐ

1ܒܡܪܝܐ ܣܒܪܬ ܐܝܟܢ ܐܡܪܝܢ ܐܢܬܘܢ ܠܢܦܫܝ ܢܘܕܝ ܘܫܟܢܝ ܥܠ ܛܘܪ̈ܐ ܐܝܟ ܨܦܪܐ

2ܡܛܠ ܕܗܐ ܚ̈ܛܝܐ ܡܠܘ ܩܫܬܐ ܘܐܬܩܢܘ ܓܐܪ̈ܝܗܘܢ ܥܠ ܝܬܪܐ ܠܡܫܕܐ ܒܥܡܛܢܐ ܒܬܪ̈ܝܨܝ ܠܒܐ

3ܡܛܠ ܕܡܕܡ ܕܥܬܕܬ ܣܚܦܘ. ܙܕܝܩܐ ܕܝܢ ܡܢܐ ܥܒܕ

4ܡܪܝܐ ܒܗܝܟܠܐ ܕܩܘܕܫܗ ܡܪܝܐ ܒܫܡܝܐ ܟܘܪܣܝܗ ܥܝ̈ܢܘܗܝ ܚܙܝܢ ܘܬܡܪ̈ܘܗܝ ܒܚܪܝܢ ܠܒܢ̈ܝ ܐܢܫܐ

5ܡܪܝܐ ܒܚܪ ܠܙܕܝܩ̈ܐ. ܠܥܘ̈ܠܐ ܘܠܪ̈ܚܡܝ ܥܘܠܐ ܣܢܬ ܢܦܫܗ

6ܢܚܬܘ ܥܠ ܪ̈ܫܝܥܐ ܦܚ̈ܐ ܐܝܟ ܡܛܪܐ. ܢܘܪܐ ܘܟܒܪܝܬܐ. ܪܘܚܐ ܕܡܚܘܬܐ ܡܢܬܐ ܕܟܣܗܘܢ

7ܡܛܠ ܕܙܕܝܩ ܗܘ ܡܪܝܐ ܘܙܕܝܩܘܬܐ ܪܚܡ. ܘܬܪܝܨܘܬܐ ܚܙܝܢ ܐ̈ܦܘܗܝ

Chapter 12 ܡܙܡܘܪ̈ܐ

2ܦܪܘܩ ܡܪܝܐ ܡܛܠ ܕܓܡܪ ܛܒܐ ܘܒܛܠܬ ܗܝܡܢܘܬܐ ܡܢ ܐܪܥܐ ܒܢ̈ܝ ܐܢܫܐ

3ܣܪܝܩܘܬܐ ܡܡܠܠܝܢ ܘܓܒܪܐ ܥܡ ܚܒܪܗ ܒܣ̈ܦܘܬܐ ܡ̈ܦܠܓܬܐ ܒܠܒܐ ܘܒܠܒܐ ܡܡܠܠܝܢ

4ܢܘܒܕ ܡܪܝܐ ܟܘܠܗܝܢ ܣܦܘܬ̈ܐ ܡ̈ܦܠܓܬܐ ܘܠܫ̈ܢܐ ܕܡܡ̈ܠܠܝܢ ܪ̈ܘܪܒܬܐ

5ܕܐܡܪܘ ܠܫܢܢ ܢܘܪܒ ܣ̈ܦܘܬܐ ܕܝܠܢ ܐܢܝܢ ܡܢܘ ܡܪܢ

6ܡܛܠ ܒܙܬܐ ܕܡܣ̈ܟܢܐ ܘܐܢܩܬܐ ܕܒܝܫ̈ܐ ܡܟܝܠ ܐܩܘܡ ܐܡܪ ܡܪܝܐ ܘܐܥܒܕ ܦܘܪܩܢܐ ܓܠܝܐܝܬ

7ܡܐܡܪܗ ܕܡܪܝܐ ܡܐܡܪܐ ܗܘ ܕܟܝܐ. ܣܐܡܐ ܓܒܝܐ ܕܒܚܝܪ ܒܐܪܥܐ ܘܡܕܟܝ ܚܕ ܒܫܒܥܐ

8ܘܐܢܬ ܡܪܝܐ ܬܛܪ ܐܢܘܢ ܫܘܙܒܝܢܝ ܘܦܨܢܝ ܡܢ ܕܪܐ ܗܢܐ ܠܥܠܡ

9ܟܪ̈ܝܟܝܢ ܪ̈ܫܝܥܐ ܘܡܗܠܟܝܢ ܐܝܟ ܪܘܡܐ ܙܠܝܠܐ ܕܒ̈ܢܝ ܐܕܘܡ

Chapter 13 ܡܙܡܘܪ̈ܐ

2ܥܕܡܐ ܠܐܡܬܝ ܬܛܥܝܢܝ ܡܪܝܐ ܠܥܠܡ ܥܕܡܐ ܠܐܡܬܝ ܬܗܦܟ ܐ̈ܦܝܟ ܡܢܝ

3ܥܕܡܐ ܠܐܡܬܝ ܬܣܝܡ ܬܟܪܝܬܐ ܒܢܦܫܝ ܘܕܐܘܘܢܐ ܒܠܒܝ ܟܠܝܘܡ ܥܕܡܐ ܠܐܡܬܝ ܢܬܬܪܝܡ ܒܥܠܕܒܒܝ ܥܠܝ

4ܚܘܪ ܘܥܢܝܢܝ ܡܪܝܐ ܐܠܗܝ ܘܐܢܗܪ ܥܝܢ̈ܝ ܕܠܐ ܐܕܡܟ ܠܡܘܬܐ

5ܘܠܐ ܢܐܡܪ ܒܥܠܕܒܒܝ ܕܙܟܝܬܗ ܘܐ̈ܠܘܨܝ ܢܚܕܘܢ ܠܝ ܟܕ ܐܙܘܥ

6ܐܢܐ ܕܝܢ ܥܠ ܛܝܒܘܬܟ ܐܬܬܟܠܬ ܢܪܘܙ ܠܒܝ ܒܦܘܪܩܢܟ ܘܐܫܒܚ ܠܡܪܝܐ ܕܦܪܩܢܝ

Chapter 14 ܡܙܡܘܪ̈ܐ

1ܐܡܪ ܥܘܠܐ ܒܠܒܗ ܕܠܝܬ ܐܠܗܐ. ܐܬܚܒܠܘ ܘܐܬܛܢܦܘ ܒܨܢ̈ܥܬܗܘܢ ܘܠܝܬ ܕܥܒܕ ܛܒܬܐ

2ܡܪܝܐ ܐܕܝܩ ܡܢ ܫܡܝܐ ܥܠ ܒܢܝܢܫ̈ܐ ܕܢܚܙܐ ܐܢ ܐܝܬ ܕܣܟܘܠܬܢ ܘܒܥܐ ܠܐܠܗܐ

3ܟܠܗܘܢ ܣܛܘ ܐܝܟ ܚܕܐ ܘܐܣܬܠܝܘ ܘܠܝܬ ܕܥܒܕ ܛܒܬܐ ܐܦ ܠܐ ܚܕ

4ܘܠܐ ܝܕܥܘ ܟܠ ܥܒ̈ܕܝ ܥܘܠܐ ܐ̈ܟܠܝ ܠܥܡܝ ܡܐܟܠ ܠܚܡܐ ܘܠܡܪܝܐ ܠܐ ܩܪܘ

5ܬܡܢ ܕܚܠܘ ܕܚܠܬܐ ܡܛܠ ܕܐܠܗܐ ܒܕܪܐ ܗܘ ܕܙܕܝܩ̈ܐ

6ܬܪܥܝܬܗ ܕܡܣܟܢܐ ܐܒܗܬܘ ܡܛܠ ܕܡܪܝܐ ܗܘ ܬܘܟܠܢܗ

7ܡܢ ܢܬܠ ܡܢ ܨܗܝܘܢ ܦܘܪܩܢܐ ܠܐܝܣܪܝܠ ܡܐ ܕܡܗܦܟ ܡܪܝܐ ܫܒܝܬܐ ܕܥܡܗ. ܢܕܘܨ ܝܥܩܘܒ ܘܢܚܕܐ ܐܝܣܪܝܠ

Chapter 15 ܡܙܡܘܪ̈ܐ

1ܡܪܝܐ ܡܢܘ ܢܥܡܪ ܒܡܫܟܢܟ ܘܡܢ ܗܘ ܢܫܪܐ ܒܛܘܪܟ ܩܕܝܫܐ

2ܐܝܢܐ ܕܡܗܠܟ ܕܠܐ ܡܘܡ ܘܥܒܕ ܙܕܝܩܘܬܐ ܘܡܡܠܠ ܩܘܫܬܐ ܒܠܒܗ

3ܘܠܐ ܢܟܘܠܬܢ ܒܠܫܢܗ ܘܠܐ ܥܒܕ ܠܚܒܪܗ ܒܝܫܬܐ. ܘܫܘܚܕܐ ܥܠ ܩܪܝܒܗ ܠܐ ܡܩܒܠ

4ܘܡܣܠܝ ܒܥܝܢ̈ܘܗܝ ܡܪܓܙܢܐ ܘܠܕܚ̈ܠܘܗܝ ܕܡܪܝܐ ܡܝܩܪ ܝܡܐ ܠܚܒܪܗ ܘܠܐ ܡܕܓܠ

5ܘܟܣܦܗ ܒܪܒܝܬܐ ܠܐ ܝܗܒ ܘܫܘܚܕܐ ܥܠ ܙܟܝܐ ܠܐ ܢܣܒ ܡܢ ܕܥܒܕ ܗܠܝܢ ܟܐܝܢ ܗܘ ܘܠܐ ܡܬܬܙܝܥ ܠܥܠܡ

Chapter 16 ܡܙܡܘܪ̈ܐ

1ܢܛܪܝܢܝ ܐܠܗܐ ܡܛܠ ܕܥܠܝܟ ܐܬܬܟܠܬ

2ܘܐܡܪܬ ܠܡܪܝܐ ܕܡܪܝ ܐܢܬ ܘܛܒܬܝ ܡܢ ܠܘܬܟ ܗܝ

3ܐܦ ܠܩܕܝ̈ܫܐ ܕܒܐܪܥܐ ܘܡܫܒ̈ܚܐ ܕܟܠܗ ܨܒܝܢܝ ܒܗܘܢ

4ܢܣܓܘܢ ܟܐ̈ܒܝܗܘܢ ܐܚܪ̈ܝܐ ܒܥܓܠ ܕܠܐ ܐܢܩܐ ܢܘܩܝ̈ܗܘܢ ܡܢ ܕܡܐ ܘܠܐ ܐܬܕܟܪ ܫ̈ܡܗܝܗܘܢ ܒܣ̈ܦܘܬܝ

5ܡܪܝܐ ܡܢܬܐ ܕܝܪܬܘܬܝ ܘܕܟܣܝ ܐܢܬ ܡܦܢܐ ܠܝ ܝܪܬܘܬܝ

6ܚܒ̈ܠܐ ܢܦܠܘ ܠܝ ܒܛܪ̈ܩܐ. ܐܦ ܝܪܬܘܬܝ ܫܦܪܬ ܠܝ

7ܐܒܪܟ ܠܡܪܝܐ ܕܡܠܟܢܝ ܐܦ ܒ̈ܠܝܠܘܬܐ ܪ̈ܕܝܢܝ ܟܘ̈ܠܝܬܝ

8ܣܡܬ ܠܡܪܝܐ ܠܘܩܒܠܝ ܒܟܠ ܙܒܢ ܘܗܘܐ ܡܢ ܝܡܝܢܝ ܕܠܐ ܐܙܘܥ

9ܡܛܠ ܗܢܐ ܚܕܝ ܠܒܝ ܘܕܨ ܐܝܩܪܝ ܐܦ ܒܣܪܝ ܢܫܪܐ ܒܫܠܝܐ

10ܡܛܠ ܕܠܐ ܫܒܩܬ ܠܢܦܫܝ ܒܫܝܘܠ ܘܠܐ ܝܗܒܬ ܠܚܣܝܟ ܠܡܚܙܐ ܚܒܠܐ

11ܬܚܘܝܢܝ ܐܘܪܚܟ ܕܚ̈ܝܐ ܘܐܣܒܥ ܡܢ ܚܕܘܬܗ ܕܦܪܨܘܦܟ. ܘܡܢ ܒܣܝܡܘܬܐ ܕܙܟܘܬܐ ܕܝܡܝܢܟ

Chapter 17 ܡܙܡܘܪ̈ܐ

1ܫܡܥ ܡܪܝܐ ܩܕܝܫܐ ܘܚܘܪ ܒܒܥܘܬܝ ܘܨܘܬ ܨܠܘܬܝ ܕܠܐ ܡܢ ܣ̈ܦܘܬܐ ܢܟܘ̈ܠܬܢܝܬܐ

2ܡܢ ܩܕܡܝܟ ܕܝܢܝ ܢܦܘܩ ܘܥܝܢ̈ܝܟ ܢܚ̈ܙܝܢ ܬܪܝܨܘܬܐ

3ܒܚܪܬ ܠܒܝ ܘܣܥܪܬܢܝ ܒܠܠܝܐ ܘܒܩܝܬܢܝ ܘܠܐ ܐܫܟܚܬ ܒܝ ܥܘܠܐ ܘܠܐ ܥܒܪܘ ܥܠ ܦܘܡܝ

4ܥܒ̈ܕܐ ܕܒܢܝܢܫ̈ܐ ܒܡܡܠܠܐ ܕܣܦܘ̈ܬܐ ܐܠܐ ܢܛܪܬܢܝ ܡܢ ܐܘܪ̈ܚܬܐ ܒܝܫ̈ܬܐ

5ܣܡܟܬ ܗ̈ܠܟܬܝ ܒܫ̈ܒܝܠܝܟ ܕܠܐ ܢܙܘ̈ܥܢ ܦܣ̈ܥܬܝ

6ܐܢܐ ܩܪܝܬܟ ܡܛܠ ܕܥܢܝܬܢܝ ܐܠܗܐ ܨܠܝ ܐܕܢܟ ܠܘܬܝ ܘܫܡܥ ܡ̈ܠܝ

7ܘܥܒܕܝܗܝ ܬܕܡܘܪܬܐ ܠܚܣܝܟ ܘܦܪܘܩܐ ܕܐܝܠܝܢ ܕܡܣܒܪܝܢ ܡܢ ܐܝܠܝܢ ܕܩܝܡܝܢ ܠܘܩܒܠ ܝܡܝܢܟ

8ܢܛܪܝܢܝ ܐܝܟ ܒܒܬܐ ܕܥܝܢܐ ܘܒܛܠܠܐ ܕܟܢ̈ܦܝܟ ܣܬܪܝܢܝ

9ܡܢ ܩܕܡ ܚ̈ܛܝܐ ܗܠܝܢ ܕܒܙܘܢܝ ܘܒ̈ܥܠܕܒܒܝܗ̇ ܕܢܦܫܝ ܕܣܡܘ ܥܠܝ

10ܣܟܘܪ ܦܘܡܗܘܢ ܕܡܠܠܘ ܫܒܗܪܢܘܬܐ

11ܫܒܚܘܢܝ ܘܗܫܐ ܟܪܟܘܢܝ ܣܡܘ ܥܝܢ̈ܝܗܘܢ ܕܢܪܡܘܢܢܝ ܒܐܪܥܐ

12ܕܡܝܢ ܠܐܪܝܐ ܕܒܥܐ ܠܡܬܒܪ ܘܐܝܟ ܓܘܪܝܐ ܕܐܪܝܐ ܕܝܬܒ ܒܛܘܫܝܐ

13ܩܘܡ ܡܪܝܐ ܩܕܡ ܐ̈ܦܝܗܘܢ ܘܐܒܪܟ ܐܢܘܢ ܘܦܨܗ̇ ܠܢܦܫܝ ܡܢ ܪ̈ܫܝܥܐ ܘܡܢ ܚܪܒܐ

14ܘܡܢ ܡ̈ܝܬܐ ܕܡܝܬܝܢ ܡܢ ܐ̈ܝܕܝܟ ܡܪܝܐ ܘܡܢ ܡ̈ܝܬܐ ܕܚܦܪܐ ܬܦܠܓ ܐܢܘܢ ܒܚ̈ܝܐ ܘܣܝ̈ܡܬܟ ܡܠܝ ܟܪܣܗܘܢ ܢܣܒܥܘܢ ܒ̈ܢܝܐ ܘܢܫܒܩܘܢ ܫܪܟܐ ܠܒܢܝ̈ܗܘܢ

15ܐܢܐ ܕܝܢ ܒܙܕܝܩܘܬܐ ܐܚܙܐ ܐ̈ܦܝܟ ܘܐܣܒܥ ܡܐ ܕܐܬܬܥܝܪܬ ܗܝܡܢܘܬܟ

Chapter 18 ܡܙܡܘܪ̈ܐ

2ܐܪܚܡܟ ܡܪܝܐ ܚܝܠܝ

3ܘܬܘܟܠܢܝ ܘܒܝܬ ܓܘܣܝ ܡܦܨܝܢܝ ܐܠܗܐ ܬܩܝܦܐ ܕܬܟܝܠ ܐܢܐ ܥܠܘܗܝ ܡܣܝܥܢܝ ܘܩܪܢܐ ܕܦܘܪܩܢܝ ܘܒܝܬ ܓܘܣܝ

4ܡܫܒܚܐ ܐܩܪܐ ܠܡܪܝܐ ܘܡܢ ܒ̈ܥܠܕܒܒܝ ܐܬܦܪܩ

5ܡܛܠ ܕܚܕܪܘܢܝ ܚܒ̈ܠܐ ܕܡܘܬܐ ܘܕܓܠܘ̈ܬܐ ܕܥܘ̈ܠܐ ܕܠܚ̈ܢܝ

6ܘܚ̈ܒܠܐ ܕܫܝܘܠ ܟܪܟܘܢܝ ܘܩܕܡܘܢܝ ܦܚ̈ܘܗܝ ܕܡܘܬܐ

7ܒܐܘܠܨܢܝ ܩܪܝܬ ܠܡܪܝܐ ܘܠܐܠܗܝ ܩܪܝܬ ܘܫܡܥ ܡܢ ܗܝܟܠܗ ܒܩܠܝ ܘܓܥܬܝ ܩܕܡܘܗܝ ܘܥܠܬ ܒܐ̈ܕܢܘܗܝ

8ܐܬܕܠܚܬ ܘܙܥܬ ܐܪܥܐ ܘܫܬܐ̈ܣܐ ܕܛܘܪ̈ܐ ܙ̈ܥܝ ܘܐܬܬܠܚܝ ܡܛܠ ܕܐܬܚܡܬ ܥܠܝܗܘܢ

9ܣܠܩ ܬܢܢܐ ܒܪܘܓܙܗ ܘܢܘܪܐ ܡܢ ܦܪܨܘܦܗ ܐܬܓܘܙܠܬ ܘܓܘܡܪ̈ܐ ܚ̈ܒܢ ܡܢܗ

10ܐܪܟܢ ܫܡܝܐ ܘܢܚܬ ܘܥܪ̈ܦܠܐ ܬܚܝܬ ܪ̈ܓܠܘܗܝ

11ܪܟܒ ܥܠ ܟܪ̈ܘܒܐ ܘܦܪܚ ܘܛܣ ܥܠ ܟܢ̈ܦܝܗ̇ ܕܪܘܚܐ

12ܣܡ ܚܫܘܟܐ ܠܓܢܝܗ ܘܟܪܟܗ ܡܛܠܠܗ ܘܚܫܘܟܐ ܕܡ̈ܝܐ ܒܥܢ̈ܢܐ ܕܐܐܪ

13ܡܢ ܙܗܪܐ ܕܡܛܠܠܗ ܥܢ̈ܢܘܗܝ ܥܒܕ ܒܪܕܐ ܘܓܘܡܪ̈ܐ ܕܢܘܪܐ

14ܘܪܥܡ ܒܫܡܝܐ ܡܪܝܐ ܘܥܠܝܐ ܝܗܒ ܩܠܗ ܒܪܕܐ ܘܓܘܡܪ̈ܐ ܕܢܘܪܐ

15ܫܕܪ ܓܐܪ̈ܘܗܝ ܘܒܕܪ ܐܢܘܢ ܒܪ̈ܩܘܗܝ ܐܣܓܝ ܘܕܠܚ ܐܢܘܢ

16ܘܐܬܚܙܝܘ ܡܒ̈ܘܥܐ ܕܡ̈ܝܐ ܘܐܬܓܠܝ ܫܬܐ̈ܣܝܗ̇ ܕܬܒܝܠ ܡܢ ܟܐܬܟ ܡܪܝܐ ܘܡܢ ܢܫܡܬܐ ܕܪܘܚܐ ܕܪܘܓܙܟ

17ܫܕܪ ܡܢ ܡܪܘܡܐ ܘܫܠܢܝ ܘܩܒܠܢܝ ܡܢ ܡ̈ܝܐ ܣ̈ܓܝܐܐ

18ܘܦܨܝܢܝ ܡܢ ܒ̈ܥܠܕܒܒܝ ܥܫܝ̈ܢܐ. ܘܡܢ ܣ̈ܢܐܝ ܕܥܫܢܘ ܡܢܝ

19ܩܕܡܘܢܝ ܒܝܘܡܐ ܕܥܩܬܝ ܘܗܘܐ ܠܝ ܡܪܝܐ ܦܪܘܩܐ

20ܘܐܦܩܢܝ ܠܐܪܘܚܬܐ. ܘܦܨܝܢܝ ܡܛܠ ܕܨܒܐ ܒܝ

21ܘܦܪܥܢܝ ܡܪܝܐ ܐܝܟ ܙܕܝܩܘܬܝ ܘܐܝܟ ܕܟܝܘܬܐ ܕܐ̈ܝܕܝ ܫܠܡܢܝ

22ܡܛܠ ܕܢܛܪܬ ܐܘܪ̈ܚܬܗ ܕܡܪܝܐ ܘܠܐ ܐܬܡܪܕܬ ܡܢ ܐܠܗܝ

23ܡܛܠ ܕܟܠܗܘܢ ܕܝܢ̈ܘܗܝ ܠܘܩܒܠܝ ܘܢܡܘ̈ܣܘܗܝ ܠܐ ܐܥܒܪܬ ܡܢܝ

24ܘܗܘܝܬ ܕܠܐ ܡܘܡ ܥܡܗ ܘܐܙܕܗܪܬ ܡܢ ܚ̈ܛܗܝ

25ܘܦܪܥܢܝ ܡܪܝܐ ܐܝܟ ܙܕܝܩܘܬܝ ܘܐܝܟ ܕܟܝܘܬܐ ܕܐ̈ܝܕܝ ܩܕܡ ܥܝܢ̈ܘܗܝ

26ܥܡ ܚܣܝܐ ܚܣܝܐ ܬܗܘܐ. ܘܥܡ ܬܡܝܡܐ ܬܬܡܡ

27ܘܥܡ ܓܒܝܐ ܬܬܓܒܐ ܘܥܡ ܥܩܝܡܐ ܬܬܦܬܠ

28ܡܛܠ ܕܐܢܬ ܥܡܐ ܡܣܟܢܐ ܬܦܪܘܩ ܘܥܝ̈ܢܐ ܪ̈ܡܬܐ ܬܡܟܟ

29ܐܢܬ ܬܢܗܪ ܫܪܓܝ ܡܪܝܐ ܐܠܗܝ ܢܢܗܪ ܚܫܘܟܝ

30ܡܛܠ ܕܒܟ ܐܪܗܛ ܥܠ ܓܝܣܐ ܘܒܐܠܗܝ ܐܫܘܪ ܫܘܪܐ

31ܐܠܗܐ ܕܕܠܐ ܡܘܡ ܐܘܪܚܗ ܡܐܡܪܗ ܕܡܪܝܐ ܒܩܐ ܘܡܥܕܪ ܠܟܠ ܕܬܟܝܠܝܢ ܥܠܘܗܝ

32ܡܛܘܠ ܕܠܝܬ ܐܠܗܐ ܠܒܪ ܡܢ ܡܪܝܐ ܘܠܝܬ ܕܬܩܝܦ ܐܝܟ ܐܠܗܢ

33ܐܠܗܐ ܕܚܙܩܢܝ ܚܝܠܐ ܘܝܗܒ ܕܠܐ ܡܘܡ ܐܘܪܚܝ

34ܥܒܕ ܪ̈ܓܠܝ ܐܝܟ ܕܐܝܠܐ ܘܥܠ ܪܘܡܝ ܐܩܝܡܢܝ

35ܐܠܦ ܐ̈ܝܕܝ ܠܩܪܒܐ ܘܫܪܪ ܐܝܟ ܩܫܬܐ ܕܢܚܫܐ ܕܪ̈ܥܝ

36ܝܗܒܬ ܠܝ ܣܟܪܐ ܕܦܘܪܩܢܐ. ܝܡܝܢܟ ܬܣܝܥܢܝ ܘܡܪܕܘܬܟ ܬܪܒܝܢܝ

37ܐܪܘܚܬ ܦܣ̈ܥܬܝ ܬܚܘܬܝ ܕܠܐ ܢܙܘܥܘܢ ܩܘܪ̈ܨܠܝ

38ܐܪܕܘܦ ܒ̈ܥܠܕܒܒܝ ܘܐܕܪܟ ܐܢܘܢ ܘܠܐ ܐܗܦܘܟ ܥܕܡܐ ܕܐܓܡܪ ܐܢܘܢ

39ܐܡܚܐ ܐܢܘܢ ܘܠܐ ܢܫܟܚܘܢ ܠܡܩܡ ܘܢܦܠܘܢ ܬܚܝܬ ܪ̈ܓܠܝ

40ܬܚܙܩܢܝ ܚܝܠܐ ܒܩܪܒܐ ܘܬܒܪܟ ܠܕܩܝܡܝܢ ܥܠܝ ܬܚܘܬܝ

41ܘܠܒ̈ܥܠܕܒܒܝ ܬܬܒܪ ܩܕܡܝ ܘܠܣ̈ܢܐܝ ܐܫܬܩ ܐܢܘܢ

42ܢܓܥܘܢ ܘܠܐ ܢܗܘܐ ܠܗܘܢ ܦܪܘܩܐ ܢܒܥܘܢ ܡܢ ܡܪܝܐ ܘܠܐ ܢܥܢܐ ܐܢܘܢ

43ܐܫܚܘܩ ܐܢܘܢ ܐܝܟ ܥܦܪܐ ܥܠ ܐ̈ܦܝ ܪܘܚܐ ܘܐܝܟ ܣܝܢܐ ܕܫ̈ܘܩܐ ܐܕܘܫ ܐܢܘܢ

44ܬܦܨܝܢܝ ܡܢ ܕܝܢ̈ܘܗܝ ܕܥܡܐ ܘܬܥܒܕܢܝ ܪܝܫܐ ܠܥܡ̈ܡܐ ܥܡܐ ܕܠܐ ܝܕܥܬ ܢܦܠܚܘܢܢܝ

45ܘܡܫܡܥ ܐܕܢܐ ܢܫܡܥܘܢܢܝ ܒܢ̈ܝܐ ܢܘܟܪ̈ܝܐ ܢܫܬܥܒܕܘܢ ܠܝ

46ܒܢ̈ܝܐ ܢܘܟܪ̈ܝܐ ܢܬܟܠܘܢ ܘܢܬܚܓܪܘܢ ܡܢ ܫܒܝ̈ܠܝܗܘܢ

47ܚܝ ܗܘ ܡܪܝܐ ܘܒܪܝܟ ܗܘ ܡܚܝܠܢܝ ܐܬܬܪܝܡ ܐܠܗܝ ܘܦܪܘܩܝ

48ܐܠܗܐ ܕܝܗܒ ܠܝ ܬܒܥܬܐ ܘܫܥܒܕ ܠܥܡ̈ܡܐ ܬܚܘܬܝ

49ܘܦܨܝܢܝ ܡܢ ܒ̈ܥܠܕܒܒܝ ܘܡܢ ܐܝܠܝܢ ܕܩܝܡܝܢ ܥܠܝ ܐܪܝܡܝܢܝ ܘܡܢ ܓܒܪ̈ܐ ܥܘ̈ܠܐ ܬܦܨܝܢܝ

50ܡܛܠ ܗܢܐ ܐܘܕܐ ܠܟ ܒܝܬ ܥܡ̈ܡܐ ܡܪܝ ܘܠܫܡܟ ܐܙܡܪ

51ܡܘܪܒ ܦܘܪܩܢܐ ܕܡܠܟܗ ܘܥܒܕ ܛܝܒܘܬܐ ܠܡܫܝܚܗ ܠܕܘܝܕ ܘܠܙܪܥܗ ܥܕܡܐ ܠܥܠܡ

Chapter 19 ܡܙܡܘܪ̈ܐ

2ܫܡܝܐ ܡܫܬܥܝܢ ܫܘܒܚܗ ܕܐܠܗܐ ܘܥܒܕ ܐ̈ܝܕܘܗܝ ܡܚܘܐ ܐܪܩܝܥܐ

3ܝܘܡܐ ܠܝܘܡܐ ܡܒܥ ܡܐܡܪܐ ܠܠܝܐ ܠܠܠܝܐ ܡܚܘܐ ܡܕܥܐ

4ܠܝܬ ܡܐܡܪܐ ܐܦ ܠܐ ܡ̈ܠܐ ܕܠܐ ܢܫܬܡܥ ܒܩܠܗܘܢ

5ܒܟܠܗ̇ ܐܪܥܐ ܢܦܩܬ ܣܒܪܬܗܘܢ ܘܒܣܘ̈ܦܝܗ̇ ܕܬܒܝܠ ܡܠܝܗ̈ܘܢ ܘܥܠ ܫܡܫܐ ܢܩܫ ܡܫܟܢܗ ܒܗܘܢ

6ܘܗܘ ܐܝܟ ܚܬܢܐ ܕܢܦܩ ܡܢ ܒܝܬ ܓܢܘܢܐ ܢܕܘܨ ܐܝܟ ܓܢܒܪܐ ܠܡܪܗܛ ܐܘܪܚܗ

7ܘܡܢ ܣܘ̈ܦܝ ܫܡܝܐ ܡܦܩܗ ܘܡܣܡܟܗ ܥܠ ܣܘ̈ܦܝ ܫܡܝܐ ܘܠܝܬ ܕܛܫܐ ܡܢ ܠܗܓܗ

8ܢܡܘܣܗ ܕܡܪܝܐ ܕܠܐ ܡܘܡ ܘܡܦܢܐ ܢܦܫܐ ܣܗܕܘܬܗ ܕܡܪܝܐ ܡܗܝܡܢܐ ܘܡܚܟܡܐ ܝܠܘ̈ܕܐ

9ܦܘܩ̈ܕܢܘܗܝ ܕܡܪܝܐ ܬܪ̈ܝܨܝܢ ܘܡܚܕܝܢ ܠܒܐ ܦܘܩܕܢܗ ܕܡܪܝܐ ܓܒܐ ܘܡܢܗܪ ܥܝܢ̈ܐ

10ܕܚܠܬܗ ܕܡܪܝܐ ܕܟܝܐ ܘܩܝܡܐ ܠܥܠܡ ܕܝ̈ܢܘܗܝ ܕܡܪܝܐ ܒܩܘܫܬܐ ܘܟܐ̈ܢܝܢ ܒܟܠ ܡܕܡ

11ܘܪ̈ܓܝܓܝܢ ܡܢ ܕܗܒܐ ܘܡܢ ܟܐ̈ܦܐ ܛܒ̈ܬܐ ܘܚܠܝܢ ܡܢ ܕܒܫܐ ܘܡܢ ܟܟܪܝܬܐ

12ܘܐܦ ܥܒܕܟ ܢܙܕܗܪ ܒܗܘܢ ܐܢ ܢܛܪ ܐܢܘܢ ܢܬܦܪܥ ܣܓܝ

13ܫܪ̈ܥܬܐ ܡܢܘ ܡܣܬܟܠ ܘܡܢ ܛܫܝ̈ܬܐ ܙܟܢܝ

14ܐܦ ܡܢ ܥܘܠܐ ܚܣܘܟܝܗܝ ܠܥܒܕܟ ܕܠܐ ܢܫܬܠܛܘܢ ܒܝ ܒܝܫ̈ܐ ܘܐܬܕܟܐ ܡܢ ܚ̈ܛܗܝ

15ܢܗ̈ܘܝܢ ܠܨܒܝܢܟ ܡ̈ܠܘܗܝ ܕܦܘܡܝ ܘܪܢܝܗ ܕܠܒܝ ܩܕܡܝܟ ܡܪܝܐ ܥܕܘܪܝ ܘܦܪܘܩܝ

Chapter 20 ܡܙܡܘܪ̈ܐ

2ܢܥܢܝܟ ܡܪܝܐ ܒܝܘܡܐ ܕܐܘܠܨܢܐ ܘܢܥܕܪܟ ܫܡܐ ܕܐܠܗܗ ܕܝܥܩܘܒ

3ܢܫܕܪ ܠܟ ܥܘܕܪܢܐ ܡܢ ܡܩܕܫܗ ܘܡܢ ܨܗܝܘܢ ܢܣܝܥܟ

4ܢܬܕܟܪ ܠܟ ܡܪܝܐ ܟܠܗܘܢ ܩܘܪ̈ܒܢܝܟ. ܘܝܩ̈ܕܝܟ ܗܘ ܢܕܗܢ

5ܢܬܠ ܠܟ ܡܪܝܐ ܐܝܟ ܠܒܟ ܘܐܝܟ ܟܠܗ̇ ܬܪܥܝܬܟ ܢܫܡܠܐ

6ܘܢܫܒܚ ܒܦܘܪܩܢܟ ܘܒܫܡܗ ܕܐܠܗܢ ܢܬܬܪܝܡ ܢܥܒܕ ܡܪܝܐ ܟܠܗ ܨܒܝܢܟ

7ܡܟܝܠ ܝܕܝܥܐ ܗܝ ܕܦܪܩ ܐܠܗܐ ܠܡܫܝܚܗ ܘܥܢܝܗܝ ܡܢ ܫܡܝܐ ܕܩܘܕܫܗ ܒܚܝܠܐ ܕܦܘܪܩܢܐ ܕܝܡܝܢܗ

8ܗܠܝܢ ܒܡܪ̈ܟܒܬܐ ܘܗܠܝܢ ܒܪ̈ܟܫܐ ܘܚܢܢ ܒܫܡܗ ܕܡܪܝܐ ܐܠܗܢ ܢܥܫܢ

9ܗܢܘܢ ܒܪܟܘ ܘܢܦܠܘ ܘܚܢܢ ܩܡܢ ܘܐܬܛܝܒܢ

10ܡܪܝܐ ܢܦܪܩܢ ܘܡܠܟܢ ܢܥܢܝܢ ܒܝܘܡܐ ܕܢܩܪܝܘܗܝ

Chapter 21 ܡܙܡܘܪ̈ܐ

2ܡܪܝܐ ܒܚܝܠܟ ܢܚܕܐ ܡܠܟܐ ܘܒܦܘܪܩܢܟ ܢܕܘܨ ܪܘܪܒܐܝܬ

3ܪܓܬܐ ܕܠܒܗ ܝܗܒܬ ܠܗ ܘܛܘܝܒܐ ܕܣܦܘ̈ܬܗ ܠܐ ܟܠܝܬܝܗܝ

4ܡܛܠ ܕܩܪܡܬܝܗܝ ܒܘܪܟܬܐ ܛܒܬܐ ܘܣܡܬ ܒܪܝܫܗ ܟܠܝܠܐ ܡܫܒܚܐ

5ܚ̈ܝܐ ܫܐܠܟ ܘܝܗܒܬ ܠܗ ܢܘܓܪܐ ܕܝܘܡ̈ܬܐ ܠܥܠܡ ܥܠܡܝܢ

6ܝܪܒ ܫܘܒܚܗ ܒܦܘܪܩܢܟ ܫܘܒܚܐ ܘܙܝܘܐ ܣܡܬ ܥܠܘܗܝ

7ܡܛܠ ܕܥܒܕܬܝܗܝ ܒܘܪܟܬܐ ܠܥܠܡ ܥܠܡܝܢ ܘܚܕܝܬܝܗܝ ܒܚܕܘܬܗ ܕܦܪܨܘܦܟ

8ܡܛܠ ܕܡܠܟܐ ܡܣܒܪ ܒܡܪܝܐ ܒܛܝܒܘܬܗ ܕܡܪܝܡܐ ܠܐ ܢܬܬܙܝܥ

9ܬܫܟܚ ܐܝܕܟ ܠܟܠܗܘܢ ܒ̈ܥܠܕܒܒܝܟ ܘܝܡܝܢܟ ܬܫܟܚ ܠܣܢܐܝ̈ܟ

10ܬܥܒܕ ܐܢܘܢ ܐܝܟ ܬܢܘܪܐ ܕܢܘܪܐ ܠܙܒܢܐ ܕܪܘܓܙܐ ܡܪܝܐ ܒܪܘܓܙܗ ܢܘܩܕ ܐܢܘܢ ܘܬܐܟܘܠ ܐܢܘܢ ܢܘܪܐ

11ܘܦܐܪ̈ܝܗܘܢ ܡܢ ܐܪܥܐ ܬܘܒܕ ܘܙܪܥܗܘܢ ܡܢ ܒܢ̈ܝ ܐܢܫܐ

12ܡܛܠ ܕܨܠܘ ܥܠܝܟ ܒܝܫܬܐ ܘܐܬܚܫܒܘ ܬܪܥܝܬܐ ܘܠܐ ܐܬܡܨܝܘ ܚܝܠܐ

13ܬܣܝܡ ܒܗܘܢ ܟܘܬܡܐ ܘܛܘܝܒܟ ܬܬܩܢ ܥܠ ܦܪ̈ܨܘܦܝܗܘܢ

14ܐܬܬܪܝܡ ܡܪܝܐ ܒܥܘܫܢܟ ܢܙܡܪ ܘܢܫܒܚ ܓܢܒܪܘܬܟ

Chapter 22 ܡܙܡܘܪ̈ܐ

2ܐܠܗܝ ܐܠܗܝ ܠܡܢܐ ܫܒܩܬܢܝ ܘܐܪܚܩܬ ܡܢ ܦܘܪܩܢܝ ܒܡ̈ܠܐ ܕܣ̈ܟܠܘܬܝ

3ܐܠܗܝ ܐܩܪܝܟ ܒܐܝܡܡܐ ܘܠܐ ܬܥܢܝܢܝ ܘܒܠܠܝܐ ܘܠܐ ܬܟܬܪ ܠܝ

4ܐܢܬ ܩܕܝܫ ܘܝܬܒ ܒܫܘܒܚܟ ܐܝܣܪܝܠ

5ܒܟ ܣܒܪܘ ܐ̈ܒܗܝ ܣܒܪܘ ܒܟ ܘܦܨܝܬ ܐܢܘܢ

6ܠܘܬܟ ܓܥܘ ܘܐܬܦܨܝܘ ܒܟ ܣܒܪܘ ܘܠܐ ܒܗܬܘ

7ܐܢܐ ܬܘܠܥܐ ܐܢܐ ܘܠܐ ܒܪܢܫܐ ܚܣܕܐ ܕܒܢ̈ܝ ܐܢܫܐ ܘܣܘܠܢܗ ܕܥܡܐ

8ܟܠ ܕܚܙܐܘܢܝ ܡܝܩܘ ܒܝ ܐܦܛܪܘ ܒܣ̈ܦܘܬܗܘܢ ܘܐܢܝܕܘ ܒܪ̈ܝܫܝܗܘܢ

9ܐܬܬܟܠ ܥܠ ܡܪܝܐ ܕܢܦܨܝܘܗܝ ܘܢܦܠܛܝܘܗܝ ܐܢ ܨܒܐ ܒܗ

10ܡܛܠ ܕܐܢܬ ܗܘ ܬܘܟܠܢܝ ܡܢ ܡܪܒܥܐ ܘܣܒܪܝ ܥܠ ܬܕܝ̈ܗ̇ ܕܐܡܝ

11ܥܠܝܟ ܐܫܬܕܝܬ ܡܢ ܡܪܒܥܐ ܘܡܢ ܟܪܣܗ̇ ܕܐܡܝ ܐܠܗܝ ܐܢܬ

12ܠܐ ܬܪܚܩ ܡܢܝ ܡܛܠ ܕܐܘܠܨܢܐ ܩܪܒ ܘܠܝܬ ܕܡܥܕܪ

13ܐܬܟܪܟܘܢܝ ܬܘܪ̈ܐ ܣ̈ܓܝܐܐ ܘܐܪ̈ܘܢܐ ܕܒܝܫܢ ܚܕܪܘܢܝ

14ܦܬܚܘ ܥܠܝ ܦܘܡܗܘܢ ܐܝܟ ܐܪܝܐ ܕܢܗܡ ܘܚܛܦ

15ܘܐܝܟ ܡ̈ܝܐ ܐܬܐܫܕܬ ܘܐܬܒܕܪܘ ܟܠܗܘܢ ܓܪ̈ܡܝ ܘܗܘܐ ܠܒܝ ܐܝܟ ܫܥܘܬܐ ܘܐܬܡܣܝܘ ܒܓܘ ܡ̈ܥܝ

16ܘܝܒܫ ܐܝܟ ܚܨܦܐ ܕܦܚܪܐ ܚܝܠܝ ܘܠܫܢܝ ܕܒܩ ܠܫܡ̈ܝ ܚܟܝ ܘܥܠ ܥܦܪܐ ܕܡܘܬܐ ܫܕܝܬܢܝ

17ܡܛܠ ܕܚܕܪܘܢܝ ܟܠܒ̈ܐ ܘܟܢܘܫܬܐ ܕܒܝܫ̈ܐ ܟܪܟܘܢܝ ܒܙܥܘ ܐ̈ܝܕܝ ܘܪ̈ܓܠܝ

18ܘܐܝܠܠܘ ܟܘܠܗܘܢ ܓܪ̈ܡܝ ܗܢܘܢ ܚܪܘ ܘܚܙܘ ܒܝ

19ܘܦܠܓܘ ܢܚ̈ܬܝ ܒܝܢܬܗܘܢ ܘܥܠ ܠܒܘܫܝ ܐܪܡܝܘ ܦܣܐ

20ܘܐܢܬ ܡܪܝܐ ܠܐ ܬܪܚܩ ܡܢܝ ܐܝܠ ܐܝܠ ܠܥܘܕܪܢܝ ܟܬܪ

21ܘܦܨܗ̇ ܡܢ ܚܪܒܐ ܠܢܦܫܝ ܘܡܢ ܐܝܕܐ ܕܟܠܒ̈ܐ ܝܚܝܕܘܬܝ

22ܦܪܘܩܝܢܝ ܡܢ ܦܘܡܗ ܕܐܪܝܐ. ܘܡܢ ܩܪܢܐ ܪܡܬܐ ܡܘܟܟܝ

23ܕܐܣܒܪ ܫܡܟ ܠܐ̈ܚܝ ܘܒܓܘ ܟܢܘܫܬܐ ܐܫܒܚܟ

24ܕܚ̈ܠܘܗܝ ܕܡܪܝܐ ܫܒܚܘܗܝ ܘܟܠܗ ܙܪܥܗ ܕܝܥܩܘܒ ܐܘܩܪܘܗܝ ܘܕܚܠܘ ܡܢܗ ܟܠܗ ܙܪܥܗ ܕܐܝܣܪܝܠ

25ܡܛܠ ܕܠܐ ܫܛ ܘܠܐ ܐܣܠܝ ܓܥܬܗ ܕܡܣܟܢܐ ܘܠܐ ܐܗܦܟ ܐ̈ܦܘܗܝ ܡܢܗ ܟܕ ܓܥܐ ܠܘܬܗ ܫܡܥܗ

26ܡܢ ܩܕܡܝܟ ܗܝ ܬܫܒܘܚܬܝ ܒܥܕܬܐ ܪܒܬܐ ܢܕܪ̈ܝ ܐܫܠܡ ܩܕܡ ܕܚ̈ܠܘܗܝ

27ܢܐܟܠܘܢ ܡܣ̈ܟܢܐ ܘܢܣܒܥܘܢ ܘܢܫܒܚܘܢ ܠܡܪܝܐ ܐܝܠܝܢ ܕܒܥܝܢ ܠܗ ܘܢܚܐ ܠܒܗܘܢ ܠܥܠܡܝܢ

28ܢܬܕܟܪܘܢ ܘܢܬܦܢܘܢ ܠܘܬ ܡܪܝܐ ܟܠܗܘܢ ܥܒܪ̈ܝܗ̇ ܕܐܪܥܐ ܘܩܕܡܘܗܝ ܢܣ̈ܓܕܢ ܟܠܗܝܢ ܫܪ̈ܒܬܐ ܕܥܡ̈ܡܐ

29ܡܛܠ ܕܕܡܪܝܐ ܗܝ ܡܠܟܘܬܐ ܘܗܘܝܘ ܫܠܝܛ ܥܠ ܥܡ̈ܡܐ

30ܢܐܟܠܘܢ ܘܢܣܓܕܘܢ ܩܕܡ ܡܪܝܐ ܟܠܗܘܢ ܟܦܢ̈ܝܗ̇ ܕܐܪܥܐ ܘܩܕܡܘܗܝ ܢܒܪܟܘܢ ܟܠ ܢܚ̈ܬܝ ܥܦܪܐ. ܢܦܫܝ ܠܗ ܗܘ ܚܝܐ

31ܙܪܥܐ ܕܢܦܠܚܝܘܗܝ ܢܣܒܪ ܕܪܗ ܠܡܪܝܐ

32ܢܐܬܘܢ ܘܢܚܘܘܢ ܙܕܝܩܘܬܗ ܠܥܡܐ ܕܡܬܝܠܕ ܕܥܒܕ ܡܪܝܐ

Chapter 23 ܡܙܡܘܪ̈ܐ

1ܡܪܝܐ ܢܪܥܝܢܝ ܘܡܕܡ ܠܐ ܢܚܣܪ ܠܝ

2ܘܥܠ ܡܪ̈ܓܐ ܕܥܘܫܢܐ ܢܫܪܝܢܝ ܘܥܠ ܡ̈ܝܐ ܢܝܚ̈ܐ ܢܕܒܪܢܝ

3ܢܦܫܝ ܐܦܢܝ ܘܕܒܪܢܝ ܒܫܒ̈ܝܠܝ ܩܘܫܬܐ ܡܛܠ ܫܡܟ

4ܐܦܢ ܐܗܠܟ ܒܢܚ̈ܠܝ ܛ̈ܠܠܝ ܡܘܬܐ ܠܐ ܐܕܚܠ ܡܢ ܒܝܫܬܐ ܡܛܠ ܕܐܢܬ ܥܡܝ ܫܒܛܟ ܘܚܘܛܪܟ ܗܢܘܢ ܒܝܐܘܢܝ

5ܣܕܪܬ ܩܕܡܝ ܦܬܘܪ̈ܐ ܠܘܩܒܠ ܒ̈ܥܠܕܒܒܝ ܐܕܗܢܬ ܪܝܫܝ ܒܡܫܚܐ ܘܟܣܝ ܡܪܘܐ ܐܝܟ ܚܝܐ

6ܛܝܒܘܬܟ ܘܪ̈ܚܡܝܟ ܪܕܦܘܢܝ ܟܠܗܘܢ ܝܘܡ̈ܬܐ ܕܚ̈ܝܝ. ܕܐܥܡܪ ܒܒܝܬܗ ܕܡܪܝܐ ܢܘܓܪܐ ܕܝܘܡ̈ܬܐ

Chapter 24 ܡܙܡܘܪ̈ܐ

1ܕܡܪܝܐ ܗܝ ܐܪܥܐ ܒܡܠܐܗ̇ ܬܒܝܠ ܘܟܠܗܘܢ ܥܡܘܪ̈ܝܗ̇

2ܡܛܠ ܕܗܘ ܒܝܡܐ ܣܡ ܫܬܐ̈ܣܝܗ̇ ܘܒܢܗܪ̈ܘܬܐ ܐܬܩܢܗ̇

3ܡܢܘ ܢܣܩ ܠܛܘܪܗ ܕܡܪܝܐ ܘܡܢܘ ܢܩܘܡ ܒܛܘܪܗ ܩܕܝܫܐ

4ܐܝܢܐ ܕܕܟܝ̈ܢ ܐ̈ܝܕܘܗܝ ܘܓܒܐ ܒܠܒܗ ܘܠܐ ܝܡܐ ܒܢܦܫܗ ܒܕܓܠܘܬܐ ܘܠܐ ܝܡܐ ܒܢܟܠܐ

5ܗܢܐ ܢܩܒܠ ܒܘܪܟܬܐ ܡܢ ܡܪܝܐ ܘܙܕܝܩܘܬܐ ܡܢ ܐܠܗܐ ܦܪܘܩܢ

6ܗܢܘ ܕܪܐ ܕܒܥܐ ܘܡܣܒܪ ܠܦܪܨܘܦܐ ܕܐ̈ܦܝܟ ܐܠܗܗ ܕܝܥܩܘܒ

7ܐܪܝܡܘ ܬܪ̈ܥܐ ܪ̈ܝܫܝܟܘܢ ܐܬܬܪܝܡܘ ܬܪ̈ܥܐ ܕܡܢ ܥܠܡ ܢܥܘܠ ܡܠܟܐ ܕܐܝܩܪ̈ܐ

8ܡܢܘ ܗܢܐ ܡܠܟܐ ܕܐܝܩܪ̈ܐ ܡܪܝܐ ܥܫܝܢܐ ܘܓܢܒܪܐ ܡܪܝܐ ܓܢܒܪܐ ܘܩܪܒܬܢܐ

9ܐܪܝܡܘ ܬܪ̈ܥܐ ܪ̈ܝܫܝܟܘܢ ܐܬܬܪܝܡܘ ܬܪ̈ܥܐ ܕܡܢ ܥܠܡ ܕܢܥܘܠ ܡܠܟܐ ܕܐܝܩܪ̈ܐ

10ܡܢܘ ܗܢܐ ܡܠܟܐ ܕܐܝܩܪ̈ܐ ܡܪܝܐ ܚܝܠܬܢܐ ܗܘܝܘ ܡܠܟܐ ܡܝܩܪܐ ܠܥܠܡ

Chapter 25 ܡܙܡܘܪ̈ܐ

1ܠܘܬܟ ܡܪܝܐ ܢܦܫܝ ܐܪܝܡܬ

2ܐܠܗܝ ܒܟ ܣܒܪܬ ܠܐ ܐܒܗܬ ܕܠܐ ܢܫܬܒܗܪܘܢ ܥܠܝ ܒ̈ܥܠܕܒܒܝ

3ܐܦ ܟܠ ܕܡܣܒܪܝܢ ܒܟ ܠܐ ܢܒܗܬܘܢ ܢܒܗܬܘܢ ܥܘ̈ܠܐ ܒܣܪ̈ܝܩܘܬܗܘܢ

4ܐܘܪ̈ܚܬܟ ܡܪܝܐ ܚܘܢܝ ܘܫܒܝ̈ܠܝܟ ܐܘܕܥܝܢܝ

5ܕܒܪܝܢܝ ܒܩܘܫܬܟ ܘܐܠܦܝܢܝ ܡܛܠ ܕܐܢܬ ܗܘ ܐܠܗܝ ܘܦܪܘܩܝ ܘܠܟ ܣܟܝܬ ܒܟܠܝܘܡ

6ܐܬܕܟܪ ܡܪܝܐ ܪ̈ܚܡܝܟ ܕܡܢ ܥܠܡ ܘܛܝܒ̈ܘܬܟ

7ܘܣ̈ܟܠܘܬܐ ܕܛܠܝܘܬܝ ܠܐ ܬܕܟܪ ܠܝ ܐܠܐ ܐܝܟ ܣܘܓܐܐ ܕܪ̈ܚܡܝܟ ܐܬܕܟܪܝܢܝ ܡܛܠ ܛܝܒܘܬܟ ܐܠܗܐ

8ܛܒ ܗܘ ܘܬܪܝܨ ܡܪܝܐ. ܡܛܠ ܗܢܐ ܬܪܨ ܠܚ̈ܛܝܐ ܒܐܘܪܚܐ

9ܘܡܕܒܪ ܠܡ̈ܟܝܟܐ ܒܕܝܢܐ. ܘܡܠܦ ܠܡܣܟ̈ܢܐ ܐܘܪܚܗ

10ܟܠܗܝܢ ܐܘܪ̈ܚܬܗ ܕܡܪܝܐ ܛܝܒܘܬܐ ܘܩܘܫܬܐ ܠܐܝܠܝܢ ܕܢܛܪܝܢ ܩܝܡܗ ܘܣܗ̈ܕܘܬܗ

11ܡܛܠ ܫܡܟ ܡܪܝܐ ܚܣܢܝ ܡܢ ܥܘܠܝ ܕܪܒ ܗܘ

12ܡܢܘ ܓܒܪܐ ܕܕܚܠ ܡܢ ܡܪܝܐ ܢܠܦܝܘܗܝ ܐܘܪܚܐ ܕܓܒܐ

13ܢܦܫܗ ܬܒܘܬ ܒܛܝܒܘܬܐ ܘܙܪܥܗ ܢܐܪܬ ܐܪܥܐ

14ܬܪܥܝܬܗ ܕܡܪܝܐ ܥܠ ܕܚ̈ܠܘܗܝ ܘܩܝܡܗ ܐܘܕܥ ܐܢܘܢ

15ܥܝܢ̈ܝ ܒܟܠܙܒܢ ܠܘܬ ܡܪܝܐ ܡܛܠ ܕܗܘ ܡܦܩ ܡܢ ܡܨܝܕܬܐ ܪ̈ܓܠܝ

16ܐܬܦܢ ܥܠܝ ܘܪܚܡ ܥܠܝ ܡܛܠ ܕܝܚܝܕܝܐ ܐܢܐ ܘܒܝܫܐ

17ܥܩܬ̈ܗ ܕܠܒܝ ܣܓܝ ܘܡܢ ܥܩ̈ܬܝ ܐܦܩܝܢܝ

18ܘܚܙܝ ܫܘܥܒܕܝ ܘܥܡܠܝ ܘܫܒܘܩ ܠܝ ܟܠܗ̇ ܚܛܝܬܝ

19ܘܚܙܝ ܕܣܓܝܘ ܒ̈ܥܠܕܒܒܝ ܘܣܢܐܬܐ ܕܥܘܠܐ ܣܢܐܘܢܝ

20ܛܪ ܢܦܫܝ ܘܦܨܢܝ ܡܛܠ ܕܒܟ ܣܒܪܬ

21ܬܡ̈ܝܡܐ ܘܬܪ̈ܨܐ ܢܩܦܘ ܠܝ ܡܛܠ ܕܠܟ ܣܟܝܬ

22ܦܪܩ ܐܠܗܐ ܠܐܝܣܪܝܠ ܡܢ ܟܘܠܗܘܢ ܐ̈ܠܘܨܘܗܝ

Chapter 26 ܡܙܡܘܪ̈ܐ

1ܕܘܢ ܠܝ ܡܪܝܐ ܡܛܠ ܕܐܢܐ ܒܬܡܝܡܘܬܝ ܗܠܟܬ ܒܡܪܝܐ ܣܒܪܬ ܠܐ ܐܙܘܥ

2ܒܚܘܪܝܢܝ ܡܪܝܐ ܘܢܣܢܝ ܘܒܩܝ ܟܘ̈ܠܝܬܝ ܘܠܒܝ

3ܡܛܠ ܕܪ̈ܚܡܝܟ ܠܘܩܒܠ ܥܝܢ̈ܝ ܗܠܟܬ ܒܗܝܡܢܘܬܐ

4ܘܠܐ ܝܬܒܬ ܥܡ ܒܝܫ̈ܐ ܘܥܡ ܫ̈ܛܝܐ ܠܐ ܥܠܬ

5ܣܢܝܬ ܟܢܘܫܬܐ ܕܒܝܫ̈ܐ ܘܥܡ ܪ̈ܫܝܥܐ ܠܐ ܝܬܒܬ

6ܘܐܫܝܓܬ ܕܟܝܐܝܬ ܐܝ̈ܕܝ ܘܐܬܟܪܟܬ ܠܡܕܒܚܟ ܡܪܝܐ

7ܕܐܫܡܥ ܩܠܗ ܕܫܘܒܚܟ ܘܐܫܬܥܐ ܟܠܗܝܢ ܬܕܡܪ̈ܬܟ

8ܡܪܝܐ ܪܚܡܬ ܬܫܡܫܬܗ ܕܒܝܬܟ ܘܐܬܪܐ ܕܡܫܪܝܗ ܕܫܘܒܚܟ

9ܠܐ ܬܘܒܕܝܢܝ ܥܡ ܚ̈ܛܝܐ ܘܥܡ ܓܒܪ̈ܐ ܕܕܡܐ ܚܝ̈ܝ

10ܕܒܐ̈ܝܕܝܗܘܢ ܢܟܠܐ ܘܝܡܝܢܗܘܢ ܡܠܝܐ ܫܘܚܕܐ

11ܐܢܐ ܕܝܢ ܒܬܡܝܡܘܬܝ ܗܠܟܬ ܦܪܘܩܝܢܝ ܘܪܚܡ ܥܠܝ

12ܘܪܓܠܝ ܩܡܬ ܒܬܪܝܨܘܬܐ ܘܒܥܕܬܐ ܐܒܪܟ ܠܡܪܝܐ

Chapter 27 ܡܙܡܘܪ̈ܐ

1ܡܪܝܐ ܢܘܗܪܝ ܘܦܘܪܩܢܝ ܡܢ ܡܢ ܐܕܚܠ. ܡܪܝܐ ܥܘܫܢܐ ܕܚܝ̈ܝ ܡܢ ܡܢ ܗܘ ܙܐܥ ܐܢܐ

2ܟܕ ܩܪܒܘ ܠܝ ܒܝܫ̈ܐ ܠܡܐܟܠ ܒܣܪܝ ܒ̈ܥܠܕܒܒܝ ܘܣܢܐ̈ܝ ܐܝܟ ܚܕܐ ܐܣܬܚܦܘ ܘܢܦܠܘ

3ܐܢ ܬܫܪܐ ܥܠܝ ܡܫܪܝܬܐ ܠܐ ܕܚܠ ܠܒܝ ܘܐܢ ܢܩܘܡ ܥܠܝ ܩܪܒܐ ܒܗܕܐ ܬܟܝܠ ܐܢܐ

4ܕܚܕܐ ܫܐܠܬ ܡܢ ܡܪܝܐ ܘܠܗ̇ ܗܘ ܒܥܐ ܐܢܐ ܕܐܥܡܪ ܒܒܝܬܗ ܕܡܪܝܐ ܟܠܗܘܢ ܝܘܡ̈ܬܐ ܕܚ̈ܝܝ ܘܐܚܙܐ ܒܒܣܝܡܘܬܗ ܕܡܪܝܐ ܘܐܦܩܘܕ ܗܝܟܠܗ

5ܡܛܠ ܕܢܛܫܝܢܝ ܒܣܬܪܗ ܒܝܘܡܐ ܒܝܫܐ ܘܢܛܫܝܢܝ ܒܛܠܠܐ ܕܡܫܟܢܗ ܘܥܠ ܫܘܥܐ ܢܪܝܡܢܝ

6ܡܢ ܗܫܐ ܢܬܬܪܝܡ ܪܝܫܝ ܥܠ ܒ̈ܥܠܕܒܒܝ ܕܚܕܪܘܢܝ ܘܐܕܒܚ ܒܡܫܟܢܗ ܕܒܚ̈ܐ ܕܫܘܒܚܐ ܐܫܒܚ ܘܐܙܡܪ ܠܡܪܝܐ

7ܫܡܥ ܡܪܝܐ ܩܠܝ ܡܐ ܕܩܪܝܬܟ ܪܚܡ ܥܠܝ ܘܥܢܝܢܝ

8ܠܟ ܐܡܪ ܠܒܝ ܘܒ̈ܥܝܢ ܐ̈ܦܝ ܠܐ̈ܦܝܟ

9ܡܪܝܐ ܠܐ ܬܗܦܟ ܐ̈ܦܝܟ ܡܢܝ ܘܠܐ ܬܐܠܨܝܘܗܝ ܒܪܘܓܙܐ ܠܥܒܕܟ ܥܕܘܪܝ ܗܘܝܬ ܡܪܝܐ ܠܐ ܬܫܕܝܢܝ ܘܠܐ ܬܫܒܩܢܝ ܐܠܗܝ ܘܦܪܘܩܝ

10ܡܛܠ ܕܐܒܝ ܘܐܡܝ ܫܒܩܘܢܝ ܘܡܪܝܐ ܚܡܠܢܝ

11ܐܠܦܝܢܝ ܡܪܝܐ ܐܘܪܚܟ ܘܕܒܪܝܢܝ ܒܫ̈ܒܝܠܝܟ ܬܪ̈ܝܨܐ

12ܘܠܐ ܬܫܠܡܢܝ ܠܒ̈ܥܠܕܒܒܝ ܡܛܠ ܕܩܡܘ ܥܠܝ ܣܗ̈ܕܐ ܕܫܘܩܪܐ ܘܡܠܠܘ ܥܘܠܐ

13ܐܢܐ ܕܝܢ ܗܝܡܢܬ ܕܐܚܙܐ ܒܛܒܬ̈ܗ ܕܡܪܝܐ ܒܐܪܥܐ ܕܚ̈ܝܐ

14ܣܒܪܘ ܒܡܪܝܐ ܘܢܬܚܝܠ ܠܒܟܘܢ ܣܒܪܘ ܒܡܪܝܐ

Chapter 28 ܡܙܡܘܪ̈ܐ

1ܠܟ ܡܪܝܐ ܩܪܝܬ ܐܠܗܝ ܠܐ ܬܫܬܘܩ ܡܢܝ ܕܠܡܐ ܬܫܬܘܩ ܡܢܝ ܘܐܫܬܠܡ ܥܡ ܢܚ̈ܬܝ ܓܘܒܐ

2ܫܡܥ ܩܠܐ ܕܒܥܘܬܝ ܟܕ ܐܓܥܐ ܠܘܬܟ ܘܟܕ ܐܪܝܡ ܐ̈ܝܕܝ ܠܗܝܟܠܟ ܩܕܝܫܐ

3ܠܐ ܬܡܢܝܢܝ ܥܡ ܪ̈ܫܝܥܐ ܘܥܡ ܥܒ̈ܕܝ ܥܘܠܐ ܕܡܡܠܠܝܢ ܫܠܡܐ ܥܡ ܚܒܪ̈ܝܗܘܢ ܘܒܝܫܬܐ ܒܠܒܗܘܢ

4ܦܪܘܥ ܐܢܘܢ ܐܝܟ ܥܒ̈ܕܝܗܘܢ ܘܐܝܟ ܒܝܫܘܬܗܘܢ

5ܡܛܠ ܕܠܐ ܐܣܬܟܠܘ ܒܥܒ̈ܕܘܗܝ ܕܡܪܝܐ ܘܒܥܒܕ ܐ̈ܝܕܘܗܝ ܢܣܚܘܦ ܐܢܘܢ ܘܠܐ ܢܒܢܐ ܐܢܘܢ

6ܒܪܝܟ ܗܘ ܡܪܝܐ ܕܫܡܥ ܩܠܐ ܕܒܥܘܬܝ

7ܡܪܝܐ ܥܕܘܪܝ ܘܡܣܝܥܢܝ ܕܥܠܘܗܝ ܐܬܬܟܠ ܠܒܝ ܘܫܘܚ ܒܣܪܝ ܘܒܬܫܒܘܚܬܐ ܐܘܕܐ ܠܗ

8ܡܪܝܐ ܚܝܠܐ ܗܘ ܕܥܡܗ ܡܣܝܥܢܐ ܘܦܪܘܩܐ ܕܡܫܝܚܗ

9ܦܪܘܩ ܠܥܡܟ ܘܒܪܟ ܠܝܪܬܘܬܟ ܘܪܥܝ ܐܢܘܢ ܘܕܒܪ ܐܢܘܢ ܥܕܡܐ ܠܥܠܡ

Chapter 29 ܡܙܡܘܪ̈ܐ

1ܐܝܬܘ ܠܡܪܝܐ ܒ̈ܢܝ ܕܟܪ̈ܐ ܐܝܬܘ ܠܡܪܝܐ ܫܘܒܚܐ ܘܐܝܩܪܐ

2ܐܝܬܘ ܠܡܪܝܐ ܐܝܩܪܐ ܠܫܡܗ ܣܓܘܕܘ ܠܡܪܝܐ ܒܕܪܬܐ ܕܩܘܕܫܗ

3ܩܠܗ ܕܡܪܝܐ ܥܠ ܡ̈ܝܐ ܐܠܗܐ ܡܫܒܚܐ ܪܥܡ ܡܪܝܐ ܥܠ ܡ̈ܝܐ ܣܓܝܐܐ

4ܩܠܗ ܕܡܪܝܐ ܒܚܝܠܐ ܘܩܠܗ ܕܡܪܝܐ ܒܫܘܒܚܐ

5ܩܠܗ ܕܡܪܝܐ ܕܡܚܛܦ ܐܪ̈ܙܐ ܘܬܒܪ ܡܪܝܐ ܐܪ̈ܙܐ ܕܠܒܢܢ

6ܪܩܕ ܐܢܘܢ ܐܝܟ ܥ̈ܓܠܐ ܠܠܒܢܢ ܘܠܣܢܝܪ ܐܝܟ ܒܢ̈ܝ ܪܝܡܐ

7ܩܠܗ ܕܡܪܝܐ ܕܦܣܩ ܫܠܗܒܝܬܐ ܕܢܘܪܐ

8ܩܠܗ ܕܡܪܝܐ ܕܡܙܝܥ ܡܕܒܪܐ ܘܡܙܝܥ ܡܪܝܐ ܡܕܒܪܐ ܕܩܕܫ

9ܩܠܗ ܕܡܪܝܐ ܕܡܙܝܥ ܐ̈ܝܠܬܐ ܘܡܥܩܪ ܥܒ̈ܐ ܘܒܗܝܟܠܗ ܟܠܢܫ ܐܡܪ ܫܘܒܚܐ

10ܡܪܝܐ ܡܡܘܠܐ ܐܗܦܟ ܝܬܒ ܡܪܝܐ ܡܠܟܐ ܠܥܠܡ

11ܡܪܝܐ ܢܬܠ ܚܝܠܐ ܠܥܡܗ ܡܪܝܐ ܢܒܪܟ ܠܥܡܗ ܒܫܠܡܐ

Chapter 30 ܡܙܡܘܪ̈ܐ

2ܐܪܡܪܡܟ ܡܪܝܐ ܕܐܪܝܡܬܢܝ ܘܠܐ ܚܕܝܬ ܒܝ ܠܒ̈ܥܠܕܒܒܝ

3ܡܪܝܐ ܐܠܗܝ ܒܥܝܬ ܡܢܟ ܘܐܣܝܬܢܝ

4ܘܐܣܩܬ ܡܢ ܫܝܘܠ ܠܢܦܫܝ ܘܐܚܝܬܢܝ ܡܢ ܢܚ̈ܬܝ ܓܘܒܐ

5ܙܡܪܘ ܠܡܪܝܐ ܓܒ̈ܘܗܝ ܘܐܘܕܘ ܠܕܘܟܪܢܐ ܕܩܘܕܫܗ

6ܡܛܠ ܕܟܐܬܐ ܒܪܘܓܙܗ ܘܚ̈ܝܐ ܒܨܒܝܢܗ ܒܪܡܫܐ ܬܒܘܬ ܒܟܬܐ ܘܒܨܦܪܐ ܚܕܘܬܐ

7ܐܢܐ ܐܡܪܬ ܒܫܠܝܘܬܝ ܕܠܐ ܐܙܘܥ ܠܥܠܡ

8ܐܠܗܐ ܒܨܒܝܢܟ ܐܩܝܡܬ ܥܠ ܫܘܒܚܝ ܚܝܠܐ ܘܐܗܦܟܬ ܐ̈ܦܝܟ ܘܙܥܬ

9ܘܩܪܝܬܟ ܡܪܝܐ ܘܡܢܟ ܡܪܝ ܒܥܝܬ

10ܡܢܐ ܝܘܬܪܢܐ ܐܝܬ ܒܕܡܝ ܕܐܚܘܬ ܠܚܒܠܐ ܠܐ ܡܘܕܐ ܠܟ ܥܦܪܐ ܘܠܐ ܡܚܘܐ ܗܝܡܢܘܬܟ

11ܫܡܥ ܐܠܗܐ ܘܪܚܡ ܥܠܝ ܡܪܝܐ ܗܘܝ ܠܝ ܥܕܘܪܐ

12ܕܐܗܦܟܬ ܡܪ̈ܩܕܬܝ ܠܚܕܘܬܐ ܫܪܝܬ ܣܩܝ ܘܐܟܒܢܬܢܝ ܚܕܘܬܐ

13ܡܛܠ ܗܢܐ ܐܙܡܪ ܠܟ ܫܘܒܚܐ ܘܠܐ ܐܫܬܘܩ ܡܪܝܐ ܐܠܗܝ ܠܥܠܡ ܐܘܕܐ ܠܟ

Chapter 31 ܡܙܡܘܪ̈ܐ

2ܒܟ ܡܪܝܐ ܣܒܪܬ ܠܐ ܐܒܗܬ ܠܥܠܡ ܒܙܕܝܩܘܬܟ ܦܠܛܝܢܝ

3ܨܠܝ ܠܘܬܝ ܐܕܢܟ ܘܒܥܓܠ ܥܢܝܢܝ ܗܘܝ ܠܝ ܐܠܗܐ ܡܥܕܪܢܐ ܘܒܝܬ ܓܘܣܐ ܘܦܪܘܩܝܢܝ

4ܡܛܠ ܕܥܘܫܢܝ ܘܒܝܬ ܓܘܣܝ ܐܢܬ ܗܘ ܡܛܠ ܫܡܟ ܡܪܝܐ ܒܝܐܝܢܝ

5ܘܐܦܩܝܢܝ ܡܢ ܡܨܝܕܬܐ ܗܕܐ ܕܛܡܪܘ ܠܝ ܡܛܠ ܕܐܢܬ ܗܘ ܡܣܝܥܢܝ

6ܘܠܟ ܐܛܪܬ ܪܘܚܝ ܘܦܪܩܬܢܝ ܡܪܝܐ ܐܠܗܐ ܕܩܘܫܬܐ

7ܣܢܝܬ ܠܐܝܠܝܢ ܕܢܛܪܝܢ ܕܚ̈ܠܬܐ ܣܪ̈ܝܩܬܐ ܘܐܢܐ ܒܟ ܡܪܝܐ ܣܒܪܬ

8ܐܕܘܨ ܘܐܚܕܐ ܒܛܝܒܘܬܟ ܕܚܙܝܬ ܒܡܘܟܟܝ ܘܝܕܥܬ ܒܐܘܠܨܢܗ̇ ܕܢܦܫܝ

9ܘܠܐ ܐܫܠܡܬܢܝ ܒܐܝܕܐ ܕܒ̈ܥܠܕܒܒܝ ܐܩܝܡܬ ܒܐܪܘܚܬܐ ܪ̈ܓܠܝ

10ܪܚܡ ܥܠܝ ܡܪܝܐ ܡܛܠ ܕܥܩܬ ܠܝ ܐܬܕܠܚܬ ܥܝܢܝ ܒܪܘܓܙܐ ܢܦܫܝ ܘܟܪܣܝ

11ܡܛܠ ܕܓܡܪܘ ܚܝ̈ܝ ܒܕܐܘܘܢܐ. ܘܫܢܝ̈ ܒܬ̈ܢܚܬܐ ܐܬܟܪܗ ܚܝܠܝ ܒܡܣܟܢܘܬܐ ܘܐܬܕܠܚܘ ܓܪ̈ܡܝ

12ܡܢ ܟܘܠܗܘܢ ܒ̈ܥܠܕܒܒܝ ܘܗܘܝܬ ܚܣܕܐ ܠܫ̈ܒܒܝ ܘܕܚܠܬܐ ܠܐܝܠܝܢ ܕܝܕܥܝܢ ܠܝ ܘܐܝܠܝܢ ܕܚܙܝܢ ܗܘܘ ܠܝ ܒܫܘܩܐ ܢܕܝܢ ܗܘܘ ܡܢܝ

13ܐܬܛܥܝܬ ܐܝܟ ܡܝܬܐ ܡܢ ܠܒܐ ܘܗܘܝܬ ܐܝܟ ܡܐܢܐ ܐܒܝܕܐ

14ܡܛܠ ܕܫܡܥܬ ܪܢܝܐ ܕܣ̈ܓܝܐܐ ܟܕ ܐܬܡܠܟܘ ܥܠܝ ܐܝܟ ܚܕܐ. ܘܐܬܚܫܒܘ ܕܢܣܒܘܢ ܠܢܦܫܝ

15ܐܢܐ ܕܝܢ ܥܠܝܟ ܡܪܝܐ ܐܬܬܟܠܬ ܘܐܡܪܬ ܕܐܠܗܝ ܐܢܬ ܡܪܝܐ

16ܘܒܐ̈ܝܕܝܟ ܐܢܘܢ ܙܒܢ̈ܐ ܦܪܘܩܝܢܝ ܡܢ ܒ̈ܥܠܕܒܒܝ ܘܡܢ ܐܝܠܝܢ ܕܪܕܦܝܢ ܠܝ

17ܐܢܗܪ ܐ̈ܦܝܟ ܥܠ ܥܒܕܟ ܘܦܪܘܩܝܢܝ ܒܛܝܒܘܬܟ

18ܡܪܝܐ ܠܐ ܐܒܗܬ ܕܩܪܝܬܟ ܢܒܗܬܘܢ ܪ̈ܫܝܥܐ ܘܢܚܬܘܢ ܠܫܝܘܠ

19ܘܢܣܬܟܪ̈ܢ ܣ̈ܦܘܬܗܘܢ ܕܥܘ̈ܠܐ ܕܡܡܠܠܝܢ ܥܠ ܙܕܝܩܐ ܫܘܩܪܐ ܘܫܛܝܘܬܐ

20ܡܐ ܣܓܝܐܐ ܛܝܒܘܬܟ ܕܢܛܪ ܐܢܬ ܠܕܚ̈ܠܝܟ. ܠܕܡܣܒܪܝܢ ܒܟ ܩܕܡ ܒܢܝܢܫ̈ܐ

21ܬܟܣܐ ܐܢܘܢ ܒܣܬܪܗ ܕܦܪܨܘܦܟ ܡܢ ܕܠܘܚܝܐ ܕܒܢܝܢܫ̈ܐ ܬܟܣܐ ܐܢܘܢ ܒܛܠܠܟ ܡܢ ܚܪܝܢܐ

22ܒܪܝܟ ܗܘ ܡܪܝܐ ܕܓܒܐ ܠܗ ܓܒ̈ܝܐ ܒܩܪܝܬܐ ܥܫܝܢܬܐ

23ܐܢܐ ܐܡܪܬ ܒܡܣܪܗܒܘܬܝ ܕܐܒܕܬ ܡܢ ܩܕܡ ܥܝܢ̈ܝܟ ܘܫܡܥܬ ܩܠܐ ܕܒܥܘܬܝ ܟܕ ܩܪܝܬܟ

24ܪܚܡܘ ܠܡܪܝܐ ܙܕܝܩ̈ܘܗܝ ܘܠܡܗܝ̈ܡܢܐ ܢܛܪ ܡܪܝܐ ܘܦܪܥ ܠܥܘ̈ܠܐ ܥܒ̈ܕܝܗܘܢ

25ܐܬܚܝܠܘ ܘܢܬܥܫܢ ܠܒܟܘܢ ܟܠ ܕܡܣܒܪܝܢ ܒܡܪܝܐ

Chapter 32 ܡܙܡܘܪ̈ܐ

1ܛܘܒܘܗܝ ܠܡܢ ܕܐܫܬܒܩ ܠܗ ܥܘܠܗ ܘܐܬܟܣܝܘ ܠܗ ܚ̈ܛܗܘܗܝ

2ܛܘܒܘܗܝ ܠܒܪܢܫܐ ܕܠܐ ܢܚܫܘܒ ܠܗ ܡܪܝܐ ܚܛܝܬܗ ܘܠܝܬ ܢܟܠܐ ܒܠܒܗ

3ܡܛܠ ܕܫܬܩܬ ܒܠܝܘ ܓܪ̈ܡܝ ܟܕ ܢܗܡ ܗܘܝܬ ܝܘܡܐ ܟܘܠܗ

4ܡܛܠ ܕܠܠܝܐ ܘܐܝܡܡܐ ܝܩܪܬ ܥܠܝ ܐܝܕܟ ܘܐܬܗܦܟ ܒܚܕܝܝ ܟܐܒܐ ܠܡܩܛܠܢܝ

5ܚ̈ܛܗܝ ܐܘܕܥܬܟ ܘܣܟ̈ܠܘܬܝ ܠܐ ܟܣܝܬ ܡܢܟ ܐܡܪܬ ܕܐܘܕܐ ܠܡܪܝܐ ܥܠ ܣ̈ܟܠܘܬܝ ܘܐܢܬ ܫܒܩ ܐܢܬ ܠܝ ܟܠܗܘܢ ܚ̈ܛܗܝ

6ܡܛܠ ܗܢܐ ܢܨܠܐ ܠܟ ܟܘܠ ܡܢ ܕܓܒܐ ܠܟ ܒܙܒܢܐ ܡܩܒܠܐ ܚܐܦܐ ܕܝܢ ܕܡ̈ܝܐ ܣ̈ܓܝܐܐ ܘܠܘܬܗ ܠܐ ܢܬܩܪܒܘܢ

7ܐܢܬ ܣܬܪܝܢܝ ܘܡܢ ܒ̈ܥܠܕܒܒܝ ܢܛܪܝܢܝ ܫܘܒܚܐ ܘܦܘܪܩܢܐ ܐܟܪܟܝܢܝ

8ܕܐܣܬܟܠܟ ܐܘܕܥܟ ܐܘܪܚܐ ܕܬܐܙܠ ܒܗ̇ ܘܐܣܝܡ ܥܝܢܝ ܥܠܝܟ

9ܠܐ ܬܗܘܘܢ ܐܝܟ ܣܘܣܝܐ ܘܐܝܟ ܟܘܕܢܝܐ ܕܠܐ ܚܟܝܡܝܢ ܕܒܦܓܘܕܬܐ ܡܟܒܫܝܢ ܠܗܘܢ ܡܢ ܛܠܝܘܬܗܘܢ ܘܠܐ ܩܪܒܝܢ ܠܘܬܗ

10ܣ̈ܓܝܐܝܢ ܟܐ̈ܒܘܗܝ ܕܥܘܠܐ ܘܐܝܢܐ ܕܡܣܒܪ ܒܡܪܝܐ ܛܝܒܘܬܐ ܬܚܕܪܝܘܗܝ

11ܚܕܘ ܙܕܝܩ̈ܐ ܘܐܬܒܣܡܘ ܒܡܪܝܐ ܘܫܒܚܘܗܝ ܟܠ ܬܪ̈ܝܨܝ ܠܒܐ

Chapter 33 ܡܙܡܘܪ̈ܐ

1ܫܒܚܘ ܙܕܝܩ̈ܐ ܠܡܪܝܐ ܘܠܬܪ̈ܝܨܐ ܝܐܝܐ ܬܫܒܘܚܬܐ

2ܐܘܕܘ ܠܗ ܒܟܢܪܐ ܘܒܩܝܬܪܐ ܕܥܣܪ̈ ܡ̈ܢܝܢ ܙܡܪܘ ܠܗ

3ܫܒܚܘ ܠܗ ܬܫܒܘܚܬܐ ܚܕܬܐ ܘܐܡܪܘ ܕܫܦܝܪ ܒܩܠܐ

4ܡܛܠ ܕܬܪܝܨ ܗܘ ܦܬܓܡܗ ܕܡܪܝܐ ܘܟܠܗܘܢ ܥܒ̈ܕܘܗܝ ܒܗܝܡܢܘܬܐ

5ܪܚܡ ܙܕܝܩܘܬܐ ܘܕܝܢܐ ܛܝܒܘܬܗ ܕܡܪܝܐ ܡܠܝܐ ܐܪܥܐ

6ܒܡܠܬܗ ܕܡܪܝܐ ܐܬܥܒܕܘ ܫܡܝܐ ܘܒܪܘܚܐ ܕܦܘܡܗ ܟܠܗܘܢ ܚܝ̈ܠܘܬܗ

7ܟܢܫ ܐܝܟ ܕܒܙܩ̈ܐ ܡ̈ܝܐ ܕܝܡܐ ܘܣܡ ܒܐܘܨܪ̈ܐ ܬܗܘܡܐ

8ܢܕܚܠܘܢ ܡܢ ܡܪܝܐ ܟܠܗ̇ ܐܪܥܐ. ܘܢܙܘܥܘܢ ܡܢ ܩܕܡܘܗܝ ܟܘܠܗܘܢ ܥܡܘܪ̈ܝܗ̇ ܕܬܒܝܠ

9ܡܛܠ ܕܗܘ ܐܡܪ ܘܗܘܘ ܘܗܘܝܘ ܦܩܕ ܘܐܩܝܡ

10ܡܪܝܐ ܡܒܛܠ ܡܠܟܐ ܕܥܡ̈ܡܐ ܘܡܒܛܠ ܡܪܝܐ ܡܚܫ̈ܒܬܗܘܢ ܕܥܡ̈ܡܐ

11ܬܪܥܝܬܗ ܕܡܪܝܐ ܠܥܠܡ ܩܝܡܐ ܘܡܚܫܒܬܐ ܕܠܒܗ ܠܕܪܕܪܝܢ

12ܛܘܒܘܗܝ ܠܥܡܐ ܕܡܪܝܐ ܗܘ ܐܠܗܗ ܥܡܐ ܕܓܒܐ ܠܗ ܠܝܪܬܘܬܐ

13ܡܢ ܫܡܝܐ ܐܕܝܩ ܡܪܝܐ ܘܚܙܐ ܠܟܠܗܘܢ ܒܢܝܢܫ̈ܐ

14ܘܡܢ ܡܘܬܒܗ ܚܙܐ ܠܟܠܗܘܢ ܥܡܘܪ̈ܝܗ̇ ܕܐܪܥܐ

15ܕܓܒܠ ܐܟܚܕܐ ܠܒܗܘܢ ܘܡܬܒܝܢ ܒܟܠܗܘܢ ܥܒ̈ܕܝܗܘܢ

16ܡܠܟܐ ܠܐ ܡܬܦܪܩ ܒܣܘܓܐܐ ܕܚܝܠܐ ܐܦ ܠܐ ܓܢܒܪܐ ܡܬܦܨܐ ܒܣܘܓܐܐ ܕܚܝܠܗ

17ܕܓܠ ܗܘ ܦܘܪܩܢܗ ܕܣܘܣܝܐ ܕܒܣܘܓܐܐ ܕܚܝܠܗ ܠܐ ܡܦܨܐ ܠܪܟܒܗ

18ܥܝܢ̈ܘܗܝ ܕܡܪܝܐ ܥܠ ܙܕܝܩ̈ܐ ܕܡܣܟܝܢ ܠܛܝܒܘܬܗ

19ܕܢܦܨܐ ܢܦܫ̈ܬܗܘܢ ܡܢ ܡܘܬܐ ܘܢܚܐ ܐܢܘܢ ܒܟܦܢܐ

20ܢܦܫܢ ܣܟܝܬ ܠܡܪܝܐ ܡܛܠ ܕܗܘܝܘ ܡܥܕܪܢܢ ܘܡܣܝܥܢܢ

21ܘܒܗ ܗܘ ܢܚܕܐ ܠܒܢ ܕܒܫܡܗ ܩܕܝܫܐ ܣܒܪܢ

22ܬܗܘܐ ܛܝܒܘܬܟ ܥܠܝܢ ܡܪܝܐ ܐܝܟܢܐ ܕܣܟܝܢܢ ܠܟ

Chapter 34 ܡܙܡܘܪ̈ܐ

2ܐܒܪܟ ܠܡܪܝܐ ܒܟܠܙܒܢ ܘܒܟܠܙܒܢ ܬܫ̈ܒܚܬܗ ܒܦܘܡܝ

3ܒܡܪܝܐ ܬܫܬܒܗܪ ܢܦܫܝ ܢܫܡܥܘܢ ܡܣ̈ܟܢܐ ܘܢܚܕܘܢ

4ܐܘܪܒ ܥܡܝ ܠܡܪܝܐ ܘܢܪܝܡ ܫܡܗ ܐܟܚܕܐ

5ܒܥܝܬ ܡܢ ܡܪܝܐ ܘܥܢܢܝ ܘܡܢ ܟܠܗܘܢ ܐܘ̈ܠܨܢܝ ܦܨܝܢܝ

6ܚܘܪܘ ܠܘܬܗ ܘܣܒܪܘ ܒܗ ܘܐ̈ܦܝܟܘܢ ܠܐ ܢܚܦܪ̈ܢ

7ܗܢܘ ܡܣܟܢܐ ܕܩܪܝܗܝ ܘܫܡܥܗ ܘܡܢ ܟܠܗܘܢ ܐܘ̈ܠܨܢܘܗܝ ܦܨܝܗ

8ܡܫܪܝܬܐ ܕܡܠܐ̈ܟܘܗܝ ܕܡܪܝܐ ܚܕܝܪܐ ܠܕܚ̈ܠܘܗܝ ܘܡܦܨܝܐ ܠܗܘܢ

9ܛܥܡܘ ܘܚܙܘ ܕܛܒ ܗܘ ܡܪܝܐ ܘܛܘܒܝܗܘܢ ܠܟܠ ܕܬܟܝܠܝܢ ܥܠܘܗܝ

11ܥܬܝܪ̈ܐ ܐܬܡܣܟܢܘ ܘܟܦܢܘ ܘܐܝܠܝܢ ܕܠܡܪܝܐ ܒܥܝܢ ܠܐ ܬܚܣܪ ܠܗܘܢ ܛܒܬܐ

12ܬܘ ܒܢ̈ܝܐ ܫܘܡܥܘܢܝ ܘܐܠܦܟܘܢ ܕܚܠܬܗ ܕܐܠܗܐ

13ܐܝܢܘ ܓܒܪܐ ܕܨܒܐ ܚ̈ܝܐ ܘܪܚܡ ܝܘܡ̈ܬܐ ܛܒ̈ܐ ܠܡܚܙܐ

14ܛܪ ܠܫܢܟ ܡܢ ܒܝܫܬܐ ܘܣ̈ܦܘܬܟ ܠܐ ܢܡܠܠܢ ܢܟܠܐ

15ܥܒܪ ܡܢ ܒܝܫܬܐ ܘܥܒܕ ܛܒܬܐ ܒܥܝ ܫܠܡܐ ܘܗܪܛ ܒܬܪܗ

16ܥܝܢ̈ܘܗܝ ܕܡܪܝܐ ܥܠ ܙܕܝܩ̈ܐ ܘܐ̈ܕܢܘܗܝ ܠܡܫܡܥ ܐܢܘܢ

17ܐ̈ܦܘܗܝ ܕܡܪܝܐ ܥܠ ܒܝܫ̈ܐ ܕܢܥܛܐ ܡܢ ܐܪܥܐ ܕܘܟܪܢܗܘܢ

18ܓܥܘ ܙܕܝܩ̈ܐ ܘܡܪܝܐ ܫܡܥ ܐܢܘܢ ܘܦܨܝ ܐܢܘܢ

19ܩܪܝܒ ܗܘ ܡܪܝܐ ܠܬܒܝܪ̈ܝ ܠܒܐ ܘܠܡ̈ܟܝܟܝ ܪܘܚܐ ܦܪܩ

20ܣ̈ܓܝܐܢ ܒܝܫ̈ܬܗ ܕܙܕܝܩܐ ܘܡܢ ܟܘܠܗܝܢ ܡܦܨܐ ܠܗ ܡܪܝܐ

21ܘܢܛܪ ܠܟܠܗܘܢ ܓܪ̈ܡܘܗܝ ܕܚܕ ܡܢܗܘܢ ܠܐ ܢܬܬܒܪ

22ܩܛܠܐ ܠܪ̈ܫܝܥܐ ܒܝܫܬܐ ܘܣܢܐ̈ܘܗܝ ܕܙܕܝܩܐ ܢܣܘܦܘܢ

23ܢܦܪܘܩ ܡܪܝܐ ܢܦܫ̈ܬܐ ܕܥܒ̈ܕܘܗܝ ܘܠܐ ܢܬܚܝܒܘܢ ܟܘܠ ܕܡܣܒܪܝܢ ܒܗ

Chapter 35 ܡܙܡܘܪ̈ܐ

1ܕܘܢ ܡܪܝܐ ܕܝܢܝ ܘܐܬܟܬܫ ܥܡ ܐܝܠܝܢ ܕܡܬܟܬܫܝܢ ܥܡܝ

2ܐܚܘܕ ܙܝܢܐ ܘܣܟܪܐ ܘܩܘܡ ܒܥܘܕܪܢܝ

3ܫܡܘܛ ܣܦܣܝܪܐ ܘܐܒܪܩ ܠܘܩܒܠ ܪ̈ܕܘܦܝ ܘܐܡܪ ܠܢܦܫܝ ܕܐܢܐ ܗܘ ܦܪܘܩܟܝ

4ܢܒܗܬܘܢ ܘܢܚܦܪܘܢ ܐܝܠܝܢ ܕܒܥܝܢ ܠܢܦܫܝ ܢܗܦܟܘܢ ܠܒܣܬܪܗܘܢ ܘܢܚܦܪܘܢ ܐܝܠܝܢ ܕܐܬܚܫܒܘ ܥܠܝ ܒܝܫܬܐ

5ܢܗܘܘܢ ܐܝܟ ܕܚܝܚܐ ܩܕܡ ܪܘܚܐ ܘܡܠܐܟܗ ܕܡܪܝܐ ܢܪܕܘܦ ܐܢܘܢ

6ܬܚܫܟ ܐܘܪܚܗܘܢ ܘܢܗ̈ܘܝܢ ܒܗ̇ ܡܫܪ̈ܘܥܝܬܐ ܘܡܠܐܟܗ ܕܐܠܗܐ ܢܪܕܘܦ ܐܢܘܢ

7ܥܠ ܕܛܡܪܘ ܠܝ ܦܚ̈ܐ ܘܡܨܝܕܬܐ ܦܪܣܘ ܠܢܦܫܝ

8ܬܐܬܐ ܥܠܝܗܘܢ ܒܝܫܬܐ ܡܢ ܫܠܝܐ ܘܡܨܝܕܬܐ ܕܛܡܪܘ ܬܐܚܘܕ ܐܢܘܢ ܘܓܘܡܨܐ ܕܚܦܪܘ ܢܦܠܘܢ ܒܗ

9ܢܦܫܝ ܕܝܢ ܬܪܘܙ ܒܐܠܗܐ. ܘܬܬܒܣܡ ܒܦܘܪܩܢܗ

10ܘܟܠܗܘܢ ܓܪ̈ܡܝ ܢܐܡܪܘܢ ܡܪܝܐ ܡܢܘ ܐܟܘܬܟ ܕܡܦܨܐ ܐܢܬ ܠܒܝܫܐ ܡܢ ܒܥܠܕܒܒܗ ܘܠܡܣܟܢܐ ܘܠܒܝܫܐ ܡܢ ܡܢ ܕܚܛܦ ܠܗ ܒܩܛܝܪܐ

11ܩܡܘ ܣܗ̈ܕܐ ܕܥܘܠܐ ܘܡܕܡ ܕܠܐ ܝܕܥ ܗܘܝܬ ܫܐܠܘܢܝ

12ܦܪܥܘܢܝ ܒܝܫܬܐ ܚܠܦ ܛܒܬܐ ܘܐܘܒܕܘ ܢܦܫܝ ܡܢ ܒܢ̈ܝ ܐܢܫܐ

13ܘܐܢܐ ܒܟܪܝܗܘܬܗܘܢ ܠܒܫܬ ܣܩܐ ܘܡܟܟܬ ܢܦܫܝ ܒܨܘܡܐ ܘܨܠܘܬܝ ܠܥܘܒܝ ܗܦܟܬ

14ܐܝܟ ܪܚܡܐ ܘܐܝܟ ܐܚܐ ܡܗܠܟ ܗܘܝܬ ܘܐܝܟ ܗܘ ܕܝܬܒ ܒܐܒܠܐ ܐܬܕܘܝܬ

15ܒܚܫܝ ܐܬܟܢܫܘ ܘܚܕܝܘ ܠܝ ܐܬܟܢܫܘ ܥܠܝ ܢܘܓܪܐ ܘܠܐ ܝܕܥܬ

16ܒܫܘܒܗܪܗܘܢ ܘܒܒܘܙܚܗܘܢ ܚܪܩܘ ܥܠܝ ܫ̈ܢܝܗܘܢ

17ܡܪܝ ܟܕܘ ܚܙܝܬ ܐܗܦܟ ܢܦܫܝ ܡܢ ܫܓܘܫܝܗܘܢ ܘܡܢ ܐܪ̈ܝܘܬܐ ܝܚܝܕܘܬܝ

18ܐܘܕܐ ܠܟ ܒܥܕܬܐ ܪܒܬܐ ܘܒܥܡ̈ܡܐ ܣ̈ܓܝܐܐ ܐܙܡܪ ܠܟ

19ܕܠܐ ܢܚܕܘܢ ܠܝ ܒ̈ܥܠܕܒܒܝ ܘܫܩܪ̈ܐ ܕܣܢܝܢ ܠܝ ܡܓܢ ܕܡܪܡܙܝܢ ܒܥܝܢ̈ܝܗܘܢ

20ܘܫܠܡܐ ܠܐ ܐܡܪܝܢ ܘܥܠ ܡܟܝܟܐ ܕܐܪܥܐ ܢܟܠܐ ܡܬܚܫܒܝܢ

21ܦܬܚܘ ܥܠܝ ܦܘܡܗܘܢ ܘܐܡܪܘ ܐܗܐ ܐܗܐ ܚܙܬ ܒܗ ܥܝܢܢ

22ܚܙܝܬ ܐܠܗܐ ܘܠܐ ܬܫܬܘܩ ܡܪܝ ܘܠܐ ܬܪܚܩ ܡܢܝ

23ܐܬܬܥܝܪ ܠܕܝܢܝ ܐܠܗܝ ܘܡܪܝ ܘܚܙܝ ܥܘܠܒܢܝ

24ܕܘܢܝܢܝ ܐܝܟ ܙܕܝܩܘܬܟ ܡܪܝܐ ܕܠܐ ܢܚܕܘܢ ܠܝ

25ܘܠܐ ܢܐܡܪܘܢ ܒܠܒܗܘܢ ܕܐܬܬܢܝܚܬ ܢܦܫܢ ܘܛܒܥܢܝܗܝ

26ܢܒܗܬܘܢ ܘܢܚܦܪܘܢ ܐܟܚܕܐ ܐܝܠܝܢ ܕܨܒܝܢ ܠܒܝܫܬܝ ܘܐܝܠܝܢ ܕܡܬܪܘܪܒܝܢ ܥܠܝ ܢܠܒܫܘܢ ܒܗܬܬܐ

27ܢܫܒܚܘܢ ܘܢܚܕܘܢ ܐܝܠܝܢ ܕܨܒܝܢ ܠܙܟܘܬܝ ܘܢܐܡܪܘܢ ܒܟܠܙܒܢ ܕܪܒ ܗܘ ܡܪܝܐ ܕܨܒܐ ܒܫܠܡܐ ܕܥܒܕܗ

28ܠܫܢܝ ܢܘܕܐ ܒܙܕܝܩܘܬܟ ܘܟܠܗ ܝܘܡܐ ܒܬܫܒ̈ܚܬܟ

Chapter 36 ܡܙܡܘܪ̈ܐ

2ܡܬܚܫܒ ܥܘܠܐ ܪܘܫܥܐ ܒܠܒܗ ܡܛܘܠ ܕܠܝܬ ܕܚܠܬܗ ܕܐܠܗܐ ܠܘܩܒܠ ܥܝ̈ܢܘܗܝ

3ܡܛܠ ܕܣܢܝܐ ܗܝ ܒܥܝ̈ܢܘܗܝ ܕܢܫܒܘܩ ܚ̈ܛܗܘܗܝ ܘܢܣܢܐ ܐܢܘܢ

4ܦܬܓܡܐ ܕܦܘܡܗ ܟܐܒܐ ܘܢܟܠܐ ܘܠܐ ܨܒܐ ܠܡܥܒܕ ܛܒܬܐ

5ܟܐܒܐ ܡܬܚܫܒ ܥܠ ܡܫܟܒܗ ܘܡܗܠܟ ܒܐܘܪܚܐ ܐܝܕܐ ܕܠܐ ܫܦܝܪܐ ܕܢܒܐܫ

6ܡܪܝܐ ܒܫܡܝܐ ܪ̈ܚܡܝܟ ܘܗܝܡܢܘܬܟ ܥܕܡܐ ܠܫܡ̈ܝ ܫܡܝܐ

7ܘܙܕܝܩܘܬܟ ܐܝܟ ܛܘܪ̈ܐ ܐܠܗܐ ܘܕܝܢ̈ܝܟ ܐܝܟ ܬܗܘܡܐ ܪܒܐ ܒܢ̈ܝ ܐܢܫܐ ܘܒܥܝܪܐ ܦܪܩ ܐܢܬ ܡܪܝܐ

8ܡܐ ܣ̈ܓܝܐܝܢ ܪ̈ܚܡܝܟ ܐܠܗܐ ܘܒܢ̈ܝ ܐܢܫܐ ܒܛܠܠܐ ܕܟܢ̈ܦܝܟ ܢܬܟܣܘܢ

9ܘܢܪܘܘܢ ܡܢ ܫܘܡܢܗ ܕܒܝܬܟ ܘܡܢ ܢܚܠܟ ܒܣܝܡܐ ܬܫܩܐ ܐܢܘܢ

10ܡܛܘܠ ܕܡܒܘܥܐ ܕܚ̈ܝܐ ܥܡܟ ܗܘ ܘܒܢܘܗܪܟ ܗܘ ܚܙܝܢܢ ܢܘܗܪܐ

11ܛܪ ܪ̈ܚܡܝܟ ܠܩܪ̈ܝܒܝܟ ܘܙܕܝܩܘܬܟ ܠܬܪ̈ܝܨܝ ܠܒܐ

12ܠܐ ܬܝܬܐ ܥܠܝܢ ܪܓܠܐ ܥܫܝܢܬܐ ܘܐܝܕܗܘܢ ܕܪ̈ܫܝܥܐ ܠܐ ܬܙܝܥܢ

13ܡܛܠ ܕܬܡܢ ܢܦܠܝܢ ܟܘܠ ܥܒ̈ܕܝ ܫܘܩܪܐ ܘܡܣܬܚܦܝܢ ܘܠܐ ܡܫܟܚܝܢ ܠܡܩܡ

Chapter 37 ܡܙܡܘܪ̈ܐ

1ܠܐ ܬܚܣܡ ܒܪ̈ܫܝܥܐ ܘܠܐ ܬܛܢ ܒܥܒ̈ܕܝ ܥܘܠܐ

2ܡܛܠ ܕܐܝܟ ܓ̈ܠܐ ܒܥܓܠ ܝܒܫܝܢ ܘܐܝܟ ܝܘܪܩܐ ܕܥܣܒܐ ܚܡܝܢ

3ܣܒܪ ܒܐܠܗܐ ܘܥܒܕ ܛܒܬܐ ܥܡܪ ܒܐܪܥܐ ܘܒܥܝ ܗܝܡܢܘܬܐ

4ܣܒܪ ܒܡܪܝܐ ܘܢܬܠ ܠܟ ܫܐ̈ܠܬܗ ܕܠܒܟ

5ܬܪܘܨ ܩܕܡ ܡܪܝܐ ܐܘܪܚܟ ܘܣܒܪ ܒܗ ܘܗܘ ܥܒܕ

6ܘܡܦܩ ܐܝܟ ܢܘܗܪܐ ܙܕܝܩܘܬܟ ܘܕܝܢ̈ܝܟ ܐܝܟ ܛܗܪܐ

7ܒܥܝ ܡܢ ܡܪܝܐ ܘܨܠܐ ܩܕܡܘܗܝ ܘܠܐ ܬܚܣܡ ܒܓܒܪܐ ܕܥܒܕ ܥܘܠܐ ܘܡܨܠܚܐ ܐܘܪܚܗ

8ܐܬܬܢܝܚ ܡܢ ܚܡܬܐ ܘܐܬܬܢܝܚ ܡܢ ܪܘܓܙܐ ܘܠܐ ܬܚܣܡ ܠܡܥܒܕ ܒܝܫܬܐ

9ܡܛܠ ܕܒܝ̈ܫܐ ܣܝܦܝܢ ܘܐܝܠܝܢ ܕܡܣܒܪܝܢ ܒܡܪܝܐ ܝܪܬܝܢ ܐܪܥܐ

10ܒܙܒܢܐ ܙܥܘܪܐ ܒܥܐ ܐܢܬ ܠܗ ܠܪܫܝܥܐ ܘܠܝܬܘܗܝ ܘܚܐܪ ܐܢܬ ܒܕܘܟܬܗ ܘܠܐ ܡܫܬܟܚ

11ܘܡܣ̈ܟܢܐ ܝܪܬܝܢ ܐܪܥܐ ܘܡܬܒܣܡܝܢ ܒܫܠܡܐ ܣܓܝܐܐ

12ܡܬܚܡܬ ܪܫܝܥܐ ܥܠ ܙܕܝܩܐ ܘܡܚܪܩ ܫ̈ܢܘܗܝ ܥܠܘܗܝ

13ܘܡܪܝܐ ܢܓܚܟ ܥܠܘܗܝ ܡܛܠ ܕܝܕܥ ܕܡܛܐ ܝܘܡܗ

14ܣܝܦܐ ܫܡܛܘ ܪ̈ܫܝܥܐ ܘܡܬܚܘ ܩܫܬܐ ܕܢܩܛܠܘܢ ܠܡܣ̈ܟܢܐ ܘܠܒܝܫ̈ܐ ܘܠܐܝܠܝܢ ܕܬܪ̈ܝܨܢ ܐܘܪ̈ܚܬܗܘܢ

15ܣܝܦܗܘܢ ܢܥܘܠ ܒܠܒܗܘܢ ܘܩܫܬ̈ܬܗܘܢ ܢܬܬܒܪ̈ܢ

16ܦܩܚ ܩܠܝܠ ܠܙܕܝܩܐ ܡܢ ܩܢܝܢܐ ܣܓܝܐܐ ܕܪ̈ܫܝܥܐ

17ܡܛܘܠ ܕܕܪ̈ܥܝܗܘܢ ܕܪ̈ܫܝܥܐ ܢܬܬܒܪܘܢ ܡܣܡܟ ܠܙܕܝܩ̈ܐ ܡܪܝܐ

18ܘܝܕܥ ܡܪܝܐ ܝܘܡ̈ܬܗܘܢ ܕܬܡܝ̈ܡܐ ܘܝܪܬܘܬܗܘܢ ܠܥܠܡ ܬܗܘܐ

19ܘܠܐ ܢܒܗܬܘܢ ܒܫܥܬܐ ܒܝܫܬܐ ܘܒܝ̈ܘܡܬܐ ܕܟܦܢܐ ܢܣܒܥܘܢ

20ܡܛܠ ܕܪ̈ܫܝܥܐ ܐܒܕܝܢ ܘܒ̈ܥܠܕܒܒܘܗܝ ܕܡܪܝܐ ܡ̈ܦܛܡܐ ܓܡܪܝܢ ܘܐܝܟ ܬܢܢܐ ܣܝܦܝܢ

21ܝܙܦ ܪܫܝܥܐ ܘܠܐ ܦܪܥ ܘܙܕܝܩܐ ܡܪܚܡ ܘܝܗܒ

22ܡܛܠ ܕܒܪ̈ܝܟܘܗܝ ܕܡܪܝܐ ܝܪܬܝܢ ܐܪܥܐ ܘܠܝ̈ܛܘܗܝ ܢܣܘܦܘܢ

23ܡܢ ܩܕܡ ܡܪܝܐ ܡܬܩ̈ܢܢ ܗ̈ܠܟܬܗ ܕܓܒܪܐ ܘܐܘܪܚܗ ܗܘ ܡܬܩܢ

24ܡܛܠ ܕܐܢ ܢܦܠ ܠܐ ܡܗܪ ܕܡܪܝܐ ܐܚܝܕ ܒܐܝܕܗ

25ܛܠܐ ܗܘܝܬ ܘܣܒܬ ܘܠܐ ܚܙܝܬ ܙܕܝܩܐ ܕܐܫܬܒܩ ܐܦ ܠܐ ܙܪܥܗ ܕܒܥܐ ܠܚܡܐ

26ܐܠܐ ܟܠܗ ܝܘܡܐ ܡܪܚܡ ܘܡܘܙܦ ܘܙܪܥܗ ܡܬܒܪܟ

27ܥܒܪ ܡܢ ܒܝܫܬܐ ܘܥܒܕ ܛܒܬܐ ܐܬܬܢܝܚ ܠܥܠܡ

28ܡܛܠ ܕܡܪܝܐ ܕܝܢܐ ܪܚܡ ܘܠܐ ܫܒܩ ܠܙܕܝܩ̈ܘܗܝ ܐܠܐ ܠܥܠܡ ܡܢܛܪ ܠܗܘܢ ܘܙܪܥܗܘܢ ܕܪ̈ܫܝܥܐ ܡܘܒܕ

29ܘܙܕܝܩ̈ܐ ܝܪܬܝܢ ܐܪܥܐ ܘܫܪܝܢ ܥܠܝܗ̇ ܠܥܠܡ

30ܚܟܡܬܐ ܪܢܐ ܦܘܡܗ ܕܙܕܝܩܐ ܘܠܫܢܗ ܡܡܠܠ ܕܝܢܐ

31ܢܡܘܣܗ ܕܐܠܗܐ ܒܠܒܗ ܘܠܐ ܙܝܥ̈ܢ ܕܘܪ̈ܟܬܗ

32ܡܣܟܐ ܪܫܝܥܐ ܠܙܕܝܩܐ ܘܒܥܐ ܠܡܩܛܠܗ

33ܘܡܪܝܐ ܠܐ ܢܫܒܩܝܘܗܝ ܒܐ̈ܝܕܘܗܝ ܐܠܐ ܢܚܝܒܝܘܗܝ ܒܕܝܢܐ

34ܣܒܪ ܒܡܪܝܐ ܘܛܪ ܐܘܪܚܗ ܘܢܪܝܡܟ ܠܡܐܪܬ ܐܪܥܐ ܡܐ ܕܣܝܦܝܢ ܪ̈ܫܝܥܐ ܬܚܙܐ

35ܡܛܠ ܕܚܙܝܬ ܪ̈ܫܝܥܐ ܕܡܫܬܒܗܪܝܢ ܘܡܬܬܪܝܡܝܢ ܐܝܟ ܐ̈ܝܠܢܐ ܕܥܒܐ

36ܟܕ ܥܒܪܬ ܠܝܬܘܗܝ ܘܒܥܝܬܗ ܘܠܐ ܐܫܟܚܬܗ

37ܛܪ ܬܡܝܡܘܬܐ ܘܓܒܝ ܬܪܝܨܘܬܐ ܡܛܠ ܕܐܝܬ ܚܪܬܐ ܛܒܬܐ ܠܓܒܪ̈ܐ ܕܫܠܡܐ

38ܘܚ̈ܛܝܐ ܢܣܘܦܘܢ ܐܝܟ ܚܕܐ ܘܚܪܬܐ ܕܪ̈ܫܝܥܐ ܠܐܒܕܢܐ

39ܦܪܘܩܐ ܕܙܕܝܩ̈ܐ ܡܪܝܐ ܡܥܕܪ ܠܗܘܢ ܒܙܒܢܐ ܕܥܩܬܐ

40ܡܥܕܪ ܠܗܘܢ ܡܪܝܐ ܘܡܦܨܐ ܠܗܘܢ ܘܡܦܨܐ ܠܗܘܢ ܡܢ ܪ̈ܫܝܥܐ ܘܦܪܩ ܠܗܘܢ ܡܛܠ ܕܣܒܪܘ ܒܗ

Chapter 38 ܡܙܡܘܪ̈ܐ

2ܡܪܝܐ ܠܐ ܒܪܘܓܙܟ ܬܟܣܢܝ ܐܦ ܠܐ ܒܚܡܬܟ ܬܪܕܝܢܝ

3ܡܛܘܠ ܕܓܐܪ̈ܝܟ ܐܬܩܒܥܘ ܒܝ ܘܐܬܬܢܝܚܬ ܐܝܕܟ ܥܠܝ

4ܘܠܝܬ ܫܠܡܐ ܠܒܣܪܝ ܡܢ ܩܕܡ ܚܡܬܟ ܘܠܝܬ ܫܠܡܐ ܠܓܪ̈ܡܝ ܡܢ ܩܕܡ ܚ̈ܛܗܝ

5ܡܛܠ ܕܣ̈ܟܠܘܬܝ ܥܒܪ ܠܪܝܫܝ ܘܐܝܟ ܡܘܒܠܐ ܝܩܝܪܬܐ ܝܩܪ ܠܝ

6ܣܪ̈ܝ ܘܐܬ̈ܡܣܝ ܚܒܪ̈ܬܝ ܘܡܢ ܩܕܡ ܣ̈ܟܠܘܬܝ

7ܙܥܬ ܛܒ ܘܟܠܗ ܝܘܡܐ ܒܟܡܝܪܘܬܐ ܗܠܟܬ

8ܡܛܠ ܕܩܘܪ̈ܨܠܝ ܐܬܡܠܝܘ ܙܘܥܬܐ ܘܠܝܬ ܫܠܡܐ ܠܒܣܪܝ

9ܙܥܬ ܘܐܬܕܘܝܬ ܛܒ ܘܢܗܓ ܗܘܝܬ ܡܢ ܢܗܡܬܗ ܕܠܒܝ

10ܡܪܝܐ ܩܕܡܝܟ ܗܝ ܟܠܗ̇ ܪܓܬܝ ܘܬܐܢܚ̈ܬܝ ܡܢܟ ܠܐ ܡܛܫ̈ܝܢ

11ܠܒܝ ܐܬܗܦܟ ܘܚܝܠܝ ܫܒܩܢܝ ܘܢܘܗܪܐ ܕܥܝܢ̈ܝ ܠܐ ܗܘܐ ܠܘܬܝ

12ܪ̈ܚܡܝ ܘܚܒܪ̈ܝ ܠܘܩܒܠ ܟܐܒܝ ܩܡܘ ܘܩܪ̈ܝܒܝ ܒܪܘܚܩܐ ܩܝܡܝܢ ܗܘܘ

13ܘܐܚܕܘܢܝ ܐܝܠܝܢ ܕܒܥܝܢ ܠܢܦܫܝ ܘܨܒܝܢ ܠܒܝܫܬܝ ܘܡܠܠܘ ܫܘܩܪܐ ܘܢܟܠܐ ܝܘܡܐ ܟܠܗ ܪܢܝܢ ܗܘܘ

14ܐܢܐ ܕܝܢ ܐܝܟ ܚܪܫܐ ܠܐ ܫܡܥ ܗܘܝܬ ܘܐܝܟ ܕܘܓܐ ܠܐ ܦܬܚܬ ܦܘܡܝ

15ܘܗܘܝܬ ܐܝܟ ܓܒܪܐ ܕܠܐ ܫܡܥ ܘܠܝܬ ܡܟܣܢܘܬܐ ܒܦܘܡܗ

16ܡܛܠ ܕܠܟ ܣܟܝܬ ܡܪܝܐ ܘܥܢܝܬܢܝ ܡܪܝܐ ܐܠܗܝ

17ܡܛܘܠ ܕܐܡܪܬ ܕܠܐ ܢܚܕܘܢ ܠܝ ܘܠܐ ܢܬܬܪܝܡܘܢ ܥܠܝ ܒܙܘܥܬܐ ܕܪ̈ܓܠܝ

18ܡܛܠ ܕܐܢܐ ܠܚܫܐ ܡܛܝܒ ܐܢܐ ܘܟܐܒܝ ܠܘܩܒܠܝ ܒܟܠܙܒܢ

19ܡܛܘܠ ܕܐܚܘܝܟ ܣ̈ܟܠܘܬܝ ܘܐܬܕܟܐ ܡܢ ܚ̈ܛܗܝ

20ܒ̈ܥܠܕܒܒܝ ܐܬܥܫܢܘ ܘܚܙܘ ܘܣܓܝܘ ܣܢܐ̈ܝ ܕܫܘܩܪܐ

21ܦܪܥܘܢܝ ܒܝܫܬܐ ܚܠܦ ܛܒܬܐ ܘܣܩܪܘܢܝ ܥܠ ܕܒܥܝܬ ܛܒܬܐ

22ܠܐ ܬܫܒܩܢܝ ܡܪܝܐ ܐܠܗܝ ܘܠܐ ܬܪܚܩ ܡܢܝ

23ܐܠܐ ܟܬܪ ܠܥܘܕܪܢܝ ܘܦܪܘܩܝܢܝ

Chapter 39 ܡܙܡܘܪ̈ܐ

2ܐܡܪܬ ܕܐܛܪ ܐܘܪܚܝ ܘܠܐ ܐܚܛܐ ܒܠܫܢܝ ܐܛܪ ܦܘܡܝ ܡܢ ܥܘܠܐ ܡܛܠ ܪ̈ܫܝܥܐ ܕܠܘܩܒܠܝ

3ܚܪܫܬ ܘܐܬܟܡܪܬ ܘܕܘܝܬ ܡܢ ܛܒܬܐ ܘܟܐܒܝ ܐܬܕܠܚ

4ܚܡ ܠܒܝ ܒܓܘܝ ܘܒܓܘܫܡܝ ܐܚܕܬ ܢܘܪܐ ܪܢܝܬ ܒܠܫܢܝ

5ܘܚܘܝܢܝ ܡܪܝܐ ܚܪܬܝ ܘܡܫܘܚܬܐ ܕܝܘܡ̈ܝ ܡܢܐ ܗܝ ܕܐܕܥ ܠܡܢܐ ܦܐܫ ܐܢܐ

6ܕܗܐ ܒܡܫܘܚܬܐ ܝܗܒܬ ܝܘ̈ܡܝ ܘܦܘܫܝ ܐܝܟ ܠܐ ܡܕܡ ܗܘ ܩܕܡܝܟ ܡܛܠ ܕܟܠܗܘܢ ܒܢܝܢܫ̈ܐ ܐܝܟ ܠܗܓܐ ܐܢܘܢ ܩܝܡܝܢ

7ܡܛܠ ܕܒܨܠܡܐ ܡܗܠܟ ܓܒܪܐ ܘܐܝܟ ܠܗܓܐ ܚܡܐ ܣܐܡ ܣܝܡ̈ܬܐ ܘܠܐ ܝܕܥ ܠܡܢܘ ܚܡܠ ܠܗܝܢ

8ܡܟܝܠ ܡܢܘ ܣܒܪܝ ܐܠܐ ܐܢ ܐܢܬ ܡܪܝܐ

9ܘܡܢ ܟܠܗܝܢ ܣ̈ܟܠܘܬܝ ܦܨܢܝ ܘܚܣܕܐ ܠܥܘ̈ܠܐ ܠܐ ܬܥܒܕܢܝ

10ܚܪܫܬ ܘܠܐ ܦܬܚܬ ܦܘܡܝ ܡܛܠ ܕܐܢܬ ܥܒܕܬ

11ܐܥܒܪ ܡܢܝ ܢܓܕܟ ܘܡܢ ܡܚܘܬܐ ܕܐ̈ܝܕܝܟ ܓܡܪܬ

12ܒܡܟܣܢܘܬܐ ܕܥܠ ܐ̈ܦܝ ܚ̈ܛܗܝ ܪܕܝܬ ܓܒܪܐ ܘܐܥܒܪܬ ܐܝܟ ܚܒܬܐ ܪ̈ܓܝܓܬܗ ܘܐܝܟ ܠܗܓܐ ܐܢܘܢ ܟܠܗܘܢ ܒܢܝܢܫ̈ܐ

13ܫܡܥ ܡܪܝܐ ܨܠܘܬܝ ܘܒܥܘܬܝ ܘܨܘܬ ܠܕܡܥܬܝ ܘܠܐ ܬܫܬܘܩ ܡܛܘܠ ܕܥܡܘܪܐ ܐܢܐ ܥܡܟ ܘܬܘܬܒܐ ܐܝܟ ܟܠܗܘܢ ܐܒ̈ܗܝ

14ܦܪܘܩܝܢܝ ܘܐܬܬܢܝܚ ܥܕܠܐ ܐܙܠ ܐܢܐ ܘܬܘܒ ܠܐ ܐܝܬܝ

Chapter 40 ܡܙܡܘܪ̈ܐ

2ܡܣܒܪܘ ܣܒܪܬ ܒܡܪܝܐ ܕܐܬܦܢܝ ܠܘܬܝ ܘܫܡܥ ܒܥܘܬܝ

3ܘܐܣܩܢܝ ܡܢ ܓܘܒܐ ܕܕܐܘܘܢܐ ܘܡܢ ܣܝܢܐ ܕܚܒܠܐ ܐܩܝܡ ܥܠ ܫܘܥܐ ܪ̈ܓܠܝ ܘܐܬܩܢ ܗ̈ܠܟܬܝ

4ܝܗܒ ܒܦܘܡܝ ܬܫܒܘܚܬܐ ܚܕܬܐ ܬܫܒܘܚܬܐ ܠܐܠܗܐ ܕܢܚܙܘܢ ܣ̈ܓܝܐܐ ܘܢܚܕܘܢ ܘܢܣܒܪܘܢ ܒܡܪܝܐ

5ܛܘܒܘܗܝ ܠܒܪ ܐܢܫܐ ܕܥܠ ܫܡܗ ܕܡܪܝܐ ܬܟܝܠ ܘܠܐ ܦܢܐ ܠܣܪܝܩܘܬܐ ܐܦ ܠܐ ܠܡܡܠܠܐ ܕܓܠܐ

6ܣ̈ܓܝܐܢ ܐܢܝܢ ܕܥܒܕܬ ܡܪܝܐ ܐܠܗܢ ܬܕܡܪ̈ܬܟ ܘܡܚܫ̈ܒܬܟ ܥܠܝܢ ܘܠܝܬ ܐܟܘܬܟ ܚܘܝܬ ܘܐܡܪܬ ܘܣ̈ܓܝܐܢ ܐܢܝܢ ܡܢ ܡܢܝܢܐ

7ܒܕܒܚ̈ܐ ܘܒܩܘܪ̈ܒܢܐ ܠܐ ܨܒܝܬ ܐ̈ܕܢܐ ܕܝܢ ܢܩܒܬ ܠܝ ܘܝܩ̈ܕܐ ܫ̈ܠܡܐ ܕܚܠܦ ܚ̈ܛܗܐ ܠܐ ܫܐܠܬ

8ܗܝܕܝܢ ܐܡܪܬ ܕܗܐ ܐܬܝܬ ܕܒܪܝܫ ܟܬ̈ܒܐ ܟܬܝܒ ܥܠܝ

9ܠܡܥܒܕ ܨܒܝܢܟ ܐܠܗܐ ܨܒܝܬ ܘܢܡܘܣܟ ܒܓܘ ܟܪܣܝ

10ܣܒܪܬ ܙܕܝܩܘܬܟ ܒܥܕܬܐ ܪܒܬܐ ܘܣܦܘ̈ܬܝ ܠܐ ܟܠܝܬ ܡܪܝܐ ܐܢܬ ܝܕܥ ܐܢܬ

11ܕܠܐ ܛܫܝܬ ܙܕܝܩܘܬܟ ܒܓܘ ܠܒܝ ܐܠܐ ܦܘܪܩܢܟ ܘܗܝܡܢܘܬܟ ܐܡܪܬ ܘܠܐ ܛܫܝܬ ܛܝܒܘܬܟ ܘܗܝܡܢܘܬܟ ܡܢ ܥܕܬܐ ܪܒܬܐ

12ܐܦ ܐܢܬ ܡܪܝܐ ܠܐ ܬܟܠܐ ܡܢܝ ܪ̈ܚܡܝܟ ܐܠܐ ܪ̈ܚܡܝܟ ܘܗܝܡܢܘܬܟ ܒܟܠ ܙܒܢ ܢܢܛܪܘܢܢܝ

13ܡܛܠ ܕܚܕܪ̈ܢܝ ܒܝܫ̈ܬܐ ܕܠܐ ܡܢܝܢ ܘܐܕܪܟܘܢܝ ܚ̈ܛܗܝ ܘܠܐ ܐܫܟܚܬ ܠܡܚܙܐ ܘܥܫܢܘ ܡܢ ܣܥܪܐ ܕܪܝܫܝ ܘܠܒܝ ܫܒܩܢܝ

14ܨܒܝ ܡܪܝܐ ܠܡܦܨܝܘܬܢ ܡܪܝܐ ܠܥܘܕܪܢܝ ܟܬܪ

15ܢܒܗܬܘܢ ܘܢܚܦܪܘܢ ܐܝܠܝܢ ܕܒܥܝܢ ܠܡܩܛܠ ܠܢܦܫܝ ܢܗܦܟܘܢ ܠܒܣܬܪܗܘܢ ܘܢܚܦܪܘܢ ܐܝܠܝܢ ܕܨܒܝܢ ܠܒܝܫܬܝ

16ܢܬܡܗܘܢ ܒܬܢܝܐ ܕܒܗܬܬܗܘܢ ܐܝܠܝܢ ܕܐܡܪܘ ܥܠܝ ܐܗܐ ܐܗܐ

17ܢܚܕܘܢ ܒܟ ܟܠ ܕܒܥܝܢ ܠܟ ܘܢܐܡܪܘܢ ܒܟܠ ܙܒܢ ܕܪܒ ܗܘ ܡܪܝܐ ܐܝܠܝܢ ܕܪܚܡܝܢ ܦܘܪܩܢܟ

18ܘܐܢܐ ܡܣܟܢܐ ܐܢܐ ܘܒܝܫܐ ܡܪܝ ܐܬܚܫܒܘ ܥܠܝ ܡܥܕܪܢܝ ܐܢܬ ܘܡܦܨܝܢܝ ܐܠܗܝ ܠܐ ܬܘܚܪ

Chapter 41 ܡܙܡܘܪ̈ܐ

2ܛܘܒܘܗܝ ܠܡܢ ܕܚܐܪ ܒܡܣܟܢܐ ܕܒܝܘܡܐ ܕܒܝܫܬܐ ܢܦܠܛܝܘܗܝ ܡܪܝܐ

3ܡܪܝܐ ܢܢܛܪܝܘܗܝ ܘܢܐܚܝܘܗܝ ܘܢܛܐܒ ܠܗ ܒܐܪܥܐ ܘܠܐ ܢܫܠܡܝܘܗܝ ܠܒ̈ܥܠܕܒܒܘܗܝ

4ܡܪܝܐ ܢܣܡܟܝܘܗܝ ܥܠ ܥܪܣܐ ܕܟܐ̈ܒܘܗܝ ܘܟܠܗ ܡܫܟܒܗ ܗܦܟ ܒܟܘܪܗܢܗ

5ܐܢܐ ܐܡܪܬ ܕܐܢܬ ܗܘ ܡܪܝ ܪܚܡ ܥܠܝ ܘܐܣܗ̇ ܠܢܦܫܝ ܡܛܠ ܕܚܛܝܬ ܠܟ

6ܒ̈ܥܠܕܒܒܝ ܐܡܪܘ ܥܠܝ ܒܝܫܬܐ ܐܡܬܝ ܕܝܢ ܡܝܬ ܘܐܒܕ ܫܡܗ

7ܐܡܬܝ ܕܐܬܝܢ ܗܘܘ ܠܡܚܙܝܢܝ ܕܓܠܘܬܐ ܡܡܠܠܝܢ ܗܘܘ ܘܒܠܒܗܘܢ ܚܫܠܝܢ ܗܘܘ ܒܝܫܬܐ ܢܦܩܝܢ ܗܘܘ ܠܫܘܩܐ ܘܡܡܠܠܝܢ

8ܐܬܠܚܫܘ ܥܠܝ ܐܝܟ ܚܕܐ ܟܠܗܘܢ ܣ̈ܢܐܝ ܘܐܬܚܫܒܘ ܥܠܝ ܒܝܫܬܐ

9ܒܡܠܬܐ ܕܥܘܠܐ ܪܢܝܢ ܗܘܘ ܡܟܝܠ ܕܫܟܒ ܠܐ ܡܘܣܦ ܠܡܩܡ

10ܐܦ ܓܒܪܐ ܫܐܠ ܫܠܡܝ ܕܬܟܝܠ ܐܢܐ ܥܠܘܗܝ ܐܟܠ ܠܚܡܝ ܕܬܟܝܠ ܐܢܐ ܥܠܘܗܝ ܣܓܝ ܐܬܢܟܠ ܥܠܝ

11ܘܐܢܬ ܡܪܝܐ ܪܚܡ ܥܠܝ ܘܐܩܝܡܝܢܝ ܕܐܦܪܘܥ ܐܢܘܢ

12ܒܗܕܐ ܝܕܥܬ ܕܨܒܐ ܐܢܬ ܒܝ ܡܛܠ ܕܠܐ ܡܒܐܫ ܠܝ ܒܥܠܕܒܒܝ

13ܠܝ ܕܝܢ ܒܬܡܝܡܘܬܝ ܣܡܟܬܢܝ ܘܐܩܝܡܬܢܝ ܩܕܡܝܟ ܠܥܠܡ

14ܒܪܝܟ ܗܘ ܡܪܝܐ ܐܠܗܐ ܕܐܝܣܪܝܠ ܡܢ ܥܠܡ ܘܥܕܡܐ ܠܥܠܡ ܐܡܝܢ ܘܐܡܝܢ

Chapter 42 ܡܙܡܘܪ̈ܐ

2ܐܝܟ ܐܝܠܐ ܕܓܥܐ ܥܠ ܦܨܝܕܐ ܕܡ̈ܝܐ ܗܟܢܐ ܐܦ ܢܦܫܝ ܓܥܝܐ ܠܘܬܟ ܡܪܝܐ

3ܨܗܝܐ ܗܝ ܠܟ ܢܦܫܝ ܐܠܗܐ ܚܝܐ ܕܐܡܬܝ ܐܬܐ ܘܐܚܙܐ ܐ̈ܦܝܟ ܐܠܗܐ

4ܗܘܬ ܠܝ ܕܡܥܬܝ ܡܐܟܘܠܬܐ ܒܐܝܡܡܐ ܘܒܠܠܝܐ ܟܕ ܐܡܪܝܢ ܗܘܘ ܠܝ ܟܠܝܘܡ ܕܐܝܟܘ ܐܠܗܟ

5ܗܠܝܢ ܐܬܕܟܪܬ ܘܐܬܛܪܦܬ ܢܦܫܝ ܡܛܠ ܕܐܥܒܪ ܒܣܬܪܟ ܥܫܝܢܐ ܥܕܡܐ ܠܒܝܬܗ ܕܐܠܗܐ ܒܩܠܐ ܕܬܫܒܘܚܬܐ ܘܕܬܘܕܝܬܐ ܣ̈ܓܝܐܐ ܚܕܝܢ

6ܠܡܢܐ ܡܬܛܪܦܬ ܢܦܫܝ ܘܠܡܢܐ ܬܡܝܗܬܝ ܣܟܝ ܠܐܠܗܐ ܡܛܠ ܕܬܘܒ ܐܘܕܐ ܠܗ ܠܦܪܘܩܐ ܕܐ̈ܦܝ

7ܘܐܠܗܝ ܥܠܝ ܢܦܫܝ ܐܬܛܪܦܬ ܡܛܠ ܗܢܐ ܐܬܕܟܪܬܟ ܡܢ ܐܪܥܐ ܕܝܘܪܕܢܢ ܘܡܢ ܚܪܡܘܢ ܘܡܢ ܛܘܪܐ ܙܥܘܪܐ

8ܬܗܘܡܐ ܠܬܗܘܡܐ ܩܪܐ ܩܠܐ ܠܩܠܐ ܕܡ̈ܝܐ ܕܢܣܟ̈ܝܟ ܟܠܗܘܢ ܡܚܫ̈ܘܠܝܟ ܘܓ̈ܠܠܝܟ ܥܠܝ ܥܒܪܘ

9ܒܐܝܡܡܐ ܢܦܩܘܕ ܡܪܝܐ ܪ̈ܚܡܘܗܝ ܘܒܠܠܝܐ ܬܫܒܚ̈ܬܗ ܥܡܝ ܨܠܘܬܐ ܗܘ ܠܐܠܗܐ ܚܝܐ

10ܐܡܪܬ ܠܐܠܗܐ ܕܠܡܢܐ ܛܥܝܬܢܝ ܘܠܡܢܐ ܡܗܠܟ ܐܢܐ ܟܡܝܪܐܝܬ ܒܐܘܠܨܢܐ ܕܒ̈ܥܠܕܒܒܝ

11ܒܬܒܪܐ ܕܓܪ̈ܡܝ ܚܣܕܘܢܝ ܒ̈ܥܠܕܒܒܝ ܐܡܪܝܢ ܗܘܘ ܠܝ ܟܘܠ ܝܘܡ ܐܝܟܘ ܐܠܗܟ

12ܠܡܢܐ ܡܬܛܪܦܬܝ ܢܦܫܝ ܘܠܡܢܐ ܬܡܝܗܬܝ ܣܟܝ ܠܐܠܗܐ ܡܛܠ ܕܬܘܒ ܐܘܕܐ ܠܗ ܠܦܪܘܩܐ ܕܐ̈ܦܝ ܘܐܠܗܝ

Chapter 43 ܡܙܡܘܪ̈ܐ

1ܕܘܢ ܐܠܗܐ ܕܝܢܝ ܘܬܒܥ ܬܒܥܬܝ ܡܢ ܥܡܐ ܕܠܐ ܡܪܚܡܢ ܘܡܢ ܓܒܪ̈ܐ ܥܘ̈ܠܐ ܘܢܟܘ̈ܠܬܢܐ ܦܨܢܝ

2ܡܛܠ ܕܐܢܬ ܗܘ ܐܠܗܐ ܕܚܝܠܝ ܘܠܡܢܐ ܛܥܝܬܢܝ ܘܠܡܢܐ ܡܗܠܟ ܐܢܐ ܟܡܝܪܐܝܬ ܒܐܘܠܨܢܐ ܕܒ̈ܥܠܕܒܒܝ

3ܫܕܪ ܢܘܗܪܟ ܘܗܝܡܢܘܬܟ ܘܢܒܝܐܘܢܢܝ ܘܢܝܬܘܢܢܝ ܠܛܘܪܟ ܩܕܝܫܐ ܘܠܡܫܟܢܟ

4ܘܐܬܐ ܠܘܬ ܡܕܒܚܗ ܕܐܠܗܐ ܘܠܘܬ ܐܠܗܐ ܕܡܚܕܐ ܛܠܝܘܬܝ ܐܘܕܐ ܠܟ ܒܟܢܪܐ ܐܠܗܐ ܐܠܗܝ

5ܠܡܢܐ ܡܬܛܪܦܬܝ ܢܦܫܝ ܘܠܡܢܐ ܟܪܝܐ ܠܟܝ ܣܟܝ ܠܐܠܗܐ ܡܛܠ ܕܬܘܒ ܐܘܕܐ ܠܗ ܠܦܪܘܩܐ ܕܐ̈ܦܝ ܘܐܠܗܝ

Chapter 44 ܡܙܡܘܪ̈ܐ

2ܐܠܗܐ ܫܡܥܢܢ ܒܐ̈ܕܢܝܢ ܐܦ ܐ̈ܒܗܝܢ ܐܫܬܥܝܘ ܠܢ ܡܕܡ ܕܥܒܕܬ ܒܝ̈ܘܡܝܗܘܢ ܒܝܘܡ̈ܬܐ ܩܕܡ̈ܝܐ

3ܐܝܕܟ ܐܘܒܕܬ ܠܥܡ̈ܡܐ ܘܢܨܒܬ ܐܢܘܢ ܘܐܒܐܫܬ ܠܡ̈ܠܟܘܬܐ ܘܫܪܪܬ ܐܢܘܢ

4ܡܛܠ ܕܠܐ ܗܘܐ ܒܚܪܒܗܘܢ ܝܪܬܘ ܐܪܥܐ ܐܦ ܠܐ ܕܪܥܗܘܢ ܦܪܩ ܐܢܘܢ ܐܠܐ ܝܡܝܢܟ ܘܕܪܥܟ ܘܢܘܗܪܐ ܕܐ̈ܦܝܟ ܕܨܒܝܬ ܒܗܘܢ

5ܐܢܬ ܗܘ ܐܠܗܐ ܡܠܟܝ ܕܦܩܕܬ ܥܠ ܦܘܪܩܢܗ ܕܝܥܩܘܒ

6ܒܟ ܢܕܩܪ ܠܒ̈ܥܠܕܒܒܝܢ ܘܡܛܠ ܫܡܟ ܢܕܘܫ ܠܣܢܐ̈ܝܢ

7ܡܛܠ ܕܠܐ ܗܘܐ ܥܠ ܩܫ̈ܬܬܢ ܬܟܝܠܝܢܢ ܐܦ ܠܐ ܥܠ ܙܝܢܢ ܕܢܦܪܩܢ

8ܐܢܬ ܗܘ ܦܪܩܬܢ ܡܢ ܣܢܐ̈ܝܢ ܘܐܒܗܬܬ ܠܒ̈ܥܠܕܒܒܝܢ

9ܫܒܚܢܟ ܐܠܗܐ ܟܘܠܗ ܝܘܡܐ ܘܠܫܡܟ ܠܥܠܡ ܢܘܕܐ

10ܗܫܐ ܛܥܝܬܢ ܘܐܒܗܬܬܢ ܘܠܐ ܢܦܩ ܐܢܬ ܒܚܝܠܢ

11ܐܠܐ ܐܗܦܟܬܢ ܠܒܣܬܪܢ ܘܒܙܘܢ ܒ̈ܥܠܕܒܒܝܢ

12ܝܗܒܬܢ ܐܝܟ ܥܢܐ ܠܡܐܟܘܠܬܐ ܘܒܕܪܬܢ ܒܝܬ ܥܡ̈ܡܐ

13ܙܒܢܬ ܠܥܡܟ ܕܠܐ ܕܡ̈ܝܐ ܘܠܐ ܐܣܓܝܬ ܚܘܠܦܗܘܢ

14ܥܒܕܬܢ ܚܣܕܐ ܠܫܒ̈ܒܝܢ ܡܘܝܩܐ ܘܒܘܙܚܐ ܠܐܝܠܝܢ ܕܚܕܪܝܢ ܐܢܘܢ

15ܥܒܕܬܢ ܠܡܬܠܐ ܒܝܬ ܥܡ̈ܡܐ ܘܢܝܕܐ ܕܪܝܫܐ ܒܐ̈ܡܘܬܐ

16ܘܟܠܗ ܝܘܡܐ ܒܗܬܬܝ ܩܕܡܝ ܗܝ ܘܒܗܬܬܐ ܕܐ̈ܦܝ ܟܣܝܬܢܝ

17ܡܢ ܩܠܐ ܕܡܚܣܕ ܘܡܓܕܦ ܘܡܢ ܩܕܡ ܒܥܠܕܒܒܐ ܕܡܬܢܩܡ

18ܗܠܝܢ ܟܠܗܝܢ ܓܕܫ ܠܢ ܘܠܐ ܛܥܝܢܟ ܘܠܐ ܕܓܠܢܢ ܒܩܝܡܟ

19ܘܠܐ ܗܦܟܢ ܠܒܣܬܪܢ ܘܠܐ ܐܗܦܟܢ ܫܒܝ̈ܠܝܢ ܡܢ ܐܘܪܚܟ

20ܡܛܠ ܕܡܟܟܬܢ ܒܐܬܪܐ ܬܢܝܢܐ ܘܟܣܝܬܢ ܒ̈ܛܠܠܝ ܡܘܬܐ

21ܘܠܐ ܛܥܝܢ ܫܡܗ ܕܐܠܗܢ ܘܠܐ ܦܫܛܢ ܐ̈ܝܕܝܢ ܠܘܬ ܐ̈ܠܗܐ ܢܘܟܪ̈ܝܐ

22ܐܠܗܐ ܗܘ ܒܨܐ ܠܗ̇ ܠܗܕܐ ܡܛܠ ܕܗܘ ܝܕܥ ܡܚܫ̈ܒܬܗ ܕܠܒܐ

23ܡܛܠܬܟ ܐܬܩܛܠܢ ܟܠ ܝܘܡ ܘܐܬܚܫܒܢ ܐܝܟ ܥܢܐ ܠܢܟܣܬܐ

24ܐܬܬܥܝܪ ܘܠܐ ܬܕܡܟ ܡܪܝܐ ܥܗܕܝܢ ܘܠܐ ܬܛܥܝܢ

25ܘܠܐ ܬܗܦܟ ܐ̈ܦܝܟ ܡܢܢ ܘܠܐ ܬܛܥܐ ܡܘܟܟܢ ܘܐ̈ܘܠܨܢܝܢ

26ܡܛܠ ܕܡܟܬ ܥܠ ܥܦܪܐ ܢܦܫܢ ܘܕܒܩܬ ܟܪܣܢ ܠܐܪܥܐ

27ܩܘܡ ܥܕܪܝܢܝ ܘܦܪܘܩܝܢܝ ܡܛܠ ܪ̈ܚܡܝܟ

Chapter 45 ܡܙܡܘܪ̈ܐ

2ܐܒܥ ܠܒܝ ܦܬ̈ܓܡܐ ܛܒ̈ܐ ܘܐܡܪ ܥܒ̈ܕܝ ܡܠܟܐ ܠܫܢܝ ܩܢܝܗ ܕܣܦܪܐ ܡܗܝܪܐ

3ܕܫܦܝܪ ܒܚܙܘܗ ܡܢ ܒܢ̈ܝ ܐܢܫܐ ܐܬܢܣܟܘ ܪ̈ܚܡܐ ܥܠ ܣܦܘ̈ܬܟ ܡܛܠ ܗܢܐ ܒܪܟܟ ܐܠܗܐ ܠܥܠܡ

4ܐܪܡܐ ܣܝܦܐ ܒܚ̈ܨܝܟ ܓܢܒܪܐ ܗܕܪܟ ܘܫܘܒܚܟ

5ܘܫܘܒܚܟ ܙܟܐ ܪܟܒ ܥܠ ܡܠܬܐ ܕܩܘܫܬܐ ܡܘܟܟܐ ܕܙܕܝܩܘܬܐ ܢܡܘܣܟ ܒܕܚܠܬܐ ܕܝܡܝܢܟ

6ܓܐܪ̈ܝܟ ܫܢܝܢܝܢ ܘܥܡ̈ܡܐ ܢܦܠܘܢ ܬܚܘܬܝܟ ܒܠܒܐ ܕܒ̈ܥܠܕܒܒܘܗܝ ܕܡܠܟܐ

7ܟܘܪܣܝܗ ܕܐܠܗܐ ܠܥܠܡ ܥܠܡܝܢ ܫܒܛܐ ܦܫܝܛܐ ܫܒܛܐ ܕܡܠܟܘܬܟ

8ܪܚܡܬ ܙܕܝܩܘܬܐ ܘܣܢܝܬ ܥܘܠܐ ܡܛܠ ܗܢܐ ܡܫܚܟ ܐܠܗܐ ܐܠܗܟ ܡܫܚܐ ܕܚܕܘܬܐ ܝܬܝܪ ܡܢ ܚܒܪ̈ܝܟ

9ܡܘܪܐ ܘܩܣܝܐ ܘܐܣ̈ܛܩܛܐ ܡܒܣܡܝܢ ܟܠܗܘܢ ܠܒ̈ܘܫܝܟ ܡܢ ܗܝܟܠܐ ܪܝܫܝܐ ܘܡܢ ܠܘܬܝ ܚܕܝܘܟ

10ܒܪܬ ܡܠܟܐ ܒܫܘܒܚܐ ܩܡܬ ܘܡܠܟܬܐ ܡܢ ܝܡܝܢܟ ܒܠܒܘܫܐ ܕܕܗܒܐ ܕܐܘܦܝܪ

11ܫܡܥܝ ܒܪܬܝ ܘܚܙܝ ܘܨܠܝ ܐܕܢܟܝ ܘܛܥܝ ܥܡܟܝ ܘܒܝܬ ܐܒܘܟܝ

12ܕܢܬܪܓܪܓ ܡܠܟܐ ܠܫܘܦܪܟܝ ܡܛܠ ܕܗܘܝܘ ܡܪܟܝ ܣܓܘܕܝ ܠܗ

13ܘܒܪܬ ܨܘܪ ܬܣܓܘܕ ܠܗ ܒܩܘܪ̈ܒܢܐ ܐ̈ܦܝܟܝ ܢܒܥܘܢ ܥܬܝܪ̈ܘܗܝ ܕܥܡܐ

14ܘܟܘܠܗ ܫܘܒܚܐ ܕܒܪܬ ܡܠܟܐ ܡܢ ܠܓܘ ܘܡܨܒܬ ܠܒܘܫܗ̇ ܒܕܗܒܐ ܛܒܐ

15ܒܩܘܪ̈ܒܢܐ ܬܐܙܠ ܠܡܠܟܐ ܘܢܘܒ̈ܠܢ ܒܬ̈ܘܠܬܐ ܚܒܪ̈ܬܗ̇ ܒܬܪܗ̇

16ܘܢܐ̈ܙܠܢ ܒܚܕܘܬܐ ܘܒܒܣܝܡܘܬܐ ܘܢ̈ܥܠܢ ܠܗܝܟܠܗ ܕܡܠܟܐ

17ܚܠܦ ܐ̈ܒܗܝܟܝ ܢܗܘܘܢ ܒܢܝ̈ܟܝ ܥܒܕ ܐܢܘܢ ܫ̈ܠܝܛܐ ܒܟܠܗ̇ ܐܪܥܐ

18ܕܢܬܕܟܪ ܫܡܟ ܒܟܠ ܕܪ ܘܕܪ ܡܛܠ ܗܢܐ ܢܘܕܘܢ ܠܟ ܥܡ̈ܡܐ ܠܥܠܡ ܥܠܡܝܢ

Chapter 46 ܡܙܡܘܪ̈ܐ

2ܐܠܗܢ ܒܝܬ ܓܘܣܢ ܥܫܝܢܐ ܘܡܥܕܪܢܢ ܒܙܒ̈ܢܐ ܕܐܘܠܨܢܐ. ܐܫܬܟܚܬ ܠܢ ܒܟܠܙܒܢ

3ܡܛܠ ܗܢܐ ܠܐ ܕܚܠܝܢܢ ܡܐ ܕܙܝܥܐ ܐܪܥܐ ܘܙܝ̈ܥܝܢ ܛܘܪ̈ܐ ܒܠܒܐ ܕܝܡ̈ܡܐ

4ܢܬܕܠܚܘܢ ܡܝܝ̈ܗܘܢ ܘܢܬܗܦܟܘܢ ܘܢܙܘܥܘܢ ܛܘܪ̈ܐ ܒܥܘܫܢܗ

5ܬ̈ܦܐ ܕܢܗܪ̈ܘܬܐ ܢܚܕܘܢ ܒܡܕܝܢܬܗ ܕܐܠܗܢ ܩܕܝܫ ܗܘ ܒܝܬ ܡܫܪܝܗ ܕܡܪܝܡܐ

6ܐܠܗܐ ܒܓܘܗ̇ ܠܐ ܬܙܘܥ ܢܥܕܪܝܗ̇ ܐܠܗܐ ܒܥܕܢ ܨܦܪܐ

7ܐܫܬܓܫܘ ܥܡ̈ܡܐ ܘܙܥ̈ܝ ܡ̈ܠܟܘܬܐ ܐܪܝܡ ܩܠܗ ܘܙܥܬ ܐܪܥܐ

8ܡܪܝܐ ܚܝܠܬܢܐ ܥܡܢ ܘܡܥܕܪܢܢ ܐܠܗܗ ܕܝܥܩܘܒ

9ܬܘ ܚܙܘ ܥܒ̈ܕܘܗܝ ܕܐܠܗܐ ܕܥܒܕ ܬܕܡܪ̈ܬܐ ܒܐܪܥܐ

10ܡܒܛܠ ܩܪ̈ܒܐ ܡܢ ܣܘ̈ܦܝܗ̇ ܕܐܪܥܐ ܩܫܬ̈ܬܐ ܡܬܒܪ ܘܡܬܒܪ ܢܝ̈ܙܟܐ ܘܡܪ̈ܟܒܬܐ ܡܘܩܕ ܒܢܘܪܐ

11ܐܬܦܢܘ ܘܕܥܘ ܕܐܢܐ ܐܢܐ ܐܠܗܐ ܐܬܬܪܝܡܬ ܒܥܡ̈ܡܐ ܘܐܬܬܪܝܡܬ ܒܐܪܥܐ

12ܡܪܝܐ ܚܝܠܬܢܐ ܥܡܢ ܘܡܥܕܪܢܢ ܐܠܗܗ ܕܝܥܩܘܒ

Chapter 47 ܡܙܡܘܪ̈ܐ

2ܟܘܠܟܘܢ ܥܡ̈ܡܐ ܩܘܫܘ ܟܦܐ ܘܫܒܚܘ ܠܐܠܗܐ ܒܩܠܐ ܕܫܘܒܚܐ

3ܡܛܠ ܕܡܪܝܐ ܡܪܝܡܐ ܘܕܚܝܠܐ ܗܘܝܘ ܡܠܟܐ ܪܒܐ ܥܠ ܟܠܗ̇ ܐܪܥܐ

4ܕܫܥܒܕ ܠܢ ܥܡ̈ܡܐ ܬܚܘܬܝܢ ܘܐ̈ܡܘܬܐ ܬܚܘܬ ܪ̈ܓܠܝܢ

5ܐܓܒܝܢ ܝܪܬܘܬܗ ܘܐܝܩܪܗ ܕܝܥܩܘܒ ܕܪܚܡ

6ܣܠܩ ܐܠܗܐ ܒܫܘܒܚܐ ܡܪܝܐ ܒܩܠܐ ܕܩܪܢܐ

7ܙܡܪܘ ܠܐܠܗܐ ܒܫܘܒܚܐ ܙܡܪܘ ܠܡܠܟܢ

8ܡܛܠ ܕܡܠܟܐ ܕܟܠܗ̇ ܐܪܥܐ ܐܠܗܐ ܗܘ ܙܡܪܘ ܠܗ ܫܘܒܚܐ

9ܐܡܠܟ ܐܠܗܐ ܥܠ ܥܡ̈ܡܐ ܐܠܗܐ ܝܬܒ ܥܠ ܟܘܪܣܝܗ ܩܕܝܫܐ

10ܫ̈ܠܝܛܢܐ ܕܥܡ̈ܡܐ ܐܬܦܢܘ ܠܘܬ ܐܠܗܗ ܕܐܒܪܗܡ ܡܛܠ ܕܕܐܠܗܐ ܐܢܘܢ ܐܘܚ̈ܕܢܝܗ̇ ܕܐܪܥܐ ܘܛܒ ܐܬܬܪܝܡ

Chapter 48 ܡܙܡܘܪ̈ܐ

2ܪܒ ܗܘ ܡܪܢ ܘܡܫܒܚ ܪܘܪܒܐܝܬ ܒܩܪܝܬܗ ܕܐܠܗܢ ܘܒܛܘܪܗ ܩܕܝܫܐ

3ܘܡܫܒܚܐ ܚܕܘܬܐ ܒܟܠܗ̇ ܐܪܥܐ ܛܘܪܐ ܕܨܗܝܘܢ ܕܒܫ̈ܦܘܠܝ ܓܪܒܝܐ ܩܪܝܬܗ ܗܝ ܕܡܠܟܐ ܪܒܐ

4ܐܠܗܐ ܒܣܚܪ̈ܬܗ̇ ܡܘܕܥ ܥܘܫܢܗ

5ܡܛܠ ܕܗܐ ܡ̈ܠܟܐ ܐܬܛܝܒܘ ܘܥܒܪܘ ܐܝܟ ܚܕܐ

6ܗܢܘܢ ܚܙܘ ܘܬܡܗܘ ܘܙܥܘ

7ܘܐܪܬܝܬܐ ܐܚܕ ܐܢܘܢ ܘܚܒ̈ܠܐ ܐܝܟ ܕܝܠܕܬܐ

8ܒܪܘܚܐ ܥܫܝܢܬܐ ܢܬܬܒܪ̈ܢ ܐ̈ܠܦܐ ܕܬܪܫܝܫ

9ܐܝܟ ܕܫܡܥܢ ܗܟܢ ܚܙܝܢ ܒܩܪܝܬܗ ܕܡܪܝܐ ܚܝܠܬܢܐ ܒܩܪܝܬܗ ܕܐܠܗܢ ܐܠܗܐ ܢܬܩܢܝܗ̇ ܥܕܡܐ ܠܥܠܡ

10ܣܒܪܢ ܐܠܗܐ ܠܛܝܒܘܬܟ ܒܓܘܗ ܕܗܝܟܠܟ

11ܐܝܟ ܫܡܟ ܐܠܗܐ ܗܟܢܐ ܬܫܒܚ̈ܬܟ ܥܕܡܐ ܠܣܘ̈ܦܝܗ̇ ܕܐܪܥܐ ܙܕܝܩܘܬܐ ܡܠܝܐ ܝܡܝܢܟ

12ܢܚܕܐ ܛܘܪܐ ܕܨܗܝܘܢ ܘܢܕܘ̈ܨܢ ܒܢ̈ܬ ܝܗܘܕܐ ܡܛܠ ܕܝܢܝ̈ܟ ܡܪܝܐ

13ܐܬܟܪܟܘܗ̇ ܠܨܗܝܘܢ ܘܚܘܕܪܘܗ̇ ܘܡܢܘ ܡ̈ܓܕܠܝܗ̇

14ܣܝܡܘ ܠܒܟܘܢ ܥܠ ܚܝܠܗ̇ ܘܥܩܘܪܘ ܣܚܪ̈ܬܗ̇ ܕܬܫܬܥܘܢ ܠܕܪܐ ܐܚܪܝܐ

15ܕܗܢܘ ܐܠܗܐ ܐܠܗܢ ܠܥܠܡ ܘܠܥܠܡ ܥܠܡܝܢ ܘܗܘ ܢܕܒܪܢܝ ܠܥܠ ܡܢ ܡܘܬܐ

Chapter 49 ܡܙܡܘܪ̈ܐ

2ܫܡܥܘ ܗܕܐ ܟܠܟܘܢ ܥܡ̈ܡܐ ܘܨܘܬܘ ܟܠ ܝܬ̈ܒܝ ܐܪܥܐ

3ܒܢܝ̈ ܐܪܥܐ ܘܒܢܝܢ̈ܫܐ ܐܝܟ ܚܕܐ ܥܬܝܪ̈ܐ ܘܡܣ̈ܟܢܐ

4ܦܘܡܝ ܢܡܠܠ ܚܟܡܬܐ ܘܪܢܝܗ ܕܠܒܝ ܣܘܟܠܐ

5ܐܨܠܐ ܐ̈ܕܢܝ ܠܡ̈ܬܠܐ ܘܐܡܠܠ ܒܟܢܪ̈ܐ ܐܘܚ̈ܕܬܝ

6ܠܐ ܕܚܠ ܐܢܐ ܒܝܘܡ̈ܬܐ ܒܝܫ̈ܐ ܥܘܠܐ ܕܒ̈ܥܠܕܒܒܝ ܟܪܟܢܝ

7ܟܠ ܕܬܟܝܠܝܢ ܥܠ ܚܝܠܗܘܢ ܘܡܫܬܒܗܪܝܢ ܒܣܘܓܐܐ ܕܥܘܬܪܗܘܢ

8ܐܚܐ ܠܐ ܦܪܩ ܘܓܒܪܐ ܠܐ ܝܗܒ ܠܐܠܗܐ ܦܘܪܩܢܗ

9ܝܩܝܪ ܗܘ ܦܘܪܩܢܐ ܕܢܦܫܗܘܢ ܠܐܝ ܠܥܠܡ

10ܕܬܚܐ ܠܥܠܡ ܥܠܡܝܢ ܘܠܐ ܬܚܙܐ ܚܒܠܐ

11ܟܕ ܬܚܙܐ ܚܟ̈ܝܡܐ ܕܡܝܬܝܢ ܐܟܚܕܐ ܣܟ̈ܠܐ ܘܚܣܝܪ̈ܝ ܪܥܝܢܐ ܕܐܒܕܝܢ ܘܫܒܩܝܢ ܩܢܝܢܗܘܢ ܠܐܚܪ̈ܢܐ

12ܩܒܪ̈ܝܗܘܢ ܒ̈ܬܝܗܘܢ ܠܥܠܡ ܘܡܥܡܪܗܘܢ ܠܕܪܕܪܝܢ ܘܩܪܝܢ ܫܡ̈ܗܐ ܒܐܪܥܐ

13ܒܪܢܫܐ ܒܐܝܩܪܗ ܠܐ ܐܬܒܝܢ ܐܠܐ ܐܫܬܠܡ ܠܒܥܝܪܐ ܘܐܬܕܡܝ ܠܗ̇

14ܗܢܘ ܫܒܝܠܗܘܢ ܬܘܩܠܬܐ ܠܢܦܫܗܘܢ ܘܐܚܪܝܬ ܒܦܘܡܗܘܢ ܢܪܥܘܢ

15ܐܝܟ ܥܢܐ ܠܫܝܘܠ ܢܫܬܠܡܘܢ ܘܡܘܬܐ ܢܪܥܐ ܐܢܘܢ ܘܢܫܬܠܛܘܢ ܒܗܘܢ ܬܪ̈ܝܨܐ ܒܨܦܪܐ ܘܨܘܪܬܗܘܢ ܬܒܠܐ ܫܝܘܠ ܘܡܢ ܬܫ̈ܒܚܬܗܘܢ ܢܬܕܚܩܘܢ

16ܐܠܗܐ ܢܦܪܩܝܗ̇ ܠܢܦܫܝ. ܘܡܢ ܐܝܕܐ ܕܫܝܘܠ ܢܣܩܢܝ

17ܠܐ ܬܕܚܠ ܡܐ ܕܥܬܪ ܓܒܪܐ ܘܣܓܐ ܐܝܩܪܐ ܕܒܝܬܗ

18ܡܛܘܠ ܕܠܐ ܢܣܒ ܡܕܡ ܒܡܘܬܗ ܐܦ ܠܐ ܢܚܬ ܒܬܪܗ ܫܘܒܚܗ

19ܡܛܠ ܕܢܦܫܗ ܗܘ ܡܒܪܟ ܒܚܝ̈ܘܗܝ ܢܘܕܐ ܠܟ ܟܕ ܬܛܐܒ ܠܗ

20ܘܬܡܛܝܘܗܝ ܥܕܡܐ ܠܕܪܐ ܕܐ̈ܒܗܘܗܝ ܥܕܡܐ ܠܥܠܡ ܠܐ ܢܚܙܐ ܢܘܗܪܐ

21ܒܪܢܫܐ ܕܒܐܝܩܪܗ ܠܐ ܐܬܒܝܢ ܐܠܐ ܐܫܬܠܡ ܠܚܝܘܬܐ ܘܐܬܕܡܝ ܠܗ̇

Chapter 50 ܡܙܡܘܪ̈ܐ

1ܐܠܗ ܐ̈ܠܗܝܢ ܡܪܝܐ ܡܠܠ ܘܩܪܗ̇ ܠܐܪܥܐ ܡܢ ܡܕܢܚ̈ܘܗܝ ܕܫܡܫܐ ܘܥܕܡܐ ܠܡܥܪ̈ܒܘܗܝ

2ܡܢ ܨܗܝܘܢ ܟܠܝܠܐ ܡܫܒܚܐ ܐܠܗܐ ܚܘܝ

3ܢܐܬܐ ܐܠܗܐ ܘܠܐ ܢܫܬܘܩ ܘܢܘܪܐ ܬܐܟܘܠ ܩܕܡܘܗܝ ܘܚܕܪܘܗܝ ܬܬܓܘܙܠ ܛܒ

4ܢܩܪܐ ܠܫܡܝܐ ܡܢ ܠܥܠ ܘܐܪܥܐ ܠܡܕܢ ܥܡܗ

5ܐܬܟܢܫܘ ܠܘܬܗ ܓܒ̈ܘܗܝ ܕܡܩܝܡܝܢ ܩܝܡܗ ܥܠ ܕܒܚܬܐ

6ܢܚܘܘܢ ܫܡܝܐ ܙܕܝܩܘܬܗ ܡܛܠ ܕܐܠܗܐ ܗܘ ܕܝܢܐ

7ܫܡܥ ܥܡܝ ܘܐܡܪ ܠܟ ܘܐܝܣܪܝܠ ܐܣܗܕܟ ܐܢܐ ܐܢܐ ܐܠܗܐ ܐܠܗܟ

8ܠܐ ܥܠ ܕܒܚ̈ܝܟ ܐܟܣܟ ܘܥ̈ܠܘܬܟ ܠܘܩܒܠܝ ܐܢܝܢ ܒܟܠܙܒܢ

9ܠܐ ܐܣܒ ܡܢ ܒܝܬܟ ܬܘܪ̈ܐ ܐܦ ܠܐ ܡܢ ܓܙܪܟ ܓܕܝ̈ܐ

10ܡܛܠ ܕܕܝܠܝ ܗܝ ܟܠܗ̇ ܚܝܘܬܐ ܕܕܒܪܐ ܘܒܥܝܪܐ ܕܒܛܘܪ̈ܐ ܘܬܘܪ̈ܐ

11ܝܕܥ ܐܢܐ ܟܘܠܗ̇ ܦܪܚܬܐ ܕܫܡܝܐ ܘܚܝܘܬܐ ܕܕܒܪܐ ܕܝܠܝ ܗܝ

12ܐܢ ܟܦܢ ܐܢܐ ܠܐ ܐܡܪ ܠܟ ܡܛܠ ܕܕܝܠܝ ܗܝ ܬܒܝܠ ܒܡܠܐܗ̇

13ܠܐ ܐܟܠ ܐܢܐ ܒܣܪܐ ܕܐܪ̈ܘܢܐ ܘܕܡܐ ܕܓܕܝ̈ܐ ܠܐ ܫܬܐ ܐܢܐ

14ܕܒܚ ܠܐܠܗܐ ܬܘܕܝܬܐ ܘܫܠܡ ܠܡܪܝܡܐ ܢܕܪ̈ܝܟ

15ܘܩܪܝܢܝ ܒܝܘܡܐ ܕܐܘܠܨܢܐ ܐܥܫܢܟ ܘܬܫܒܚܢܝ

16ܠܚܛܝܐ ܐܡܪ ܠܗ ܐܠܗܐ ܡܐ ܠܟ ܘܠܟܬ̈ܒܐ ܕܦܘܩ̈ܕܢܝ ܕܫܩܠܬ ܩܝܡܝ ܒܦܘܡܟ

17ܐܢܬ ܕܝܢ ܣܢܝܬ ܡܪܕܘܬܝ ܘܫܕܝܬ ܡ̈ܠܝ ܠܒܣܬܪܟ

18ܐܢ ܚܙܐ ܗܘܝܬ ܓܢܒܐ ܪܗܛ ܗܘܝܬ ܥܡܗ ܘܥܡ ܓܝܪܐ ܡܢܬܟ ܣܐܡ ܗܘܝܬ

19ܦܘܡܟ ܡܡܠܠ ܗܘܐ ܒܝܫܬ̈ܐ ܘܠܫܢܟ ܡܡܠܠ ܢܟܠܐ

20ܝܬܒ ܗܘܝܬ ܘܪܢܐ ܒܐܚܘܟ ܘܒܒܪ ܐܡܟ ܡܡܝܩ ܗܘܝܬ

21ܗܠܝܢ ܟܠܗܝܢ ܥܒܕܬ ܘܫܬܩܬ ܠܟ ܣܒܪܬ ܥܘܠܐ ܕܐܟܘܬܟ ܐܗܘܐ ܐܟܣܟ ܕܝܢ ܘܐܣܕܘܪ ܐܢܝܢ ܠܥܢܝ̈ܟ

22ܐܣܬܟܠܘ ܒܗܕܐ ܐܝܠܝܢ ܕܛܥܝܢ ܠܐܠܗܐ ܕܠܡܐ ܢܬܒܪܟܘܢ ܘܠܝܬ ܕܡܦܨܐ

23ܐܝܢܐ ܕܕܒܚ ܬܘܕܝܬܐ ܗܘ ܢܫܒܚܢܝ ܬܡܢ ܐܚܘܝܘܗܝ ܐܘܪܚܐ ܕܦܘܪܩܢܗ ܕܐܠܗܢ

Chapter 51 ܡܙܡܘܪ̈ܐ

3ܪܚܡ ܥܠܝ ܐܠܗܐ ܐܝܟ ܛܝܒܘܬܟ ܘܐܝܟ ܣܘܓܐܐ ܕܪ̈ܚܡܝܟ ܥܛܝ ܚ̈ܛܗܝ

4ܐܣܓܐ ܐܫܝܓܝܢܝ ܡܢ ܥܘܠܝ ܘܡܢ ܚ̈ܛܗܝ ܕܟܢܝ

5ܡܛܠ ܕܣܟ̈ܠܘܬܝ ܝܕܥ ܐܢܐ ܘܚ̈ܛܗܝ ܠܘܩܒܠܝ ܐܢܘܢ ܒܟܠܙܒܢ

6ܠܟ ܒܠܚܘܕܝܟ ܚܛܝܬ ܘܒܝܫܬ̈ܐ ܩܕܡܝܟ ܥܒܕܬ. ܡܛܠ ܕܬܙܕܕܩ ܒܡܠܬܟ ܘܬܙܟܐ ܒܕܝܢܝ̈ܟ

7ܡܛܠ ܕܒܥܘܠܐ ܐܬܒܛܢܬ ܘܒܚ̈ܛܗܐ ܒܛܢܬܢܝ ܐܡܝ

8ܐܢܬ ܕܝܢ ܒܩܘܫܬܐ ܨܒܝܬ ܘܟܣ̈ܝܬܐ ܕܚܟܡܬܟ ܐܘܕܥܬܢܝ

9ܪܘܣ ܥܠܝ ܒܙܘܦܐ ܘܐܬܕܟܐ ܚܠܠܝܢܝ ܒܗ ܘܡܢ ܬܠܓܐ ܐܚܘܪ

10ܐܣܒܥܝܢܝ ܒܘܣܡܟ ܘܚܕܘܬܟ ܘܢܚܕܘܢ ܓܪ̈ܡܝ ܡܟܝ̈ܟܐ

11ܐܗܦܟ ܐ̈ܦܝܟ ܡܢ ܚ̈ܛܗܝ ܘܟܠܗܝܢ ܣܟ̈ܠܘܬܝ ܥܛܝ

12ܠܒܐ ܕܟܝܐ ܒܪܝ ܒܝ ܐܠܗܐ ܘܪܘܚܟ ܬܩܢܬܐ ܚܕܬ ܒܓܘܝ

13ܠܐ ܬܫܕܝܢܝ ܡܢ ܩܕܡܝܟ. ܘܪܘܚܟ ܩܕܝܫܐ ܠܐ ܬܣܒ ܡܢܝ

14ܐܠܐ ܐܗܦܟ ܠܝ ܒܘܣܡܟ ܘܦܘܪܩܢܟ ܘܪܘܚܟ ܡܫܒܚܬܐ ܬܣܡܟܢܝ

15ܕܐܠܦ ܠܥܘ̈ܠܐ ܐܘܪܚܟ ܘܚ̈ܛܝܐ ܠܘܬܟ ܢܬܦܢܘܢ

16ܦܨܢܝ ܡܢ ܕܡܐ ܐܠܗܝ ܐܠܗܐ ܕܙܕܝܩܘܬܝ ܘܢܫܒܚ ܠܫܢܝ ܙܕܝܩܘܬܟ

17ܡܪܝܐ ܦܬܚ ܠܝ ܣܦܘ̈ܬܝ ܘܦܘܡܝ ܢܦܩ ܬܫܒܚ̈ܬܟ

18ܡܛܠ ܕܠܐ ܨܒܝܬ ܒܕܒܚ̈ܐ ܐܦܠܐ ܒܝܩ̈ܕܐ ܫܠܡ̈ܐ ܐܬܪܥܝܬ

19ܕܒܚ̈ܘܗܝ ܕܐܠܗܐ ܪܘܚܐ ܗܝ ܡܟܝܟܬܐ ܠܒܐ ܫܚܝܩܐ ܐܠܗܐ ܠܐ ܡܣܠܐ

20ܐܛܐܒ ܒܨܒܝܢܟ ܠܨܗܝܘܢ ܘܒܢܝ ܫܘܪ̈ܝܗ̇ ܕܐܘܪܫܠܡ

21ܗܝ ܕܝܢ ܬܨܛܒܐ ܒܕܒܚ̈ܐ ܕܩܘܫܬܐ ܘܒܝ̈ܩܕܐ ܫ̈ܠܡܐ ܗܝ ܕܝܢ ܢܣܩܘܢ ܬܘܪ̈ܐ ܥܠ ܡܕܒܚܟ

Chapter 52 ܡܙܡܘܪ̈ܐ

3ܠܡܢܐ ܡܫܬܒܗܪ ܐܢܬ ܒܒܝܫܬܐ ܓܢܒܪܐ ܘܥܠ ܡܚܣܝܐ ܟܠܝܘܡ

4ܥܘܠܐ ܡܬܚܫܒ ܠܫܢܟ ܘܐܝܟ ܡܕܟܝܐ ܕܠܛܝܫ ܥܒܕܬ ܢܟܠܐ

5ܪܚܡܬ ܒܝ̈ܫܬܐ ܡܢ ܛܒ̈ܬܐ ܘܕܓܠܘܬܐ ܡܢ ܡܡܠܠܐ ܕܙܕܝܩܘܬܐ

6ܪܚܡܬ ܠܟܠ ܕܡܡܠܠܝܢ ܥܘܠܐ ܘܠܠܫ̈ܢܐ ܢܟܘ̈ܠܬܢܐ

7ܡܛܘܠ ܗܢܐ ܐܠܗܐ ܢܥܩܪܝܘܗܝ ܘܢܣܚܦܝܘܗܝ ܠܥܠܡ ܡܢ ܡܫܟܢܗ ܘܥܩܪܗ ܡܢ ܐܪܥܐ ܕܚ̈ܝܐ

8ܕܢܚܙܘܢ ܙܕܝܩ̈ܐ ܘܢܚܕܘܢ ܘܢܣܒܪܘܢ ܒܡܪܝܐ

9ܘܢܐܡܪܘܢ ܕܗܢܘ ܓܒܪܐ ܕܠܐ ܥܒܕ ܠܐܠܗܐ ܬܘܟܠܢܗ ܐܠܐ ܐܬܬܟܠ ܥܠ ܣܘܓܐܐ ܕܥܘܬܪܗ ܘܐܬܬܪܝܡ ܒܩܢܝܢܗ

10ܘܐܢܐ ܐܝܟ ܙܝܬܐ ܡܫܒܚܐ ܒܒܝܬܗ ܕܐܠܗܐ ܣܒܪܬ ܒܛܝܒܘܬܗ ܕܐܠܗܐ ܠܥܠܡ ܘܠܥܠܡ ܥܠܡܝܢ

11ܐܘܕܐ ܠܟ ܠܥܠܡ ܕܥܒܕܬ ܘܐܣܒܪ ܫܡܟ ܠܕܪܕܪܝܢ ܠܘܩܒܠ ܙܕܝܩ̈ܝܟ

Chapter 53 ܡܙܡܘܪ̈ܐ

2ܐܡܪ ܥܘܠܐ ܒܠܒܗ ܕܠܝܬ ܐܠܗܐ ܐܬܚܒܠܘ ܘܐܬܛܢܦܘ ܒܥܘܠܗܘܢ ܘܠܝܬ ܕܥܒܕ ܛܒܬܐ

3ܐܠܗܐ ܐܕܝܩ ܡܢ ܫܡܝܐ ܥܠ ܒܢܝܢܫ̈ܐ ܕܢܚܙܐ ܐܢ ܐܝܬ ܕܣܟܘܠܬܢ ܘܒܥܐ ܠܐܠܗܐ

4ܟܠܗܘܢ ܣܛܘ ܐܟܚܕܐ ܘܐܬܛܢܦܘ ܘܠܝܬ ܕܥܒܕ ܛܒܬܐ ܐܦ ܠܐ ܚܕ

5ܘܠܐ ܝܕܥܘ ܟܠ ܥܒ̈ܕܝ ܥܘܠܐ ܐܝܠܝܢ ܕܐܟܠܝܢ ܗܘܘ ܠܥܡܝ ܡܐܟܘܠܬܐ ܕܠܚܡܐ ܘܠܐܠܗܐ ܠܐ ܩܪܘ

6ܬܡܢ ܕܚܠܘ ܕܚܠܬܐ ܐܬܪ ܕܠܝܬ ܗܘܐ ܕܚܠܬܐ ܡܛܠ ܕܐܠܗܐ ܢܒܕܪ ܓܪ̈ܡܝܗܘܢ ܕܐܝܠܝܢ ܕܫܦܪܝܢ ܠܒܢ̈ܝ ܐܢܫܐ ܒܗܬܘ ܡܛܠ ܕܐܠܗܐ ܐܣܠܝ ܐܢܘܢ

7ܡܢ ܢܬܠ ܡܢ ܨܗܝܘܢ ܦܘܪܩܢܐ ܠܐܝܣܪܝܠ ܡܐ ܕܡܗܦܟ ܡܪܝܐ ܫܒܝܬܐ ܕܥܡܗ ܢܕܘܨ ܝܥܩܘܒ ܘܢܚܕܐ ܐܝܣܪܐܝܠ

Chapter 54 ܡܙܡܘܪ̈ܐ

3ܐܠܗܐ ܒܫܡܟ ܦܪܘܩܝܢܝ ܘܒܓܢܒܪܘܬܟ ܕܘܢܝܢܝ

4ܐܠܗܐ ܫܡܥ ܨܠܘܬܝ ܘܨܘܬ ܐܢܝܢ ܠܡ̈ܠܘܗܝ ܕܦܘܡܝ

5ܡܛܠ ܕܢܘܟܪ̈ܝܐ ܩܡܘ ܥܠܝ ܘܥܫܝ̈ܢܐ ܒܥܐܘܗ̇ ܠܢܦܫܝ ܘܠܐ ܚܫܒܘܟ ܐܠܗܐ

6ܐܠܗܐ ܡܥܕܪܢܝ ܡܪܝܐ ܡܣܡܟܢܗ̇ ܕܢܦܫܝ

7ܐܝܬܐ ܒܝܫܬܐ ܥܠ ܒ̈ܥܠܕܒܒܝ ܘܒܩܘܫܬܟ ܫܬܩ ܐܢܘܢ

8ܘܐܢܐ ܒܦܘܪܫܢܐ ܐܕܒܚ ܠܟ ܘܐܘܕܐ ܠܫܡܟ ܡܪܝܐ ܕܛܒ ܗܘ

9ܕܡܢ ܟܠ ܥܩ̈ܢ ܦܨܝܬܢܝ ܘܒܒ̈ܥܠܕܒܒܝ ܚܙܬ ܥܝܢܝ

Chapter 55 ܡܙܡܘܪ̈ܐ

2ܨܘܬ ܐܠܗܐ ܨܠܘܬܝ ܘܠܐ ܬܗܡܐ ܡܢ ܒܥܘܬܝ

3ܫܡܥܝܢܝ ܘܥܢܝܢܝ ܘܐܬܦܢ ܠܓܥܬܝ ܘܫܡܥܝܢܝ

4ܡܛܠ ܒ̈ܥܠܕܒܒܝ ܘܡܛܠ ܐܘܠܨܢܗ ܕܥܘܠܐ ܡܛܠ ܕܨܠܘ ܥܠܝ ܥܘ̈ܠܐ ܘܣܩܪܘܢܝ

5ܘܢܦܠܬ ܒܝ ܕܚܠܬܐ

6ܘܟܣܝܘܢܝ ܛ̈ܠܠܝ ܡܘܬܐ

7ܘܐܡܪܬ ܡܢ ܕܝܢ ܝܗܒ ܠܝ ܓܦ̈ܐ ܐܝܟ ܕܝܘܢܐ ܦܪܚܬ ܘܫܟܢܬ

8ܘܐܪܚܩܬ ܦܪܚܬ ܘܫܪܝܬ ܒܡܕܒܪܐ

9ܘܟܬܪܬ ܠܡܢ ܕܡܦܨܐ ܠܝ ܡܢ ܪܘܚܐ ܕܥܠܥܠܐ

10ܛܒܥ ܡܪܝ ܗܘܦܟܐ ܕܠܫܢܝ̈ܗܘܢ ܡܛܠ ܕܚܙܝܬ ܚܪܝܢܐ ܘܕܝܢܐ ܒܩܪܝܬܐ

11ܒܐܝܡܡܐ ܘܒܠܠܝܐ ܟܪܝܟܝܢ ܠܫܘܪ̈ܝܗ̇ ܥܘܠܐ ܘܫܘܩܪܐ ܒܓܘܗ̇

12ܘܥܬܐ ܘܠܐ ܥܢܕ ܡܢ ܫܘܩ̈ܝܗ̇ ܬܘܟܐ ܘܢܟܠܐ

13ܠܐ ܗܘܐ ܓܝܪ ܒܥܠܕܒܒܝ ܚܣܕܢܝ ܕܐܣܝܒܪ ܐܦ ܠܐ ܣܢܐܝ ܐܬܬܪܝܡ ܥܠܝ ܕܐܛܫܐ ܡܢܗ

14ܐܢܬ ܗܘ ܒܪܢܫܐ ܕܐܟܘܬܝ ܩܪܝܒܝ ܘܪܚܡܝ

15ܕܐܝܟ ܚܕܐ ܠܥܣܢ ܫܪܘܬܐ ܒܒܝܬܗ ܕܐܠܗܐ ܟܕ ܡܗܠܟܝܢ ܗܘܝܢ ܒܐܘܝܘܬܐ

16ܐܝܬܐ ܥܠܝܗܘܢ ܡܘܬܐ ܘܢܚܬܘܢ ܟܕ ܚܝܝ̈ܢ ܠܫܝܘܠ ܡܛܠ ܕܒܝܫܬܐ ܐܝܬ ܒܓܘܗܘܢ

17ܐܢܐ ܕܝܢ ܠܐܠܗܐ ܐܩܪܐ ܘܐܠܗܐ ܢܦܪܩܢܝ

18ܒܪܡܫܐ ܘܒܨܦܪܐ ܘܒܛܗܪܐ ܐܪܢܐ ܘܐܡܪ ܘܐܫܡܥ ܩܠܝ

19ܦܨܗ̇ ܠܢܦܫܝ ܡܢ ܐܝܠܝܢ ܕܚܟܡܝܢ ܠܝ ܡܛܠ ܕܒܚܪܝܢܐ ܗܘܘ ܥܡܝ

20ܢܫܡܥ ܐܠܗܐ ܘܢܡܟܟ ܐܢܘܢ ܗܘ ܕܐܝܬܘܗܝ ܡܢ ܩܕܡ ܥܠܡ̈ܐ ܠܝܬ ܠܗܘܢ ܬܚܠܘܦܐ ܘܠܐ ܕܚܠܘ ܡܢ ܐܠܗܐ

21ܐܘܫܛܘ ܐܝܕܐ ܥܠ ܩܪܝܒܗ ܘܛܘܫܘ ܩܝܡܗ

22ܐܬܕܠܚܘ ܡܢ ܪܘܓܙܐ ܕܐ̈ܦܘܗܝ ܘܡܢ ܚܡܬܐ ܕܠܒܗ ܪ̈ܟܝܟܢ ܡ̈ܠܘܗܝ ܡܢ ܡܫܚܐ ܘܗ̈ܢܝܢ ܠܘ̈ܠܝܬܐ

23ܫܕܝ ܨܦܬܟ ܥܠ ܡܪܝܐ ܘܗܘ ܢܬܪܣܝܟ ܘܠܐ ܢܬܠ ܠܥܠܡ ܙܘܥܬܐ ܠܙܕܝܩ̈ܘܗܝ

24ܐܢܬ ܕܝܢ ܐܠܗܐ ܐܚܬ ܐܢܘܢ ܠܓܘܒܐ ܕܐܒܕܢܐ ܠܓܒܪ̈ܐ ܐܫ̈ܕܝ ܕܡܐ ܘܢ̈ܟܠܝ ܢܟܠܐ ܘܠܐ ܢܫܠܡܘܢ ܝܘܡ̈ܬܗܘܢ ܘܐܢܐ ܐܣܒܪ ܒܟ

Chapter 56 ܡܙܡܘܪ̈ܐ

2ܪܚܡ ܥܠܝ ܐܠܗܐ ܡܛܠ ܕܕܫܢܝ ܒܪܢܫܐ. ܘܝܘܡܐ ܟܠܗ ܩܪܒܬܢܐ ܐܠܨܢܝ

3ܕܫܘܢܝ ܒ̈ܥܠܕܒܒܝ ܟܠܗ ܝܘܡܐ ܡܛܠ ܕܣܘܓܐܐ ܕܩܪ̈ܒܬܢܐ ܐܬܬܪܝܡ ܥܠܝ

4ܒܐܝܡܡܐ ܠܐ ܐܕܚܠ ܡܛܠ ܕܥܠܝܟ ܗܘ ܬܟܝܠ ܐܢܐ

5ܒܐܠܗܐ ܐܫܬܒܚ ܒܐܠܗܐ ܣܒܪܬ ܠܐ ܐܕܚܠ ܡܢܐ ܥܒܕ ܠܝ ܒܪܢܫܐ

6ܟܠܗ ܝܘܡܐ ܡܬܡܠܟܝܢ ܗܘܘ ܥܠܝ ܘܡܬܚܫܒܝܢ ܗܘܘ ܥܠܝ ܒܝܫܬܐ

7ܢܛܫܘܢ ܘܢܥܡܪܘܢ ܘܗܢܘܢ ܥܩ̈ܒܝ ܢܛܪܘܢ ܐܝܟ ܕܣܟܝܘ ܠܢܦܫܝ

8ܘܐܡܪܘ ܕܠܝܬ ܠܗ ܡܦܨܝܢܐ ܒܪܘܓܙܐ ܕܥܡ̈ܡܐ ܕܘܢ ܐܢܘܢ ܐܠܗܐ

9ܬܘܕܝܬܝ ܚܘܝܬܟ ܣܝܡ ܕܡ̈ܥܝ ܩܕܡܝܟ ܘܒܣܦܪܟ

10ܗܝܕܝܢ ܢܗܦܟܘܢ ܒ̈ܥܠܕܒܒܝ ܠܒܣܬܪܗܘܢ ܘܐܕܥ ܕܐܠܗܐ ܐܝܬ ܠܝ

11ܠܡܠܬܗ ܕܐܠܗܐ ܐܫܒܚ

12ܒܐܠܗܐ ܬܟܝܠ ܐܢܐ ܠܐ ܐܕܚܠ ܡܢܐ ܥܒܕ ܠܝ ܒܪܢܫܐ

13ܠܟ ܐܠܗܐ ܐܫܠܡ ܢܕܪ̈ܝ ܘܒܬܘܕܝܬܐ ܐܕܒܚ ܠܟ

14ܡܛܠ ܕܦܨܝܬ ܢܦܫܝ ܡܢ ܡܘܬܐ ܘܪ̈ܓܠܝ ܡܢ ܫܘܪ̈ܥܬܐ ܕܐܫܦܪ ܩܕܡܝܟ ܐܠܗܐ ܒܐܪܥܐ ܕܚ̈ܝܐ

Chapter 57 ܡܙܡܘܪ̈ܐ

2ܪܚܡ ܥܠܝ ܐܠܗܐ ܡܛܠ ܕܒܟ ܗܘ ܡܣܒܪܐ ܢܦܫܝ ܘܒܛܠܠܐ ܕܟܢ̈ܦܝܟ ܐܣܬܬܪ ܥܕܡܐ ܕܢܥܒܪ ܕܠܘܚܝܐ

3ܐܩܪܐ ܠܐܠܗܐ ܡܪܝܡܐ ܘܠܐܠܗܐ ܦܪܘܩܝ

4ܕܫܕܪ ܡܢ ܫܡܝܐ ܘܦܪܩܢܝ ܘܚܣܕ ܠܒ̈ܥܠܕܒܒܝ ܫܕܪ ܐܠܗܐ ܛܝܒܘܬܗ ܘܩܘܫܬܗ

5ܘܦܪܩ ܢܦܫܝ ܡܢ ܟܠܒ̈ܐ ܘܕܡܟܬ ܟܕ ܕܠܝܚ ܐܢܐ ܒܢܝܢܫ̈ܐ ܫܢ̈ܝܗܘܢ ܢܝܙ̈ܟܐ ܘܓܐܪ̈ܐ ܘܠܫܢܗܘܢ ܐܝܟ ܣܝܦܐ ܚܪܝܦܐ

6ܐܬܬܪܝܡ ܥܠ ܫܡܝܐ ܐܠܗܐ ܘܥܠ ܟܠܗ̇ ܐܪܥܐ ܐܝܩܪܟ

7ܡܨܝܕܬܐ ܬܩܢܘ ܠܪ̈ܓܠܝ ܘܓܘܡܨܐ ܚܦܪܘ ܠܢܦܫܝ ܘܢܦܠܘ ܒܓܘܗ

8ܡܬܩܢ ܗܘ ܠܒܝ ܐܠܗܐ ܡܬܩܢ ܗܘ ܠܒܝ ܐܫܒܚ ܘܐܙܡܪ

9ܐܬܬܥܝܪ ܟܢܪܝ ܐܬܬܥܝܪ ܩܝܬܪܐ ܘܟܢܪܐ ܘܐܢܐ ܐܬܬܥܝܪ ܒܨܦܪܐ

10ܐܘܕܐ ܠܟ ܒܥܡ̈ܡܐ ܐܠܗܐ ܘܠܫܡܟ ܐܙܡܪ ܒܐ̈ܡܘܬܐ

11ܡܛܠ ܕܐܬܬܪܝܡܬ ܥܕܡܐ ܠܫܡܝܐ ܛܝܒܘܬܟ ܘܥܕܡܐ ܠܫܡ̈ܝ ܫܡܝܐ ܗܝܡܢܘܬܟ

12ܐܬܬܪܝܡ ܥܠ ܫܡܝܐ ܐܠܗܐ ܘܥܠ ܟܠܗ̇ ܐܪܥܐ ܐܝܩܪܟ

Chapter 58 ܡܙܡܘܪ̈ܐ

2ܐܢ ܫܪܝܪܐܝܬ ܙܕܝܩܘܬܐ ܡܡܠܠܝܢ ܐܢܬܘܢ ܘܬܪܝܨܘܬܐ ܕܝܢܝܢ ܐܢܬܘܢ ܒܢ̈ܝ ܐܢܫܐ

3ܗܐ ܟܠܟܘܢ ܥܘܠܐ ܡܡܠܠܝܢ ܐܢܬܘܢ ܒܐܪܥܐ ܘܒܥܘܠܐ ܡܥܪ̈ܙܠܢ ܐܝ̈ܕܝܟܘܢ

4ܐܬܦܪܫܘ ܥܘ̈ܠܐ ܡܢ ܟܪܣܐ ܘܛܥܘ ܡܢ ܡܪܒܥܐ ܕܡܡܠܠܝܢ ܕܓܠܘܬܐ

5ܚܡܬܗܘܢ ܐܝܟ ܕܚܘܝܐ ܚܪܡܢܐ ܘܐܝܟ ܕܐܣܦܣ ܚܪܫܬܐ ܕܡܣܟܪܐ ܐ̈ܕܢܝܗ̇

6ܕܠܐ ܬܫܡܥ ܩܠܐ ܕܠܚܘܫܐ ܘܕܚܒܪܐ ܘܕܚܟܝܡܐ

7ܐܠܗܐ ܢܬܒܪ ܫܢܝ̈ܗܘܢ ܒܦܘܡܗܘܢ ܘܢܝ̈ܒܝܗܘܢ ܕܐܪ̈ܝܘܬܐ ܥܩܪ ܡܪܝܐ

8ܢܣܬܠܘܢ ܐܝܟ ܡ̈ܝܐ ܕܡܬܐܫܕܝܢ ܘܢܫܕܐ ܓܐܪ̈ܘܗܝ ܥܕܡܐ ܕܢܣܘܦܘܢ

9ܐܝܟ ܫܥܘܬܐ ܕܡܬܦܫܪܐ ܘܢܦܠܐ ܡܢ ܩܕܡ ܢܘܪܐ ܢܬܚܪܒܘܢ ܢܦܠܬ ܢܘܪܐ ܘܠܐ ܚܙܘ ܘܫܡܫܐ ܘܠܐ ܐܣܬܟܠܘ

10ܢܗܘܘܢ ܟܘܒܝ̈ܗܘܢ ܗ̈ܛܛܐ ܘܪܘܓܙܐ ܢܕܠܚ ܐܢܘܢ

11ܢܚܕܐ ܙܕܝܩܐ ܕܚܙܐ ܦܘܪܥܢܐ ܘܐ̈ܝܕܘܗܝ ܢܫܝܓ ܒܕܡܗ ܕܪܫܝܥܐ

12ܢܐܡܪ ܒܪܢܫܐ ܐܝܬ ܟܝ ܦܐܪ̈ܐ ܠܙܕܝܩܐ ܐܝܬ ܐܠܗܐ ܕܢܕܘܢ ܐܢܘܢ ܒܐܪܥܐ

Chapter 59 ܡܙܡܘܪ̈ܐ

2ܦܨܢܝ ܡܢ ܒ̈ܥܠܕܒܒܝ ܐܠܗܐ ܘܡܢ ܐܝܠܝܢ ܕܩܝܡܝܢ ܥܠܝ ܐܪܝܡܝܢܝ

3ܦܨܢܝ ܡܢ ܥܒ̈ܕܝ ܫܘܩܪܐ ܘܡܢ ܓܒܪ̈ܐ ܐܫ̈ܕܝ ܕܡܐ ܦܪܘܩܝܢܝ

4ܡܛܠ ܕܗܢܘܢ ܟܡܢܘ ܠܢܦܫܝ ܘܐܥܫܢܘ ܥܠܝ ܒܝܫܘܬܗܘܢ ܠܐ ܒܣܟ̈ܠܘܬܝ ܘܠܐ ܒܚ̈ܛܗܝ ܡܪܝ

5ܕܠܐ ܒܣܟܠܘܬܐ ܪܗܛܘ ܥܠܝ ܘܐܬܛܝܒܘ ܥܠܝ ܐܬܬܥܝܪ ܘܚܙܝ

6ܐܢܬ ܡܪܝܐ ܐܠܗܐ ܚܝܠܬܢܐ ܐܠܗܗ ܕܐܝܣܪܝܠ ܐܬܬܥܝܪ ܘܦܩܘܕ ܠܟܠܗܘܢ ܥܡ̈ܡܐ ܘܠܐ ܬܫܒܘܩ ܠܟܠܗܘܢ ܥܘ̈ܠܐ

7ܢܗܦܟܘܢ ܒܪܡܫܐ ܘܢܥܘܘܢ ܐܝܟ ܟ̈ܠܒܐ ܘܢܬܟܪܟܘܢ ܡܕܝܢܬܐ

8ܡܐܡܪܐ ܕܦܘܡܗܘܢ ܣܦܣܝܪܐ ܒܣ̈ܦܘܬܗܘܢ ܘܐܡܪܝܢ ܕܡܢܘ ܫܡܥ

9ܘܐܢܬ ܡܪܝܐ ܓܚܟ ܥܠܝܗܘܢ ܘܡܝܩ ܥܠ ܟܠܗܘܢ ܥܡ̈ܡܐ

10ܐܠܗܐ ܠܟ ܐܫܒܚ ܡܛܠ ܕܐܢܬ ܗܘ ܒܝܬ ܓܘܣܝ

11ܐܠܗܐ ܛܝܒܘܬܟ ܬܩܕܡܢܝ ܐܠܗܐ ܚܘܢܝ ܒܒ̈ܥܠܕܒܒܝ

12ܠܐ ܬܩܛܘܠ ܐܢܘܢ ܕܠܐ ܢܛܥܘܢ ܠܥܡܝ ܐܠܐ ܐܙܝܥ ܐܢܘܢ ܒܚܝܠܟ ܘܐܢܝܕ ܐܢܘܢ ܡܪܝܐ ܬܘܟܠܢܝ

13ܚܛܝܬܐ ܕܦܘܡܗܘܢ ܡܠܠ ܣ̈ܦܘܬܗܘܢ ܢܬܬܚܕܘܢ ܒܫܘܒܗܪܗܘܢ ܡܛܠ ܕܠܘܛܬܐ ܘܕܓܠܘܬܐ ܡܫܬܥܝܢ

14ܐܘܒܕ ܐܢܘܢ ܒܪܘܓܙܟ ܐܘܒܕ ܐܢܘܢ ܘܠܐ ܢܫܬܟܚܘܢ ܕܢܕܥܘܢ ܕܐܠܗܐ ܫܠܝܛ ܥܠ ܝܥܩܘܒ ܘܥܠ ܥܒܪ̈ܝܗ̇ ܕܐܪܥܐ

15ܢܗܦܟܘܢ ܒܪܡܫܐ ܘܢܥܘܘܢ ܐܝܟ ܟܠܒ̈ܐ ܘܢܬܟܪܟܘܢ ܡܕܝܢܬܐ

16ܢܒܥܘܢ ܠܡܐܟܠ ܘܠܐ ܢܣܒܥܘܢ ܘܠܐ ܢܒܘܬܘܢ

17ܘܐܢܐ ܐܫܒܚ ܠܚܝܠܟ ܘܐܫܒܚ ܒܨܦܪܐ ܠܛܝܒܘܬܟ ܡܛܠ ܕܗܘܝܬ ܠܝ ܒܝܬ ܓܘܣܐ ܘܡܦܨܝܢܐ ܒܝܘܡܐ ܕܐܘܠܨܢܐ

18ܐܠܗܐ ܠܟ ܐܙܡܪ ܡܛܠ ܕܐܢܬ ܗܘ ܐܠܗܐ ܕܒܝܬ ܓܘܣܝ ܘܐܠܗܐ ܕܛܝܒܘܬܝ

Chapter 60 ܡܙܡܘܪ̈ܐ

3ܐܠܗܐ ܛܥܝܬܢܝ ܘܕܚܩܬܢ ܘܪܓܙܬ ܥܠܝܢ

4ܐܙܝܥܬܗ̇ ܠܐܪܥܐ ܘܦܬܚܬܗ̇ ܥܨܘܒ ܬܒܪܗ̇ ܡܛܠ ܕܐܬܟܪܗܬ

5ܚܘܝܬ ܐܢܘܢ ܠܥܡܟ ܩܫܝ̈ܬܐ ܘܐܫܩܝܬ ܐܢܘܢ ܚܡܪܐ ܬܛܝܪܐ

6ܝܗܒܬ ܠܕܚ̈ܠܝܟ ܐܬܐ ܕܠܐ ܢܥܪܩܘܢ ܡܢ ܩܕܡ ܩܫܬܟ

7ܡܛܠ ܕܢܙܕܝܢܘܢ ܚܒܝ̈ܒܝܟ ܦܪܘܩܝܢܝ ܒܝܡܝܢܟ ܘܥܢܝܢܝ

8ܐܠܗܐ ܡܠܠ ܒܩܘܕܫܗ ܐܬܚܝܠ ܐܢܐ ܘܐܦܠܓ ܠܫܟܝܡ ܘܠܥܘܡܩܐ ܕܣܟܘܬ ܐܡܫܘܚ

9ܕܝܠܝ ܗܘ ܓܠܥܕ ܘܕܝܠܝ ܗܘ ܡܢܫܐ ܐܦܪܝܡ ܡܥܫܢܢܗ ܕܪܝܫܝ ܝܗܘܕܐ ܡܠܟܝ

10ܡܘܐܒ ܫܝܓܬܐ ܕܪ̈ܓܠܝ ܥܠ ܐܕܘܡ ܐܫܪܐ ܡܣ̈ܢܝ ܘܥܠ ܦܠܫܬ ܐܩܥܐ

11ܡܢܘ ܢܕܒܪܢܝ ܥܕܡܐ ܠܐܕܘܡ ܘܡܢܘ ܢܘܒܠܢܝ ܠܩܪܝܬܐ ܥܫܝܢܬܐ

12ܕܗܐ ܐܢܬ ܐܠܗܐ ܛܥܝܬܢܝ ܘܠܐ ܢܦܩ ܐܢܬ ܒܚܝܠܢ

13ܗܒ ܠܢ ܥܘܕܪܢܐ ܥܠ ܒ̈ܥܠܕܒܒܝܢ ܡܛܠ ܕܕܓܠ ܗܘ ܦܘܪܩܢܗ ܕܒܪܢܫܐ

Chapter 61 ܡܙܡܘܪ̈ܐ

2ܫܡܥ ܐܠܗܐ ܨܠܘܬܝ ܘܨܘܬ ܠܒܥܘܬܝ

3ܡܢ ܣ̈ܘܦܝܗ̇ ܕܐܪܥܐ ܠܟ ܗܘ ܩܪܐ ܐܢܐ ܒܛܘܪܦܗ ܕܠܒܝ ܕܥܠ ܟܐܦܐ ܐܪܝܡܬܢܝ ܘܒܝܐܬܢܝ

4ܡܛܠ ܕܗܘܝܬ ܠܝ ܒܝܬ ܓܘܣܐ ܘܡܓܕܠܐ ܪܡܐ ܡܢ ܩܕܡ ܒ̈ܥܠܕܒܒܝ

5ܕܐܥܡܪ ܒܡܫܟܢܟ ܠܥܠܡܝܢ ܘܐܣܬܬܪ ܒܛܠܠܐ ܕܟܢ̈ܦܝܟ

6ܡܛܠ ܕܐܢܬ ܐܠܗܐ ܫܡܥܬ ܢܕܪ̈ܝ ܘܝܗܒܬ ܝܘܪܬܢܐ ܠܕܚ̈ܠܝ ܫܡܟ

7ܘܐܘܣܦܬ ܝܘܡ̈ܬܐ ܥܠ ܝܘܡ̈ܬܗ ܕܡܠܟܐ ܘܫ̈ܢܘܗܝ ܠܕܪܕܪܝܢ

8ܕܢܬܩܝܡ ܠܥܠܡ ܩܕܡ ܐܠܗܐ ܛܝܒܘܬܐ ܘܩܘܫܬܐ ܡܢܘ ܢܛܪܝܗ̇

9ܗܟܢ ܐܙܡܪ ܠܫܡܟ ܠܥܠܡ ܥܠܡܝܢ ܟܕ ܐܫܠܡ ܢܕܪ̈ܝ ܝܘܡ ܡܢ ܝܘܡ

Chapter 62 ܡܙܡܘܪ̈ܐ

2ܠܐܠܗܐ ܡܣܟܝܐ ܢܦܫܝ ܕܡܢܗ ܗܘ ܦܘܪܩܢܝ

3ܘܗܘܝܘ ܐܠܗܝ ܘܦܪܘܩܝ ܘܒܝܬ ܓܘܣܝ ܪܒܐ ܕܠܐ ܐܙܘܥ

4ܥܕܡܐ ܠܐܡܬܝ ܡܬܓܪܓܝܢ ܐܢܬܘܢ ܥܠ ܓܒܪܐ ܕܬܩܛܠܘܢ ܐܝܟ ܐܣܬܐ ܕܡܛܬ ܘܐܝܟ ܣܝܓܐ ܕܕܚܝܩ

5ܐܠܐ ܐܦ ܡܢ ܐܝܩܪܗ ܐܬܪܥܝܘ ܠܡܕܚܝܗ ܘܪܗܛܘ ܒܕܓܠܘܬܐ ܒܦܘܡܗܘܢ ܡܒܪܟܝܢ ܘܒܠܒܗܘܢ ܠܝܛܝܢ

6ܠܐܠܗܐ ܣܟܝ ܢܦܫܝ ܕܡܢܗ ܗܘ ܦܘܪܩܢܝ

7ܘܗܘܝܘ ܐܠܗܝ ܘܦܪܘܩܝ ܘܒܝܬ ܓܘܣܝ ܕܠܐ ܐܙܘܥ

8ܒܐܠܗܐ ܗܘ ܦܘܪܩܢܝ ܘܐܝܩܪܝ ܬܘܩܦܝ ܘܥܕܘܪܝ ܘܣܒܪܝ ܐܠܗܐ ܗܘ

9ܣܒܪܘ ܒܗ ܒܟܠ ܫܥܐ ܥܡܐ ܘܐܫܘܕܘ ܩܕܡܘܗܝ ܠܒܟܘܢ ܡܛܠ ܕܐܠܗܐ ܗܘ ܣܬܪܐ ܕܝܠܢ

10ܘܐܝܟ ܠܗܓܐ ܐܢܘܢ ܟܠܗܘܢ ܒܢ̈ܝ ܐܢܫܐ ܕܓ̈ܠܐ ܕܒܡܐܣܬܐ ܡܥܠܝܢ ܘܣܪܝܩܝܢ ܐܟܚܕܐ

11ܠܐ ܬܬܟܠܘܢ ܥܠ ܛܠܘܡܝܐ ܘܚܛܘܦܝܐ ܠܐ ܬܪܚܡܘܢ ܩܢܝܢܐ ܡܐ ܕܣܓܐ ܠܐ ܢܚܕܐ ܒܗ ܠܒܟܘܢ

12ܚܕܐ ܗܝ ܕܐܡܪ ܐܠܗܐ ܘܕܬܪ̈ܬܝܢ ܗܠܝܢ ܫܡܥܬ ܡܛܠ ܕܥܘܫܢܐ ܕܐܠܗܐ ܗܘ

13ܘܠܟ ܡܪܝܐ ܛܝܒܘܬܐ ܡܛܠ ܕܐܢܬ ܦܪܥ ܐܢܬ ܠܓܒܪܐ ܐܝܟ ܥܒ̈ܕܘܗܝ

Chapter 63 ܡܙܡܘܪ̈ܐ

2ܐܠܗܝ ܐܠܗܝ ܐܢܬ ܐܣܟܐ ܠܟ ܨܗܝܐ ܗܝ ܠܟ ܢܦܫܝ ܘܡܣܟܐ ܠܟ ܒܣܪܝ ܐܝܟ ܐܪܥܐ ܨܗܝܬܐ ܘܡܛܪܦܬܐ ܕܒܥܝܐ ܡ̈ܝܐ

3ܗܟܢ ܚܪܬܟ ܒܩܘܫܬܐ ܕܐܚܙܐ ܥܘܫܢܟ ܘܐܝܩܪܟ

4ܡܛܠ ܕܛܒܝ̈ܢ ܪ̈ܚܡܝܟ ܡܢ ܚ̈ܝܐ ܘܣܦܘ̈ܬܝ ܢܫܒܚ̈ܢܟ

5ܗܟܢ ܐܒܪܟܟ ܒܚ̈ܝܝ ܘܒܫܡܟ ܐܪܝܡ ܐ̈ܝܕܝ

6ܐܝܟ ܫܘܡܢܐ ܘܐܝܟ ܬܪܒܐ ܬܕܗܢ ܢܦܫܝ ܘܒܣ̈ܦܘܬܐ ܕܫܘܒܚܐ ܢܫܒܚܟ ܦܘܡܝ

7ܐܬܕܟܪܬܟ ܥܠ ܬܫܘܝܬܝ ܘܒ̈ܠܝܠܘܬܐ ܪܢܝܬ ܒܟ

8ܡܛܠ ܕܗܘܝܬ ܠܝ ܡܥܕܪܢܐ ܘܒܛܠܠܐ ܕܟܢ̈ܦܝܟ ܐܫܬܒܚ

9ܢܦܩܬ ܢܦܫܝ ܒܬܪܟ ܘܥܠܝ ܣܡܟܬ ܝܡܝܢܟ

10ܗܢܘܢ ܒܥܘ ܕܢܘܒܕܘܢ ܠܢܦܫܝ ܢܥܠܘܢ ܒܬܚ̈ܬܝܬܗ̇ ܕܐܪܥܐ

11ܢܫܬܠܡܘܢ ܠܚܪܒܐ ܘܡܐܟܘܠܬܐ ܠܬܥ̈ܠܐ ܢܗܘܘܢ

12ܘܡܠܟܐ ܢܚܕܐ ܒܐܠܗܐ ܘܢܫܬܒܗܪ ܟܠ ܕܝܡܐ ܒܗ ܡܛܠ ܕܢܣܬܟܪ ܦܘܡܗܘܢ ܕܕܓ̈ܠܐ

Chapter 64 ܡܙܡܘܪ̈ܐ

2ܫܡܥ ܐܠܗܐ ܩܠܝ ܟܕ ܐܬܟܫܦ ܠܟ ܘܡܢ ܕܚܠܬܐ ܕܒ̈ܥܠܕܒܒܝ ܢܛܪܝܢܝ

3ܣܬܪܝܢܝ ܡܢ ܥܘܠܗ ܕܒܝܫܐ ܘܡܢ ܗܘܦܟܐ ܕܥܒ̈ܕܝ ܥܘܠܐ

4ܕܠܛܫܘ ܠܫܢܗܘܢ ܐܝܟ ܣܝܦܐ ܘܡܠܬܗܘܢ ܐܝܟ ܓܐܪܐ

5ܠܡܫܕܐ ܒܛܘܫܝܐ ܒܬܡܝܡܐ ܡܢ ܫܠܝܐ ܢܫܕܘܢ ܒܗ ܘܠܐ ܢܬܚܙܘܢ

6ܘܐܥܫܢܘ ܡܠܬܗܘܢ ܒܝܫܬܐ ܘܐܬܚܫܒܘ ܠܡܛܡܪ ܦܚ̈ܐ ܘܐܡܪܘ ܕܡܢܘ ܚܙܐ ܠܢ

7ܐܬܚܫܒܘ ܥܘ̈ܠܐ ܘܣܦܘ ܠܡܒܨܐ ܥܘܠܐ ܡܢ ܓܘܗ ܕܒܪ ܐܢܫܐ ܘܡܢ ܠܒܗ ܥܡܝܩܐ

8ܢܬܬܪܝܡ ܐܠܗܐ ܘܢܫܕܐ ܒܗܘܢ ܓܐܪܐ ܡܢ ܫܠܝܐ

9ܘܢܬܟܪܗܘܢ ܠܫܢܝ̈ܗܘܢ ܘܢܕܚܠܘܢ ܟܠ ܕܚܙܝܢ ܠܗܘܢ

10ܘܢܕܚܠܘܢ ܟܠ ܒܢ̈ܝ ܐܢܫܐ ܘܢܚܘܘܢ ܥܒ̈ܕܘܗܝ ܕܐܠܗܐ ܘܒܥܒܕ ܐ̈ܝܕܘܗܝ ܢܚܘܪܘܢ

11ܢܚܕܘܢ ܙܕܝܩ̈ܐ ܒܡܪܝܐ ܘܢܬܬܟܠܘܢ ܥܠܘܗܝ ܘܢܫܒܚܘܢܝܗܝ ܟܠ ܬܪ̈ܝܨܝ ܠܒܐ

Chapter 65 ܡܙܡܘܪ̈ܐ

2ܠܟ ܝܐܝܐ ܬܫܒܘܚܬܐ ܐܠܗܐ ܒܨܗܝܘܢ ܘܠܟ ܡܬܦܪܥ ܢܕܪܐ

3ܫܡܥ ܨܠܘܬܝ ܠܘܬܟ ܟܠܒܣܪ ܢܐܬܐ

4ܡ̈ܠܐ ܕܥܘ̈ܠܐ ܥܫܢܝܢ ܡܢܝ ܘܚ̈ܛܗܝ ܐܢܬ ܬܚܣܐ ܐܢܘܢ

5ܛܘܒܘܗܝ ܠܡܢ ܕܨܒܐ ܐܢܬ ܒܗ ܘܡܩܪܒ ܐܢܬ ܠܗ ܕܢܥܡܪ ܒܕܝܪܟ ܘܢܣܒܥ ܡܢ ܛܒܬ̈ܗ ܕܒܝܬܟ ܘܡܢ ܩܕܝܫܘܬܗ ܕܗܝܟܠܟ

6ܘܡܢ ܙܕܝܩܘܬܟ ܕܚܝܠܬܐ ܥܢܝܢܝ ܐܠܗܐ ܦܪܘܩܢ ܣܒܪܐ ܕܟܠܗܘܢ ܣܘ̈ܦܝܗ̇ ܕܐܪܥܐ ܘܕܥܡ̈ܡܐ ܪ̈ܚܝܩܐ

7ܡܬܩܢ ܛܘܪ̈ܐ ܒܚܝܠܗ ܘܡܬܥܫܢ ܒܓܢܒܪܘܬܗ

8ܡܫܬܩ ܡܚܫ̈ܘܠܐ ܕܝܡ̈ܡܐ ܘܩܠܐ ܕܓܠܠܝ̈ܗܘܢ ܢܬܕܠܚܘܢ ܥܡ̈ܡܐ

9ܘܢܕܚܠܘܢ ܥܡܘܪ̈ܝܗ̇ ܕܐܪܥܐ ܡܢ ܐܬ̈ܘܬܟ ܘܡܢ ܡܦܩ̈ܝ ܨܦܪܐ ܘܪܡܫܐ ܒܫܘܒܚܐ

10ܐܬܕܟܪܬܗ̇ ܠܐܪܥܐ ܐܫܠܝܬܗ̇ ܘܒܣܘܓܐܐ ܐܥܬܪܬܗ̇ ܬ̈ܦܐ ܕܐܠܗܐ ܡ̈ܠܝܢ ܡ̈ܝܐ ܛܝܒܬ ܡܐܟܘܠܬܗܘܢ ܟܕ ܬܩܢܬܗ̇

11ܟܪ̈ܒܝܗ̇ ܐܪܘܝܬ ܕܢܬܪܒܘܢ ܦܐܪ̈ܝܗ̇ ܒܪ̈ܣܝܣܐ ܬܬܪܒܐ ܘܡܘܥܝܬܗ̇ ܬܬܒܪܟ

12ܒܪܟ ܟܠܝܠܐ ܕܫܢܬܐ ܒܛܝܒܘܬܟ ܘܥ̈ܓܠܝܟ ܢܣܒܥܘܢ ܬܕܐܐ

13ܘܢܣܒܥܘܢ ܡܢ ܕܝܪ̈ܐ ܕܒܡܕܒܪܐ ܒܫܘܒܚܐ ܪ̈ܡܬܐ ܢܬܚ̈ܙܩܢ

14ܘܢܠܒܫܘܢ ܫܡܝ̈ܢܐ ܕܥܢܐ ܘܥܘ̈ܡܩܐ ܢܬܡܠܘܢ ܥܒܘܪܐ ܘܢܪܘܙܘܢ ܘܢܫܒܚܘܢ

Chapter 66 ܡܙܡܘܪ̈ܐ

1ܫܒܚܘ ܠܐܠܗܐ ܟܠܗ̇ ܐܪܥܐ

2ܙܡܪܘ ܠܐܝܩܪܐ ܕܫܡܗ ܙܡܪܘ ܠܐܝܩܪܐ ܕܬܫܒܘܚܬܗ

3ܐܡܪܘ ܠܐܠܗܐ ܡܐ ܕܚܝ̈ܠܝܢ ܥܒ̈ܕܝܟ ܒܣܘܓܐܐ ܕܥܘܫܢܟ ܢܬܟܬܒܘܢ ܠܟ ܒܥ̈ܠܕܒܒܝܟ

4ܒܟܠܗ̇ ܐܪܥܐ ܢܣܓܕܘܢ ܠܟ ܘܢܙܡܪܘܢ ܠܟ ܘܢܫܒܚܘܢ ܠܫܡܟ ܠܥܠܡܝܢ

5ܘܢܐܡܪܘܢ ܬܘ ܚܙܘ ܥܒ̈ܕܘܗܝ ܕܐܠܗܐ. ܕܣ̈ܓܝܐܢ ܬܕܡܪ̈ܬܗ ܥܠ ܒܢܝ̈ ܐܢܫܐ

6ܕܗܦܟ ܝܡܐ ܠܝܒܫܐ ܘܠܢܗܪܐ ܥܒܪܘܗܝ ܡܢ ܪܓܠ ܬܡܢ ܢܚܕܐ ܒܗ

7ܡܢ ܕܫܠܝܛ ܒܓܢܒܪܘܬܗ ܠܥܠܡ ܥܝܢ̈ܘܗܝ ܒܥܡ̈ܡܐ ܚܝܪ̈ܢ ܘܡܪ̈ܘܕܐ ܠܐ ܢܬܬܪܝܡܘܢ ܠܥܠܡ

8ܒܪܟܘ ܥܡ̈ܡܐ ܠܐܠܗܐ. ܘܫܡܥ ܩܠܐ ܕܫܘܒܚܗ

9ܕܣܡ ܢܦܫܢ ܒܚ̈ܝܐ ܘܠܐ ܝܗܒ ܪܓܠܢ ܠܙܘܥܬܐ

10ܡܛܠ ܕܒܚܪܬܢ ܐܠܗܐ ܘܒܩܝܬܢ ܐܝܟ ܕܒܩܝܢ ܠܣܐܡܐ

11ܐܥܠܬܢ ܒܡܨܝܕܬܐ ܘܥܒܕܬ ܐܘܠܨܢܐ ܒܚ̈ܨܝܢ

12ܐܪܟܒܬ ܒܪܢܫܐ ܥܠ ܪܝܫܢ ܐܥܠܬܢ ܒܢܘܪܐ ܘܒܡ̈ܝܐ ܘܐܦܩܬܢ ܠܐܪܘܚܬܐ

13ܐܬܐ ܠܒܝܬܟ ܒܐܝܩܪܐ ܘܐܦܪܥܟ ܢܕܪ̈ܝ

14ܡܕܡ ܕܦܬܚ ܣ̈ܦܘܬܝ ܒܡܡܠܠܗ ܕܦܘܡܝ ܒܐܘܠܨܢܐ

15ܝܩ̈ܕܐ ܫܡ̈ܝܢܐ ܐܣܩ ܠܟ ܥܡ ܣܘܬܐ ܕܕܟܪ̈ܐ ܘܐܥܒܕ ܬܘܪ̈ܐ ܘܓܕܝ̈ܐ

16ܬܘ ܫܡܥܘ ܘܐܫܬܥܐ ܠܟܘܢ ܟܠܟܘܢ ܥܒ̈ܕܘܗܝ ܕܐܠܗܐ ܡܕܡ ܕܥܒܕ ܠܢܦܫܝ

17ܒܦܘܡܝ ܩܪܝܬܗ ܘܥܢܢܝ ܘܪܡܪܡܬܗ ܒܠܫܢܝ

18ܥܘܠܐ ܐܢ ܚܙܝܬ ܒܠܒܝ ܠܐ ܬܦܪܩܢܝ ܡܪܝܐ

19ܗܝܕܝܢ ܫܡܥ ܐܠܗܐ ܩܠܐ ܕܒܥܘܬܝ

20ܒܪܝܟ ܗܘ ܡܪܝܐ ܕܠܐ ܐܥܒܪ ܨܠܘܬܝ ܘܛܝܒܘܬܗ ܡܢܝ

Chapter 67 ܡܙܡܘܪ̈ܐ

2ܐܠܗܢ ܢܪܚܡ ܥܠܝܢ ܢܒܪܟܢ ܘܢܢܗܪ ܐ̈ܦܘܗܝ ܒܢ

3ܕܢܕܥ ܒܐܪܥܐ ܐܘܪ̈ܚܬܗ ܘܒܟܠܗܘܢ ܥܡ̈ܡܐ ܦܘܪܩܢܗ

4ܢܘܕܘܢ ܠܟ ܥܡ̈ܡܐ ܐܠܗܐ ܢܘܕܘܢ ܠܟ ܥܡ̈ܡܐ ܟܠܗܘܢ

5ܢܚ̈ܕܝܢ ܘܢܫ̈ܒܚܢ ܡ̈ܠܟܘܬܐ ܕܕܐܢ ܐܢܬ ܠܥܡ̈ܡܐ ܬܪܝܨܐܝܬ ܘܠܡ̈ܠܟܘܬܐ ܡܕܒܪ ܐܢܬ ܒܐܪܥܐ

6ܢܘܕܘܢ ܠܟ ܥܡ̈ܡܐ ܐܠܗܐ ܢܘܕܘܢ ܠܟ ܥܡ̈ܡܐ ܟܠܗܘܢ

7ܐܪܥܐ ܝܗܒܬ ܦܐܪ̈ܝܗ̇ ܢܒܪܟܢ ܐܠܗܐ ܐܠܗܢ

8ܘܢܒܪܟܢ ܐܠܗܐ ܘܢܕܚܠܘܢ ܡܢܗ ܟܠܗܘܢ ܥܒܪ̈ܝܗ̇ ܕܐܪܥܐ

Chapter 68 ܡܙܡܘܪ̈ܐ

2ܢܩܘܡ ܐܠܗܐ ܘܢܬܒܕܪܘܢ ܟܠܗܘܢ ܒ̈ܥܠܕܒܒܘܗܝ ܘܢܥܪܩܘܢ ܣܢܐ̈ܘܗܝ ܡܢ ܩܕܡܘܗܝ

3ܘܐܝܟ ܕܡܬܛܠܩ ܬܢܢܐ ܢܬܛܠܩܘܢ ܘܐܝܟ ܕܡܬܦܫܪܐ ܫܥܘܬܐ ܡܢ ܩܕܡ ܢܘܪܐ ܢܐܒܕܘܢ ܪ̈ܫܝܥܐ ܡܢ ܩܕܡ ܐܠܗܐ

4ܘܙܕܝܩ̈ܐ ܢܚܕܘܢ ܘܢܬܥܫܢܘܢ ܩܕܡ ܐܠܗܐ ܘܢܚܕܘܢ ܒܒܘܣܡܗ

5ܙܡܪܘ ܠܐܠܗܐ ܘܫܒܚܘ ܠܫܡܗ ܫܒܚܘ ܠܕܪܟܝܒ ܠܡܥܪܒܐ ܡܪܝܐ ܫܡܗ ܐܬܥܫܢܘ ܩܕܡܘܗܝ

6ܕܐܒܐ ܕܝ̈ܬܡܐ ܘܕܝܢܐ ܕܐܪ̈ܡܠܬܐ ܐܠܗܐ ܒܡܥܡܪܗ ܩܕܝܫܐ

7ܐܠܗܐ ܡܘܬܒ ܝܚܝܕܝܐ ܒܒܝܬܐ ܘܡܦܩ ܐܣܝܪ̈ܐ ܒܟܫܝܪܘܬܐ ܘܡܪ̈ܘܕܐ ܢܫܪܘܢ ܒܝܬ ܩܒܘܪ̈ܐ

8ܐܠܗܐ ܟܕ ܢܦܩܬ ܩܕܡ ܥܡܟ ܘܟܕ ܥܒܪܬ ܒܐܫܝܡܘܢ

9ܐܪܥܐ ܙܥܬ ܘܐܦ ܫܡܝܐ ܢܛܦܘ ܡܢ ܩܕܡ ܐܠܗܐ ܗܢܐ ܛܘܪܐ ܕܣܝܢܝ ܡܢ ܩܕܡ ܐܠܗܐ ܐܠܗܗ ܕܐܝܣܪܝܠ

10ܡܛܪܐ ܕܨܒܝܢܐ ܝܗܒܬ ܐܠܗܐ ܠܝܪܬܘܬܟ ܐܬܟܪܗܬ ܘܐܢܬ ܬܩܦܬܗ̇

11ܘܚܝ̈ܘܬܟ ܥܡܪ̈ܝ ܒܗ̇ ܬܩܦܬ ܒܛܝܒܘܬܟ ܠܒܝܫ̈ܐ ܐܠܗܐ

12ܡܪܝܐ ܢܬܠ ܡܠܬܐ ܕܣܒܪܬܐ ܒܚܝܠܐ ܪܒܐ

13ܡ̈ܠܟܐ ܕܚܝ̈ܠܘܬܐ ܢܬܟܢܫܘܢ ܘܫܘܦܪܗ ܕܒܝܬܟ ܢܦܠܓ ܒܙܬܐ

14ܐܢ ܬܕܡܟܘܢ ܒܝܬ ܫ̈ܦܝܐ ܓܦ̈ܐ ܕܝܘܢܐ ܕܩܪܝܡܝܢ ܒܟܣܦܐ ܘܐܒܪ̈ܝܗ̇ ܒܕܗܒܐ ܣܢܝܢܐ

15ܟܕ ܦܪܫ ܐܠܗܐ ܡܠܟܐ ܒܗ ܐܬܠܓܬ ܒܨܠܡܘܢ

16ܛܘܪܗ ܕܐܠܗܐ ܛܘܪ̈ܐ ܕܒܝܫܢ ܛܘܪ̈ܐ ܕܓܒܢܝܡ ܛܘܪ̈ܐ ܕܒܝܫܢ

17ܡܢܐ ܨܒܝܢ ܐܢܬܘܢ ܒܛܘܪ̈ܐ ܕܓܒܢܝܡ ܛܘܪܐ ܕܓܒܐ ܠܗ ܐܠܗܐ ܠܡܬܒ ܒܗ ܡܪܝܐ ܢܫܪܐ ܒܗ ܠܥܠܡ

18ܪܟܒ ܐܠܗܐ ܒܪ̈ܒܘܬܐ ܘܒܐ̈ܠܦܐ ܕܚܝܠܐ ܡܪܝܐ ܒܗܘܢ ܣܝܢܝ ܒܩܘܕܫܗ

19ܣܠܩܬ ܠܡܪܘܡܐ ܘܫܒܝܬ ܫܒܝܬܐ ܘܝܗܒܬ ܡܘܗ̈ܒܬܐ ܠܒܢ̈ܝ ܐܢܫܐ ܐܦ ܡܪ̈ܘܕܐ ܠܐ ܢܥܡܪܘܢ ܩܕܡ ܐܠܗܐ

20ܒܪܝܟ ܗܘ ܡܪܝܐ ܒܟܠ ܝܘܡ ܕܐܓܒܝܢ ܝܪܬܘܬܗ ܐܠܗܐ ܦܪܘܩܢ ܐܠܗܐ ܡܦܨܝܢܢ

21ܡܪܝܐ ܐܠܗܐ ܡܪܗ ܕܡܘܬܐ ܡܦܩܢܐ

22ܒܪܡ ܐܠܗܐ ܢܦܣܘܩ ܪܝܫܐ ܕܒ̈ܥܠܕܒܒܘܗܝ ܘܒܝ̈ܥܬܐ ܕܣܥܪܐ ܕܐܝܠܝܢ ܕܡܗܠܟܝܢ ܒܚ̈ܛܗܝܗܘܢ

23ܐܡܪ ܡܪܝܐ ܕܡܢ ܒܝܬ ܫܢ̈ܐ ܐܦܩ ܘܐܗܦܟ ܡܢ ܥܘܡ̈ܩܘܗܝ ܕܝܡܐ

24ܡܛܠ ܕܬܨܛܒܥ ܪܓܠܟ ܒܕܡܐ ܘܠܫܢܐ ܕܟ̈ܠܒܝܟ ܡܢ ܒ̈ܥܠܕܒܒܝܟ

25ܚܙܘ ܗ̈ܠܟܬܟ ܐܠܗܐ ܗ̈ܠܟܬܗ ܕܐܠܗܝ ܘܕܡܠܟܝ ܩܕܝܫܐ

26ܩܕܡܘ ܪ̈ܘܪܒܢܐ ܒܬܪ ܡܫܒܚ̈ܢܐ ܒܝܢܬ ܥ̈ܠܝܡܬܐ ܕܢܩܫ̈ܢ ܒ̈ܦܠܓܐ

27ܘܒܟܢ̈ܘܫܬܐ ܒܪܟܘ ܠܡܪܝܐ ܐܠܗܐ ܡܢ ܡܒ̈ܘܥܐ ܕܐܝܣܪܝܠ

28ܬܡܢ ܒܢܝܡܝܢ ܙܥܘܪܐ ܒܫܠܝܐ ܪ̈ܘܪܒܢܐ ܕܝܗܘܕܐ ܘܫ̈ܠܝܛܢܝܗܘܢ ܪ̈ܘܪܒܢܐ ܕܙܒܘܠܘܢ ܘܪ̈ܘܪܒܢܐ ܕܢܦܬܠܝ

29ܦܩܘܕ ܐܠܗܐ ܥܘܫܢܟ ܘܐܥܫܢ ܐܠܗܐ ܠܗܕܐ ܕܥܬܕܬ ܠܢ

30ܡܢ ܗܝܟܠܟ ܠܐܘܪܫܠܡ ܠܟ ܢܝܬܘܢ ܡ̈ܠܟܐ ܩܘܪ̈ܒܢܐ

31ܟܐܝ ܒܚܝܘܬܐ ܕܩܢܝܐ ܟܢܘܫܬܐ ܕܐܪ̈ܘܢܐ ܥ̈ܓܠܐ ܕܥܡ̈ܡܐ ܕܩܪܝܡܝܢ ܒܣܐܡܐ ܒܕܪ ܥܡ̈ܡܐ ܕܨܒܝܢ ܩܪܒܐ

32ܢܐܬܘܢ ܐܝܙ̈ܓܕܐ ܡܢ ܡܨܪܝܢ ܘܟܘܫ ܬܫܠܡ ܐܝܕܐ ܠܐܠܗܐ

33ܡ̈ܠܟܘܬܐ ܕܐܪܥܐ ܫܒܚܝܢ ܠܐܠܗܐ ܙܡܪܘ ܠܡܪܝܐ

34ܕܪܟܝܒ ܒܫ̈ܡܝ ܫܡܝܐ ܡܢ ܡܕܢܚܐ ܝܗܒ ܩܠܗ ܩܠܐ ܥܫܝܢܐ

35ܗܒܘ ܬܫܒܘܚܬܐ ܠܐܠܗܐ ܘܐܝܣܪܝܠ ܪܒܘܬ ܝܐܝܘܬܐ ܕܥܘܫܢܗ ܒܫ̈ܡܝ ܫܡܝܐ

36ܕܚܝܠ ܐܢܬ ܐܠܗܐ ܡܢ ܡܩܕܫܟ ܐܠܗܗ ܕܐܝܣܪܝܠ ܗܘ ܢܬܠ ܚܝܠܐ ܘܥܘܫܢܐ ܠܥܡܗ ܒܪܝܟ ܗܘ ܐܠܗܐ

Chapter 69 ܡܙܡܘܪ̈ܐ

2ܦܪܘܩܝܢܝ ܐܠܗܐ ܡܛܠ ܕܡܛܘ ܡ̈ܝܐ ܥܕܡܐ ܠܢܦܫܐ

3ܛܒܥܬ ܒܗܘܬܐ ܥܡܝܩܬܐ ܘܠܝܬ ܒܗ̇ ܒܝܬ ܩܝܡܐ ܥܠܬ ܠܥܘܡܩܐ ܕܡ̈ܝܐ ܘܨܡܪܬܐ ܛܒܥܬܢܝ

4ܠܐܝܬ ܒܩܪ̈ܝ ܘܚܪܬ ܓܓܪܬܝ ܓ̈ܙܝ ܥܝܢ̈ܝ ܟܕ ܡܣܟܐ ܐܢܐ ܠܐܠܗܝ

5ܣܓܝܘ ܡܢ ܣܥܪܐ ܕܪܝܫܝ ܒ̈ܥܠܕܒܒܝ ܕܡܓܢ ܘܥܫܢܘ ܡܢ ܓܪ̈ܡܝ ܒ̈ܥܠܕܒܒܝ ܕܫܘܩܪܐ ܡܕܡ ܕܠܐ ܛܠܡܬ ܡܦܢܐ ܗܘܝܬ

6ܐܠܗܐ ܐܢܬ ܝܕܥ ܐܢܬ ܣܟ̈ܠܘܬܝ ܘܚ̈ܛܗܝ ܡܢܟ ܠܐ ܐܬܟܣܝܘ

7ܠܐ ܢܒܗܬܘܢ ܒܝ ܐܝܠܝܢ ܕܡܣܒܪܝܢ ܒܟ ܡܪܝܐ ܐܠܗܐ ܚܝܠܬܢܐ ܘܠܐ ܢܚܦܪܘܢ ܒܝ ܐܝܠܝܢ ܕܒܥܝܢ ܠܟ ܐܠܗܗ ܕܐܝܣܪܝܠ

8ܡܛܠܬܟ ܩܒܠܬ ܚܣܕܐ ܘܟܣܝܬ ܒܗܬܬܐ ܠܐ̈ܦܝ

9ܘܢܘܟܪܝܐ ܗܘܝܬ ܠܐ̈ܚܝ ܘܐܟܣܢܝܐ ܠܒܢ̈ܝ ܐܡܝ

10ܡܛܠ ܕܛܢܢܗ ܕܒܝܬܟ ܐܟܠܢܝ ܘܚܣܕܐ ܕܡܚܣ̈ܕܢܝܟ ܢܦܠ ܥܠܝ

11ܡܟܟܬ ܢܦܫܝ ܒܨܘܡܐ ܘܗܘܝܬ ܠܗܘܢ ܠܚܣܕܐ

12ܥܒܕܬ ܠܒܘܫܝ ܣܩܐ ܘܗܘܝܬ ܠܗܘܢ ܠܡܬܠܐ

13ܘܪܢܘ ܒܝ ܐܝܠܝܢ ܕܝܬܒܝܢ ܒܬܪܥܐ ܘܪܢܘ ܒܝ ܐܝܠܝܢ ܕܫܬܝܢ ܫܟܪܐ

14ܘܐܢܐ ܨܠܝܬ ܩܕܡܝܟ ܡܪܝܐ ܒܙܒܢܐ ܡܩܒܠܐ ܐܠܗܐ ܒܣܘܓܐܐ ܕܛܝܒܘܬܟ ܥܢܝܢܝ ܘܒܣܘܓܐܐ ܕܦܘܪܩܢܟ

15ܦܨܢܝ ܡܢ ܣܝܢܐ ܕܠܐ ܐܛܒܥ ܘܐܬܦܨܐ ܡܢ ܣ̈ܢܐܝ ܘܡܢ ܥܘܡܩܐ ܕܡ̈ܝܐ

16ܕܠܐ ܬܛܒܥܢܝ ܨܡܪܬܐ ܕܡ̈ܝܐ ܘܠܐ ܬܒܠܥܢܝ ܗܘܬܐ ܘܠܐ ܬܐܚܘܕ ܥܠܝ ܒܐܪܐ ܦܘܡܗ̇

17ܥܢܝܢܝ ܡܪܝܐ ܡܛܠ ܕܛܒܐ ܗܝ ܛܝܒܘܬܟ ܘܒܣܘܓܐܐ ܕܪ̈ܚܡܝܟ ܐܬܦܢ ܥܠܝ

18ܠܐ ܬܗܦܟ ܐ̈ܦܝܟ ܡܢ ܥܒܕܟ ܡܛܠ ܕܥܩܬ ܠܝ ܒܥܓܠ ܥܢܝܢܝ

19ܩܪܒ ܢܦܫܝ ܠܦܘܪܩܢܟ ܡܛܠ ܒ̈ܥܠܕܒܒܝ ܦܪܘܩܝܢܝ

20ܐܢܬ ܝܕܥ ܐܢܬ ܚܣܕܝ ܘܒܗܬܬܝ ܠܘܩܒܠ ܟܘܠܗܘܢ ܒ̈ܥܠܕܒܒܝ

21ܐܣܐ ܬܒܪܗ ܕܠܒܝ ܘܥܨܘܒ ܣܟܝܬ ܠܡܢ ܕܬܟܪܐ ܠܗ ܘܠܝܬ ܘܠܡܒܝܐܢܐ ܘܠܐ ܐܫܟܚܬ

22ܝܗܒܘ ܒܡܐܟܘܠܬܝ ܡܪ̈ܪܐ ܘܠܨܗܝܝ ܚܠܐ ܐܫܩܝܘܢܝ

23ܢܗܘܐ ܦܬܘܪܗܘܢ ܩܕܡܝܗܘܢ ܦܚܐ ܘܦܘܪܥܢܗܘܢ ܠܬܘܩܠܬܐ

24ܢܚܫ̈ܟܢ ܥܝܢ̈ܝܗܘܢ ܕܠܐ ܢܚܙܘܢ ܘܚܨܗܘܢ ܒܟܠܙܒܢ ܢܗܘܐ ܟܦܝܦ

25ܐܫܘܕ ܥܠܝܗܘܢ ܪܘܓܙܟ ܘܚܡܬܐ ܕܪܘܓܙܟ ܬܕܪܟ ܐܢܘܢ

26ܢܗܘܐ ܒܝܬ ܡܥܡܪܗܘܢ ܚܪܒ ܘܒܡܫ̈ܟܢܝܗܘܢ ܠܐ ܢܗܘܐ ܕܥܡܪ

27ܡܛܠ ܕܠܡܢ ܕܐܢܬ ܡܚܝܬ ܪܕܦܘ ܘܐܘܣܦܘ ܥܠ ܟܐܒܗ ܕܩܛܝܠܐ

28ܗܒ ܥܘܠܐ ܥܠ ܥܘܠܗܘܢ ܕܠܐ ܢܥܠܘܢ ܒܙܕܝܩܘܬܟ

29ܢܬܥܛܘܢ ܡܢ ܣܦܪܟ ܕܚ̈ܝܐ ܘܥܡ ܙܕܝܩ̈ܝܟ ܠܐ ܢܬܟܬܒܘܢ

30ܘܐܢܐ ܡܣܟܢܐ ܐܢܐ ܘܡܟܐܒܐ ܦܘܪܩܢܟ ܐܠܗܐ ܥܕܪܢܝ

31ܐܫܒܚ ܫܡܗ ܕܐܠܗܐ ܒܬܫܒܘܚܬܐ ܘܐܘܪܒܝܘܗܝ ܒܬܘܕܝܬܐ

32ܐܫܦܪ ܠܡܪܝܐ ܡܢ ܬܘܪ̈ܐ ܡ̈ܦܛܡܐ ܩܪ̈ܢܢܐ ܘܦܪ̈ܣܢܐ

33ܚܙܘ ܡܣ̈ܟܢܐ ܘܚܕܘ ܘܢܚܐ ܠܒܟܘܢ

34ܡܛܠ ܕܫܡܥ ܡܪܝܐ ܠܡܣ̈ܟܢܐ ܘܠܐܣܝܪ̈ܘܗܝ ܠܐ ܫܐܛ

35ܢܫܒܚܘܢܝܗܝ ܫܡܝܐ ܘܐܪܥܐ ܘܝܡ̈ܡܐ ܘܟܠ ܕܪܚܫ ܒܗܘܢ

36ܡܛܠ ܕܐܠܗܐ ܦܪܩ ܠܨܗܝܘܢ ܘܡܒܢܐ ܠܩܘܪ̈ܝܐ ܕܝܗܘܕܐ ܕܢܬܒܘܢ ܒܗ̇ ܥܒ̈ܕܘܗܝ ܘܢܐܪܬܘܢܗ̇

37ܘܪ̈ܚܡܝ ܫܡܗ ܢܫܪܘܢ ܒܗ̇

Chapter 70 ܡܙܡܘܪ̈ܐ

2ܐܠܗܐ ܦܨܢܝ ܡܪܝܐ ܠܥܘܕܪܢܝ ܟܬܪ

3ܢܒܗܬܘܢ ܘܢܚܦܪܘܢ ܐܝܠܝܢ ܕܒܥܝܢ ܠܢܦܫܝ ܢܗܦܟܘܢ ܠܒܣܬܪܗܘܢ ܘܢܚܦܪܘܢ ܐܝܠܝܢ ܕܨܒܝܢ ܠܒܝܫܬܝ

4ܢܬܡܗܘܢ ܒܬܢܝܐ ܕܒܗܬܬܗܘܢ ܐܝܠܝܢ ܕܐܡܪܘ ܥܠܝ ܐܗܐ ܐܗܐ

5ܢܚܕܘܢ ܒܟ ܟܠ ܕܒܥܝܢ ܠܟ ܘܢܐܡܪܘܢ ܒܟܠܙܒܢ ܕܪܒ ܗܘ ܐܠܗܐ ܐܝܠܝܢ ܕܪܚܡܝܢ ܦܘܪܩܢܟ

6ܘܐܢܐ ܡܣܟܢܐ ܐܢܐ ܘܒܝܫܐ ܐܠܗܐ ܟܬܪ ܠܝ ܡܥܕܪܢܝ ܐܢܬ ܘܡܦܨܝܢܝ ܐܠܗܝ ܠܐ ܬܘܚܪ

Chapter 71 ܡܙܡܘܪ̈ܐ

1ܒܟ ܡܪܝܐ ܣܒܪܬ ܠܐ ܐܒܗܬ ܠܥܠܡ

2ܒܙܕܝܩܘܬܟ ܦܨܢܝ ܨܠܝ ܠܝ ܐܕܢܟ ܘܦܪܘܩܝܢܝ

3ܗܘܝ ܠܝ ܒܝܬ ܡܥܡܪܐ ܕܐܥܘܠ ܠܗ ܒܟܠܙܒܢ ܘܦܩܘܕ ܠܡܦܪܩܢܝ ܡܛܠ ܕܐܢܬ ܗܘ ܒܝܬ ܓܘܣܝ ܘܒܝܬ ܡܪܕܝ

4ܐܠܗܐ ܦܨܢܝ ܡܢ ܐܝܕܗ ܕܪܫܝܥܐ ܘܡܢ ܐܝܕܗ ܕܥܘܠܐ ܒܝܫܐ

5ܡܛܠ ܕܐܢܬ ܗܘ ܣܒܪܝ ܡܪܝܐ ܐܠܗܐ ܬܘܟܠܢܝ ܕܡܢ ܛܠܝܘܬܝ

6ܕܥܠܝܟ ܐܣܬܡܟܬ ܡܢ ܡܪܒܥܐ ܘܡܢ ܡܥ̈ܝܗ̇ ܕܐܡܝ ܐܢܬ ܗܘ ܬܘܟܠܢܝ ܠܟ ܫܒܚܬ ܒܟܠܙܒܢ

7ܘܕܘܡܪܐ ܗܘܝܬ ܠܣ̈ܓܝܐܐ ܕܐܢܬ ܗܘ ܬܘܟܠܢܝ ܥܫܝܢܐ

8ܢܬܡܠܐ ܦܘܡܝ ܬܫܒܘܚܬܟ ܘܟܠܗ ܝܘܡܐ ܪܒܘܬܟ

9ܠܐ ܬܫܕܝܢܝ ܒܙܒܢܐ ܕܣܝܒܘܬܐ ܘܡܐ ܕܓܡܪ ܚܝܠܝ ܠܐ ܬܫܒܩܢܝ

10ܡܛܠ ܕܐܡܪܘ ܥܠܝ ܒ̈ܥܠܕܒܒܝ ܘܐܝܠܝܢ ܕܢܛܪܝܢ ܠܢܦܫܝ ܐܬܡܠܟܘ ܐܝܟ ܚܕܐ

11ܘܐܡܪܘ ܐܠܗܐ ܫܒܩܗ ܪܘܕܦܘܗܝ ܘܐܘܚܕܘܗܝ ܡܛܠ ܕܠܝܬ ܠܗ ܡܦܨܝܢܐ

12ܐܠܗܐ ܠܐ ܬܪܚܩ ܡܢܝ ܐܠܗܐ ܠܥܘܕܪܢܝ ܟܬܪ

13ܢܒܗܬܘܢ ܘܢܚܦܪܘܢ ܐܝܠܝܢ ܕܣܩܪܝܢ ܠܢܦܫܝ ܢܬܥܛܦܘܢ ܒܗܬܬܐ ܐܝܠܝܢ ܕܨܒܝܢ ܠܒܝܫܬܝ

14ܐܢܐ ܕܝܢ ܒܟܠܙܒܢ ܐܨܠܐ ܘܐܘܣܦ ܥܠ ܬܫ̈ܒܚܬܟ

15ܦܘܡܝ ܢܣܒܪ ܙܕܝܩܘܬܟ ܘܟܠܗ ܝܘܡܐ ܒܬܫ̈ܒܚܬܟ ܡܛܠ ܕܠܐ ܝܕܥܬ ܣܦܪܘܬܐ

16ܐܥܘܠ ܒܓܢܒܪܘܬܗ ܕܡܪܝܐ ܘܐܥܗܕ ܙܕܝܩܘܬܟ ܒܠܚܘܕܝ

17ܐܠܗܐ ܝܘܠܦܢܝ ܕܡܢ ܛܠܝܘܬܝ ܘܥܕܡܐ ܠܗܫܐ ܕܐܚܘܐ ܬܕܡܪ̈ܬܟ

18ܥܕܡܐ ܠܣܝܒܘܬܐ ܘܠܩܫܝܫܘܬܐ ܠܐ ܬܫܒܩܢܝ ܥܕܡܐ ܕܐܚܘܐ ܕܪܥܟ ܘܓܢܒܪܘܬܟ ܠܕܪܐ ܕܐܬܐ

19ܘܙܕܝܩܘܬܟ ܐܠܗܐ ܥܕܡܐ ܠܡܪܘܡܐ ܘܪ̈ܘܪܒܬܐ ܕܥܒܕܬ ܐܠܗܐ ܡܢܘ ܐܟܘܬܟ

20ܕܚܘܝܬܢܝ ܐܘܠܨܢܐ ܣܓܝܐܐ ܘܒܝܫܬܐ ܘܗܦܟܬ ܘܐܚܝܬܢܝ ܘܐܦ ܡܢ ܬܗ̈ܘܡܝܗ̇ ܕܐܪܥܐ ܬܗܦܟ ܬܣܩܢܝ

21ܐܣܓܝܬ ܪܒܘܬܝ ܘܗܦܟܬ ܘܒܝܐܬܢܝ

22ܐܦ ܐܢܐ ܐܘܕܐ ܠܟ ܒܟܢܪܐ ܘܠܩܘܫܬܟ ܐܙܡܪ ܐܠܗܐ ܐܙܡܪ ܠܟ ܒܟܢܪܐ ܩܕܝܫܐ ܕܐܝܣܪܝܠ

23ܘܢܫܒ̈ܚܢ ܣ̈ܦܘܬܝ ܟܕ ܐܙܡܪ ܠܟ ܘܢܦܫܝ ܕܦܪܩܬ

24ܘܠܫܢܝ ܟܠܗ ܝܘܡܐ ܢܘܕܐ ܒܙܕܝܩܘܬܟ ܡܛܠ ܕܢܒܗܬܘܢ ܘܢܚܦܪܘܢ ܐܝܠܝܢ ܕܨܒܝܢ ܠܒܝܫܬܝ

Chapter 72 ܡܙܡܘܪ̈ܐ

1ܐܠܗܐ ܗܒ ܕܝܢܟ ܠܡܠܟܐ ܘܙܕܝܩܘܬܟ ܠܒܪ ܡܠܟܐ

2ܕܢܕܘܢ ܠܥܡܟ ܒܙܕܝܩܘܬܐ ܘܠܡܣ̈ܟܢܝܟ ܒܕܝܢܐ

3ܢܫܩܠܘܢ ܛܘܪ̈ܐ ܫܠܡܐ ܠܥܡܟ ܘܪ̈ܡܬܐ ܙܕܝܩܘܬܟ

4ܕܢܕܘܢ ܠܡ̈ܣܟܢܐ ܕܥܡܐ ܘܢܦܪܘܩ ܠܒܢ̈ܝ ܒܝܫ̈ܐ ܘܢܡܟܟ ܠܛܠܘܡ̈ܐ

5ܢܕܚܠܘܢ ܠܟ ܥܡ ܫܡܫܐ ܘܩܕܡ ܣܗܪܐ ܠܕܪܕܪܝܢ

6ܢܚܘܬ ܐܝܟ ܡܛܪܐ ܥܠ ܓܙܬܐ ܘܐܝܟ ܐܪ̈ܣܝܣܐ ܕܢܚܬܝܢ ܥܠ ܐܪܥܐ

7ܢܫܘܚ ܒܝ̈ܘܡܬܗ ܙܕܩܐ ܘܣܘܓܐܐ ܕܫܠܡܐ ܥܕܡܐ ܕܢܥܒܪ ܣܗܪܐ

8ܢܐܚܘܕ ܡܢ ܝܡܐ ܠܝܡܐ ܘܡܢ ܢܗܪ̈ܘܬܐ ܥܕܡܐ ܠܣܘ̈ܦܝܗ̇ ܕܐܪܥܐ

9ܩܕܡܘܗܝ ܢܒܪ̈ܟܢ ܓܙܪ̈ܬܐ ܘܒ̈ܥܠܕܒܒܘܗܝ ܥܦܪܐ ܢܠܟܚܘܢ

10ܡ̈ܠܟܐ ܕܬܪܫܝܫ ܘܕܓܙܪ̈ܬܐ ܩܘܪ̈ܒܢܐ ܢܝܬܘܢ ܠܗ ܡ̈ܠܟܐ ܕܫܒܐ ܘܕܣܒܐ ܩܘܪ̈ܒܢܐ ܢܩܪܒܘܢ

11ܘܢܣܓܕܘܢ ܠܗ ܟܠܗܘܢ ܡ̈ܠܟܐ ܘܟܠܗܘܢ ܥܡ̈ܡܐ ܢܦܠܚܘܢܝܗܝ

12ܡܛܠ ܕܡܦܨܐ ܠܒܝܫܐ ܡܢ ܡܢ ܕܥܫܝܢ ܡܢܗ ܘܠܡܣܟܢܐ ܕܠܝܬ ܠܗ ܡܥܕܪܢܐ

13ܚܐܣ ܥܠ ܡܣ̈ܟܢܐ ܘܥܠ ܒܝܫ̈ܐ ܘܢܦܫ̈ܬܐ ܕܡ̈ܣܟܢܐ ܦܪܩ

14ܡܢ ܬܘܟܐ ܘܡܢ ܥܘܠܐ ܦܪܩ ܢܦܫܬ̈ܗܘܢ ܝܩܝܪ ܗܘ ܕܡܗܘܢ ܒ̈ܥܝܢܘܗܝ

15ܢܐܚܐ ܘܢܬܝܗܒ ܠܗ ܡܢ ܕܗܒܐ ܕܫܒܐ ܘܢܨܠܐ ܥܠܘܗܝ ܒܟܠܙܒܢ ܘܟܠܗ ܝܘܡܐ ܢܒܪܟܝܘܗܝ

16ܢܗܘܐ ܐܝܟ ܣܘܓܐܐ ܕܥܒܘܪܐ ܒܐܪܥܐ ܘܒܪܝܫܐ ܕܛܘܪ̈ܐ ܢܫܘܚ ܦܐܪ̈ܘܗܝ ܐܝܟ ܕܠܒܢܢ ܘܢܘܥܐ ܡܢ ܡܕܝܢܬܐ ܐܝܟ ܥܣܒܐ ܕܐܪܥܐ

17ܘܢܗܘܐ ܫܡܗ ܠܥܠܡ ܘܩܕܡ ܫܡܫܐ ܐܝܬܘܗܝ ܫܡܗ ܢܬܒܪܟܘܢ ܒܗ ܟܠܗܘܢ ܥܡ̈ܡܐ ܘܟܠܗܘܢ ܢܫܒܚܘܢܝܗܝ

18ܒܪܝܟ ܗܘ ܡܪܝܐ ܐܠܗܐ ܕܐܝܣܪܝܠ ܕܥܒܕ ܬܕܡܪ̈ܬܐ ܪ̈ܘܪܒܬܐ ܒܠܚܘܕܘܗܝ

19ܘܒܪܝܟ ܗܘ ܫܡܐ ܕܐܝܩܪܗ ܠܥܠܡ ܬܬܡܠܐ ܐܝܩܪܗ ܟܠܗ̇ ܐܪܥܐ ܐܡܝܢ ܘܐܡܝܢ

Chapter 73 ܡܙܡܘܪ̈ܐ

1ܐܠܗܐ ܛܒ ܠܐܝܣܪܐܝܠ ܘܠܒܪ̈ܝܪܝ ܠܒܐ

2ܘܐܢܐ ܥܕ ܩܠܝܠ ܡܨ̈ܛܠܝܢ ܗ̈ܘܝ ܪ̈ܓܠܝ ܘܐܝܟ ܠܐ ܡܕܡ ܡܬܐܫ̈ܕܢ ܗ̈ܘܝ ܗ̈ܠܟܬܝ

3ܡܛܠ ܕܛܢܬ ܒܥܘ̈ܠܐ ܟܕ ܚܙܐ ܗܘܝܬ ܫܠܡܐ ܠܪ̈ܫܝܥܐ

4ܡܛܠ ܕܠܝܬ ܣܟܐ ܠܡܘܬܗܘܢ ܘܣܓܝܐܐ ܗܝ ܫܛܝܘܬܗܘܢ

5ܒܥܡܠܐ ܕܐܢܫܐ ܠܝܬ ܐܢܘܢ ܘܥܡ ܒ̈ܢܝ ܐܢܫܐ ܠܐ ܡܬܢܓܕܝܢ

6ܡܛܠ ܗܢܐ ܐܚܕܬ ܐܢܘܢ ܡܒܣܪܢܘܬܐ ܘܐܬܟܣܝ ܥܘܠܗܘܢ ܘܪܘܫܥܗܘܢ

7ܘܢܦܩ ܐܝܟ ܬܪܒܐ ܥܘܠܗܘܢ ܘܥܒܕܘ ܐܝܟ ܬܪܥܝܬܐ ܕܠܒܐ

8ܐܬܚܫܒܘ ܘܡܠܠܘ ܒܝܫܬܐ ܘܛܠܘܡܝܐ ܥܠ ܡܪܝܡܐ ܡܠܠܘ

9ܣܡܘ ܦܘܡܗܘܢ ܒܫܡܝܐ ܘܠܫܢܗܘܢ ܡܗܠܟ ܒܐܪܥܐ

10ܡܛܘܠ ܗܢܐ ܢܗܦܘܟ ܥܡܝ ܠܗܪܟܐ ܘܡܠܝܐܝܬ ܢܫܟܚܘܢ ܠܗܘܢ

11ܘܢܐܡܪܘܢ ܐܝܟܢ ܝܕܥ ܐܠܗܐ ܘܐܝܬ ܝܕܥܬܐ ܒܡܪܝܡܐ

12ܕܗܐ ܗܠܝܢ ܪ̈ܫܝܥܐ ܟܗܝܢܝܢ ܒܥܠܡܐ ܘܥܫܝܢܝܢ ܒܚܝܠܐ

13ܘܐܢܐ ܒܠܚܘܕܝ ܕܟܝܬ ܠܒܝ ܘܐܫܝܓܬ ܐ̈ܝܕܝ ܒܕܟܝܘܬܐ

14ܘܗܘܝܬ ܠܡܚܘܬܐ ܟܠܗ ܝܘܡܐ ܘܡܟܣܢܘܬܝ ܒܨܦܪܐ

15ܐܢ ܐܡܪܬ ܕܐܥܒܕ ܐܟܘܬܗܘܢ

16ܥܘܠܐ ܗܘ ܒܥܝܢ̈ܝ

17ܥܕܡܐ ܕܐܥܘܠ ܠܡܩܕܫܗ ܕܐܠܗܐ ܘܐܬܒܝܢ ܒܚܪܬܗܘܢ

18ܐܝܟ ܢܟܠܗܘܢ ܬܣܝܡ ܠܗܘܢ ܘܬܪܡܐ ܐܢܘܢ ܟܕ ܢܬܬܪܝܡܘܢ

19ܐܝܟܢ ܗܘܘ ܠܬܡܗܐ ܡܢ ܫܠܝܐ ܣܦܘ ܘܓܡܪܘ ܡܢ ܕܠܘܚܝܐ

20ܐܝܟ ܗܘ ܕܡܬܬܥܝܪ ܡܐ ܕܚܙܐ ܚܠܡܐ ܡܪܝܐ ܒܩܪܝܬܐ ܨܠܡܗܘܢ ܬܫܘܛ

21ܘܐܢܐ ܐܬܕܠܚ ܠܒܝ ܘܟܘ̈ܠܝܬܝ ܐܫ̈ܬܢܝ

22ܘܐܢܐ ܒܪܝܪ ܗܘܝܬ ܘܠܐ ܝܕܥ ܘܒܥܝܪܐ ܗܘܝܬ ܥܡܟ

23ܕܐܚܕܬ ܐܝܕܝ ܕܝܡܝܢܐ

24ܒܬܪܥܝܬܟ ܒܝܐܝܢܝ ܘܒܬܪ ܐܝܩܪܟ ܕܒܪܝܢܝ

25ܡܢܐ ܐܝܬ ܒܫܡܝܐ ܥܡܟ ܘܡܢܐ ܨܒܝܬ ܒܐܪܥܐ

26ܘܓܡܪ ܠܒܝ ܘܒܣܪܝ ܘܥܘܫܢܗ ܕܠܒܝ ܡܢܬܝ ܒܐܠܗܐ ܗܝ ܠܥܠܡ

27ܡܛܠ ܕܗܐ ܪ̈ܚܝܩܝܟ ܢܐܒܕܘܢ ܘܬܘܒܕ ܠܟܘܠ ܕܛܥܝܢ ܡܢܟ ܠܥܠܡ

28ܐܢܐ ܨܒܝܬ ܕܐܬܩܪܒ ܠܐܠܗܐ ܛܐܒ ܠܝ ܫܡܟ ܡܪܝܐ ܬܘܟܠܢܝ ܕܐܫܬܥܐ ܟܠܗܝܢ ܬܕܡܪ̈ܬܟ

Chapter 74 ܡܙܡܘܪ̈ܐ

1ܐܠܗܐ ܠܡܢܐ ܛܥܝܬܢܝ ܠܥܠܡ ܘܐܥܫܢܬ ܪܘܓܙܟ ܒܥܢܐ ܕܡܪܥܝܬܟ

2ܐܬܕܟܪ ܥܕܬܟ ܕܩܢܝܬ ܡܢ ܩܕܝܡ ܘܦܪܩܬ ܫܒܛܐ ܕܝܪܬܘܬܟ ܛܘܪܐ ܕܨܗܝܘܢ ܗܢܐ ܕܫܪܝܬ ܒܗ

3ܐܪܝܡ ܥܒ̈ܕܝܟ ܥܠ ܐܝܠܝܢ ܕܡܫܬܩܠܝܢ ܒܥܘܫܢܟ ܟܠ ܕܡܒܐܫ ܒܥܠܕܒܒܐ ܠܩܘܕܫܟ

4ܐܫܬܒܗܪܘ ܒ̈ܥܠܕܒܒܝܟ ܒܓܘ ܥܐܕܟ ܥܒܕܘ ܐ̈ܬܘܬܗܘܢ ܐ̈ܬܘܬܐ

5ܘܝܕܥܬ ܐܝܟ ܡܥܠܝܐ ܕܠܥܠ ܐܝܟ ܥܒܐ ܕܩܝ̈ܣܐ ܒܢܪ̈ܓܐ

6ܨܠܚܘ ܬܪ̈ܥܐ ܐܟܚܕܐ ܒ̈ܦܠܩܐ ܘܒ̈ܟܘܠܒܐ

7ܐܪܡܝܘ ܘܐܘܩܕܘ ܒܢܘܪܐ ܡܩܕܫܟ ܘܛܘܫܘ ܒܐܪܥܐ ܡܫܟܢܐ ܕܫܡܟ

8ܐܡܪܘ ܒܠܒܗܘܢ ܕܢܘܒܕ ܐܢܘܢ ܐܟܚܕܐ ܘܢܘܒܕ ܟܠܗܘܢ ܥܕܥܐ̈ܕܘܗܝ ܕܐܠܗܐ ܡܢ ܐܪܥܐ

9ܐ̈ܬܘܬܗܘܢ ܠܐ ܚܙܘ ܠܝܬ ܬܘܒ ܢܒܝܐ ܐܦ ܠܐ ܐܝܬ ܥܡܢ ܚܟܝܡܐ

10ܥܕܡܐ ܠܐܡܬܝ ܐܠܗܐ ܡܚܣܕ ܒܥܠܕܒܒܐ ܘܡܪܓܙ ܠܫܡܟ ܠܥܠܡ

11ܠܡܢܐ ܐܗܦܟܬ ܐܝܕܟ ܘܝܡܝܢܟ ܡܢ ܓܘ ܥܐܕܟ

12ܐܠܗܢ ܡܠܟܐ ܗܘ ܕܥܒܕ ܦܘܪܩܢܐ ܒܡܨܥܬܗ̇ ܕܐܪܥܐ

13ܐܢܬ ܒܥܘܫܢܟ ܦܪܫܬ ܝܡܐ ܘܬܒܪܬ ܪ̈ܝܫܝܗܘܢ ܕܬܢܝ̈ܢܐ ܒܡ̈ܝܐ

14ܐܢܬ ܪܨܨܬ ܪ̈ܝܫܘܗܝ ܕܠܘܝܬܢ ܘܝܗܒܬܝܗܝ ܡܐܟܘܠܬܐ ܠܥܡܐ ܥܫܝܢܐ

15ܐܢܬ ܒܙܥܬ ܡܒ̈ܘܥܐ ܒܢܚ̈ܠܐ ܐܢܬ ܐܘܒܫܬ ܢܗܪ̈ܘܬܐ ܥܫܝ̈ܢܐ

16ܕܝܠܟ ܗܘ ܐܝܡܡܐ ܘܕܝܠܟ ܗܘ ܠܠܝܐ ܐܢܬ ܬܩܢܬ ܢܘܗܪܐ ܘܫܡܫܐ

17ܐܢܬ ܐܩܝܡܬ ܟܠܗܘܢ ܬܚ̈ܘܡܝܗ̇ ܕܐܪܥܐ ܩܝܛܐ ܘܣܬܘܐ ܐܢܬ ܒܪܝܬ ܐܢܘܢ

18ܐܬܕܟܪ ܡܪܝܐ ܚܣܕܗ ܕܒܥܠܕܒܒܐ ܥܡܐ ܣܟܠܐ ܐܪܓܙ ܠܫܡܟ

19ܠܐ ܬܬܠ ܠܬܒܪܐ ܢܦܫܐ ܕܡܘܕܝܐ ܠܟ ܘܢܦܫܬ̈ܐ ܕܡܣ̈ܟܢܝܟ ܠܐ ܬܛܥܐ ܠܥܠܡ

20ܚܘܪ ܡܪܝܐ ܒܩܝܡܟ ܡܛܠ ܕܐܬ̈ܡܠܝ ܕܝܪ̈ܐ ܕܐܪܥܐ ܚܫܘܟܐ ܘܥܘܠܐ

21ܠܐ ܢܬܒ ܡܣܟܢܐ ܟܕ ܒܗܝܬ ܒܝܫ̈ܐ ܘܡ̈ܣܟܢܐ ܢܫܒܚܘܢ ܠܫܡܟ

22ܩܘܡ ܐܠܗܐ ܘܕܘܢ ܕܝܢܝ̈ܟ ܘܐܬܕܟܪ ܚܣܕܟ ܕܡܢ ܣܟ̈ܠܐ ܕܟܠ ܝܘܡ

23ܘܠܐ ܬܛܥܐ ܩܠܐ ܕܒ̈ܥܠܕܒܒܝܟ ܘܕܠܘܚܝܐ ܕܐܝܠܝܢ ܕܩܝܡܝܢ ܥܠܝܟ ܕܣܠܩ ܒܟܠܙܒܢ

Chapter 75 ܡܙܡܘܪ̈ܐ

2ܐܘܕܝܢܢ ܠܟ ܐܠܗܐ ܐܘܕܝܢܢ ܠܟ ܘܩܪܝܢ ܫܡܟ ܘܐܫܬܥܝܢ ܟܠܗܝܢ ܬܕܡܪ̈ܬܟ

3ܡܛܠ ܕܐܣܒ ܙܒܢܐ ܘܐܢܐ ܒܬܪܝܨܘܬܐ ܐܕܘܢ

4ܬܬܡܟܟ ܐܪܥܐ ܘܟܠܗܘܢ ܥܡܘܪ̈ܝܗ̇ ܐܢܬ ܬܩܢܬ ܠܥܡܘܪ̈ܝܗ̇

5ܐܢܬ ܐܡܪܬ ܠܫ̈ܛܝܐ ܕܠܐ ܬܫܛܘܢ ܘܠܪ̈ܫܝܥܐ ܕܠܐ ܬܪܝܡܘܢ ܩܪܢܐ

6ܘܠܐ ܬܪܝܡܘܢ ܠܡܪܘܡܐ ܩܪܢܟܘܢ ܘܬܡܠܠܘܢ ܒܨܘܪܐ ܪܡܐ

7ܡܛܠ ܕܠܐ ܡܦܩܐ ܡܢ ܡܥܪܒܐ ܐܦܠܐ ܡܢ ܡܕܒܪܐ ܕܛܘܪ̈ܐ

8ܡܛܘܠ ܕܐܠܗܐ ܗܘ ܕܝܢܐ ܠܗܢܐ ܡܫܦܠ ܘܠܗܢܐ ܡܪܝܡ

9ܡܛܠ ܕܟܣܐ ܒܐܝܕܗ ܕܡܪܝܐ ܘܡܠܐ ܡܙܓܐ ܕܚܡܪܐ ܬܛܝܪܐ ܐܪܟܢ ܡܢ ܗܢܐ ܠܗܢܐ ܬܛܪܗ ܢܡܨܘܢ ܘܢܫܬܘܢ ܟܘܠܗܘܢ ܪ̈ܫܝܥܐ ܕܐܪܥܐ

10ܘܐܢܐ ܐܚܐ ܠܥܠܡ ܘܐܙܡܪ ܠܐܠܗܗ ܕܝܥܩܘܒ

11ܘܟܠܗܝܢ ܩܪ̈ܢܬܐ ܕܪ̈ܫܝܥܐ ܐܓܕܡ ܘܢܬܬܪ̈ܝܡܢ ܩܪ̈ܢܬܗܘܢ ܕܙܕܝܩ̈ܐ

Chapter 76 ܡܙܡܘܪ̈ܐ

2ܝܕܝܥ ܒܝܗܘܕܐ ܐܠܗܐ ܘܒܐܝܣܪܝܠ ܪܒ ܫܡܗ

3ܢܗܘܐ ܒܫܠܝܡ ܡܛܠܠܗ ܘܡܥܡܪܗ ܒܨܗܝܘܢ

4ܬܡܢ ܬܒܪ ܕܪ̈ܥܐ ܕܩܫ̈ܬܬܐ ܙܝܢܐ ܘܣܝܦܐ ܒܩܪܒܐ

5ܢܗܝܪ ܐܢܬ ܘܡܫܝܚ ܡܢ ܛܘܪܟ ܥܫܝܢܐ

6ܐܬܕܠܚܘ ܟܠܗܘܢ ܣܟ̈ܠܝ ܠܒܐ ܘܕܡܟܘ ܫܢܬܗܘܢ ܓܒܪ̈ܐ ܚܝ̈ܠܬܢܐ ܘܠܐ ܐܫܟܚܘ ܐ̈ܝܕܝܗܘܢ

7ܡܢ ܟܐܬܟ ܐܠܗܗ ܕܝܥܩܘܒ ܢܡܘ ܪ̈ܟܒܝ ܪ̈ܟܫܐ

8ܘܐܢܬ ܕܚܝܠ ܐܢܬ ܡܢܘ ܢܩܘܡ ܩܕܡܝܟ ܒܗܢܐ ܪܘܓܙܐ

9ܡܢ ܫܡܝܐ ܫܡܥܬ ܕܝܢܐ ܐܪܥܐ ܚܙܬ ܘܕܚܠܬ

10ܡܐ ܕܩܐܡ ܐܠܗܐ ܠܡܕܢ ܘܠܡܦܪܩ ܠܟܠܗܘܢ ܡܣܟ̈ܢܐ ܕܐܪܥܐ

11ܡܛܠ ܕܬܪܥܝܬܗ ܕܒܪܢܫܐ ܬܘܕܐ ܠܟ ܘܫܪܟܐ ܕܚܡܬܗ ܬܦܪܩ ܪܘܓܙܐ

12ܢܕܘܪܘ ܘܫܠܡܘ ܠܡܪܝܐ ܐܠܗܟܘܢ ܟܘܠ ܕܚܕܝܪ̈ܝܢ ܠܗ ܢܘܒܠܘܢ ܩܘܪ̈ܒܢܐ ܠܕܚܝܠܐ

13ܕܡܡܟܟ ܪܘܚܐ ܕܫ̈ܠܝܛܢܐ ܘܕܚܝܠ ܥܠ ܡ̈ܠܟܐ ܕܐܪܥܐ

Chapter 77 ܡܙܡܘܪ̈ܐ

2ܒܩܠܝ ܠܘܬ ܐܠܗܐ ܩܪܝܬ ܘܫܡܥܢܝ ܘܐܪܝܡܬ ܒܩܠܝ ܠܘܬܗ ܘܥܢܢܝ

3ܒܝܘܡܐ ܕܐܘܠܨܢܝ ܠܡܪܝܐ ܒܥܝܬ ܘܐܝܕܗ ܒܠܠܝܐ ܢܓܕܬܢܝ ܘܠܐ ܫܠܝܬ ܘܠܝܬ ܡܒܝܐܢܐ ܠܢܦܫܝ

4ܐܬܕܟܪܬ ܐܠܗܐ ܘܐܬܕܠܚܬ ܘܪܢܝܬ ܘܐܬܛܪܦܬ ܪܘܚܝ

5ܘܐܚܕܘܢܝ ܨܘܪ̈ܢܐ ܒܥܝܢ̈ܝ ܚܪܫܬ ܘܠܐ ܡܠܠܬ

6ܘܚܫܒܬ ܝܘܡ̈ܝ ܕܡܢ ܩܕܡ. ܘܫܢ̈ܝܐ ܕܡܢ ܥܠܡܝܢ

7ܐܬܕܟܪܬ ܪܢܝܬ ܒܠܠܝܐ ܘܒܠܒܝ ܪܢܝܬ ܘܒܨܝܬ ܪܘܚܝ ܘܐܡܪܬ

8ܕܠܥܠܡ ܛܥܢܝ ܡܪܝܐ ܘܠܐ ܡܘܣܦ ܬܘܒ ܠܡܨܛܒܝܘ ܒܝ

9ܐܘ ܕܠܡܐ ܠܥܠܡ ܡܥܒܪ ܛܝܒܘܬܗ ܡܢܝ ܐܘ ܡܫܠܡ ܡܠܬܗ ܠܕܪܕܪܝܢ

10ܐܘ ܛܥܐ ܐܠܗܐ ܠܡܪܚܡܘ ܐܘ ܚܡܠ ܪ̈ܚܡܘܗܝ ܒܪܘܓܙܗ

11ܐܡܪܬ ܕܟܪܝܗܘܬܝ ܗܝ ܘܬܢܝܐ ܐܢܝܢ ܕܝܡܝܢܗ ܕܥܠܝܐ

12ܡܛܠ ܕܐܬܕܟܪܬ ܡܢ ܩܕܝܡ ܬܕܡܪ̈ܬܟ

13ܘܪܢܝܬ ܒܟܠܗܘܢ ܥܒ̈ܕܝܟ ܘܒܨܢ̈ܥܬܟ ܪܢܝܬ

14ܐܠܗܐ ܐܘܪܚܟ ܩܕܝܫܐ ܗܝ ܘܠܝܬ ܕܪܒ ܐܝܟ ܐܠܗܢ

15ܐܢܬ ܗܘ ܐܠܗܐ ܕܥܒܕܬ ܬܕܡܪ̈ܬܐ ܘܚܘܝܬ ܒܥܡ̈ܡܐ ܥܘܫܢܟ

16ܘܦܪܩܬ ܒܕܪܥܟ ܠܥܡܟ ܠܒܢ̈ܝ ܝܥܩܘܒ ܘܝܘܣܦ

17ܚܙܐܘܟ ܡ̈ܝܐ ܐܠܗܐ ܚܙܐܘܟ ܡ̈ܝܐ ܘܕܚܠܘ ܐܦ ܬܗ̈ܘܡܐ ܙܥܘ

18ܘܥܢ̈ܢܐ ܪܙܦ ܡ̈ܝܐ ܝܗܒܘ ܩܠܐ ܫܡ̈ܝ ܫܡܝܐ ܐܦ ܓܐܪ̈ܝܟ ܦܪ̈ܚܝܢ

19ܘܩܠܐ ܕܪ̈ܥܡܝܟ ܒ̈ܓܝܓܠܐ ܐܢܗܪܘ ܒܪ̈ܩܝܟ ܠܬܒܝܠ ܐܬܕܠܚܬ ܘܙܥܬ ܐܪܥܐ

20ܒܝܡܐ ܐܘܪܚܟ ܘܫܒ̈ܝܠܝܟ ܒܡ̈ܝܐ ܣ̈ܓܝܐܐ ܘܥܩ̈ܒܬܟ ܠܐ ܐܬܝܕܥ

21ܕܒܪܬ ܠܥܡܟ ܐܝܟ ܥܢܐ ܒܐܝܕܐ ܕܡܘܫܐ ܘܕܐܗܪܘܢ

Chapter 78 ܡܙܡܘܪ̈ܐ

1ܥܡܝ ܨܘܬ ܢܡܘܣܝ ܘܐܬܛܦܝܣܘ ܘܨܠܘ ܐ̈ܕܢܝܟܘܢ ܠܡ̈ܠܘܗܝ ܕܦܘܡܝ

2ܗܐ ܓܝܪ ܐܦܬܚ ܦܘܡܝ ܒܡܬ̈ܠܐ ܘܐܡܪ ܦܠܐ̈ܬܐ ܕܡܢ ܩܕܝܡ

3ܐܝܠܝܢ ܕܫܡܥܢ ܝܕܥܢ ܐܢܝܢ ܐܦ ܐܝܠܝܢ ܕܐܒ̈ܗܝܢ ܐܫܬܥܝܘ ܠܢ

4ܕܠܐ ܢܟܣܐ ܡܢ ܒܢܝ̈ܗܘܢ ܐܠܐ ܠܕܪܐ ܐܚܪܝܐ ܢܫܬܥܐ ܬܫ̈ܒܚܬܗ ܕܡܪܝܐ ܘܚܝܠܗ ܘܬܕܡܪ̈ܬܗ ܕܥܒܕ

5ܕܐܩܝܡ ܣܗܕܘܬܗ ܒܝܥܩܘܒ ܘܢܡܘܣܗ ܣܡ ܒܐܝܣܪܝܠ ܐܝܟ ܕܦܩܕ ܠܐ̈ܒܗܝܢ ܕܢܘܕܥܘܢ ܠܒ̈ܢܝܗܘܢ

6ܕܢܕܥܘܢ ܠܕܪܐ ܐܚܪܝܐ ܒܢ̈ܝܐ ܕܡܬܝܠܕܝܢ ܘܩܝܡܝܢ ܕܢܫܬܥܘܢ ܠܒ̈ܢܝܗܘܢ

7ܕܢܗܘܐ ܣܒܪܗܘܢ ܒܐܠܗܐ ܘܠܐ ܢܛܥܘܢ ܥܒ̈ܕܘܗܝ ܕܐܠܗܐ ܘܦܘܩ̈ܕܢܘܗܝ ܢܛܪܘܢ

8ܘܠܐ ܢܗܘܘܢ ܐܝܟ ܐ̈ܒܗܝܗܘܢ ܕܪܐ ܒܝܫܐ ܘܡܡܪܡܪܢܐ ܕܪܐ ܕܠܐ ܐܬܩܢ ܠܒܗ ܘܠܐ ܗܝܡܢ ܒܐܠܗܐ ܕܪܘܚܗ

9ܒܢ̈ܘܗܝ ܕܐܦܪܝܡ ܕܡܬܚܘ ܝܬܪܐ ܘܫܕܘ ܒܩܫܬܐ ܘܗܦܟܘ ܒܝܘܡܐ ܕܩܪܒܐ

10ܥܠ ܕܠܐ ܢܛܪܘ ܩܝܡܗ ܕܐܠܗܐ ܘܒܢܡܘܣܗ ܠܐ ܨܒܘ ܠܡܗܠܟܘ

11ܘܛܥܘ ܥܒ̈ܕܘܗܝ ܘܬܕܡܪ̈ܬܗ ܕܚܘܝ ܐܢܘܢ

12ܩܕܡ ܐ̈ܒܗܝܗܘܢ ܕܥܒܕ ܬܕܡܪ̈ܬܐ ܒܐܪܥܐ ܕܡܨܪܝܢ ܘܒܚ̈ܩܠܬܐ ܕܨܥܢ

13ܬܪܥ ܝܡܐ ܘܐܥܒܪ ܐܢܘܢ ܘܐܩܝܡ ܡ̈ܝܐ ܐܝܟ ܕܒܙܩ̈ܐ

14ܕܒܪ ܐܢܘܢ ܒܐܝܡܡܐ ܒܥܢܢܐ ܘܟܠܗ ܠܠܝܐ ܒܙܗܪܐ ܕܢܘܪܐ

15ܬܪܥ ܛܪܢܐ ܒܡܕܒܪܐ ܘܐܫܩܝ ܐܢܘܢ ܐܝܟ ܕܡܢ ܬܗܘܡܐ ܪܒܐ

16ܐܦܩ ܪ̈ܕܝܐ ܡܢ ܟܐܦܐ ܘܪܕܘ ܡ̈ܝܐ ܐܝܟ ܢܗܪ̈ܘܬܐ

17ܘܐܘܣܦܘ ܬܘܒ ܥܡܐ ܠܡܚܛܐ ܘܠܡܡܪܡܪܘ ܠܡܪܝܡܐ ܒܨܗܝܐ

18ܘܢܣܝܘ ܠܐܠܗܐ ܒܠܒܗܘܢ ܠܡܫܐܠ ܡܐܟܘܠܬܐ ܠܢܦܫܗܘܢ

19ܘܪܛܢܘ ܥܠ ܐܠܗܐ ܘܐܡܪܘ ܕܠܡܐ ܡܫܟܚ ܐܠܗܐ ܠܡܣܕܪ ܠܢ ܦܬܘܪ̈ܐ ܒܡܕܒܪܐ

20ܐܢ ܡܚܐ ܠܛܪܢܐ ܘܪܕܘ ܡ̈ܝܐ ܘܐܪ̈ܓܠܬܐ ܐܪܕܝ ܕܠܡܐ ܐܦ ܠܚܡܐ ܡܫܟܚ ܠܡܬܠ ܠܢ ܐܘ ܡܛܝܒ ܡܐܟܘܠܬܐ ܠܥܡܗ

21ܡܛܠ ܗܢܐ ܫܡܥ ܡܪܝܐ ܘܪܓܙ ܘܢܘܪܐ ܐܚܕܬ ܒܝܥܩܘܒ ܐܦ ܪܘܓܙܐ ܣܠܩ ܒܐܝܣܪܝܠ

22ܥܠ ܕܠܐ ܗܝܡܢܘ ܒܐܠܗܐ ܘܠܐ ܣܒܪܘ ܠܦܘܪܩܢܗ

23ܘܦܩܕ ܠܥ̈ܢܢܐ ܡܢ ܠܥܠ ܘܬܪ̈ܥܐ ܕܫܡܝܐ ܐܬܦܬܚܘ

24ܐܚܬ ܠܗܘܢ ܡܢܢܐ ܠܡܐܟܠ ܘܠܚܡܐ ܕܫܡܝܐ ܝܗܒ ܠܗܘܢ

25ܠܚܡܐ ܕܡܠܐ̈ܟܐ ܐܟܠ ܒܪ ܐܢܫܐ ܘܨܝܕܐ ܫܕܪ ܠܗܘܢ ܠܡܣܒܥ

26ܐܫܒ ܪ̈ܘܚܐ ܒܫܡܝܐ ܘܕܒܪ ܒܥܘܫܢܗ ܠܬܝܡܢܐ

27ܐܚܬ ܠܗܘܢ ܒܣܪܐ ܐܝܟ ܥܦܪܐ ܘܐܝܟ ܚܠܐ ܕܝܡ̈ܡܐ ܦܪܚܬܐ ܕܓܦܐ

28ܘܢܦܠܘ ܒܡܫܪ̈ܝܬܗܘܢ ܚܕܪ̈ܝ ܡܫ̈ܟܢܝܗܘܢ

29ܐܟܠܘ ܘܣܒܥܘ ܛܒ ܘܐܪ̈ܓܝܓܬܗܘܢ ܝܗܒ ܠܗܘܢ

30ܘܠܐ ܦܪܩܘ ܡܢ ܪ̈ܓܝܓܬܗܘܢ ܘܥܕ ܡܐܟܘܠܬܗܘܢ ܒܦܘܡܗܘܢ

31ܪܘܓܙܗ ܕܐܠܗܐ ܣܠܩ ܒܗܘܢ ܘܩܛܠ ܡܢ ܥܬܝܪ̈ܝܗܘܢ ܘܠܓܒ̈ܝܐ ܕܐܝܣܪܝܠ ܐܒܪܟ

32ܒܗܠܝܢ ܟܠܗܝܢ ܚܛܘ ܘܬܘܒ ܠܐ ܗܝܡܢܘ ܒܬܕܡܪ̈ܬܗ

33ܓܡܪܘ ܒܣܪܝܩܘܬܐ ܝܘܡ̈ܝܗܘܢ ܘܫ̈ܢܝܗܘܢ ܡܣܪܗܒܐܝܬ

34ܡܐ ܕܩܛܠ ܗܘܐ ܠܗܘܢ ܒܥܝܢ ܗܘܘ ܠܗ ܗܦܟܝܢ ܗܘܘ ܘܡܩܕܡܝܢ ܠܘܬܗ

35ܥܗܕܘ ܕܐܠܗܐ ܗܘ ܥܕܘܪܗܘܢ ܘܐܠܗܐ ܡܪܝܡܐ ܦܪܘܩܗܘܢ

36ܪܚܡܘܗܝ ܒܦܘܡܗܘܢ ܘܒܠܫܢܗܘܢ ܟܕܒܘ ܒܗ

37ܠܒܗܘܢ ܠܐ ܐܬܩܢܘ ܥܡܗ ܘܠܐ ܗܝܡܢܘ ܒܩܝܡܗ

38ܘܗܘ ܡܪܚܡܢ ܘܫܒܩ ܚ̈ܛܗܐ ܘܠܐ ܡܚܒܠ ܡܣܓܐ ܠܡܗܦܟܘ ܪܘܓܙܗ ܘܠܐ ܡܥܝܪ ܟܠܗ̇ ܚܡܬܗ

39ܐܬܕܟܪ ܕܒܣܪܐ ܐܢܘܢ ܪܘܚܐ ܕܐܙܠܐ ܘܠܐ ܗܦܟܐ

40ܗܢܘܢ ܡܪܡܪܘܗܝ ܒܡܕܒܪܐ ܘܐܪܓܙܘܗܝ ܒܐܫܝܡܘܢ

41ܘܗܦܟܘ ܘܢܣܝܘ ܠܐܠܗܐ ܘܠܩܕܝܫܐ ܕܐܝܣܪܝܠ ܓܪܓܘ

42ܘܠܐ ܐܬܕܟܪܘ ܐܝܕܗ ܝܘܡܐ ܕܦܪܩ ܐܢܘܢ ܡܢ ܐܠܘܨܐ

43ܕܥܒܕ ܒܡܨܪܝܢ ܐܬ̈ܘܬܗ ܘܬܕܡܪ̈ܬܗ ܒܚ̈ܩܠܬܐ ܕܨܥܢ

44ܕܗܦܟ ܢܗܪ̈ܘܬܗܘܢ ܠܕܡܐ ܘܪ̈ܕܝܗܘܢ ܕܠܐ ܢܫܬܘܢ ܡ̈ܝܐ

45ܫܕܪ ܥܠܝܗܘܢ ܚܠܘܛܐ ܘܐܟܠ ܐܢܘܢ ܘܐܘܪ̈ܕܥܐ ܘܚܒܠ ܐܢܘܢ

46ܝܗܒ ܠܩܡܨܐ ܥ̈ܠܠܬܗܘܢ ܘܠܐܘܬܗܘܢ ܠܙܚܠܐ

47ܬܒܪ ܒܒܪܕܐ ܓܘܦܢ̈ܝܗܘܢ ܘܬܐ̈ܢܝܗܘܢ ܒܓܠܝܕܐ

48ܐܫܠܡ ܠܒܪܕܐ ܒܥܝܪܗܘܢ ܘܩܢܝܢܗܘܢ ܠܝܩܕܢܐ

49ܫܕܪ ܥܠܝܗܘܢ ܚܡܬܐ ܕܪܘܓܙܗ ܚܡܬܐ ܘܪܘܓܙܐ ܘܐܘܠܨܢܐ ܫܕܪ ܒܝܕ ܡܠܐܟܐ ܒܝܫܐ

50ܘܬܪܥ ܫܒܝ̈ܠܐ ܒܝܫ̈ܐ ܘܠܐ ܚܣܟ ܡܢ ܡܘܬܐ ܢܦܫܬ̈ܗܘܢ ܘܚܝ̈ܘܬܗܘܢ ܠܡܘܬܐ ܐܫܠܡ

51ܩܛܠ ܟܠ ܒܘܟܪ̈ܐ ܕܡܨܪܝܢ ܪܝܫ ܟܠܗ ܝܠܕܗܘܢ ܒܡܫܟܢܐ ܕܚܡ

52ܐܫܩܠ ܠܥܡܗ ܐܝܟ ܥܢܐ ܘܕܒܪ ܐܢܘܢ ܐܝܟ ܓܙܪܐ ܒܡܕܒܪܐ

53ܐܫܪܝ ܐܢܘܢ ܒܣܒܪܐ ܘܠܐ ܕܚܠܘ ܘܠܒ̈ܥܠܕܒܒܝܗܘܢ ܟܣܝ ܝܡܐ

54ܐܝܬܝ ܐܢܘܢ ܠܬܚܘܡܐ ܕܩܘܕܫܗ ܠܗܢܐ ܛܘܪܐ ܕܩܢܬ ܝܡܝܢܗ

55ܐܘܒܕ ܡܢ ܩܕܡܝܗܘܢ ܥܡ̈ܡܐ ܘܐܪܡܝ ܐܢܘܢ ܒܚ̈ܒܠܐ ܕܝܪܬܘܬܗ ܘܫܪܘ ܒܡܫ̈ܟܢܝܗܘܢ ܫܒ̈ܛܐ ܕܐܝܣܪܝܠ

56ܘܢܣܝܘ ܘܡܪܡܪܘ ܠܐܠܗܐ ܡܪܝܡܐ ܘܣܗ̈ܕܘܬܗ ܠܐ ܢܛܪܘ

57ܘܗܦܟܘ ܘܕܓܠܘ ܐܝܟ ܐ̈ܒܗܝܗܘܢ ܘܐܬܗܦܟܘ ܐܝܟ ܩܫܬܐ ܢܟܝܠܬܐ

58ܘܐܪܓܙܘܗܝ ܒ̈ܥܠܘܬܗܘܢ ܘܒܦܬܟܪ̈ܝܗܘܢ ܐܛܢܘܗܝ

59ܘܫܡܥ ܐܠܗܐ ܘܐܬܚܡܬ ܘܪܓܙ ܛܒ ܥܠ ܐܝܣܪܝܠ

60ܘܛܥܐ ܠܡܫܟܢܐ ܕܫܝܠܘ ܡܫܟܢܐ ܕܫܪܐ ܒܝܬ ܒܢܝܢܫ̈ܐ

61ܝܗܒ ܠܫܒܝܬܐ ܥܡܗ ܘܬܫܒܘܚܬܗ ܒܐܝܕܐ ܕܐܠܘܨܐ

62ܐܫܠܡ ܥܡܗ ܠܚܪܒܐ ܘܐܗܡܝ ܡܢ ܝܪܬܘܬܗ

63ܠܓܕܘ̈ܕܝܗܘܢ ܐܟܠܬ ܢܘܪܐ ܘܒܬ̈ܘܠܬܗܘܢ ܐܬܛܪܦ

64ܘܟܗ̈ܢܝܗܘܢ ܢܦܠܘ ܒܚܪܒܐ ܘܐܪ̈ܡܠܬܗܘܢ ܠܐ ܐܬܒ̈ܟܝ

65ܐܬܬܥܝܪ ܡܪܝܐ ܐܝܟ ܕܡܟܐ ܘܐܝܟ ܓܒܪܐ ܕܢܦܨܗ ܚܡܪܗ

66ܡܚܐ ܠܒ̈ܥܠܕܒܒܘܗܝ ܠܒܣܬܪܗ ܘܚܣܕܐ ܕܥܠܡܐ ܝܗܒ ܠܗܘܢ

67ܐܣܠܝ ܠܡܫܟܢܐ ܕܝܘܣܦ ܘܒܫܒܛܐ ܕܐܦܪܝܡ ܠܐ ܐܬܪܥܝ

68ܓܒܐ ܠܫܪܒܬܐ ܕܝܗܘܕܐ. ܠܛܘܪܐ ܕܨܗܝܘܢ ܕܪܚܡ

69ܒܢܐ ܥܠ ܪܘܡܐ ܡܩܕܫܗ ܘܒܐܪܥܐ ܐܬܩܢܗ̇ ܠܥܠܡ

70ܓܒܐ ܠܕܘܝܕ ܥܒܕܗ ܘܕܒܪܗ ܡܢ ܓܙܪܐ ܕܥܢܐ

71ܘܡܢ ܒܣܬܪ ܥܢܐ ܕܡܝܢܩܐ ܠܡܪܥܐ ܠܝܥܩܘܒ ܥܡܗ ܘܠܐܝܣܪܐܝܠ ܝܪܬܘܬܗ

72ܘܪܥܐ ܐܢܘܢ ܒܬܡܝܡܘܬܐ ܕܠܒܗ ܘܒܣܘܟܠܐ ܕܐ̈ܝܕܘܗܝ ܕܒܪ ܐܢܘܢ

Chapter 79 ܡܙܡܘܪ̈ܐ

1ܐܠܗܐ ܥܠܘ ܥܡ̈ܡܐ ܠܝܪܬܘܬܟ ܘܛܡܐܘܗܝ ܠܗܝܟܠܟ ܩܕܝܫܐ ܥܒܕܘܗ̇ ܠܐܘܪܫܠܡ ܚܪܒܬܐ

2ܝܗܒܘ ܫ̈ܠܕܐ ܕܥܒ̈ܕܝܟ ܡܐܟܘܠܬܐ ܠܦܪܚܬܐ ܕܫܡܝܐ ܘܒܣܪܐ ܕܙܕܝܩ̈ܝܟ ܠܚܝܘܬܐ ܕܐܪܥܐ

3ܐܫܕܘ ܕܡܗܘܢ ܐܝܟ ܡ̈ܝܐ ܚܕܪ̈ܝܗ̇ ܕܐܘܪܫܠܡ ܘܠܝܬ ܕܩܒܪ

4ܗܘܝܢ ܚܣܕܐ ܠܫܒ̈ܒܝܢ ܡܘܝܩܐ ܘܒܘܙܚܐ ܠܐܝܠܝܢ ܕܚܕܪܝܢ ܐܢܘܢ

5ܥܕܡܐ ܠܐܡܬܝ ܪܓܙ ܐܢܬ ܡܪܝܐ ܠܥܠܡ ܘܝܩܕ ܐܝܟ ܢܘܪܐ ܪܘܓܙܟ

6ܐܫܘܕ ܪܘܓܙܟ ܥܠ ܥܡ̈ܡܐ ܐܝܠܝܢ ܕܠܐ ܝܕܥܘܟ ܘܥܠ ܡ̈ܠܟܘܬܐ ܐܝܠܝܢ ܕܒܫܡܟ ܠܐ ܩܪ̈ܝ

7ܡܛܠ ܕܐܟܠܘܗܝ ܠܝܥܩܘܒ ܘܠܕܝܪܗ ܚܪܒܘ

8ܠܐ ܬܬܕܟܪ ܠܢ ܚ̈ܛܗܝܢ ܩܕܡܝ̈ܐ ܒܥܓܠ ܢܩܕܡܘܢܢܝ ܪ̈ܚܡܝܟ ܡܛܠ ܕܐܬܡܟܟܢ ܛܒ

9ܥܕܪܝܢܝ ܐܠܗܐ ܦܪܘܩܢ ܡܛܠ ܐܝܩܪܐ ܕܫܡܟ ܚܣܢܝ ܘܦܨܢܝ ܡܢ ܚ̈ܛܗܝܢ ܡܛܠ ܫܡܟ

10ܕܠܐ ܢܐܡܪܘܢ ܥܡ̈ܡܐ ܐܝܟܘ ܐܠܗܗܘܢ ܬܬܝܕܥ ܒܥܡ̈ܡܐ ܠܥܝܢ̈ܝܢ ܬܒܥܬܐ ܕܕܡܐ ܕܥܒ̈ܕܝܟ ܕܐܬܐܫܕ

11ܬܥܘܠ ܩܕܡܝܟ ܐܢܩܬܗ ܕܐܣܝܪܐ ܒܪܒܘܬܐ ܕܕܪܥܟ ܫܪܝ ܒܢ̈ܝܐ ܡܢ ܡܘܬܐ

12ܘܦܪܘܥ ܠܫܒ̈ܒܝܢ ܚܕ ܒܫܒܥܐ ܒܥܘܒܗܘܢ ܚܣܕܐ ܕܚܣܕܘܟ ܡܪܝܐ

13ܘܚܢܢ ܥܡܟ ܘܥܢܐ ܕܡܪܥܝܬܟ ܢܘܕܐ ܠܟ ܠܥܠܡ ܘܠܕܪܕܪܝܢ ܢܫܬܥܐ ܬܕܡܪ̈ܬܟ

Chapter 80 ܡܙܡܘܪ̈ܐ

2ܪܥܝܗ ܕܐܝܣܪܝܠ ܨܘܬ ܘܕܒܪ ܐܝܟ ܥܢܐ ܠܝܘܣܦ ܝܬܒ ܥܠ ܟܪ̈ܘܒܐ ܐܬܓܠܝ

3ܩܕܡ ܐܦܪܝܡ ܘܒܢܝܡܝܢ ܘܡܢܫܐ ܚܘܐ ܓܢܒܪܘܬܟ ܘܬܐ ܠܦܘܪܩܢܢ

4ܐܠܗܐ ܚܝܠܬܢܐ ܐܦܢܢ ܘܐܢܗܪ ܐ̈ܦܝܟ ܘܢܬܦܪܩ

5ܡܪܝܐ ܐܠܗܐ ܚܝܠܬܢܐ ܥܕܡܐ ܠܐܡܬܝ ܪܓܙ ܐܢܬ ܥܠ ܨܠܘܬܗ ܕܥܒܕܟ

6ܐܘܟܠܬ ܐܢܘܢ ܠܚܡܐ ܒܕܡܥܬܐ ܘܐܫܩܝܬ ܐܢܘܢ ܒܕܡܥܬܐ

7ܥܒܕܬܢ ܪܢܝܐ ܠܫܒ̈ܒܝܢ ܘܒ̈ܥܠܕܒܒܝܢ ܡܝܩܘ ܒܢ

8ܐܠܗܐ ܚܝܠܬܢܐ ܐܦܢܢ ܘܐܢܗܪ ܐ̈ܦܝܟ ܘܢܬܦܪܩ

9ܓܦܬܐ ܐܦܩܬ ܡܢ ܡܨܪܝܢ ܐܘܒܕܬ ܥܡ̈ܡܐ ܘܢܨܒܬܗ̇

10ܚܪܬ ܒܗ̇ ܘܢܨܒܬ ܥܩܪܗ̇ ܘܡܠܬ ܐܪܥܐ ܡܢܗ̇

11ܘܐܬܟܣܝܘ ܛܘܪ̈ܐ ܡܢ ܛܠܠܗ̇ ܘܥ̈ܘܦܝܗ̇ ܥܠ ܐܪ̈ܙܘܗܝ ܕܐܠܗܐ

12ܫܕܬ ܓܝܕܝ̈ܗ̇ ܥܕܡܐ ܠܝܡܐ ܘܥܠ ܢܗܪ̈ܘܬܐ ܥܢܩ̈ܝܗ̇

13ܠܡܢܐ ܬܪܥܬ ܣܝܓܗ̇ ܘܕܫܘܗ̇ ܟܘܠ ܥܒܪ̈ܝ ܐܘܪܚܐ

14ܘܐܟܠܗ̇ ܚܙܝܪܐ ܕܥܒܐ ܘܚܝ̈ܘܬܐ ܕܒܪܐ ܪ̈ܥܝܗ̇

15ܐܠܗܐ ܚܝܠܬܢܐ ܐܬܦܢ ܘܚܘܪ ܡܢ ܫܡܝܐ ܘܚܙܝ ܘܦܩܘܕܝܗ̇ ܠܓܦܬܐ ܗܕܐ

16ܘܠܣܬܐ ܕܢܨܒܬ ܝܡܝܢܟ ܘܠܒܪܢܫܐ ܕܚܝܠܬ ܠܟ

17ܐܘܩܕ ܒܢܘܪܐ ܫܒܘܩ̈ܝܗ̇ ܘܡܢ ܟܐܬܐ ܕܐ̈ܦܝܟ ܢܐܒܕܘܢ

18ܬܗܘܐ ܐܝܕܟ ܕܝܡܝܢܐ ܥܠ ܓܒܪܐ ܘܥܠ ܒܪܢܫܐ ܕܚܝܠܬ ܠܟ

19ܕܠܐ ܢܗܦܘܟ ܡܢܟ ܐܠܐ ܐܚܢܝ ܘܒܫܡܟ ܢܩܪܐ

20ܡܪܝܐ ܐܠܗܐ ܚܝܠܬܢܐ ܐܦܢܢ ܘܐܢܗܪ ܐ̈ܦܝܟ ܘܢܬܦܪܩ

Chapter 81 ܡܙܡܘܪ̈ܐ

2ܫܒܚܘ ܠܐܠܗܐ ܡܥܫܢܢܢ ܘܩܥܘ ܠܐܠܗܗ ܕܝܥܩܘܒ

3ܫܩܘܠܘ ܦܠܓ̈ܐ ܘܟܢܪ̈ܐ ܘܒܣ̈ܝܡܐ ܥܡ ܩܝܬܪ̈ܐ

4ܩܪܘ ܒܩܪ̈ܢܬܐ ܒܪܝܫ ܝܪ̈ܚܐ ܘܒܟܣ̈ܐܐ ܒܝ̈ܘܡܬܐ ܕܥܕܥ̈ܐܕܐ

5ܡܛܠ ܕܢܡܘܣܐ ܗܘ ܠܐܝܣܪܝܠ ܘܕܝܢܐ ܠܐܠܗܗ ܕܝܥܩܘܒ

6ܣܗܕܘܬܐ ܒܝܘܣܦ ܣܡܗ̇ ܟܕ ܢܦܩ ܠܐܪܥܐ ܕܡܨܪܝܢ ܠܫܢܐ ܕܠܐ ܝܕܥ ܗܘܐ ܫܡܥ

7ܐܥܒܪܬ ܢܝܪܐ ܡܢ ܟܬܦܗ ܘܐ̈ܝܕܘܗܝ ܡܢ ܐܣܘܪܝܐ ܫܪܝܬ

8ܒܐܘܠܨܢܐ ܩܪܢܝ ܘܦܨܝܬܗ ܘܟܣܝܬܗ ܒܣܬܪܐ ܕܝܠܝ ܡܫܒܚܐ ܘܒܚܪܬܗ ܒܡ̈ܝܐ ܕܚܪܝܢܐ

9ܫܡܥ ܥܡܝ ܘܐܡܠܠ ܘܐܝܣܪܝܠ ܐܣܗܕ ܒܟ ܐܢ ܬܫܡܥܢܝ

10ܠܐ ܢܗܘܐ ܠܟ ܐܠܗ ܢܘܟܪܝ ܘܠܐ ܬܣܓܘܕ ܠܕܚܠܐ ܐܚܪܢܝܐ

11ܐܢܐ ܐܢܐ ܡܪܝܐ ܐܠܗܟ ܕܐܣܩܬܟ ܡܢ ܐܪܥܐ ܕܡܨܪܝܢ ܦܬܚ ܦܘܡܟ ܘܐܡܠܝܘܗܝ

12ܘܥܡܝ ܠܐ ܫܡܥ ܒܩܠܝ ܘܐܝܣܪܝܠ ܠܐ ܐܬܛܦܝܣܘ ܡܢܝ

13ܗܠܟܘ ܒܨܒܝܢܐ ܕܠܒܗܘܢ ܘܒܬܪܥܝܬܐ ܕܢܦܫܗܘܢ

14ܐܠܘ ܥܡܝ ܫܡܥܢܝ ܘܐܝܣܪܝܠ ܒܐܘܪ̈ܚܬܝ ܗܠܟ

15ܥܕ ܩܠܝܠ ܡܘܒܕ ܗܘܝܬ ܠܒ̈ܥܠܕܒܒܝܗܘܢ ܘܥܠ ܣܢܐ̈ܝܗܘܢ ܡܗܦܟ ܗܘܝܬ ܐܝܕܝ

16ܣܢܐ̈ܘܗܝ ܕܡܪܝܐ ܟܕܒܘ ܒܗ ܘܗܘܐ ܙܘܥܗܘܢ ܠܥܠܡ

17ܐܘܟܠܗ ܡܢ ܫܘܡܢܐ ܕܚܛܬܐ ܘܡܢ ܟܐܦܐ ܕܒܫܐ ܣܒܥܗ

Chapter 82 ܡܙܡܘܪ̈ܐ

1ܐܠܗܐ ܩܡ ܒܟܢܫܐ ܕܡܠܐ̈ܟܐ ܘܒܓܘ ܡܠܐ̈ܟܐ ܢܕܘܢ

2ܥܕܡܐ ܠܐܡܬܝ ܕܝܢܝܢ ܐܢܬܘܢ ܥܘܠܐ ܘܒܐ̈ܦܐ ܕܪ̈ܫܝܥܐ ܢܣܒܝܢ ܐܢܬܘܢ

3ܕܘܢܘ ܠܝܬ̈ܡܐ ܘܠܒܝܫ̈ܐ ܘܠܡܣ̈ܟܢܐ ܘܠܡ̈ܟܝܟܐ ܙܟܘ

4ܦܨܘ ܠܡܣ̈ܟܢܐ ܘܠܒܝ̈ܫܐ ܡܢ ܐܝܕܐ ܕܪ̈ܫܝܥܐ

5ܕܠܐ ܝܕܥܘ ܘܠܐ ܐܣܬܟܠܘ ܕܒܚܫܘܟܐ ܡܗܠܟܝܢ ܗܘܘ ܘܙܥ̈ܝ ܟܠܗܝܢ ܫܬܐ̈ܣܝܗ̇ ܕܐܪܥܐ

6ܐܢܐ ܐܡܪܬ ܕܐ̈ܠܗܝܢ ܐܢܬܘܢ ܘܒܢ̈ܘܗܝ ܕܡܪܝܡܐ ܟܠܟܘܢ

7ܡܟܝܠ ܐܝܟ ܒܢܝܢܫ̈ܐ ܬܡܘܬܘܢ ܘܐܝܟ ܚܕ ܡܢ ܪ̈ܘܪܒܢܐ ܬܦܠܘܢ

8ܩܘܡ ܐܠܗܐ ܘܕܘܢܝܗ̇ ܠܐܪܥܐ ܡܛܠ ܕܐܢܬ ܬܐܪܬ ܠܟܠܗܘܢ ܥܡ̈ܡܐ

Chapter 83 ܡܙܡܘܪ̈ܐ

2ܐܠܗܐ ܡܢܘ ܕܕܡܐ ܠܟ ܠܐ ܬܫܬܘܩ ܘܠܐ ܬܫܠܐ ܐܠܗܐ

3ܡܛܠ ܕܗܐ ܒ̈ܥܠܕܒܒܝܟ ܡܬܪܓܫܝܢ ܘܣ̈ܢܐܝܟ ܐܪܝܡܘ ܪܝܫܐ

4ܥܠ ܥܡܟ ܒܚܪܥܘܬܗܘܢ ܚܫܠܘ ܪܐܙܐ ܘܐܬܡܠܟܘ ܥܠ ܩܕܝܫ̈ܝܟ

5ܘܐܡܪܘ ܬܘ ܢܘܒܕ ܐܢܘܢ ܡܢ ܥܡܐ ܘܠܐ ܢܬܕܟܪ ܬܘܒ ܫܡܗ ܕܐܝܣܪܝܠ

6ܡܛܠ ܕܐܬܪܥܝܘ ܒܠܒܗܘܢ ܐܟܚܕܐ ܘܥܠܝܟ ܐܩܝܡܘ ܩܝܡܐ

7ܡܫܟܢܐ ܕܐܕܘܡ ܘܕܥܪ̈ܒܝܐ ܘܕܡܘܐܒ ܘܕܓܕܪ̈ܝܐ

8ܬܚܘܡܐ ܕܥܡܘܢ ܘܕܥܡܠܝܩ ܘܕܦܠܫܬ ܥܡ ܝܬ̈ܒܝ ܨܘܪ

9ܐܦ ܐܬܘܪܝܐ ܐܫܬܘܝ ܥܡܗܘܢ ܘܗܘܘ ܥܘܕܪܢܐ ܠܒ̈ܢܝ ܠܘܛ

10ܥܒܕ ܠܗܘܢ ܐܝܟ ܕܠܡܕܝܢ ܘܐܝܟ ܕܠܣܝܣܪܐ ܘܐܝܟ ܕܠܢܒܝܢ ܒܢܚܠܐ ܕܩܝܫܘܢ

11ܕܐܬܚܪܒܘ ܒܥܝܢܕܘܪ ܘܗܘܘ ܙܒܠܐ ܒܐܪܥܐ

12ܚܪܘܒ ܐܢܘܢ ܘܐܘܒܕ ܐܢܘܢ ܐܝܟ ܕܠܥܘܪܝܒ ܘܐܝܟ ܙܝܒ ܘܐܝܟ ܙܒܚ ܘܐܝܟ ܨܠܡܢܥ ܟܠܗܘܢ ܫ̈ܠܝܛܢܝܗܘܢ

13ܕܐܡܪܘ ܢܐܪܬ ܠܢ ܩܪܝܬܗ ܕܐܠܗܐ

14ܐܠܗܐ ܥܒܕ ܐܢܘܢ ܐܝܟ ܓܝܓܠܐ ܘܐܝܟ ܓܠܐ ܩܕܡ ܪܘܚܐ

15ܘܐܝܟ ܢܘܪܐ ܕܡܫܬܒܩܐ ܒܥܒܐ ܘܐܝܟ ܫܠܗܒܝܬܐ ܕܡܘܩܕܐ ܛܘܪ̈ܐ

16ܗܟܢܐ ܪܕܘܦ ܐܢܘܢ ܒܥܠܥܠܟ ܘܒܩܪ̈ܚܝܟ ܕܠܚ ܐܢܘܢ

17ܡܠܝ ܐ̈ܦܝܗܘܢ ܨܥܪܐ ܕܢܒܥܘܢ ܠܫܡܟ ܡܪܝܐ

18ܢܒܗܬܘܢ ܘܢܬܕܠܚܘܢ ܠܥܠܡ ܥܠܡܝܢ ܢܚܦܪܘܢ ܘܢܐܒܕܘܢ

19ܘܢܕܥܘܢ ܕܫܡܟ ܗܘ ܡܪܝܐ ܒܠܚܘܕܝܟ. ܪܡ ܒܟܠܗ̇ ܐܪܥܐ

Chapter 84 ܡܙܡܘܪ̈ܐ

2ܡܐ ܚܒ̈ܝܒܝܢ ܡܫ̈ܟܢܝܟ ܡܪܝܐ ܚܝܠܬܢܐ

3ܣܟܝܬ ܢܦܫܝ ܘܐܬܪܓܪܓܬ ܠܕܪ̈ܘܗܝ ܕܡܪܝܐ ܠܒܝ ܘܒܣܪܝ ܫܒܚܘ ܠܐܠܗܐ ܚܝܐ

4ܐܦ ܨܦܪܐ ܐܫܟܚܬ ܠܗ̇ ܒܝܬܐ ܘܫܘܦܢܝܢܐ ܩܢܐ ܪܒܝܘ ܦܪ̈ܘܓܐ ܥܠ ܓܢܒ ܡܕܒܚܟ ܡܪܝܐ ܚܝܠܬܢܐ ܡܠܟܝ ܘܐܠܗܝ

5ܛܘܒܝܗܘܢ ܠܕܥܡܪܝܢ ܒܒܝܬܟ ܢܫܒܚܘܢܟ ܠܥܠܡ

6ܛܘܒܘܗܝ ܠܒܪܢܫܐ ܕܐܢܬ ܗܘ ܡܣܝܥܢܗ ܘܫ̈ܒܝܠܝܟ ܒܠܒܗ

7ܥܒܪܘ ܒܥܘܡܩܐ ܕܒܟܬܐ ܘܥܒܕܘܗܝ ܒܝܬ ܡܥܡܪܐ ܐܦ ܒܘܪܟܬܐ ܢܬܥܛܦ ܣܐܡ ܢܡܘܣܐ

8ܢܐܙܠܘܢ ܡܢ ܚܝܠܐ ܠܚܝܠܐ ܘܢܬܚܙܐ ܐܠܗ ܐ̈ܠܗܝܢ ܒܨܗܝܘܢ

9ܡܪܝܐ ܐܠܗܐ ܚܝܠܬܢܐ ܫܡܥ ܨܠܘܬܝ ܘܨܘܬ ܐܠܗܗ ܕܝܥܩܘܒ

10ܘܚܙܝ ܐܢܬ ܐܠܗܐ ܡܣܝܥܢܢ ܘܚܘܪ ܒܐ̈ܦܝ ܡܫܝܚܟ

11ܡܛܠ ܕܛܒ ܗܘ ܚܕ ܝܘܡ ܒܕܝܪܟ ܡܢ ܐܠܦ ܨܒܝܬ ܠܡܥܡܪ ܒܒܝܬܗ ܕܐܠܗܐ ܛܒ ܡܢ ܕܠܡܥܡܪ ܒܡܫܟܢܐ ܕܪ̈ܫܝܥܐ

12ܡܛܠ ܕܡܬܪܣܝܢܢ ܘܥܕܘܪܢ ܡܪܝܐ ܗܘ ܐܠܗܐ ܪ̈ܚܡܐ ܘܐܝܩܪܐ ܢܬܠ ܡܪܝܐ ܘܠܐ ܢܟܠܐ ܛܒ̈ܬܗ ܡܢ ܐܝܠܝܢ ܕܡܗܠܟܝܢ ܒܬܡܝܡܘܬܐ

13ܡܪܝܐ ܐܠܗܐ ܚܝܠܬܢܐ ܛܘܒܘܗܝ ܠܒܪܢܫܐ ܕܡܣܒܪ ܒܟ

Chapter 85 ܡܙܡܘܪ̈ܐ

2ܨܒܝܬ ܡܪܝܐ ܒܐܪܥܟ ܘܐܦܢܝܬ ܫܒܝܬܗ ܕܝܥܩܘܒ

3ܫܒܩܬ ܥܘܠܗ ܕܥܡܟ ܘܟܣܝܬ ܟܠܗܘܢ ܚ̈ܛܗܝܗܘܢ

4ܘܐܥܒܪܬ ܟܠܗ̇ ܚܡܬܟ ܘܐܗܦܟܬ ܚܡܬܐ ܕܪܘܓܙܟ

5ܐܦܢܢ ܐܠܗܐ ܦܪܘܩܢ ܘܒܛܠ ܪܘܓܙܟ ܡܢܢ

6ܘܠܐ ܠܥܠܡ ܬܪܓܙ ܥܠܝܢ ܘܠܐ ܬܛܪ ܪܘܓܙܟ ܠܕܪܕܪܝܢ

7ܐܠܐ ܐܢܬ ܐܦܢܢܝ ܘܐܚܢܝ ܘܥܡܟ ܢܚܕܘܢ ܒܟ

8ܚܘܢܝ ܡܪܝܐ ܛܝܒܘܬܟ ܘܦܘܪܩܢܟ ܗܒ ܠܢ

9ܕܢܫܡܥ ܡܢܐ ܡܡܠܠ ܡܪܝܐ ܐܠܗܢ ܕܡܡܠܠ ܫܠܡܐ ܥܠ ܥܡܗ ܘܥܡ ܙܕܝܩ̈ܘܗܝ ܕܠܐ ܢܗܦܟܘܢ ܠܒܣܬܪܗܘܢ

10ܩܪܝܒ ܗܘ ܦܘܪܩܢܗ ܠܕܚ̈ܠܘܗܝ ܢܫܪܐ ܐܝܩܪܗ ܒܐܪܥܢ

11ܛܝܒܘܬܐ ܘܩܘܫܬܐ ܐܪܥܘܢܝ ܙܕܝܩܘܬܐ ܘܫܠܡܐ ܢܢܫܩܘܢ

12ܗܝܡܢܘܬܐ ܬܐܥܐ ܡܢ ܐܪܥܐ ܘܙܕܝܩܘܬܐ ܐܕܝܩܬ ܡܢ ܫܡܝܐ

13ܐܦ ܡܪܝܐ ܢܬܠ ܛܒܬ̈ܗ ܘܐܪܥܐ ܬܬܠ ܥ̈ܠܠܬܗ̇

14ܘܙܕܝܩܐ ܩܕܡܘܗܝ ܢܗܠܟ ܘܢܣܝܡ ܒܐܪܥܐ ܗ̈ܠܟܬܗ

Chapter 86 ܡܙܡܘܪ̈ܐ

1ܨܠܝ ܡܪܝܐ ܐܕܢܟ ܘܥܢܝܢܝ ܡܛܠ ܕܡܣܟܢܐ ܐܢܐ ܘܒܝܫܐ

2ܢܛܪ ܠܢܦܫܝ ܡܛܠ ܕܛܒ ܐܢܬ ܦܪܘܩ ܠܥܒܕܟ ܐܢܬ ܐܠܗܐ ܕܡܣܒܪ ܒܟ

3ܪܚܡ ܥܠܝ ܡܪܝܐ ܡܛܠ ܕܠܘܬܟ ܐܩܪܐ ܒܟܠܝܘܡ

4ܚܕܐ ܢܦܫܗ ܕܥܒܕܟ ܡܛܠ ܕܠܘܬܟ ܡܪܝܐ ܐܪܝܡܬ ܢܦܫܝ

5ܡܛܠ ܕܐܢܬ ܡܪܝܐ ܛܒ ܐܢܬ ܘܣܓܝܐܐ ܛܝܒܘܬܟ ܠܟܠ ܕܩܪܝܢ ܠܟ

6ܨܘܬ ܡܪܝܐ ܨܠܘܬܝ ܘܫܡܥ ܒܩܠܐ ܕܓܥܬܝ

7ܒܝܘܡܐ ܕܐܘܠܨܢܝ ܩܪܝܬܟ ܘܥܢܝܬܢܝ

8ܠܝܬ ܐܟܘܬܟ ܡܪܝܐ ܐܠܗܢ ܘܠܝܬ ܐܝܟ ܥܒ̈ܕܝܟ

9ܟܠܗܘܢ ܥܡ̈ܡܐ ܕܥܒܕܬ ܢܐܬܘܢ ܘܢܣܓܕܘܢ ܠܟ ܡܪܝܐ ܘܢܫܒܚܘܢ ܠܫܡܟ

10ܡܛܘܠ ܕܪܒ ܐܢܬ ܥܒܕ ܐܢܬ ܬܕܡܪ̈ܬܐ ܐܢܬ ܐܠܗܐ ܒܠܚܘܕܝܟ

11ܚܘܢܝ ܡܪܝܐ ܐܘܪܚܟ ܘܐܗܠܟ ܒܩܘܫܬܐ ܢܚܕܐ ܠܒܝ ܒܐܝܠܝܢ ܕܕܚܠܝܢ ܠܫܡܟ

12ܐܘܕܐ ܠܟ ܡܪܝܐ ܐܠܗܝ ܡܢ ܟܠܗ ܠܒܝ ܘܐܫܒܚ ܫܡܟ ܠܥܠܡ

13ܡܛܠ ܕܛܝܒܘܬܟ ܣܓܝܬ ܥܠܝ ܘܦܨܝܬ ܢܦܫܝ ܡܢ ܫܝܘܠ ܬܚܬܝܬܐ

14ܐܠܗܐ ܥܘ̈ܠܐ ܩܡܘ ܥܠܝ ܘܟܢܘܫܬܐ ܕܥܫ̈ܝܢܐ ܒܥܐܘܗ̇ ܠܢܦܫܝ ܘܠܐ ܐܬܕܟܪܘܟ

15ܘܐܢܬ ܡܪܝܐ ܐܠܗܐ ܡܪܚܡܢܐ ܘܡܪܚܦܢܐ ܢܓܝܪ ܪܘܚܐ ܘܣܓܝ ܛܝܒܘܬܐ ܘܩܘܫܬܐ

16ܐܬܦܢ ܥܠܝ ܘܪܚܡ ܥܠܝ ܗܒ ܚܝܠܐ ܠܥܒܕܟ ܘܦܪܘܩ ܠܒܪ ܐܡܬܟ

17ܥܒܕ ܥܡܝ ܐܬܐ ܛܒܬܐ ܕܢܚܙܘܢ ܣܢܐ̈ܝ ܘܢܒܗܬܘܢ ܕܐܢܬ ܡܪܝܐ ܥܕܪܬܢܝ ܘܒܝܐܬܢܝ

Chapter 87 ܡܙܡܘܪ̈ܐ

1ܫܬܐ̈ܣܘܗܝ ܒܛܘܪܗ ܩܕܝܫܐ

2ܪܚܡ ܡܪܝܐ ܠܬܪ̈ܥܝܗ̇ ܕܨܗܝܘܢ ܛܒ ܡܢ ܟܠܗܘܢ ܡܫ̈ܟܢܘܗܝ ܕܝܥܩܘܒ

3ܝܩܝܪ̈ܬܐ ܐܬܡܠܠܝ ܒܟܝ ܩܪܝܬܗ ܕܐܠܗܢ

4ܐܬܕܟܪ ܠܪܚܒ ܘܠܒܒܠ ܝܕܥ̈ܬܝ ܗܐ ܦܠܫ̈ܬܝܐ ܘܨܘܪ ܘܥܡܐ ܕܟܘܫ̈ܝܐ ܗܢܐ ܐܬܝܠܕ ܬܡܢ

5ܘܠܨܗܝܘܢ ܐܬܐܡܪ ܓܒܪܐ ܓܢܒܪܐ ܐܬܝܠܕ ܒܗ̇ ܘܗܘ ܐܬܩܢܗ̇

6ܡܪܝܐ ܢܡܢܐ ܒܟܬܒܐ ܠܥܡ̈ܡܐ ܗܢܐ ܐܬܝܠܕ ܬܡܢ

7ܪ̈ܘܪܒܢܐ ܕܥܡܪܝܢ ܒܟܝ ܢܚܕܘܢ ܘܟܠ ܕܐܬܡܟܟܘ ܒܟܝ

Chapter 88 ܡܙܡܘܪ̈ܐ

2ܡܪܝܐ ܐܠܗܐ ܕܦܘܪܩܢܝ ܒܐܝܡܡܐ ܓܥܝܬ ܘܒܠܠܝܐ ܩܕܡܝܟ

3ܬܥܘܠ ܩܕܡܝܟ ܨܠܘܬܝ ܘܐܪܟܢ ܐܕܢܟ ܠܒܥܘܬܝ

4ܡܛܠ ܕܣܒܥܬ ܢܦܫܝ ܒܝܫ̈ܬܐ ܘܚܝ̈ܝ ܠܫܝܘܠ ܡܛܝܘ

5ܐܬܚܫܒܬ ܥܡ ܢܚ̈ܬܝ ܓܘܒܐ ܘܗܘܝܬ ܐܝܟ ܓܒܪܐ ܕܠܝܬ ܠܗ ܐܝܠܐ

6ܒܝܬ ܡܝ̈ܬܐ ܒܪ ܚܐܪ̈ܐ ܐܝܟ ܩ̈ܛܝܠܐ ܕܫܟܝܒܝܢ ܒܩܒܪ̈ܐ ܐܝܠܝܢ ܕܬܘܒ ܠܐ ܐܬܕܟܪܬ ܐܢܘܢ ܘܗܢܘܢ ܡܢ ܐܝ̈ܕܝܟ ܐܒܕܘ

7ܐܚܬܬܢܝ ܠܓܘܒܐ ܬܚܬܝܐ ܠܚܫܘܟܐ ܘܠܛ̈ܠܠܝ ܡܘܬܐ

8ܘܥܠܝ ܣܡܟ ܪܘܓܙܟ ܘܟܘܠܗܘܢ ܡܚܫ̈ܘܠܝܟ ܐܝܬܝܬ ܥܠܝ

9ܐܪܚܩܬ ܡܢܝ ܝܕܥ̈ܝ ܘܥܒܕܬܢܝ ܠܗܘܢ ܛܡܐܐ ܐܬܟܠܝܬ ܕܠܐ ܐܦܘܩ

10ܘܥܝܢܝ ܕܒܬ ܡܢ ܡܘܟܟܝ ܘܩܪܝܬܟ ܡܪܝܐ ܒܟܠܝܘܡ ܘܦܫܛܬ ܐܝ̈ܕܝ ܠܘܬܟ

11ܗܐ ܠܡܝ̈ܬܐ ܥܒܕ ܐܢܬ ܬܕܡܪ̈ܬܐ ܘܓܢܒܪ̈ܐ ܢܩܘܡܘܢ ܘܢܘܕܘܢ ܠܟ

12ܘܢܫܬܥܘܢ ܕܒܩܒܪ̈ܐ ܛܝܒܘܬܟ ܘܗܝܡܢܘܬܟ ܒܐܒܕܢܐ

13ܬܬܝܕܥ ܒܚܫܘܟܐ ܬܕܡܘܪܬܟ ܘܙܕܝܩܘܬܟ ܒܐܪܥܐ ܕܐܬܛܥܝܬ

14ܘܐܢܐ ܠܘܬܟ ܡܪܝܐ ܓܥܝܬ ܘܒܨܦܪܐ ܨܠܘܬܝ ܬܩܕܡ ܠܘܬܟ

15ܠܐ ܬܛܥܐ ܠܢܦܫܝ ܡܪܝܐ ܘܠܐ ܬܗܦܟ ܐ̈ܦܝܟ ܡܢܝ

16ܒܝܫܐ ܐܢܐ ܘܠܐܝܐ ܡܢ ܛܠܝܘܬܝ ܐܬܬܪܝܡܬ ܘܐܬܡܟܟܬ ܘܬܘܪܬ

17ܘܥܠܝ ܥܒܪ ܪܘܓܙܟ ܘܕܠܘܚܝܟ ܫܬܩܢܝ

18ܐܬܟܪܟܘܢܝ ܐܝܟ ܡ̈ܝܐ ܟܘܠܗ ܝܘܡܐ ܘܣܡܘ ܥܠܝ ܐܝܟ ܚܕܐ

19ܐܪܚܩܬ ܡܢܝ ܪ̈ܚܡܝ ܘܚܒܪ̈ܝ ܘܝܕܥ̈ܝ ܐܦܪܩܬ ܡܢܝ

Chapter 89 ܡܙܡܘܪ̈ܐ

2ܛܝܒܘܬܗ ܕܡܪܝܐ ܠܥܠܡ ܐܙܡܪ ܘܠܕܪܕܪܝܢ ܐܘܕܥ ܗܝܡܢܘܬܗ ܒܦܘܡܝ

3ܡܛܠ ܕܐܡܪ ܕܥܠܡܐ ܒܛܝܒܘܬܐ ܢܬܒܢܐ ܘܫܡܝܐ ܬܬܩܢ ܗܝܡܢܘܬܟ

4ܩܝܡܐ ܐܩܝܡܬ ܠܓܒܝܝ ܘܝܡܝܬ ܠܕܘܝܕ ܥܒܕܝ

5ܕܥܕܡܐ ܠܥܠܡ ܐܬܩܢ ܙܪܥܟ ܘܐܒܢܐ ܠܕܪܕܪܝܢ ܟܘܪܣܝܟ

6ܢܘܕܘܢ ܫܡܝܐ ܬܕܡܪ̈ܬܟ ܡܪܝܐ ܘܗܝܡܢܘܬܟ ܒܥܕܬܐ ܕܩܕܝܫ̈ܐ

7ܡܢܘ ܕܦܚܡ ܠܡܪܝܐ ܒܫ̈ܡܝ ܫܡܝܐ ܘܕܕܡܐ ܠܡܪܝܐ ܒܒܢ̈ܝ ܡܠܐ̈ܟܐ

8ܐܠܗܐ ܩܡ ܒܥܕܬܐ ܕܩܕܝܫ̈ܐ ܪܒ ܘܕܚܝܠ ܥܠ ܟܠܗܘܢ ܕܚܕܪ̈ܘܗܝ

9ܡܪܝܐ ܐܠܗܐ ܚܝܠܬܢܐ ܡܢܘ ܐܟܘܬܟ ܥܫܝܢܐ ܗܝܡܢܘܬܟ ܚܕܪ̈ܝܟ

10ܐܢܬ ܫܠܝܛ ܐܢܬ ܒܓܐܝܘܬܗ ܕܝܡܐ ܘܕܠܘܚܝܐ ܕܓܠܠܘ̈ܗܝ ܐܢܬ ܡܫܬܩ

11ܐܢܬ ܡܡܟܟ ܐܢܬ ܠܫܒܗܪ̈ܢܐ ܐܝܟ ܕܠܩ̈ܛܝܠܐ ܒܕܪܥܟ ܥܫܝܢܐ ܒܕܪܬ ܠܒ̈ܥܠܕܒܒܝܟ

12ܕܝܠܟ ܐܢܘܢ ܫܡܝܐ ܘܕܝܠܟ ܗܝ ܐܪܥܐ ܬܒܝܠ ܒܡܠܐܗ̇ ܐܢܬ ܬܩܢܬ

13ܠܓܪܒܝܐ ܘܠܬܝܡܢܐ ܐܢܬ ܒܪܝܬ ܬܒܘܪ ܘܚܪܡܘܢ ܠܫܡܟ ܗܘ ܡܫܒܚܝܢ

14ܕܝܠܟ ܗܘ ܕܪܥܐ ܘܕܝܠܟ ܗܝ ܓܢܒܪܘܬܐ ܬܥܫܢ ܐܝܕܟ ܘܬܬܪܝܡ ܝܡܝܢܟ

15ܒܙܕܝܩܘܬܐ ܘܒܕܝܢܐ ܡܬܩܢ ܟܘܪܣܝܟ ܒܛܝܒܘܬܐ ܘܒܩܘܫܬܐ ܡܩܕܡܝܢ ܐ̈ܦܝܟ

16ܛܘܒܘܗܝ ܠܥܡܐ ܕܝܕܥ ܬܫܒܚ̈ܬܟ ܡܪܝܐ ܒܢܘܗܪܐ ܕܐ̈ܦܝܟ ܢܗܠܟܘܢ

17ܘܒܫܡܟ ܢܕܘܨܘܢ ܟܠܝܘܡ ܘܒܙܕܝܩܘܬܟ ܢܬܬܪܝܡܘܢ

18ܡܛܠ ܕܬܫܒܘܚܬܐ ܕܥܘܫܢܢ ܐܢܬ ܗܘ ܘܒܨܒܝܢܟ ܬܬܪܝܡ ܩܪܢܢ

19ܡܛܠ ܕܡܪܝܐ ܗܘ ܬܘܟܠܢܢ ܘܩܕܝܫܐ ܕܐܝܣܪܝܠ ܡܠܟܢ

20ܗܝܕܝܢ ܡܠܠ ܒܚ̈ܙܘܢܐ ܥܡ ܙܕܝܩ̈ܘܗܝ ܘܐܡܪ ܕܣܡܬ ܥܘܕܪܢܐ ܠܓܒܪܐ ܘܐܪܝܡܬ ܓܒܝܐ ܡܢ ܥܡܐ

21ܘܐܫܟܚܬ ܠܕܘܝܕ ܥܒܕܝ ܡܫܚܐ ܕܩܘܕܫܝ ܡܫܚܬܗ

22ܐܝܕܝ ܥܕܪܬܗ ܐܦ ܕܪܥܝ ܚܝܠܗ

23ܘܠܐ ܐܗܢܝ ܡܕܡ ܒܥܠܕܒܒܗ ܘܒܪܗ ܕܥܘܠܐ ܠܐ ܡܟܟܗ

24ܐܘܒܕ ܡܢ ܩܕܡܘܗܝ ܠܒ̈ܥܠܕܒܒܘܗܝ ܘܠܣܢܐ̈ܘܗܝ ܐܬܒܪ

25ܗܝܡܢܘܬܝ ܘܛܝܒܘܬܝ ܥܡܗ ܘܒܫܡܝ ܬܬܪܝܡ ܩܪܢܗ

26ܐܣܝܡ ܐܝܕܗ ܒܝܡܐ ܘܒܢܗܪ̈ܘܬܐ ܝܡܝܢܗ

27ܗܘ ܢܩܪܝܢܝ ܐܒܝ ܐܢܬ ܐܠܗܝ ܘܦܪܘܩܝ ܬܩܝܦܐ

28ܐܦ ܐܢܐ ܒܘܟܪܐ ܐܥܒܕܝܘܗܝ ܘܐܪܝܡܝܘܗܝ ܥܠ ܡ̈ܠܟܐ ܕܐܪܥܐ

29ܘܠܥܠܡ ܐܛܪ ܠܗ ܛܝܒܘܬܝ ܘܩܝܡܝ ܢܬܗܝܡܢ ܒܗ

30ܐܣܝܡ ܠܥܠܡ ܙܪܥܗ ܘܟܘܪܣܝܗ ܐܝܟ ܝܘܡ̈ܬܐ ܕܫܡܝܐ

31ܐܢ ܢܫܒܩܘܢ ܒܢ̈ܘܗܝ ܢܡܘܣܝ ܘܒ̈ܦܘܩܕܢܝ ܠܐ ܢܗܠܟܘܢ

33ܐܦܩܘܕ ܒܫܒܛܐ ܥܘܠܗܘܢ ܘܒܡܚܘܬܐ ܚ̈ܛܗܝܗܘܢ

34ܘܛܝܒܘܬܝ ܠܐ ܐܥܒܪ ܡܢܗ ܘܠܐ ܐܕܓܠ ܒܗܝܡܢܘܬܝ

35ܘܠܐ ܐܣܠܐ ܩܝܡܝ ܘܡܕܡ ܕܢܦܩ ܡܢ ܣ̈ܦܘܬܝ ܠܐ ܐܫܚܠܦ

36ܚܕܐ ܝܡܝܬ ܒܩܘܕܫܝ ܠܕܘܝܕ ܘܠܐ ܐܟܕܒ

37ܕܙܪܥܗ ܠܥܠܡ ܢܗܘܐ ܘܟܘܪܣܝܗ ܐܝܟ ܫܡܫܐ ܠܘܩܒܠܝ

38ܘܐܝܟ ܣܗܪܐ ܢܬܩܢ ܠܥܠܡ ܣܗܕܐ ܒܫܡܝܐ ܡܗܝܡܢ

39ܘܐܢܬ ܛܥܝܬܢܝ ܘܐܣܠܝܬܢܝ ܘܐܗܦܟܬ ܐ̈ܦܘܗܝ ܕܡܫܝܚܟ

40ܘܐܣܠܝܬ ܩܝܡܗ ܕܥܒܕܟ ܘܐܪܡܝܬ ܒܐܪܥܐ ܟܠܝܠܗ

41ܗܓܡܬ ܣܝ̈ܓܘܗܝ ܘܣܚܦܬ ܚܣ̈ܢܘܗܝ

42ܘܕܫܘܗܝ ܟܠ ܥܒܪ̈ܝ ܐܘܪܚܐ ܘܗܘܐ ܚܣܕܐ ܠܫܒ̈ܒܘܗܝ

43ܘܐܪܝܡܬ ܝܡܝܢܐ ܕܒ̈ܥܠܕܒܒܘܗܝ ܘܚܕܝܬ ܠܟܠܗܘܢ ܣܢܐ̈ܘܗܝ

44ܘܐܗܦܟܬ ܥܘܕܪܢܐ ܕܣܦܣܝܪܗ ܘܠܐ ܣܝܥܬܝܗܝ ܒܩܪܒܐ

45ܘܒܛܠܬ ܡܙܟܝ̈ܢܘܗܝ ܘܟܘܪܣܝܗ ܠܐܪܥܐ ܣܚܦܬ

46ܘܒܨܪܬ ܝܘܡ̈ܬܐ ܕܛܠܝܘܬܗ ܘܐܥܛܦܬܝܗܝ ܒܗܬܬܐ

47ܥܕܡܐ ܠܐܡܬܝ ܪܓܙ ܐܢܬ ܡܪܝܐ ܠܥܠܡ ܘܝܩܕ ܐܝܟ ܢܘܪܐ ܪܘܓܙܟ

48ܐܬܕܟܪܝܢܝ ܡܢ ܚܦܪܐ ܡܛܘܠ ܕܠܐ ܗܘܐ ܣܪܝܩܐܝܬ ܒܪܝܬ ܠܟܠܗܘܢ ܒܢܝܢܫ̈ܐ

49ܡܢܘ ܓܒܪܐ ܕܢܚܐ ܘܠܐ ܢܚܙܐ ܡܘܬܐ ܘܢܦܨܐ ܢܦܫܗ ܡܢ ܐܝܕܐ ܕܫܝܘܠ

50ܐܝܟܐ ܐܢܝܢ ܛܝ̈ܒܘܬܟ ܡܪܝܐ ܩܕܡܝ̈ܬܐ ܕܝܡܝܬ ܠܕܘܝܕ ܒܗܝܡܢܘܬܐ

51ܐܬܕܟܪ ܡܪܝܐ ܚܣܕܗ ܕܥܒܕܟ ܕܫܩܠܬ ܒܚ̈ܝܝ ܟܠܗ ܪܢܝܗܘܢ ܕܥܡ̈ܡܐ

52ܚܣܕܘܢܝ ܒ̈ܥܠܕܒܒܝܟ ܡܪܝܐ ܘܚܣܕܘ ܥܩ̈ܒܘܗܝ ܕܡܫܝܚܟ

53ܒܪܝܟ ܗܘ ܡܪܝܐ ܠܥܠܡ ܐܡܝܢ ܘܐܡܝܢ

Chapter 90 ܡܙܡܘܪ̈ܐ

1ܡܪܝܐ ܒܝܬ ܡܥܡܪܐ ܗܘܝܬ ܠܢ ܠܕܪܕܪܝܢ

2ܥܕܠܐ ܢܬܒܛܢܘܢ ܛܘܪ̈ܐ ܘܥܕ ܠܐ ܬܚܒܠ ܐܪܥܐ ܘܥܕ ܠܐ ܬܬܩܢ ܬܒܝܠ ܡܢ ܥܠܡ ܘܥܕܡܐ ܠܥܠܡ ܐܢܬ ܗܘ ܐܠܗܐ

3ܕܐܗܦܟܬܝܗܝ ܠܒܪܢܫܐ ܥܕܡܐ ܠܡܘܟܟܐ ܘܐܡܪܬ ܕܬܘܒܘ ܒܢ̈ܝ ܐܢܫܐ

4ܡܛܠ ܕܐܠܦ ܫܢ̈ܝܢ ܒܥܝܢ̈ܝܟ ܐܝܟ ܝܘܡܐ ܕܐܬܡܠܝ ܕܥܒܪ ܘܐܝܟ ܡܛܪܬܐ ܕܠܠܝܐ

5ܫܪ̈ܒܬܗܘܢ ܫܢܬܐ ܢܗ̈ܘܝܢ ܘܒܨܦܪܐ ܐܝܟ ܥܘܦܝܐ ܬܚܠܦ

6ܕܒܨܦܪܐ ܝܥܐ ܘܡܚܠܦ ܘܒܪܡܫܐ ܚܡܐ ܘܝܒܫ

7ܡܛܠ ܕܓܡܪܢ ܒܪܘܓܙܟ ܘܒܚܡܬܟ ܐܬܕܠܚܢ

8ܣܡܬ ܚ̈ܛܗܝܢ ܠܩܘܒܠܟ ܥܠܡܝܢܝ ܒܢܘܗܪܐ ܕܐ̈ܦܝܟ

9ܡܛܠ ܕܟܠܗܘܢ ܝܘܡ̈ܝܢ ܓܡܪܘ ܒܪܘܓܙܟ ܘܓܡܪ ܫܢܝ̈ܢ ܐܝܟ ܓܘܓܝ

10ܝܘܡ̈ܝܢ ܫܢܝ̈ܢ ܒܗܘܢ ܫܒܥܝܢ ܫܢ̈ܝܢ ܘܠܡܚܣܢ ܬܡܢܐܝܢ ܫܢܝ̈ܢ ܣܘܓܗܝܢ ܥܡܠܐ ܘܟܐ̈ܒܐ ܡܛܠ ܕܐܬܐ ܥܠܝܢ ܡܘܟܟܐ ܘܐܬܛܪܦܢ

11ܡܢ ܝܕܥ ܥܘܫܢܐ ܕܪܘܓܙܟ ܘܕܚܠܬܐ ܕܪܘܓܙܟ

12ܐܘܕܥܝܢܝ ܡܢܝܢܐ ܕܝܘ̈ܡܝܢ ܕܢܥܘܠ ܠܠܒܐ ܕܚܟܡܬܐ

13ܐܬܦܢ ܡܪܝܐ ܥܕܡܐ ܠܐܡܬܝ ܠܐ ܡܒܝܐܐ ܐܢܬ ܠܥܒ̈ܕܝܟ

14ܣܒܥܝܢܝ ܒܨܦܪܐ ܛܝܒܘܬܟ ܢܫܒܚ ܘܢܚܕܐ ܟܠܗܘܢ ܝܘܡ̈ܬܢ

15ܚܕܢ ܡܛܠ ܕܡܝܬ ܥܘܠܢ ܘܫ̈ܢܝܐ ܕܚܙܝܢ ܒܗܝܢ ܒܝܫ̈ܬܐ

16ܢܬܚܙܘܢ ܠܥܒ̈ܕܝܟ ܥܒ̈ܕܝܟ ܘܗܕܪܟ ܥܠ ܒܢܝ̈ܗܘܢ

17ܬܗܘܐ ܒܣܝܡܘܬܗ ܕܡܪܝܐ ܐܠܗܢ ܥܠܝܢ ܕܥܒܕ ܐ̈ܝܕܘܗܝ ܐܬܩܢ ܥܠܝܢ ܘܒܥܒܕ ܐ̈ܝܕܘܗܝ ܬܩܢܢ

Chapter 91 ܡܙܡܘܪ̈ܐ

1ܝܬܒ ܒܣܬܪܗ ܕܡܪܝܡܐ ܘܒܛܠܠܗ ܕܐܠܗܐ ܡܫܬܒܚ

2ܐܡܪ ܠܡܪܝܐ ܬܘܟܠܢܝ ܒܝܬ ܓܘܣܝ ܐܠܗܐ ܕܬܟܝܠ ܐܢܐ ܥܠܘܗܝ

3ܕܗܘ ܢܦܨܝܟ ܡܢ ܦܚܐ ܕܬܘܩܠܬܐ ܘܡܢ ܡܡܠܠܐ ܕܣܪܝܩܘܬܐ

4ܒܐܒܪ̈ܘܗܝ ܢܦܨܝܟ ܘܬܚܝܬ ܟܢ̈ܦܘܗܝ ܬܣܬܬܪ ܙܝܢܐ ܢܚܕܪܟ ܩܘܫܬܗ

5ܠܐ ܬܕܚܠ ܡܢ ܕܚܠܬܗ ܕܠܠܝܐ ܘܡܢ ܓܐܪܐ ܕܦܪܚ ܒܐܝܡܡܐ

6ܘܡܢ ܡܠܬܐ ܕܡܗܠܟܐ ܒܚܫܘܟܐ ܘܡܢ ܪܘܚܐ ܕܫܝܕܐ ܒܛܗܪܐ

7ܢܦܠܘܢ ܡܢ ܣܛܪܟ ܐ̈ܠܦܐ ܘܪ̈ܒܘܬܐ ܡܢ ܝܡܝܢܟ ܘܠܘܬܟ ܠܐ ܢܬܩܪܒܘܢ

8ܐܠܐ ܒܥܝܢ̈ܝܟ ܒܠܚܘܕ ܬܚܙܐ ܒܦܘܪܥܢܗܘܢ ܕܪ̈ܫܝܥܐ ܬܚܙܐ

9ܡܛܠ ܕܐܢܬ ܗܘ ܡܪܝܐ ܬܘܟܠܢܝ ܕܒܡܪܘܡܐ ܣܡܬ ܡܥܡܪܟ

10ܠܐ ܬܩܪܘܒ ܠܟ ܒܝܫܬܐ ܘܡܚܘܬܐ ܠܐ ܬܬܩܪܒ ܠܡܫܟܢܟ

11ܡܛܠ ܕܠܡܠܐ̈ܟܘܗܝ ܢܦܩܕ ܥܠܝܟ ܕܢܢܛܪܘܢܟ ܒܟܠܗܝܢ ܐܘܪ̈ܚܬܟ

12ܘܥܠ ܕܪ̈ܥܝܗܘܢ ܢܫܩܠܘܢܟ ܕܠܐ ܬܬܩܠ ܒܪܓܠܟ

13ܥܠ ܓܪܣܐ ܘܥܠ ܚܪܡܢܐ ܬܕܪܘܟ ܘܬܕܘܫ ܐܪܝܐ ܘܬܢܝܢܐ

14ܡܛܠ ܕܠܝ ܒܥܐ ܐܦܨܝܘܗܝ ܘܐܥܫܢܝܘܗܝ ܡܛܠ ܕܝܕܥ ܫܡܝ

15ܢܩܪܝܢܝ ܘܐܥܢܝܘܗܝ ܥܡܗ ܐܢܐ ܒܐܘܠܨܢܐ ܐܥܫܢܝܘܗܝ ܘܐܝܩܪܝܘܗܝ

16ܢܘܓܪܐ ܕܝܘܡ̈ܬܐ ܐܣܒܥܝܘܗܝ ܘܐܚܘܝܘܗܝ ܦܘܪܩܢܝ

Chapter 92 ܡܙܡܘܪ̈ܐ

2ܛܒ ܠܡܘܕܝܘ ܠܡܪܝܐ ܘܠܡܙܡܪ ܠܫܡܟ ܡܪܝܡܐ

3ܠܡܚܘܝܘ ܒܨܦܪܐ ܛܝܒܘܬܟ ܘܗܝܡܢܘܬܟ ܒ̈ܠܝܠܘܬܐ

4ܐܢܐ ܐܩܘܫ ܒܟܢܪܐ ܕܥܣܪ ܘܐܩܘܫ ܒܩܝܬܪܐ

5ܡܛܠ ܕܚܕܝܬܢܝ ܡܪܝܐ ܒܥܒ̈ܕܝܟ ܘܒܥܒܕ ܐ̈ܝܕܝܟ ܐܫܬܒܚ

6ܡܐ ܪ̈ܘܪܒܝܢ ܥܒ̈ܕܝܟ ܡܪܝܐ ܘܛܒ ܥܡܝ̈ܩܢ ܡܚܫ̈ܒܬܟ

7ܓܒܪܐ ܫܛܝܐ ܠܐ ܝܕܥ ܘܣܟܠܐ ܠܐ ܡܣܬܟܠ ܒܗܕܐ

8ܡܐ ܕܦܪܥܝܢ ܪ̈ܫܝܥܐ ܐܝܟ ܥܣܒܐ ܘܫܘܚܝܢ ܟܠ ܥܒ̈ܕܝ ܥܘܠܐ ܕܢܐܒܕܘܢ ܠܥܠܡ ܥܠܡܝܢ

9ܘܐܢܬ ܡܪܝܐ ܡܪܝܡܐ ܠܥܠܡ

10ܡܛܠ ܕܗܐ ܒ̈ܥܠܕܒܒܝܟ ܡܪܝܐ ܡܛܠ ܕܗܐ ܒ̈ܥܠܕܒܒܝܟ ܢܐܒܕܘܢ ܘܢܬܒܕܪܘܢ ܟܠ ܥܒ̈ܕܝ ܥܘܠܐ

11ܐܪܝܡܬ ܩܪ̈ܢܬܝ ܐܝܟ ܕܪܝܡܐ ܘܨܒܥܬܢܝ ܒܡܫܚܐ ܡܒܣܡܐ

12ܘܚ̈ܙܝ ܥܝܢ̈ܝ ܒܒ̈ܥܠܕܒܒܝ ܘܒܒܝܫ̈ܐ ܕܩܝܡܝܢ ܥܠܝ ܢܫܡ̈ܥܢ ܐ̈ܕܢܝ

13ܙܕܝܩܐ ܐܝܟ ܕܩܠܐ ܢܦܪܥ ܘܐܝܟ ܐܪ̈ܙܐ ܕܠܒܢܢ ܢܫܘܚ

14ܕܢܨܝܒܝܢ ܒܒܝܬܗ ܕܡܪܝܐ ܘܒܕܪ̈ܘܗܝ ܕܐܠܗܢ ܢܦܪܥܘܢ

15ܬܘܒ ܘܢܬܪܒܘܢ ܒܣܝܒܘܬܐ ܫܡ̈ܝܢܐ ܘܒܣ̈ܝܡܐ ܢܗܘܘܢ

16ܘܢܚܘܘܢ ܕܬܪܝܨ ܗܘ ܡܪܝܐ ܥܫܝܢܐ ܘܠܝܬ ܒܗ ܥܘܠܐ

Chapter 93 ܡܙܡܘܪ̈ܐ

1ܡܪܝܐ ܐܡܠܟ ܘܓܐܝܘܬܐ ܠܒܫ ܠܒܫ ܡܪܝܐ ܥܘܫܢܐ ܘܐܬܥܫܢ ܘܐܬܩܢܗ̇ ܠܬܒܝܠ ܕܠܐ ܬܙܘܥ

2ܡܬܩܢ ܗܘ ܟܘܪܣܝܟ ܡܢ ܩܕܝܡ ܘܡܢ ܥܠܡ ܐܢܬ ܗܘ

3ܐܬܬܪܝܡܘ ܢܗܪ̈ܘܬܐ ܡܪܝܐ ܐܪܝܡܘ ܢܗܪ̈ܘܬܐ ܩܠܗܘܢ ܐܬܬܪܝܡܘ ܢܗܪ̈ܘܬܐ ܒܕܟܝܘܬܐ

4ܡܢ ܩܠܐ ܕܡ̈ܝܐ ܣܓ̈ܝܐܐ ܥܫܝ̈ܢܝܢ ܡܚܫ̈ܘܠܘܗܝ ܕܝܡܐ ܡܫܒܚ ܒܡܪ̈ܘܡܐ ܡܪܝܐ

5ܘܣ̈ܗܕܘܬܟ ܛܒ ܡܗܝ̈ܡܢܢ ܘܠܒܝܬܟ ܝܐܝܐ ܩܕܝܫܘܬܐ ܡܪܝܐ ܢܘܓܪܐ ܕܝܘܡ̈ܬܐ

Chapter 94 ܡܙܡܘܪ̈ܐ

1ܐܠܗܐ ܬܒܘܥܐ ܡܪܝܐ ܐܠܗܐ ܬܒܘܥܐ ܐܬܓܠܝ

2ܐܬܬܪܝܡ ܕܝܢܗ̇ ܕܐܪܥܐ ܘܐܗܦܟ ܦܘܪܥܢܐ ܥܠ ܐܝܠܝܢ ܕܡܬܓܐܝܢ

3ܥܕܡܐ ܠܐܡܬܝ ܪ̈ܫܝܥܐ ܡܪܝܐ ܥܕܡܐ ܠܐܡܬܝ ܪ̈ܫܝܥܐ ܡܫܬܒܗܪܝܢ

4ܓܣܝܢ ܘܡܡܠܠܝܢ ܥܘܠܐ ܘܐܡܪܝܢ ܟܠ ܥܒ̈ܕܝ ܥܘܠܐ

5ܕܡܟܟܘ ܠܥܡܟ ܡܪܝܐ ܘܠܝܪܬܘܬܟ ܫܥܒܕܘ

6ܠܐܪ̈ܡܠܬܐ ܘܠܥܡܘܪ̈ܐ ܩܛܠܘ ܘܠܝܬ̈ܡܐ ܚܪܒܘ

7ܘܐܡܪܘ ܕܠܐ ܚܙܐ ܡܪܝܐ ܘܠܐ ܡܣܬܟܠ ܐܠܗܗ ܕܝܥܩܘܒ

8ܐܣܬܟܠܘ ܫ̈ܛܝܐ ܕܥܡܐ ܣܟ̈ܠܐ ܥܕܡܐ ܠܐܡܬܝ ܠܐ ܡܣܬܟܠܝܢ ܐܢܬܘܢ

9ܗܘ ܕܢܨܒ ܐ̈ܕܢܐ ܕܠܡܐ ܠܐ ܫܡܥ ܗܘ ܕܒܪܐ ܥܝ̈ܢܐ ܕܠܡܐ ܠܐ ܡܣܬܟܠ

10ܗܘ ܕܪܕܐ ܥܡ̈ܡܐ ܕܠܡܐ ܠܐ ܡܟܣ ܗܘ ܕܡܠܦ ܠܒܪ ܐܢܫܐ ܝܕܥܬܐ

11ܡܪܝܐ ܝܕܥ ܡܚܫܒ̈ܬܗܘܢ ܕܒܢܝܢܫ̈ܐ ܡܛܠ ܕܠܗܓܐ ܐܢܘܢ

12ܛܘܒܘܗܝ ܠܒܪܢܫܐ ܕܬܪܕܝܘܗܝ ܐܢܬ ܡܪܝܐ ܘܡܢ ܢܡܘܣܟ ܬܠܦܝܘܗܝ

13ܘܬܢܝܚܝܘܗܝ ܡܢ ܝܘܡ̈ܬܐ ܒܝܫ̈ܐ ܥܕܡܐ ܕܢܬܚܦܪ ܠܪ̈ܫܝܥܐ ܓܘܡܨܐ

14ܡܛܠ ܕܠܐ ܡܪܦܐ ܡܪܝܐ ܠܥܡܗ ܘܠܝܪܬܘܬܗ ܠܐ ܫܒܩ

15ܡܛܠ ܕܒܬܪ ܙܕܝܩܐ ܗܦܟ ܕܝܢܐ ܘܒܬܪܗ ܟܠܗܘܢ ܬܪ̈ܝܨܝ ܠܒܐ

16ܡܢܘ ܢܩܘܡ ܠܝ ܥܡ ܒܝܫ̈ܐ ܘܡܢܘ ܢܬܛܝܒ ܠܝ ܥܡ ܥܒ̈ܕܝ ܥܘܠܐ

17ܐܠܘ ܠܐ ܡܪܝܐ ܕܗܘܐ ܠܝ ܥܕܘܪܐ ܥܕ ܩܠܝܠ ܫܪܝܐ ܗܘܬ ܢܦܫܝ ܒܕܐܘܘܢܐ

18ܐܢܐ ܐܡܪܬ ܕܡ̈ܛܝ ܪ̈ܓܠܝ ܘܛܝܒܘܬܟ ܡܪܝܐ ܣܡܟܬܢܝ

19ܒܣܘܓܐܐ ܕܟܐ̈ܒܘܗܝ ܕܠܒܝ ܒܘ̈ܝܐܝܟ ܦܪܩܘܗ̇ ܠܢܦܫܝ

20ܠܐ ܢܚܒܪ ܥܡܟ ܟܘܪܣܝܐ ܕܥܘ̈ܠܐ ܕܓܒܠܘ ܥܘܠܐ ܥܠ ܢܡܘܣܟ

21ܘܨܠܝܢ ܠܡܨܕ ܢܦܫܗ ܕܙܕܝܩܐ ܘܕܡܗ ܕܙܟܝܐ ܡܚܝܒܝܢ

22ܘܗܘܐ ܠܝ ܡܪܝܐ ܡܥܫܢܢܐ ܐܠܗܐ ܬܩܝܦܐ ܡܥܕܪܢܐ

23ܐܗܦܟ ܥܠܝܗܘܢ ܥܘܠܗܘܢ ܘܒܒܝܫܘܬܗܘܢ ܫܬܩ ܐܢܘܢ ܫܬܩ ܐܢܘܢ ܡܪܝܐ ܐܠܗܢ

Chapter 95 ܡܙܡܘܪ̈ܐ

1ܬܘ ܢܫܒܚ ܠܡܪܝܐ ܘܢܙܡܪ ܠܐܠܗܢ ܦܪܘܩܐ

2ܢܩܕܡ ܐ̈ܦܘܗܝ ܒܬܘܕܝܬܐ ܘܒܙܡܝܪ̈ܬܐ ܢܫܒܚܝܘܗܝ

3ܡܛܠ ܕܐܠܗܐ ܗܘ ܪܒܐ ܡܪܝܐ ܡܠܟܐ ܕܪܒ ܥܠ ܟܠܗܘܢ ܐ̈ܠܗܐ

4ܕܒܐ̈ܝܕܘܗܝ ܐܢܝܢ ܫܬܐ̈ܣܝܗ̇ ܕܐܪܥܐ ܘܪܘܡܐ ܕܛܘܪ̈ܐ

5ܕܝܠܗ ܗܘ ܝܡܐ ܘܗܘ ܥܒܕܗ ܘܝܒܝܫܬܐ ܐ̈ܝܕܘܗܝ ܓܒܠ

6ܬܘ ܢܒܪܘܟ ܘܢܣܓܘܕ ܠܗ ܘܢܒܪܟܝܘܗܝ ܠܡܪܝܐ ܕܥܒܕܢ

7ܡܛܠ ܕܗܘܝܘ ܐܠܗܢ ܘܚܢܢ ܥܡܐ ܕܝܠܗ ܘܥܢܐ ܕܡܪܥܝܬܗ ܝܘܡܢܐ ܐܢ ܒܩܠܗ ܬܫܡܥܘܢ

8ܠܐ ܬܩܫܘܢ ܠܒ̈ܘܬܟܘܢ ܠܡܪܓܙܘܬܗ ܐܝܟ ܡܡܪ̈ܡܪܢܐ ܘܐܝܟ ܝܘܡܐ ܕܢܣܝܘܢܐ ܕܒܡܕܒܪܐ

9ܕܢܣܝܘܢܝ ܐ̈ܒܗܝܟܘܢ ܘܒܩܘ ܚܙܘ ܥܒ̈ܕܝ

10ܐܪ̈ܒܥܝܢ ܫܢܝ̈ܢ ܡܐܢܬ ܠܝ ܒܕܪܐ ܗܘ ܘܐܡܪܬ ܕܥܡܐ ܗܘ ܕܛܥܐ ܠܒܗܘܢ ܘܗܢܘܢ ܠܐ ܝܕܥܘ ܐܘܪ̈ܚܬܝ

11ܐܝܟ ܕܝܡܝܬ ܒܪܘܓܙܝ ܕܠܐ ܢܥܠܘܢ ܠܢܝܚܬܝ

Chapter 96 ܡܙܡܘܪ̈ܐ

1ܫܒܚܘ ܠܡܪܝܐ ܬܫܒܘܚܬܐ ܚܕܬܐ ܫܒܚܘ ܠܡܪܝܐ ܟܘܠܗ̇ ܐܪܥܐ

2ܫܒܚܘ ܠܡܪܝܐ ܘܒܪܟܘ ܠܫܡܗ ܣܒܪܘ ܡܢ ܝܘܡ ܠܝܘܡ ܦܘܪܩܢܗ

3ܘܐܫܬܥܘ ܒܥܡ̈ܡܐ ܐܝܩܪܗ ܘܒܟܠܗܘܢ ܥܡ̈ܡܐ ܥܒ̈ܕܘܗܝ

4ܡܛܠ ܕܪܒ ܗܘ ܡܪܢ ܘܡܫܒܚ ܛܒ ܘܕܚܝܠ ܥܠ ܟܠܗܘܢ ܐ̈ܠܗܐ

5ܡܛܠ ܕܟܠܗܘܢ ܐ̈ܠܗܐ ܕܥܡ̈ܡܐ ܣܪ̈ܝܩܝܢ ܐܢܘܢ ܘܡܪܝܐ ܫܡܝܐ ܥܒܕ

6ܙܝܘܐ ܘܫܘܒܚܐ ܩܕܡܘܗܝ ܥܘܫܢܐ ܘܬܫܒܘܚܬܐ ܒܡܩܕܫܗ

7ܗܒܘ ܠܡܪܝܐ ܫܪ̈ܒܬܐ ܕܥܡ̈ܡܐ ܗܒܘ ܠܡܪܝܐ ܬܫܒܘܚܬܐ ܘܐܝܩܪܐ

8ܗܒܘ ܠܡܪܝܐ ܐܝܩܪܐ ܠܫܡܗ ܫܩܘܠܘ ܩܘܪ̈ܒܢܐ ܘܥܘܠܘ ܠܕܪ̈ܘܗܝ

9ܣܓܘܕܘ ܠܡܪܝܐ ܒܕܪܬܐ ܕܩܘܕܫܗ ܬܙܘܥ ܡܢ ܩܕܡܘܗܝ ܟܘܠܗ̇ ܐܪܥܐ

10ܐܡܪܘ ܒܝܬ ܥܡ̈ܡܐ ܕܡܪܝܐ ܐܡܠܟ ܘܐܬܩܢܗ̇ ܠܬܒܝܠ ܕܠܐ ܬܙܘܥ ܢܕܘܢ ܠܥܡ̈ܡܐ ܒܬܪܝܨܘܬܐ

11ܢܚܕܘܢ ܫܡܝܐ ܘܬܕܘܨ ܐܪܥܐ ܢܪܘܙ ܝܡܐ ܒܡܠܐܗ

12ܢܥܫ̈ܢܢ ܚܩ̈ܠܬܐ ܘܟܠ ܕܐܝܬ ܒܗܝܢ ܗܝ ܕܝܢ ܢܫܒܚܘܢ ܟܠܗܘܢ ܐܝ̈ܠܢܐ ܕܥܒܐ

13ܩܕܡ ܡܪܝܐ ܕܐܬܐ ܠܡܕܢܗ̇ ܠܐܪܥܐ ܕܐܢ ܬܒܝܠ ܒܙܕܝܩܘܬܐ ܘܠܥܡ̈ܡܐ ܒܗܝܡܢܘܬܐ

Chapter 97 ܡܙܡܘܪ̈ܐ

1ܡܪܝܐ ܐܡܠܟ ܬܕܘܨ ܐܪܥܐ ܢܚ̈ܕܝܢ ܓܙܪ̈ܬܐ ܣ̈ܓܝܐܬܐ

2ܥܢ̈ܢܐ ܘܥܪ̈ܦܠܐ ܚܕܪ̈ܘܗܝ ܒܙܕܝܩܘܬܐ ܘܒܕܝܢܐ ܡܬܩܢ ܟܘܪܣܝܗ

3ܢܘܪܐ ܬܐܟܘܠ ܩܕܡܘܗܝ ܘܬܘܩܕ ܠܒ̈ܥܠܕܒܒܘܗܝ

4ܐܢܗܪܘ ܒܪ̈ܩܘܗܝ ܠܬܒܝܠ ܚܙܬ ܘܐܬܕܠܚܬ ܐܪܥܐ

5ܘܛܘܪ̈ܐ ܐܝܟ ܫܥܘܬܐ ܐܬܦܫܪܘ ܡܢ ܩܕܡ ܡܪܝܐ ܡܪܐ ܕܟܠܗ̇ ܐܪܥܐ

6ܚܘܝܘ ܫܡܝܐ ܙܕܝܩܘܬܗ ܘܚܙܘ ܟܠܗܘܢ ܥܡ̈ܡܐ ܐܝܩܪܗ

7ܢܒܗܬܘܢ ܟܠ ܕܥܒܕܝܢ ܦܬܟܪ̈ܐ ܘܡܫܬܒܗܪܝܢ ܒ̈ܓܠܝܦܐ ܣܓܘܕܘ ܠܗ ܟܘܠܗܘܢ ܡܠܐ̈ܟܘܗܝ

8ܬܫܡܥ ܘܬܚܕܐ ܨܗܝܘܢ ܘܢܕܘ̈ܨܢ ܒܢ̈ܬ ܝܗܘܕܐ ܡܛܠ ܕܝܢ̈ܝܟ ܡܪܝܐ

9ܡܛܠ ܕܐܢܬ ܗܘ ܡܪܝܐ ܡܪܝܡܐ ܥܠ ܟܠܗ̇ ܐܪܥܐ ܘܛܒ ܐܬܬܪܝܡܬ ܥܠ ܟܠܗܘܢ ܐ̈ܠܗܐ

10ܪ̈ܚܡܘܗܝ ܕܡܪܝܐ ܣܢܝܢ ܠܒܝܫ̈ܬܐ ܘܢܛܪ ܢܦܫ̈ܬܐ ܕܙܕܝܩ̈ܘܗܝ ܘܡܢ ܐܝܕܐ ܕܪ̈ܫܝܥܐ ܢܦܨܐ ܐܢܘܢ

11ܢܘܗܪܐ ܕܕܢܚ ܠܙܕܝ̈ܩܐ ܘܠܬܪ̈ܝܨܝ ܠܒܐ ܚܕܘܬܐ

12ܚܕܘ ܙܕܝܩ̈ܐ ܒܡܪܝܐ ܘܐܘܕܘ ܠܕܘܟܪܢܐ ܕܩܘܕܫܗ

Chapter 98 ܡܙܡܘܪ̈ܐ

1ܫܒܚܘ ܠܡܪܝܐ ܬܫܒܘܚܬܐ ܚܕܬܐ ܡܛܘܠ ܕܬܕܡܘܪܬܐ ܥܒܕ ܦܪܩܬܗ ܝܡܝܢܗ ܘܕܪܥܗ ܩܕܝܫܐ

2ܚܘܝ ܡܪܝܐ ܦܘܪܩܢܗ ܘܠܥܝܢ ܥܡ̈ܡܐ ܓܠܐ ܙܕܝܩܘܬܗ

3ܐܬܕܟܪ ܛܝܒܘܬܗ ܘܗܝܡܢܘܬܗ ܠܕܒܝܬ ܐܝܣܪܝܠ ܘܚܙܘ ܟܠܗܘܢ ܥܒܪ̈ܝܗ̇ ܕܐܪܥܐ ܦܘܪܩܢܗ ܕܐܠܗܢ

4ܫܒܚܘ ܠܡܪܝܐ ܟܠܗ̇ ܐܪܥܐ ܐܬܦܨܚܘ ܘܙܡܪܘ ܘܫܒܚܘ

5ܙܡܪܘ ܠܡܪܝܐ ܒܟܢܪ̈ܐ ܘܒܩܠܐ ܕܙܡܪܐ

6ܘܒܩܠܐ ܕܩܪ̈ܢܬܐ ܫܒܚܘ ܩܕܡ ܡܠܟܐ ܡܪܝܐ

7ܢܙܘܥ ܝܡܐ ܒܡܠܐܗ ܬܒܝܠ ܘܥܡܘܪ̈ܝܗ̇

8ܢܗܪ̈ܘܬܐ ܢܩܫܘܢ ܟܦܐ ܐܟܚܕܐ ܘܛܘܪ̈ܐ ܢܫܒܚܘܢ

9ܩܕܡ ܡܪܝܐ ܕܐܬܐ ܠܡܕܢܗ̇ ܠܐܪܥܐ ܕܐܢ ܬܒܝܠ ܒܙܕܝܩܘܬܐ ܘܠܥܡ̈ܡܐ ܒܬܪܝܨܘܬܐ

Chapter 99 ܡܙܡܘܪ̈ܐ

1ܡܪܝܐ ܐܡܠܟ ܢܙܘܥܘܢ ܥܡ̈ܡܐ ܝܬܒ ܥܠ ܟܪ̈ܘܒܐ ܬܙܘܥ ܐܪܥܐ

2ܡܪܝܐ ܪܒ ܒܨܗܝܘܢ ܘܪܡ ܥܠ ܟܠܗܘܢ ܥܡ̈ܡܐ

3ܢܘܕܘܢ ܠܫܡܟ ܪܒܐ ܘܕܚܝܠܐ ܕܩܕܝܫ ܗܘ

4ܥܘܫܢܗ ܕܡܠܟܐ ܪܚܡ ܕܝܢܐ ܐܢܬ ܬܩܢܬ ܬܪܝܨܘܬܐ ܘܕܝܢܐ ܘܙܕܝܩܘܬܐ ܒܝܥܩܘܒ ܐܢܬ ܥܒܕܬ

5ܪܡܪܡܘ ܠܡܪܝܐ ܐܠܗܢ ܘܣܓܘܕܘ ܠܟܘܒܫܐ ܕܪ̈ܓܠܘܗܝ ܩܕܝܫ ܗܘ

6ܡܘܫܐ ܘܐܗܪܘܢ ܒܟܘܡܪ̈ܘܗܝ ܘܫܡܘܐܝܠ ܒܩܪ̈ܝܝ ܫܡܗ ܕܩܪܘ ܠܡܪܝܐ ܘܥܢܐ ܐܢܘܢ

7ܘܒܥܡܘܕܐ ܕܥܢܢܐ ܡܠܠ ܥܡܗܘܢ ܢܛܪܘ ܣܗܕܘܬܗ ܘܩܝܡܐ ܕܝܗܒ ܠܗܘܢ

8ܡܪܝܐ ܐܠܗܢ ܐܢܬ ܥܢܝܬ ܐܢܘܢ ܐܠܗܐ ܬܒܘܥܐ ܗܘܝܬ ܠܗܘܢ ܦܪܘܥ ܐܢܘܢ ܐܝܟ ܥܒ̈ܕܝܗܘܢ

9ܪܡܪܡܘ ܠܡܪܝܐ ܐܠܗܢ ܘܣܓܘܕܘ ܠܛܘܪܗ ܩܕܝܫܐ ܡܛܠ ܕܩܕܝܫ ܗܘ ܡܪܝܐ ܐܠܗܢ

Chapter 100 ܡܙܡܘܪ̈ܐ

1ܫܒܚܘ ܠܡܪܝܐ ܟܠܗ̇ ܐܪܥܐ

2ܦܠܘܚܘ ܠܡܪܝܐ ܒܚܕܘܬܐ ܥܘܠܘ ܩܕܡܘܗܝ ܒܬܫܒܘܚܬܐ

3ܕܥܘ ܕܗܘܝܘ ܡܪܝܐ ܐܠܗܢ ܘܗܘܝܘ ܥܒܕܢ ܘܠܐ ܗܘܐ ܚܢܢ ܥܡܗ ܚܢܢ ܘܥܢܐ ܕܡܪܥܝܬܗ

4ܥܘܠܘ ܒܬܪ̈ܥܘܗܝ ܒܬܘܕܝܬܐ ܘܠܕܪ̈ܘܗܝ ܒܫܘܒܚܐ ܐܘܕܘ ܠܗ ܘܒܪܟܘ ܠܫܡܗ

5ܡܛܠ ܕܛܒ ܗܘ ܡܪܝܐ ܘܠܥܠܡ ܛܝܒܘܬܗ ܘܠܕܪܕܪܝܢ ܗܝܡܢܘܬܗ

Chapter 101 ܡܙܡܘܪ̈ܐ

1ܛܝܒܘܬܐ ܘܕܝܢܐ ܐܙܡܪ ܘܠܟ ܐܫܒܚ ܡܪܝܐ

2ܐܗܠܟ ܒܐܘܪܚܟ ܕܠܐ ܡܘܡ ܥܕܡܐ ܠܐܡܬܝ ܬܐܬܐ ܠܘܬܝ ܗܠܟܬ ܒܬܡܝܡܘܬܗ ܕܠܒܝ ܒܓܘ ܒܝܬܝ

3ܘܠܐ ܣܡܬ ܠܘܩܒܠ ܥܝܢ̈ܝ ܡܠܬܐ ܕܥܘܠܐ ܠܕܥܒܕ ܒܝܫܬܐ ܣܢܝܬ ܘܠܐ ܢܩܦ ܠܝ

4ܠܒܐ ܒܝܫܐ ܥܒܪ ܡܢܝ ܘܒܝܫܬܐ ܠܐ ܝܕܥܬ

5ܠܡܢ ܕܐܟܠ ܩܪܨܐ ܕܚܒܪܗ ܒܣܬܪܐ ܡܘܒܕ ܗܘܝܬ ܠܕܪ̈ܡܢ ܥܝܢ̈ܘܗܝ ܘܪܘܝܚ ܠܒܗ ܥܡܗ ܠܐ ܐܟܠ ܗܘܝܬ

6ܥܝܢ̈ܝ ܒܡܗ̈ܝܡܢܐ ܕܐܪܥܐ ܕܢܬܒܘܢ ܥܡܝ ܕܡܗܠܟ ܒܐܘܪܚܐ ܕܠܐ ܡܘܡ ܗܘ ܢܫܡܫܢܝ

7ܘܠܐ ܢܬܒ ܒܓܘ ܒܝܬܝ ܕܥܒܕ ܢܟܠܐ ܘܡܡܠܠܐ ܟܕܒܐ ܠܐ ܢܬܩܢ ܩܕܡ ܥܝܢ̈ܝ

8ܒܨܦܪܐ ܐܫܬܩ ܠܟܠܗܘܢ ܪ̈ܫܝܥܐ ܕܐܪܥܐ ܘܐܘܒܕ ܡܢ ܡܕܝܢܬܗ ܕܡܪܝܐ ܠܟܠܗܘܢ ܥܒ̈ܕܝ ܥܘܠܐ

Chapter 102 ܡܙܡܘܪ̈ܐ

2ܡܪܝܐ ܫܡܥ ܨܠܘܬܝ ܘܓܥܬܝ ܠܘܬܟ ܬܥܘܠ

3ܠܐ ܬܗܦܟ ܐ̈ܦܝܟ ܡܢܝ ܒܝܘܡܐ ܕܐܘܠܨܢܝ ܐܠܐ ܐܪܟܢ ܠܝ ܐܕܢܟ ܒܝܘܡܐ ܕܐܩܪܝܟ ܘܒܥܓܠ ܥܢܝܢܝ

4ܡܛܠ ܕܓܡܪܘ ܒܬܢܢܐ ܝܘ̈ܡܝ ܘܓܪ̈ܡܝ ܚܘܪܘ ܐܝܟ ܡܘܩ̈ܕܐ

5ܚܡܐ ܠܒܝ ܐܝܟ ܥܣܒܐ ܘܝܒܫ ܡܛܠ ܕܛܥܝܬ ܡܐܟܘܠܬܗ ܕܠܚܡܝ

6ܡܢ ܩܠܐ ܕܬܐ̈ܢܚܬܝ ܕܒܩ ܒܣܪܝ ܠܓܪ̈ܡܝ

7ܘܐܬܕܡܝܬ ܠܩܩܐ ܕܒܡܕܒܪܐ ܘܗܘܝܬ ܐܝܟ ܥܘܕܐ ܒܚܪܒܬܐ

8ܣܪܕܬ ܘܗܘܝܬ ܒܠܚܘܕܝ ܐܝܟ ܨܦܪܐ ܕܡܦܪܚܐ ܥܠ ܐܓܪ̈ܐ

9ܟܠܗ ܝܘܡܐ ܚܣܕܘܢܝ ܒ̈ܥܠܕܒܒܝ ܘܡܫܒܚ̈ܢܝ ܒܝ ܝܡܝܘ

10ܡܛܠ ܕܩܛܡܐ ܐܝܟ ܠܚܡܐ ܠܥܣܬ ܘܡܫܬܝ ܒܒܟܬܐ ܡܙܓܬ

11ܡܢ ܩܕܡ ܚܡܬܟ ܘܪܘܓܙܟ ܕܐܪܝܡܬܢܝ ܘܫܕܝܬܢܝ

12ܝܘܡ̈ܝ ܐܝܟ ܛܠܠܐ ܐܬܪܟܢܘ ܘܐܢܐ ܝܒܫܬ ܐܝܟ ܥܣܒܐ

13ܘܐܢܬ ܡܪܝܐ ܠܥܠܡ ܩܝܡ ܐܢܬ ܘܕܘܟܪܢܟ ܠܕܪܕܪܝܢ

14ܐܢܬ ܩܘܡ ܘܪܚܡ ܥܠ ܨܗܝܘܢ ܡܛܠ ܕܡܛܐ ܙܒܢܐ ܠܡܪܚܡܘ ܥܠܝܗ̇

15ܡܛܠ ܕܨܒܘ ܥܒ̈ܕܝܟ ܒܟܐ̈ܦܝܗ̇ ܘܠܥܦܪܗ̇ ܪܚܡܘ

16ܢܕܚܠܘܢ ܥܡ̈ܡܐ ܠܫܡܟ ܡܪܝܐ ܘܟܠܗܘܢ ܡ̈ܠܟܐ ܕܐܪܥܐ ܠܐܝܩܪܟ

17ܡܛܠ ܕܒܢܐ ܡܪܝܐ ܠܨܗܝܘܢ ܘܡܬܚܙܐ ܒܫܘܒܚܗ

18ܘܡܬܦܢܐ ܥܠ ܨܠܘܬܐ ܕܡܣ̈ܟܢܐ ܘܠܐ ܫܐܛ ܨܠܘܬܗܘܢ

19ܬܬܟܬܒ ܗܕܐ ܠܕܪܐ ܐܚܪܝܐ ܥܡܐ ܕܡܬܒܪܐ ܢܫܒܚ ܠܡܪܝܐ

20ܡܛܠ ܕܐܕܝܩ ܡܢ ܡܪܘܡܐ ܕܩܘܕܫܗ ܡܪܝܐ ܡܢ ܫܡܝܐ ܠܐܪܥܐ ܐܕܝܩ

21ܠܡܫܡܥ ܐܢܩܬܗ ܕܐܣܝܪܐ ܘܠܡܫܪܐ ܒ̈ܢܝܐ ܡܢ ܡܘܬܐ

22ܕܢܫܬܥܘܢ ܒܨܗܝܘܢ ܫܡܗ ܕܡܪܝܐ ܘܬܫܒܚ̈ܬܗ ܒܐܘܪܫܠܡ

23ܡܐ ܕܐܬܟܢܫܘ ܥܡ̈ܡܐ ܐܟܚܕܐ ܘܡ̈ܠܟܘܬܐ ܠܡܦܠܚ ܠܡܪܝܐ

24ܡܟܟܘ ܚܝܠܝ ܒܐܪܥܐ ܘܒܨܝܪܘܬܐ ܕܝܘܡ̈ܝ

25ܐܡܪ ܠܝ ܠܐ ܬܣܩܢܝ ܒܦܠܓܘܬ ܝܘܡ̈ܝ ܘܠܕܪܕܪܝܢ ܫܢܝ̈ܟ

26ܡܢ ܠܩܘܕܡܝܢ ܐܪܥܐ ܬܩܢܬ ܘܥܒܕ ܐ̈ܝܕܝܟ ܫܡܝܐ

27ܗܢܘܢ ܥܒܪܝܢ ܘܐܢܬ ܩܝܡ ܐܢܬ ܘܟܠܗܘܢ ܐܝܟ ܠܒܘܫܐ ܒܠܝܢ ܘܐܝܟ ܡܪܛܘܛܐ ܡܬܚܠܦܝܢ

28ܘܐܢܬ ܐܝܟ ܕܐܝܬܝܟ ܐܢܬ ܘܫ̈ܢܝܟ ܠܐ ܓܡܪ̈ܢ

29ܘܒ̈ܢܝ ܥܒ̈ܕܝܟ ܢܫܪܘܢ ܒܐܪܥܐ ܘܙܪܥܗܘܢ ܩܕܡܝܟ ܢܬܩܢ

Chapter 103 ܡܙܡܘܪ̈ܐ

1ܒܪܟܝ ܢܦܫܝ ܠܡܪܝܐ ܘܟܠܗܘܢ ܓܪ̈ܡܝ ܠܫܡܗ ܩܕܝܫܐ

2ܒܪܟܝ ܢܦܫܝ ܠܡܪܝܐ ܘܠܐ ܬܛܥܝܢ ܟܠܗܘܢ ܦܘܪ̈ܥܢܘܗܝ

3ܕܫܒܩ ܠܟܝ ܟܠܗ ܥܘܠܟܝ ܘܡܐܣܐ ܟܠܗܘܢ ܟܐ̈ܒܝܟܝ

4ܦܪܩ ܠܟܝ ܡܢ ܚܒܠܐ ܡܣܡܟ ܠܟܝ ܒܛܝܒܘܬܐ ܘܒܪ̈ܚܡܐ

5ܡܣܒܥ ܒܛܒ̈ܬܐ ܓܘܫܡܟܝ ܡܚܕܬ ܐܝܟ ܕܢܫܪܐ ܥܠܝܡܘܬܟܝ

6ܥܒܕ ܙܕܝܩܘܬܐ ܡܪܝܐ ܘܕܝܢܐ ܠܟܠܗܘܢ ܛܠܝܡ̈ܐ

7ܡܚܘܐ ܐܘܪ̈ܚܬܗ ܠܡܘܫܐ ܘܠܒ̈ܢܝ ܐܝܣܪܐܝܠ ܥܒ̈ܕܘܗܝ

8ܡܪܚܡܢ ܗܘ ܘܡܪܚܦܢ ܡܪܝܐ ܢܓܝܪܐ ܪܘܚܗ ܘܣܓܝܐܐ ܛܝܒܘܬܗ

9ܡܛܠ ܕܠܐ ܐܠܡ ܠܥܠܡ ܘܠܐ ܠܥܠܡ ܢܛܪ ܪܘܓܙܗ

10ܡܛܠ ܕܠܐ ܗܘܐ ܐܝܟ ܚ̈ܛܗܝܢ ܥܒܕ ܠܢ ܐܦܠܐ ܐܝܟ ܥܘܠܢ ܦܪܥܢ

11ܡܛܠ ܕܐܝܟ ܕܪܡܝܢ ܫܡܝܐ ܡܢ ܐܪܥܐ ܗܟܢ ܥܫܢܬ ܛܝܒܘܬܗ ܕܡܪܝܐ ܥܠ ܕܚ̈ܠܘܗܝ

12ܘܐܝܟ ܕܪܚܝܩܐ ܡܕܢܚܐ ܡܢ ܡܥܪܒܐ ܗܟܢ ܢܪܚܩ ܡܢܢ ܥܘܠܢ

13ܘܐܝܟ ܕܡܪܚܡ ܐܒܐ ܥܠ ܒ̈ܢܝܐ ܡܪܚܡ ܡܪܝܐ ܥܠ ܕܚ̈ܠܘܗܝ

14ܡܛܠ ܕܗܘ ܝܕܥ ܓܒܝܠܬܢ ܐܬܕܟܪ ܕܥܦܪܐ ܚܢܢ

15ܒܪܢܫܐ ܐܝܟ ܥܡܝܪܐ ܝܘܡ̈ܘܗܝ ܘܐܝܟ ܥܘܦܝܐ ܕܚܩܠܐ ܗܟܢ ܝܥܐ

16ܕܡܐ ܕܢܫܒܬ ܒܗ ܪܘܚܐ ܠܝܬܘܗܝ ܐܦܠܐ ܡܬܝܕܥܐ ܕܘܟܬܗ

17ܛܝܒܘܬܗ ܕܡܪܝܐ ܡܢ ܥܠܡ ܗܝ ܘܥܕܡܐ ܠܥܠܡ ܥܠ ܕܚ̈ܠܘܗܝ ܘܙܕܝܩܘܬܗ ܠܒܢ̈ܝ ܒܢܝ̈ܗܘܢ

18ܠܐܝܠܝܢ ܕܢܛܪܝܢ ܩܝܡܗ ܘܡܬܕܟܪܝܢ ܦܘܩ̈ܕܢܘܗܝ ܘܥܒܕܝܢ ܠܗܘܢ

19ܡܪܝܐ ܒܫܡܝܐ ܡܬܩܢ ܟܘܪܣܝܗ ܘܡܠܟܘܬܗ ܒܟܠ ܫܠܝܛܐ

20ܒܪܟܘ ܠܡܪܝܐ ܡܠܐ̈ܟܘܗܝ ܕܡܨܝܢ ܒܚܝܠܐ ܘܥܒܕܝܢ ܦܘܩ̈ܕܢܘܗܝ

21ܒܪܟܘ ܠܡܪܝܐ ܟܠܗܘܢ ܚܝ̈ܠܘܬܗ ܘܡܫ̈ܡܫܢܘܗܝ ܕܥܒܕܝܢ ܨܒܝܢܗ

22ܒܪܟܘ ܠܡܪܝܐ ܟܘܠܗܘܢ ܥܒ̈ܕܘܗܝ ܕܒܟܠܗ̇ ܐܪܥܐ ܫܘܠܛܢܗ ܒܪܟܝ ܢܦܫܝ ܠܡܪܝܐ

Chapter 104 ܡܙܡܘܪ̈ܐ

1ܒܪܟܝ ܢܦܫܝ ܠܡܪܝܐ ܡܪܝܐ ܐܠܗܝ ܝܪܒ ܛܒ ܙܝܘܐ ܘܗܕܪܐ ܠܒܫ

2ܐܬܟܣܝ ܢܘܗܪܐ ܐܝܟ ܡܪܛܘܛܐ ܡܬܚ ܫܡܝܐ ܐܝܟ ܝܪܝܥܬܐ

3ܥܒܕ ܒܡ̈ܝܐ ܡܕܝܪ̈ܘܗܝ ܘܣܡ ܥܠ ܥܢ̈ܢܐ ܡܪܟܒܬܗ ܘܡܗܠܟ ܥܠ ܟܢ̈ܦܝܗ̇ ܕܪܘܚܐ

4ܥܒܕ ܡܠܐ̈ܟܘܗܝ ܪܘܚ ܘܡܫܡ̈ܫܢܘܗܝ ܢܘܪ ܝܩܕܐ

5ܐܬܩܢ ܐܪܥܐ ܥܠ ܡܬܩ̈ܢܝܗ̇ ܕܠܐ ܬܙܘܥ ܠܥܠܡ ܥܠܡܝܢ

6ܬܗܘܡܐ ܐܝܟ ܡܪܛܘܛܐ ܟܣܝܬܝܗܝ ܘܥܠ ܛܘܪ̈ܐ ܩܡܘ ܡ̈ܝܐ

7ܡܢ ܟܐܬܟ ܥܪܩܝܢ ܘܡܢ ܩܠܐ ܕܪ̈ܥܡܝܟ ܡܬܪܗܒܝܢ

8ܣܠܩܘ ܛܘܪ̈ܐ ܘܢܚܬܘ ܦܩ̈ܥܬܐ ܒܐܬܪܐ ܕܬܩܢܬ ܠܗܘܢ

9ܬܚܘܡܐ ܣܡܬ ܠܗܘܢ ܕܠܐ ܢܥܒܪܘܢ ܘܢܟܣܘܢܗ̇ ܠܐܪܥܐ

10ܫܕܪ ܡܒ̈ܘܥܐ ܒܢܚ̈ܠܐ ܘܒܝܢܬ ܛܘܪ̈ܐ ܡܗܠܟܝܢ

11ܘܡܫܩܝܢ ܟܠܗ̇ ܚܝܘܬܐ ܕܕܒܪܐ ܘܣܒܥܝܢ ܥܪ̈ܕܐ ܕܨܗܝܢ

12ܘܦܪܚܬܐ ܕܫܡܝܐ ܥܠܝܗܘܢ ܫܟܢܐ ܡܢ ܒܝܢܬ ܛܘܪ̈ܐ ܝܗܒܝܢ ܩܠܐ

13ܡܫܩܐ ܛܘܪ̈ܐ ܡܢ ܡܕܝܪ̈ܘܗܝ ܡܢ ܦܐܪ̈ܝ ܥܒ̈ܕܝܟ ܬܣܒܥ ܐܪܥܐ

14ܡܘܥܐ ܥܡܝܪܐ ܠܒܥܝܪܐ ܘܥܣܒܐ ܠܦܘܠܚܢܗ ܕܒܪܢܫܐ ܠܡܦܩܘ ܠܚܡܐ ܡܢ ܐܪܥܐ

15ܚܡܪܐ ܡܚܕܐ ܠܒܗ ܕܒܪܢܫܐ ܘܡܦܨܚ ܐ̈ܦܘܗܝ ܒܡܫܚܐ ܠܚܡܐ ܣܡܟ ܠܒܗ ܕܒܪ ܐܢܫܐ

16ܢܣܒܥܘܢ ܐ̈ܝܠܢܘܗܝ ܕܡܪܝܐ ܘܐܪ̈ܙܐ ܕܠܒܢܢ ܕܢܨܒ

17ܬܡܢ ܐܩܢ ܨܦܪ̈ܐ ܘܚܘܪܒܐ ܩܢܗ ܒܫܪ̈ܘܝܢܐ

18ܛܘܪ̈ܐ ܪ̈ܡܐ ܠܕܝ̈ܨܐ ܘܫ̈ܩܝܦܐ ܣܬܪܐ ܠܚ̈ܓܣܐ

19ܥܒܕ ܣܗܪܐ ܠܙܒ̈ܢܐ ܘܫܡܫܐ ܝܕܥ ܙܒܢܐ ܕܡܥܪ̈ܒܘܗܝ

20ܥܒܕ ܚܫܘܟܐ ܘܗܘܐ ܠܠܝܐ ܘܒܗ ܥܡܪ̈ܢ ܟܠܗܝܢ ܚܝ̈ܘܬܐ ܕܥܒܐ

21ܐܪ̈ܝܘܬܐ ܢܗܡܝܢ ܠܡܬܒܪ ܘܠܡܒܥܐ ܡܢ ܐܠܗܐ ܡܐܟܘܠܬܗܘܢ

22ܒܡܕܢܚ̈ܝ ܫܡܫܐ ܡܬܚܡܠܝܢ ܘܒܡܥܡܪ̈ܝܗܘܢ ܪܒܥܝܢ

23ܢܦܩ ܒܪܢܫܐ ܠܥܒܕܗ ܘܠܦܘܠܚܢܗ ܥܕܡܐ ܠܪܡܫܐ

24ܡܐ ܣܓܝܐܝܢ ܥܒ̈ܕܝܟ ܡܪܝܐ ܘܟܠܗܘܢ ܒܚܟܡܬܐ ܥܒܕܬ ܐܢܘܢ ܘܡܠܬ ܐܪܥܐ ܩܢܝܢܟ

25ܗܢܘ ܝܡܐ ܪܒܐ ܘܐܪܘܚܬܐ ܕܐ̈ܝܕܝܐ ܕܒܗ ܐܝܬ ܪܚܫܐ ܕܠܐ ܡܢܝܢ ܚ̈ܝܘܬܐ ܪ̈ܘܪܒܬܐ ܥܡ ܕܩ̈ܕܩܬܐ

26ܘܒܗ ܗܘ ܡܗ̈ܠܟܢ ܣܦܝ̈ܢܐ ܠܘܝܬܢ ܗܢܐ ܕܒܪܝܬ ܠܡܓܚܟ ܥܠܘܗܝ

27ܟܠܗܘܢ ܠܟ ܗܘ ܡܣܟܝܢ ܕܬܬܠ ܠܗܘܢ ܡܐܟܘܠܬܐ ܒܙܒܢܗܘܢ

28ܝܗܒ ܐܢܬ ܠܗܘܢ ܘܡܬܬܪܣܝܢ ܦܬܚ ܐܢܬ ܐܝܕܟ ܘܣܒܥܝܢ

29ܡܗܦܟ ܐܢܬ ܐ̈ܦܝܟ ܘܡܬܕܠܚܝܢ ܫܩܠ ܐܢܬ ܪܘܚܗܘܢ ܘܡܝܬܝܢ ܘܠܥܦܪܗܘܢ ܗܦܟܝܢ

30ܡܫܕܪ ܐܢܬ ܪܘܚܟ ܘܡܬܒܪܝܢ ܘܡܚܕܬ ܐܢܬ ܐ̈ܦܝܗ̇ ܕܐܪܥܐ

31ܢܗܘܐ ܫܘܒܚܗ ܕܡܪܝܐ ܠܥܠܡ ܢܚܕܐ ܡܪܝܐ ܒܥܒ̈ܕܘܗܝ

32ܕܚܐܪ ܒܐܪܥܐ ܘܙܝܥܐ ܘܟܐܐ ܒܛܘܪ̈ܐ ܘܬܢܝܢ

33ܐܫܒܚ ܠܡܪܝܐ ܒܚܝ̈ܝ ܘܐܙܡܪ ܠܐܠܗܝ ܥܕ ܩܝܡ ܐܢܐ

34ܬܒܣܡ ܠܗ ܬܫܒܘܚܬܝ ܘܐܢܐ ܐܚܕܐ ܒܡܪܝܐ

35ܘܢܣܘܦܘܢ ܚ̈ܛܝܐ ܡܢ ܐܪܥܐ ܘܥܘ̈ܠܐ ܠܐ ܢܫܬܚܪܘܢ ܒܗ̇ ܒܪܟܝ ܢܦܫܝ ܠܡܪܝܐ

Chapter 105 ܡܙܡܘܪ̈ܐ

1ܐܘܕܘ ܠܡܪܝܐ ܘܩܪܘ ܫܡܗ ܘܚܘܘ ܒܥܡ̈ܡܐ ܥܒ̈ܕܘܗܝ

2ܫܒܚܘܗܝ ܘܙܡܪܘ ܠܗ ܘܐܫܬܥܘ ܟܠܗܝܢ ܬܕܡܪ̈ܬܗ

3ܫܒܚܘ ܠܫܡܐ ܕܩܘܕܫܗ ܢܚܕܐ ܠܒܗܘܢ ܕܐܝܠܝܢ ܕܒܥܝܢ ܠܡܪܝܐ

4ܒܥܘ ܠܡܪܝܐ ܘܐܬܚܝܠܘ ܘܒܥܘ ܐ̈ܦܘܗܝ ܒܟܠܙܒܢ

5ܐܬܕܟܪ ܬܕܡܪ̈ܬܗ ܕܥܒܕ ܬܕܡܪ̈ܬܗ ܘܕܝܢܐ ܕܦܘܡܗ

6ܙܪܥܗ ܕܐܒܪܗܡ ܥܒܕܗ ܘܒܢ̈ܝ ܝܥܩܘܒ ܓܒ̈ܘܗܝ

7ܗܘܝܘ ܡܪܝܐ ܐܠܗܢ ܕܒܟܘܠܗ̇ ܐܪܥܐ ܕܝܢ̈ܘܗܝ

8ܡܬܕܟܪ ܠܥܠܡ ܩܝܡܗ ܡܠܬܐ ܕܦܩܕ ܠܐܠܦ ܕܪ̈ܝܢ

9ܕܐܩܝܡ ܩܝܡܗ ܥܡ ܐܒܪܗܡ ܘܡܘܡ̈ܬܗ ܥܡ ܐܝܣܚܩ

10ܘܣܗܕܘܬܗ ܥܡ ܝܥܩܘܒ ܩܝܡܐ ܠܐܝܣܪܝܠ ܠܥܠܡ

11ܘܐܡܪ ܕܠܟ ܐܬܠܝܗ̇ ܐܪܥܐ ܕܟܢܥܢ ܚܒ̈ܠܐ ܕܝܪܬܘܬܗܘܢ

12ܟܕ ܙܥܘܪ̈ܝܢ ܗܘܝܬܘܢ ܒܡܢܝܢܐ ܩܠܝܠ ܗܘܝܬܘܢ ܘܥܡܘܪ̈ܐ ܗܘܝܬܘܢ ܒܗ̇

13ܗܠܟܘ ܡܢ ܥܡܐ ܠܥܡܐ ܘܡܢ ܡܠܟܘܬܐ ܠܥܡܐ ܐܚܪܢܐ

14ܘܠܐ ܫܒܩ ܠܒܪܢܫܐ ܕܢܛܠܘܡ ܐܢܘܢ ܐܟܣ ܡ̈ܠܟܐ ܥܠ ܐ̈ܦܝܗܘܢ

15ܕܠܐ ܬܬܩܪܒܘܢ ܠܡܫܝܚ̈ܝ ܘܠܢܒܝ̈ܝ ܠܐ ܬܒܐܫܘܢ

16ܘܩܪܐ ܟܦܢܐ ܥܠ ܐܪܥܐ ܘܟܠܗ ܩܢܝܐ ܕܥܒܘܪܗܘܢ ܬܒܪ

17ܫܕܪ ܩܕܡܝܗܘܢ ܓܒܪܐ ܠܥܒܕܘܬܐ ܐܙܕܒܢ ܝܘܣܦ

18ܘܐܣܪ ܒܣܘ̈ܛܡܐ ܪ̈ܓܠܘܗܝ ܘܒܦܪ̈ܙܠܐ ܥܠܬ ܢܦܫܗ

19ܥܕܡܐ ܕܫܪܬ ܡܠܬܗ ܡܐܡܪܗ ܕܡܪܝܐ ܒܩܝܗܝ

20ܫܕܪ ܡܠܟܐ ܘܫܪܝܗܝ ܥܒܕܗ ܫܠܝܛܐ ܥܠ ܥܡܗ

21ܡܪܐ ܥܠ ܒܝܬܗ ܘܫܠܝܛܐ ܥܠ ܟܠܗ ܩܢܝܢܗ

22ܕܢܪܕܐ ܫ̈ܠܝܛܐ ܐܝܟ ܕܨܒܐ ܘܠܩܫܝ̈ܫܐ ܢܚܟܡ

23ܥܠ ܐܝܣܪܝܠ ܠܡܨܪܝܢ ܘܝܥܩܘܒ ܥܡܪ ܒܡܫܟܢܐ ܕܚܡ

24ܐܣܓܝ ܛܒ ܥܡܗ ܘܐܥܫܢܗ ܝܬܝܪ ܡܢ ܒ̈ܥܠܕܒܒܘܗܝ

25ܘܗܦܟܘ ܠܒܗܘܢ ܠܡܣܢܝܗ ܠܥܡܗ ܘܠܡܬܢܟܠܘ ܥܠ ܥܒ̈ܕܘܗܝ

26ܫܕܪ ܠܡܘܫܐ ܥܒܕܗ ܘܠܐܗܪܘܢ ܕܓܒܐ

27ܥܒܕ ܒܗܘܢ ܐܬܘ̈ܬܗ ܘܬܕܡܪ̈ܬܗ ܒܐܪܥܐ ܕܚܡ

28ܫܕܪ ܚܫܘܟܐ ܘܐܚܫܟ ܘܡܪܡܪܘ ܡܠܬܗ

29ܗܦܟ ܡܝ̈ܝܗܘܢ ܠܕܡܐ ܘܐܡܝܬ ܢܘܢܝ̈ܗܘܢ

30ܐܪܚܫ ܒܐܪܥܗܘܢ ܐܘܪ̈ܕܥܐ ܘܒܬܘܘ̈ܢܐ ܕܡ̈ܠܟܝܗܘܢ

31ܐܡܪ ܘܐܝܬܝ ܚܠܘܛܐ ܘܩܠܡܐ ܒܟܠܗ ܬܚܘܡܗܘܢ

32ܥܒܕ ܡܛܪܗܘܢ ܒܪܕܐ ܘܢܘܪܐ ܐܬܓܘܙܠܬ ܒܐܪܥܗܘܢ

33ܡܚܐ ܓܘܦܢܝ̈ܗܘܢ ܘܬܐ̈ܢܝܗܘܢ ܘܬܒܪ ܐ̈ܝܠܢܐ ܕܬܚ̈ܘܡܝܗܘܢ

34ܐܡܪ ܘܐܝܬܝ ܩܡܨܐ ܘܙܚܠܐ ܕܠܐ ܡܢܝܢ ܒܟܠܗ̇ ܐܪܥܗܘܢ

35ܐܟܠ ܟܠܗ ܥܣܒܐ ܘܦܐܪ̈ܐ ܕܐܪ̈ܥܬܗܘܢ

36ܩܛܠ ܟܠ ܒܘܟܪ̈ܐ ܕܡܨܪܝܢ ܪܝܫ ܟܘܠܗ ܝܠܕܗܘܢ

37ܐܦܩ ܐܢܘܢ ܒܣܐܡܐ ܘܒܕܗܒܐ ܘܠܝܬ ܒܫܪ̈ܒܬܗܘܢ ܕܟܪܝܗ

38ܚܕܝܬ ܡܨܪܝܢ ܒܡܦܩܬܗܘܢ ܡܛܠ ܕܢܦܠܬ ܕܚܠܬܗܘܢ ܥܠܝܗܘܢ

39ܦܪܣ ܥܠܝܗܘܢ ܥܢܢܐ ܘܛܠܠ ܐܢܘܢ ܘܢܘܪܐ ܠܡܢܗܪܘ ܒܠܠܝܐ

40ܫܐܠܘ ܘܐܝܬܝ ܠܗܘܢ ܡܐܟܘܠܬܐ ܘܠܚܡܐ ܕܫܡܝܐ ܣܒܥ ܐܢܘܢ

41ܦܬܚ ܛܪܢܐ ܘܪܕܘ ܡ̈ܝܐ ܘܗܠܟܘ ܡ̈ܝܐ ܒܐܬܪܐ ܨܗܝܐ

42ܡܛܠ ܕܐܬܕܟܪ ܡܠܬܐ ܕܩܘܕܫܗ ܕܐܒܪܗܡ ܥܒܕܗ

43ܐܦܩ ܠܥܡܗ ܒܚܕܘܬܐ ܘܒܬܫܒܘܚܬܐ ܠܓܕܘ̈ܕܘܗܝ

44ܝܗܒ ܠܗܘܢ ܐܪ̈ܥܬܐ ܕܥܡ̈ܡܐ ܘܥܡܠܐ ܕܐܡ̈ܘܬܐ ܝܪܬܘ

45ܕܢܙܕܗܪܘܢ ܒܦܘܩ̈ܕܢܘܗܝ ܘܢܡܘ̈ܣܘܗܝ ܢܛܪܘܢ

Chapter 106 ܡܙܡܘܪ̈ܐ

1ܐܘܕܘ ܠܡܪܝܐ ܕܛܒ ܗܘ ܘܠܥܠܡ ܛܝܒܘܬܗ

2ܡܢܘ ܢܫܬܥܐ ܬܕܡܪ̈ܬܗ ܕܡܪܝܐ ܘܢܫܡܥ ܟܘܠܗܝܢ ܬܫ̈ܒܚܬܗ

3ܛܘܒܝܗܘܢ ܠܐܝܠܝܢ ܕܢܛܪܝܢ ܕܝܢ̈ܘܗܝ ܘܥܒܕܝܢ ܙܕܝܩܘܬܗ ܒܟܠܙܒܢ

4ܐܬܕܟܪܝܢܝ ܡܪܝܐ ܒܨܒܝܢܗ ܕܥܡܟ ܘܦܪܘܩܝܢܝ ܒܦܘܪܩܢܟ

5ܕܐܚܙܐ ܒ̈ܛܒܬܐ ܕܓܒܝ̈ܟ ܐܚܕܐ ܒܚܕܘܬܟ ܘܐܫܬܒܚ ܒܝܪܬܘܬܟ

6ܚܛܝܢ ܥܡ ܐ̈ܒܗܝܢ ܘܐܣܟܠܢ ܘܐܪܫܥܢ

7ܐܒ̈ܗܝܢ ܒܡܨܪܝܢ ܠܐ ܐܣܬܟܠܘ ܬܕܡܪ̈ܬܟ ܘܠܐ ܐܬܕܟܪܘ ܣܘܓܐܐ ܕܛܝܒ̈ܘܬܟ ܕܐܬܚܪܝܘ ܥܠ ܡ̈ܝܐ ܒܝܡܐ ܕܣܘܦ

8ܘܦܪܩ ܐܢܘܢ ܡܛܠ ܫܡܗ ܕܢܚܘܐ ܓܢܒܪܘܬܗ

9ܟܐܐ ܒܝܡܐ ܕܣܘܦ ܘܝܒܫ ܗܠܟ ܐܢܘܢ ܒܬܗܘܡܐ ܐܝܟ ܕܒܡܕܒܪܐ

10ܘܦܪܩ ܐܢܘܢ ܡܢ ܐܝܕܐ ܕܒܥܠܕܒܒܐ ܘܦܨܝ ܐܢܘܢ ܡܢ ܐܝܕܐ ܕܐܠܘܨܐ

11ܘܟܣܝܘ ܡ̈ܝܐ ܠܐ̈ܠܘܨܝܗܘܢ ܘܚܕ ܡܢܗܘܢ ܠܐ ܐܫܬܚܪ

12ܗܝܡܢܘ ܒܡ̈ܠܘܗܝ ܘܫܒܚܘ ܬܫܒ̈ܚܬܗ

13ܐܣܬܪܗܒܘ ܘܛܥܘ ܠܐܠܗܐ ܘܠܐ ܣܒܪܘ ܠܬܪܥܝܬܗ

14ܪܓܘ ܪܓܬܐ ܒܡܕܒܪܐ ܘܢܣܝܘ ܠܐܠܗܐ ܒܐܫܝܡܘܢ

15ܝܗܒ ܠܗܘܢ ܫܐ̈ܠܬܗܘܢ ܘܫܕܪ ܣܒܥܐ ܠܢܦܫ̈ܬܗܘܢ

16ܛܢܘ ܒܡܘܫܐ ܒܡܫܪܝܬܐ ܘܒܐܗܪܘܢ ܩܕܝܫܗ ܕܡܪܝܐ

17ܐܬܦܬܚܬ ܐܪܥܐ ܘܒܠܥܬ ܠܕܬܢ ܘܟܣܝܬ ܥܠ ܟܢܘܫܬܗ ܕܐܒܝܪܡ

18ܚܒܬ ܢܘܪܐ ܒܟܢܘܫ̈ܬܗܘܢ ܘܫܠܗܒܝܬܐ ܐܘܩܕܬ ܠܥܘ̈ܠܐ

19ܥܒܕܘ ܥܓܠܐ ܒܚܘܪܝܒ ܘܣܓܕܘ ܠܢܣܝܟܐ

20ܘܚܠܦܘ ܐܝܩܪܗܘܢ ܒܕܡܘܬܐ ܕܬܘܪܐ ܕܐܟܠ ܥܣܒܐ

21ܘܛܥܘ ܠܐܠܗܐ ܕܦܪܩ ܐܢܘܢ ܕܥܒܕ ܪ̈ܘܪܒܬܐ ܒܡܨܪܝܢ

22ܘܬܕܡܪ̈ܬܐ ܒܐܪܥܐ ܕܚܡ ܘܕܚ̈ܝܠܬܐ ܒܝܡܐ ܕܣܘܦ

23ܘܐܡܪ ܕܢܘܒܕ ܐܢܘܢ ܐܠܘ ܠܐ ܡܘܫܐ ܓܒܝܗ ܕܩܡ ܒܬܘܪܥܬܐ ܩܕܡܘܗܝ ܘܐܗܦܟ ܪܘܓܙܗ ܕܠܐ ܢܚܒܠ ܐܢܘܢ

24ܘܐܣܠܝܘܗ̇ ܠܐܪܥܐ ܕܪܓܬܐ ܘܠܐ ܗܝܡܢܘ ܠܡܠܬܗ

25ܘܪܛܢܘ ܒܡܫ̈ܟܢܝܗܘܢ ܘܠܐ ܫܡܥܘ ܒܩܠܗ ܕܡܪܝܐ

26ܘܐܪܝܡ ܐܝܕܗ ܥܠܝܗܘܢ ܕܢܘܒܕ ܐܢܘܢ ܒܥܡ̈ܡܐ

27ܘܢܒܕܪ ܙܪܥܗܘܢ ܒܥܡ̈ܡܐ ܘܢܘܒܕ ܐܢܘܢ ܒܐܪ̈ܥܬܐ

28ܥܠ ܕܐܬܢܩܦܘ ܠܦܬܟܪ̈ܐ ܕܦܥܘܪ ܘܐܟܠܘ ܕܒ̈ܚܐ ܕܡ̈ܝܬܐ

29ܘܐܪܓܙܘܗܝ ܒܥܒ̈ܕܝܗܘܢ ܘܒܦܬܟܪ̈ܝܗܘܢ ܐܛܢܘܗܝ ܘܥܫܢ ܥܠܝܗܘܢ ܡܘܬܢܐ ܡܢ ܫܠܝܐ

30ܩܡ ܦܝܢܚܣ ܘܨܠܝ ܘܐܬܟܠܝ ܡܘܬܢܐ

31ܘܐܬܚܫܒܬ ܠܗ ܙܟܘܬܐ ܠܕܪܕܪܝܢ ܥܕܡܐ ܠܥܠܡ

32ܘܐܪܓܙܘܗܝ ܥܠ ܡ̈ܝܐ ܕܚܪܝܢܐ ܘܐܒܐܫ ܠܡܘܫܐ ܡܛܠܬܗܘܢ

33ܡܛܠ ܕܡܪܡܪܘ ܪܘܚܗ ܘܡܠܠܘ ܒܣ̈ܦܘܬܗ

34ܘܠܐ ܐܘܒܕܘ ܠܥܡ̈ܡܐ ܕܐܡܪ ܠܗܘܢ ܡܪܝܐ

35ܐܠܐ ܐܬܚܠܛܘ ܒܥܡ̈ܡܐ ܘܝܠܦܘ ܥܒ̈ܕܝܗܘܢ

36ܘܕܚܠܘ ܠܦܬܟܪ̈ܝܗܘܢ ܘܗܘܘ ܠܗܘܢ ܠܬܘܩܠܬܐ

37ܕܒܚܘ ܒܢܝ̈ܗܘܢ ܘܒܢ̈ܬܗܘܢ ܠܫܐ̈ܕܐ

38ܘܐܫܕܘ ܕܡܐ ܙܟܝܐ ܕܡܐ ܕܒܢܝ̈ܗܘܢ ܘܕܒܢ̈ܬܗܘܢ ܕܒܚܘ ܠܦܬܟܪ̈ܐ ܕܟܢܥܢ ܘܐܬܛܢܦܬ ܐܪܥܐ ܒܕܡܐ

39ܐܬܛܢܦܘ ܒܥܒ̈ܕܝܗܘܢ ܘܙܢܝܘ ܒܨܢ̈ܥܬܗܘܢ

40ܘܐܬܚܡܬ ܪܘܓܙܗ ܕܡܪܝܐ ܥܠ ܥܡܗ ܘܐܣܠܝ ܠܝܪܬܘܬܗ

41ܘܐܫܠܡ ܐܢܘܢ ܒܐܝܕܐ ܕܥܡ̈ܡܐ ܘܐܫܬܠܛܘ ܒܗܘܢ ܣ̈ܢܐܝܗܘܢ

42ܘܫܥܒܕܘ ܐܢܘܢ ܒ̈ܥܠܕܒܒܝܗܘܢ ܘܐܫܬܥܒܕܘ ܬܚܘܬ ܐ̈ܝܕܝܗܘܢ

43ܙܒܢ̈ܬܐ ܣ̈ܓܝܐܬܐ ܦܨܝ ܐܢܘܢ ܘܗܢܘܢ ܡܪܡܪܘܗܝ ܒܬܪ̈ܥܝܬܗܘܢ ܘܐܬܡܟܟܘ ܒܥܘܠܗܘܢ

44ܘܚܙܐ ܒܐܘܠܨܢܗܘܢ ܘܫܡܥ ܒܥܘܬܗܘܢ

45ܘܐܬܕܟܪ ܩܝܡܗ ܘܪܚܡ ܥܠܝܗܘܢ ܘܕܒܪ ܐܢܘܢ ܐܝܟ ܣܘܓܐܐ ܕܛܝܒ̈ܘܬܗ

46ܘܝܗܒ ܐܢܘܢ ܒܪ̈ܚܡܐ ܩܕܡ ܟܘܠ ܫܒܝ̈ܗܘܢ

47ܦܪܘܩܝܢ ܡܪܝܐ ܐܠܗܢ ܘܟܢܫܝܢܝ ܡܢ ܥܡ̈ܡܐ ܕܢܘܕܐ ܠܫܡܟ ܩܕܝܫܐ ܘܢܫܬܒܚ ܒܝܪܬܘܬܟ

48ܒܪܝܟ ܗܘ ܡܪܝܐ ܐܠܗܐ ܕܐܝܣܪܝܠ ܡܢ ܥܠܡ ܘܥܕܡܐ ܠܥܠܡ ܘܢܐܡܪ ܟܘܠܗ ܥܡܐ ܐܡܝܢ ܘܐܡܝܢ

Chapter 107 ܡܙܡܘܪ̈ܐ

1ܐܘܕܘ ܠܡܪܝܐ ܕܛܒ ܗܘ ܘܠܥܠܡ ܛܝܒܘܬܗ

2ܢܐܡܪܘܢ ܦܪ̈ܝܩܘܗܝ ܕܡܪܝܐ ܕܦܪܩ ܐܢܘܢ ܡܢ ܐܝܕܐ ܕܐܠܘܨܐ

3ܘܡܢ ܟܠܗܝܢ ܐܪ̈ܥܬܐ ܟܢܫ ܐܢܘܢ ܡܢ ܡܕܢܚܐ ܘܡܢ ܡܥܪܒܐ ܘܡܢ ܓܪܒܝܐ ܘܡܢ ܝܡܐ

4ܘܛܥܘ ܒܡܕܒܪܐ ܕܐܫܝܡܘܢ ܘܐܘܪܚܐ ܕܩܪܝܬܐ ܕܝܬܒܐ ܠܐ ܐܫܟܚܘ

5ܟܦܢܘ ܘܨܗܝܘ ܘܢܦܫܗܘܢ ܐܬܛܪܦܬ

6ܒܥܘ ܡܢ ܡܪܝܐ ܒܐ̈ܘܠܨܢܝܗܘܢ ܘܡܢ ܥܩܬ̈ܗܘܢ ܐܦܩ ܐܢܘܢ

7ܗܠܟ ܐܢܘܢ ܒܐܘܪܚܐ ܕܩܘܫܬܐ ܠܡܐܙܠ ܠܩܘܪ̈ܝܐ ܕܝܬ̈ܒܢ

8ܢܘܕܘܢ ܠܡܪܝܐ ܙܕܝܩ̈ܘܗܝ ܕܪ̈ܚܡܘܗܝ ܥܠ ܒ̈ܢܝ ܐܢܫܐ

9ܡܛܠ ܕܣܒܥ ܢܦܫ̈ܬܐ ܡܛܪ̈ܦܬܐ ܘܢܦܫܐ ܟܦܢܬܐ ܡܠܐ

10ܕܐܝܠܝܢ ܕܝܬܒܝܢ ܒܚܫܘܟܐ ܘܒ̈ܛܠܠܝ ܡܘܬܐ ܘܐܣܝܪܝܢ ܒܡܣܟܢܘܬܐ ܘܒܦܪ̈ܙܠܐ

11ܡܛܠ ܕܡܪܡܪܘ ܡܠܬܗ ܕܐܠܗܐ ܘܬܪܥܝܬܗ ܕܡܪܝܡܐ ܐܣܠܝܘ

12ܬܒܪ ܒܥܡܠܐ ܠܒܗܘܢ ܘܐܬܟܪܗܘ ܘܠܝܬ ܕܡܥܕܪ ܠܗܘܢ

13ܘܨܠܝܘ ܠܘܬ ܡܪܝܐ ܒܥܩ̈ܬܗܘܢ ܘܡܢ ܐܘ̈ܠܨܢܝܗܘܢ ܦܪܩ ܐܢܘܢ

14ܐܦܩ ܐܢܘܢ ܡܢ ܚܫܘܟܐ ܘܡܢ ܛ̈ܠܠܝ ܡܘܬܐ ܘܚ̈ܢܩܝܗܘܢ ܦܣܩ

15ܢܘܕܘܢ ܠܡܪܝܐ ܙܕܝܩ̈ܘܗܝ ܕܪ̈ܚܡܘܗܝ ܥܠ ܒܢܝܢܫ̈ܐ

16ܡܛܠ ܕܬܒܪ ܬܪ̈ܥܐ ܕܢܚܫܐ ܘܡܘܟ̈ܠܐ ܕܦܪܙܠܐ ܓܕܡ

17ܥܕܪ ܐܢܘܢ ܡܢ ܐܘܪܚܐ ܕܚ̈ܛܗܝܗܘܢ ܘܡܢ ܥܘܠܗܘܢ ܐܬܡܟܟܘ

18ܟܠ ܡܐܟܠܐ ܣܢܬ ܢܦܫܗܘܢ ܘܡܛܝܘ ܥܕܡܐ ܠܬܪ̈ܥܝ ܡܘܬܐ

19ܒܥܘ ܡܢ ܡܪܝܐ ܒܐ̈ܘܠܨܢܝܗܘܢ ܘܡܢ ܥܩ̈ܬܗܘܢ ܐܦܩ ܐܢܘܢ

20ܫܕܪ ܡܠܬܗ ܘܐܣܝ ܐܢܘܢ ܘܦܨܝ ܐܢܘܢ ܡܢ ܚܒܠܐ

21ܢܘܕܘܢ ܠܡܪܝܐ ܙܕܝܩ̈ܘܗܝ ܕܪ̈ܚܡܘܗܝ ܥܠ ܒܢ̈ܝ ܐܢܫܐ

22ܕܒܚܘ ܠܗ ܕܒܚ̈ܐ ܕܫܘܒܚܐ ܫܒܚܘ ܥܒ̈ܕܘܗܝ ܒܬܕܡܪ̈ܬܗ

23ܢܚ̈ܬܝ ܝܡܐ ܒܐ̈ܠܦܐ ܘܥܒܪ̈ܝ ܥܒܪ̈ܐ ܒܡ̈ܝܐ ܣܓ̈ܝܐܐ

24ܗܢܘܢ ܚܙܘ ܥܒ̈ܕܘܗܝ ܕܡܪܝܐ ܘܬܕܡܪ̈ܬܗ ܒܥܘܡ̈ܩܘܗܝ ܕܝܡܐ

25ܕܐܩܝܡ ܪܘܚܐ ܕܥܠܥܠܐ ܘܐܬܬܪܝܡܘ ܓ̈ܠܠܘܗܝ ܕܝܡܐ

26ܣܠܩܝܢ ܠܫܡܝܐ ܘܢܚܬܝܢ ܠܬܗܘܡܐ ܘܢܦܫܗܘܢ ܒܗܘܢ ܡܬܛܪܦܐ

27ܙܥܘ ܘܢܕܘ ܐܝܟ ܐܪ̈ܘܝܐ ܘܟܠܗ̇ ܚܟܡܬܗܘܢ ܐܒܕܬ

28ܓܥܘ ܠܘܬ ܡܪܝܐ ܒܐ̈ܘܠܨܢܝܗܘܢ ܘܡܢ ܥܩ̈ܬܗܘܢ ܐܦܩ ܐܢܘܢ

29ܐܫܠܝ ܥܠܥܠܐ ܘܫܬܩܘ ܘܐܬܬܢܝܚܘ ܓ̈ܠܠܘܗܝ ܕܝܡܐ

30ܘܚܕܝܘ ܟܕ ܫܬܩܘ ܕܒܪ ܐܢܘܢ ܠܠܡܐܢܐ ܕܨܒܘ

31ܢܘܕܘܢ ܠܡܪܝܐ ܙܕܝܩ̈ܘܗܝ ܕܪ̈ܚܡܘܗܝ ܥܠ ܒܢܝܢܫ̈ܐ

32ܫܒܚܘܗܝ ܒܥܕܬܐ ܕܥܡ̈ܡܐ ܘܥܠ ܡܘܬܒܐ ܕܣܒ̈ܐ ܪܡܪܡܘܗܝ

33ܕܥܒܕ ܢܗܪ̈ܘܬܐ ܐܝܟ ܡܕܒܪܐ ܘܡܒ̈ܘܥܐ ܕܡ̈ܝܐ ܠܨܗܝܐ

34ܐܪܥܐ ܝܗܒܬ ܦܐܪ̈ܝܗ̇ ܠܡܠܚܬܐ ܡܢ ܥܒ̈ܕܝܗܘܢ ܒܝܫ̈ܐ ܕܝܬܒ̈ܝܗ̇

35ܕܥܒܕ ܡܕܒܪܐ ܠܐ̈ܓܡܐ ܕܡ̈ܝܐ ܘܐܪܥܐ ܨܗܝܬܐ ܠܡܒ̈ܘܥܐ ܕܡ̈ܝܐ

36ܐܘܬܒ ܬܡܢ ܟܦܢ̈ܐ ܘܒܢܘ ܩܘܪ̈ܝܐ ܘܝܬܒܘ ܒܗܝܢ

37ܙܪܥܘ ܚܩ̈ܠܬܐ ܘܢܨܒܘ ܟܪ̈ܡܐ ܘܐܟܠܘ ܡܢ ܦܐܪ̈ܐ ܕܥ̈ܠܠܬܗܘܢ

38ܒܪܟ ܐܢܘܢ ܘܣܓܝܘ ܛܒ ܘܒܥܝܪܗܘܢ ܠܐ ܐܙܥܪ

39ܘܙܥܪܘ ܘܐܬܡܟܟܘ ܒܣܘܓܐܐ ܕܒܝܫܬܐ ܘܕܕܐܘܘܢܐ

40ܐܪܡܝ ܒܝܫܬܐ ܥܠ ܫ̈ܠܝܛܐ ܘܐܛܥܝ ܐܢܘܢ ܒܬܘܫܐ ܕܠܐ ܐܘܪܚܐ

41ܘܐܥܫܢ ܠܡܣ̈ܟܢܐ ܘܥܒܕ ܐܝܟ ܥܢܐ ܫܪ̈ܒܬܗܘܢ

42ܕܢܚܙܘܢ ܙܕܝܩ̈ܐ ܘܢܚܕܘܢ ܘܟܠܗܘܢ ܥܘ̈ܠܐ ܢܣܟܪܘܢ ܚܟܗܘܢ

43ܡܢ ܕܚܟܝܡ ܢܛܪ ܗܠܝܢ ܘܢܕܥ ܚܣܕܗ ܕܡܪܝܐ

Chapter 108 ܡܙܡܘܪ̈ܐ

2ܡܛܝܒ ܗܘ ܠܒܝ ܐܠܗܐ ܡܛܝܒ ܗܘ ܠܒܝ ܐܫܒܚ ܘܐܙܡܪ ܒܐܝܩܪܝ

3ܐܬܬܥܝܪ ܟܢܪܝ ܐܬܬܥܝܪ ܩܝܬܪܐ ܘܟܢܪܐ ܘܐܢܐ ܐܬܬܥܝܪ ܒܨܦܪܐ

4ܐܘܕܐ ܠܟ ܒܥܡ̈ܡܐ ܐܠܗܐ ܘܠܫܡܟ ܐܙܡܪ ܒܐ̈ܡܘܬܐ

5ܡܛܠ ܕܪܒܐ ܗܝ ܛܝܒܘܬܟ ܥܕܡܐ ܠܫܡܝܐ ܘܗܝܡܢܘܬܟ ܥܕܡܐ ܠܫ̈ܡܝ ܫܡܝܐ

6ܐܬܬܪܝܡ ܥܠ ܫܡܝܐ ܐܠܗܐ ܘܥܠ ܟܠܗ̇ ܐܪܥܐ ܐܝܩܪܟ

7ܡܛܠ ܕܢܬܦܪܩܘܢ ܚܒܝ̈ܒܝܟ ܦܪܘܩܝܢܝ ܒܝܡܝܢܟ ܘܥܢܝܢܝ

8ܐܠܗܐ ܡܠܠ ܒܩܘܕܫܗ ܐܫܒܚ ܐܢܐ ܘܐܦܠܓ ܠܫܟܝܡ ܘܠܥܘܡܩܐ ܕܣܟܘܬ ܐܡܫܘܚ

9ܕܝܠܝ ܗܘ ܓܠܥܕ ܘܕܝܠܝ ܗܘ ܡܢܫܐ ܐܦܪܝܡ ܡܥܫܢܢܗ ܕܪܝܫܝ ܝܗܘܕܐ ܡܠܟܝ

10ܡܘܐܒ ܩܕܣܐ ܕܫܝܓܬܝ ܥܠ ܐܕܘܡ ܐܫܪܐ ܡ̈ܣܢܝ ܘܥܠ ܦܠܫܬ ܐܩܥܐ

11ܡܢܘ ܢܘܒܠܢܝ ܠܩܪܝܬܐ ܥܫܝܢܬܐ ܘܡܢܘ ܢܕܒܪܢܝ ܥܕܡܐ ܠܐܕܘܡ

12ܕܗܐ ܐܢܬ ܐܠܗܐ ܛܥܝܬܢ ܘܠܐ ܢܦܩ ܐܢܬ ܒܚܝܠܢ

13ܗܒ ܠܢ ܚܝܠܐ ܥܠ ܒ̈ܥܠܕܒܒܝܢ ܡܛܠ ܕܣܪܝܩ ܗܘ ܦܘܪܩܢܗ ܕܒܪܢܫܐ

14ܐܠܗܐ ܢܩܢܝܢ ܚܝܠܐ ܘܗܘ ܢܕܘܫ ܠܒ̈ܥܠܕܒܒܝܢ

Chapter 109 ܡܙܡܘܪ̈ܐ

1ܐܠܗܐ ܕܬܫܒܘܚܬܝ ܠܐ ܬܫܬܘܩ

2ܡܛܠ ܕܦܘܡܗ ܕܪܫܝܥܐ ܘܦܘܡܗ ܕܢܟܘܠܬܢܐ ܐܬܦܬܚ ܥܠܝ ܡܠܠܘ ܥܡܝ ܒܠܫܢܐ ܕܓܠܐ

3ܘܒܩܠܐ ܕܣܢܐܬܐ ܘܐܬܟܬܫܘ ܥܡܝ ܣܪܝܩܐܝܬ

4ܘܚܠܦ ܪܚܡܬܝ ܣܩܪܘܢܝ ܘܐܢܐ ܡܨܠܐ ܗܘܝܬ ܥܠܝܗܘܢ

5ܦܪܥܘܢܝ ܒܝܫܬܐ ܚܠܦ ܛܒܬܐ ܘܣܢܐܬܐ ܚܠܦ ܪܚܡܬܐ

6ܦܩܘܕ ܥܠܝܗܘܢ ܥܘ̣ܠܐ ܘܣܛܢܐ ܢܩܘܡ ܡܢ ܝܡܝܢܗܘܢ

7ܘܡܐ ܕܡܬܕܝܢܝܢ ܢܦܩܘܢ ܟܕ ܚܝܒܝܢ ܘܨܠܘܬܗܘܢ ܬܗܘܐ ܚܛܝܬܐ

8ܢܗܘܘܢ ܝܘܡܝ̈ܗܘܢ ܙܥܘܪ̈ܝܢ ܘܡܕܡ ܕܡܛܪ ܠܗܘܢ ܐܚܪ̈ܢܐ ܢܣܒܘܢ

9ܢܗܘܘܢ ܒܢܝ̈ܗܘܢ ܝܬ̈ܡܐ ܘܢܝܫ̈ܝܗܘܢ ܐܪ̈ܡܠܬܐ

11ܢܩܘܡ ܡܪܐ ܚܘܒܐ ܥܠ ܟܠ ܕܐܝܬ ܠܗܘܢ ܘܢܒܨܘܢ ܢܘܟܪ̈ܝܐ ܚܝܠܗܘܢ

12ܘܠܐ ܢܗܘܐ ܠܗܘܢ ܡܪܚܡܢܐ ܘܠܐ ܢܗܘܐ ܕܡܪܚܡ ܥܠ ܝܬܡ̈ܝܗܘܢ

13ܬܗܘܐ ܚܪܬܗܘܢ ܠܐܒܕܢܐ ܘܠܕܪܐ ܐܚܪܝܐ ܢܬܥܛܐ ܫܡܗܘܢ

14ܢܬܕܟܪ ܥܘܠܐ ܕܐ̈ܒܗܝܗܘܢ ܘܚ̈ܛܗܐ ܕܐܡܗ̈ܬܗܘܢ ܠܐ ܢܬܥܛܘܢ

15ܐܠܐ ܢܗܘܘܢ ܩܕܡ ܡܪܝܐ ܒܟܠܙܒܢ ܘܢܘܒܕ ܡܢ ܐܪܥܐ ܕܘܟܪܢܗܘܢ

16ܥܠ ܕܠܐ ܥܗܕܘ ܠܡܥܒܕ ܛܒܬܐ ܘܪܕܦܘ ܠܡܣܟܢܐ ܘܠܒܝܫܐ ܘܠܕܡܟܐܒ ܠܒܗ ܠܡܘܬܐ

17ܪܚܡܘ ܠܘ̈ܛܬܐ ܘܠܐ ܨܒܘ ܒܒܘܪ̈ܟܬܐ

18ܘܠܒܫܘ ܠܘ̈ܛܬܐ ܐܝܟ ܙܝܢܐ ܥܠܘ ܒܗܘܢ ܐܝܟ ܡ̈ܝܐ ܘܐܝܟ ܡܫܚܐ ܒܓܪ̈ܡܝܗܘܢ

19ܬܗܘܐ ܠܗܘܢ ܐܝܟ ܡܪܛܘܛܐ ܕܡܬܟܣܝܢ ܘܐܝܟ ܐܣܪ ܚ̈ܨܐ ܒܟܠܙܒܢ

20ܗܢܘ ܥܒܕܐ ܕܐܝܠܝܢ ܕܣܩܪܝܢ ܠܡܪܝܐ ܘܕܐܝܠܝܢ ܕܡܡܠܠܝܢ ܒܝܫܬܐ ܥܠ ܢܦܫܝ

21ܘܐܢܬ ܡܪܝܐ ܥܒܕ ܥܡܝ ܡܛܠ ܫܡܟ ܡܛܠ ܕܛܒܐ ܗܝ ܛܝܒܘܬܟ ܦܨܢܝ

22ܡܛܠ ܕܡܣܟܢܐ ܐܢܐ ܘܒܝܫܐ ܠܒܝ ܐܬܕܠܚ ܒܓܘܝ

23ܘܐܝܟ ܛܠܠܐ ܐܬܪܟܢ ܗ̈ܠܟܬܝ ܘܐܬܢܦܨܬ ܐܝܟ ܩܡܨܐ

24ܘܒܘܪ̈ܟܝ ܐܬܟܪܗ ܡܢ ܨܘܡܐ ܘܒܣܪܝ ܢܚܒ ܡܢ ܡܫܚܐ

25ܘܐܢܐ ܗܘܝܬ ܠܗܘܢ ܠܚܣܕܐ ܚܙܐܘܢܝ ܘܐܢܝܕܘ ܒܪ̈ܝܫܝܗܘܢ

26ܥܕܪܝܢܝ ܡܪܝܐ ܐܠܗܝ ܘܦܪܘܩܝܢܝ ܐܝܟ ܛܝܒܘܬܟ

27ܕܢܕܥܘܢ ܕܕܝܠܟ ܗܝ ܗܕܐ ܘܐܢܬ ܥܒܕܬܗ̇

28ܢܬܠܝܛܘܢ ܗܢܘܢ ܘܐܢܬ ܬܬܒܪܟ ܘܥܒܕܟ ܢܚܕܐ

29ܢܠܒܫܘܢ ܒܗܬܬܐ ܐܝܠܝܢ ܕܣܩܪܝܢ ܗܘܘ ܠܝ ܘܢܬܥܛܦܘܢܗ̇ ܐܝܟ ܦܪܝܣܐ

30ܐܘܕܐ ܠܡܪܝܐ ܒܦܘܡܝ ܘܒܝܢܬ ܣ̈ܓܝܐܐ ܐܫܒܚܝܘܗܝ

31ܡܛܠ ܕܩܡ ܡܢ ܝܡܝܢܗ ܕܒܝܫܐ ܠܡܦܪܩ ܢܦܫܗ ܡܢ ܕܝܢܐ

Chapter 110 ܡܙܡܘܪ̈ܐ

1ܐܡܪ ܡܪܝܐ ܠܡܪܝ ܕܬܒ ܠܟ ܡܢ ܝܡܝܢܝ ܥܕܡܐ ܕܐܣܝܡ ܒ̈ܥܠܕܒܒܝܟ ܟܘܒܫܐ ܠܪ̈ܓܠܝܟ

2ܚܘܛܪܐ ܕܥܘܫܢܐ ܢܫܕܪ ܡܪܝܐ ܡܢ ܨܗܝܘܢ ܘܢܫܬܠܛ ܥܠ ܒ̈ܥܠܕܒܒܝܟ

3ܥܡܟ ܡܫܒܚܐ ܒܝܘܡܐ ܕܚܝܠܐ ܒܗܕܪ̈ܝ ܩܘܕܫܐ ܡܢ ܡܪܒܥܐ ܡܢ ܩܕܝܡ ܠܟ ܛܠܝܐ ܐܝܠܕܬܟ

4ܝܡܐ ܡܪܝܐ ܘܠܐ ܢܟܕܒ ܕܐܢܬ ܗܘ ܟܘܡܪܐ ܠܥܠܡ ܒܕܡܘܬܗ ܕܡܠܟܝܙܕܩ

5ܡܪܝܐ ܥܠ ܝܡܝܢܟ ܬܒܪ ܒܝܘܡܐ ܕܪܘܓܙܗ ܡ̈ܠܟܐ

6ܢܕܘܢ ܠܥܡ̈ܡܐ ܘܢܡܠܐ ܫ̈ܠܕܐ ܘܢܦܣܘܩ ܪܝܫܐ ܕܣ̈ܓܝܐܐ ܒܐܪܥܐ

7ܘܡܢ ܢܚܠܐ ܒܐܘܪܚܐ ܢܫܬܐ ܡܛܠ ܗܢܐ ܢܬܬܪܝܡ ܪܝܫܗ

Chapter 111 ܡܙܡܘܪ̈ܐ

1ܐܘܕܐ ܠܡܪܝܐ ܡܢ ܟܠܗ ܠܒܝ ܒܡܠܟܐ ܕܬܪ̈ܝܨܐ ܒܥܕܬܐ

2ܪ̈ܘܪܒܝܢ ܥܒ̈ܕܘܗܝ ܕܡܪܝܐ ܘܡܬܒܥܝܢ ܠܟܠ ܕܨܒܝܢ ܒܗܘܢ

3ܡܫܒܚܝܢ ܘܪ̈ܘܪܒܝܢ ܥܒ̈ܕܘܗܝ ܘܙܕܝܩܘܬܗ ܩܝܡܐ ܠܥܠܡ

4ܥܘܗܕܢܐ ܝܗܒ ܠܬܕܡܪ̈ܬܗ ܡܪܚܡܢ ܗܘ ܘܡܪܚܦܢ ܡܪܝܐ

5ܡܐܟܘܠܬܐ ܝܗܒ ܠܕܚ̈ܠܘܗܝ ܘܡܬܕܟܪ ܠܥܠܡ ܩܝܡܗ

6ܚܝܠܐ ܕܒ̈ܥܒܕܘܗܝ ܚܘܝ ܠܥܡܗ ܕܢܬܠ ܠܗܘܢ ܝܪܬܘܬܐ ܕܥܡ̈ܡܐ

7ܘܡܫܪܪܝܢ ܟܠܗܘܢ ܦܘܩ̈ܕܢܘܗܝ

8ܘܥܒܝܕܝܢ ܒܙܕܝܩܘܬܐ ܘܒܩܘܫܬܐ

9ܦܘܪܩܢܐ ܫܕܪ ܠܥܡܗ ܘܡܬܕܟܪ ܠܥܠܡ ܩܝܡܗ ܩܕܝܫ ܗܘ ܘܕܚܝܠ ܫܡܗ

10ܪܝܫ ܚܟܡܬܐ ܕܚܠܬܗ ܕܡܪܝܐ ܘܣܘܟܠܐ ܛܒܐ ܠܥܒ̈ܘܕܝܗ̇ ܘܬܫܒܘܚܬܗ ܩܝܡܐ ܠܥܠܡ

Chapter 112 ܡܙܡܘܪ̈ܐ

1ܛܘܒܘܗܝ ܠܓܒܪܐ ܕܕܚܠ ܡܢ ܡܪܝܐ ܘܙܗܝܪ ܒܦܘܩ̈ܕܢܘܗܝ

2ܢܗܘܐ ܚܝܠܬܢ ܙܪܥܗ ܒܐܪܥܐ ܘܢܬܒܪܟ ܒܕܪܐ ܕܙܕܝܩ̈ܐ

3ܩܢܝܢܐ ܘܥܘܬܪܐ ܢܣܓܐ ܒܒܝܬܗ ܘܙܕܝܩܘܬܗ ܬܩܘܡ ܠܥܠܡ

4ܕܢܚ ܢܘܗܪܐ ܒܚܫܘܟܐ ܠܬܪ̈ܝܨܐ ܘܡܪܚܡ ܥܠ ܙܕܝܩ̈ܐ

5ܛܒ ܗܘ ܓܒܪܐ ܕܡܪܚܡ ܘܡܘܙܦ ܘܡܣܝܒܪ ܡ̈ܠܘܗܝ ܒܕܝܢܐ

6ܘܠܥܠܡ ܠܐ ܢܙܘܥ ܕܘܟܪܢܐ ܠܥܠܡ ܢܗܘܐ ܠܙܕܝܩܐ

7ܘܡܢ ܛܒܐ ܒܝܫܐ ܠܐ ܢܕܚܠ ܕܡܬܩܢ ܠܒܗ ܬܟܝܠ ܥܠ ܐܠܗܐ

8ܘܡܫܪܪ ܠܒܗ ܘܠܐ ܕܚܠ ܥܕܡܐ ܕܚܙܐ ܒ̈ܒܥܠܕܒܒܘܗܝ

9ܒܕܪ ܘܝܗܒ ܠܒܝܫ̈ܐ ܘܙܕܝܩܘܬܗ ܩܝܡܐ ܠܥܠܡ ܥܠܡܝܢ ܘܩܪܢܗ ܬܬܪܝܡ ܒܫܘܒܚܐ

10ܘܥܘܠܐ ܢܚܙܐ ܘܢܪܓܙ ܘܫ̈ܢܘܗܝ ܢܚܪܩ ܘܢܬܕܠܚ ܘܪܓܬܐ ܕܪ̈ܫܝܥܐ ܬܐܒܕ

Chapter 113 ܡܙܡܘܪ̈ܐ

1ܫܒܚܘ ܥܒ̈ܕܘܗܝ ܕܡܪܝܐ ܫܒܚܘ ܠܫܡܗ ܕܡܪܝܐ

2ܢܗܘܐ ܫܡܗ ܕܡܪܝܐ ܡܒܪܟ ܡܢ ܥܠܡ ܘܥܕܡܐ ܠܥܠܡ

3ܡܢ ܡ̈ܕܢܚܘܗܝ ܕܫܡܫܐ ܥܕܡܐ ܠܡܥܪ̈ܒܘܗܝ ܪܒ ܗܘ ܫܡܗ ܕܡܪܝܐ

4ܘܪܡ ܥܠ ܟܠܗܘܢ ܥܡ̈ܡܐ ܡܪܝܐ ܘܥܠ ܫܡܝܐ ܐܝܩܪܗ

5ܡܢܘ ܐܝܟ ܡܪܝܐ ܐܠܗܢ ܕܝܬܒ ܒܪܘܡܐ

6ܘܚܙܐ ܒܥܘܡܩܐ ܒܫܡܝܐ ܘܒܐܪܥܐ

7ܡܪܝܡ ܡܢ ܩܩܠܬܐ ܠܒܝܫܐ

8ܕܢܘܬܒܝܘܗܝ ܥܡ ܪ̈ܘܪܒܢܐ ܕܥܡܐ

9ܡܘܬܒ ܥܩܪܬܐ ܒܒܝܬܐ ܘܐܡܐ ܕܒ̈ܢܝܐ ܟܕ ܚܕܝܐ

Chapter 114 ܡܙܡܘܪ̈ܐ

1ܟܕ ܢܦܩ ܐܝܣܪܝܠ ܡܢ ܡܨܪܝܢ ܘܕܒܝܬ ܝܥܩܘܒ ܡܢ ܥܡܐ ܠܥܘܙܐ

2ܗܘܐ ܝܗܘܕܐ ܩܘܕܫܗ ܘܐܝܣܪܝܠ ܬܫܒܘܚܬܗ

3ܝܡܐ ܚܙܝܗܝ ܘܥܪܩ ܘܝܘܪܕܢܢ ܗܦܟ ܠܒܣܬܪܗ

4ܛܘܪ̈ܐ ܪܩܕܘ ܐܝܟ ܐܝ̈ܠܐ ܘܪ̈ܡܬܐ ܐܝܟ ܐܡܪ̈ܐ ܕܥܢܐ

5ܡܐ ܠܟ ܝܡܐ ܕܥܪܩܬ ܘܝܘܪܕܢܢ ܕܗܦܟܬ ܠܒܣܬܪܟ

6ܛܘܪ̈ܐ ܕܪܩܕܬܘܢ ܐܝܟ ܐ̈ܝܠܐ ܘܪ̈ܡܬܐ ܐܝܟ ܐܡܪ̈ܐ ܕܥܢܐ

7ܡܢ ܩܕܡ ܡܪܝܐ ܙܥܬ ܐܪܥܐ ܘܡܢ ܩܕܡ ܐܠܗܗ ܕܝܥܩܘܒ

8ܕܗܦܟ ܛܪܢܐ ܠܐ̈ܓܡܐ ܕܡ̈ܝܐ ܘܟܐܦܐ ܫܪܝܪܬܐ ܠܡܒ̈ܘܥܐ ܕܡ̈ܝܐ

Chapter 115 ܡܙܡܘܪ̈ܐ

1ܠܐ ܠܢ ܡܪܝܐ ܠܐ ܠܢ ܐܠܐ ܠܫܡܟ ܗܒ ܐܝܩܪܐ ܥܠ ܛܝܒܘܬܟ ܘܥܠ ܩܘܫܬܟ

2ܕܠܐ ܢܐܡܪܘܢ ܥܡ̈ܡܐ ܐܝܟܘ ܐܠܗܗܘܢ

3ܐܠܗܢ ܒܫܡܝܐ ܗܘ ܘܟܠ ܕܨܒܐ ܥܒܕ

4ܦܬܟܪ̈ܐ ܕܥܡ̈ܡܐ ܣܐܡܐ ܘܕܗܒܐ ܥܒܕ ܐ̈ܝܕܝܐ ܕܒܪܢܫܐ

5ܦܘܡܐ ܐܝܬ ܠܗܘܢ ܘܠܐ ܡܡܠܠܝܢ ܥܝ̈ܢܐ ܐܝܬ ܠܗܘܢ ܘܠܐ ܚܙܝܢ

6ܐ̈ܕܢܐ ܐܝܬ ܠܗܘܢ ܘܠܐ ܫܡܥܝܢ ܢܚܝܪ̈ܐ ܐܝܬ ܠܗܘܢ ܘܠܐ ܡܪܝܚܝܢ

7ܘܒܐ̈ܝܕܝܗܘܢ ܠܐ ܡܝܫܝܢ ܘܒܪ̈ܓܠܝܗܘܢ ܠܐ ܡܗܠܟܝܢ ܘܠܐ ܡܡܠܠܝܢ ܒܓܝܓܪ̈ܬܗܘܢ

8ܐܟܘܬܗܘܢ ܢܗܘܘܢ ܥܒܘ̈ܕܝܗܘܢ ܘܟܠ ܕܬܟܝܠܝܢ ܥܠܝܗܘܢ

9ܕܒܝܬ ܐܝܣܪܝܠ ܬܟܝܠܝܢ ܥܠ ܡܪܝܐ ܗܘܝܘ ܥܕܘܪܗܘܢ ܘܡܣܝܥܢܗܘܢ

10ܕܒܝܬ ܐܗܪܘܢ ܬܟܝܠܝܢ ܥܠ ܡܪܝܐ ܗܘܝܘ ܥܕܘܪܗܘܢ ܘܡܣܝܥܢܗܘܢ

11ܕܚ̈ܠܘܗܝ ܕܡܪܝܐ ܬܟܝܠܝܢ ܥܠ ܡܪܝܐ ܗܘܝܘ ܥܕܘܪܗܘܢ ܘܡܣܝܥܢܗܘܢ

12ܡܪܝܐ ܥܗܕܢ ܘܒܪܟܢ ܢܒܪܟ ܠܕܒܝܬ ܐܝܣܪܝܠ ܢܒܪܟ ܠܕܒܝܬ ܐܗܪܘܢ

13ܢܒܪܟ ܡܪܝܐ ܠܕܚ̈ܠܘܗܝ ܙܥܘܪ̈ܐ ܥܡ ܪ̈ܘܪܒܐ

14ܢܘܣܦ ܥܠܝܟܘܢ ܡܪܝܐ ܥܠܝܟܘܢ ܘܥܠ ܒܢܝ̈ܟܘܢ

15ܒܪܝܟܝܢ ܐܢܬܘܢ ܠܡܪܝܐ ܕܥܒܕ ܫܡܝܐ ܘܐܪܥܐ

16ܫܡ̈ܝ ܫܡܝܐ ܕܡܪܝܐ ܘܐܪܥܐ ܝܗܒܗ̇ ܠܒܢ̈ܝ ܐܢܫܐ

17ܠܐ ܡ̈ܝܬܐ ܢܫܒܚܘܢ ܠܡܪܝܐ ܐܦ ܠܐ ܟܠ ܢܚ̈ܬܝ ܚܫܘܟܐ

18ܚܢܢ ܕܝܢ ܢܒܪܟ ܠܡܪܝܐ ܡܟܝܠ ܘܥܕܡܐ ܠܥܠܡ

Chapter 116 ܡܙܡܘܪ̈ܐ

1ܪܚܡܬ ܕܢܫܡܥ ܡܪܝܐ ܩܠܐ ܕܒܥܘܬܝ

2ܘܢܨܠܐ ܐܕܢܗ ܠܘܬܝ ܒܝܘܡܐ ܕܐܩܪܝܘܗܝ

3ܡܛܠ ܕܚܕܪܘܢܝ ܚܒ̈ܠܐ ܕܡܘܬܐ ܘܐ̈ܘܠܨܢܐ ܕܫܝܘܠ ܡܛܝܘܢܝ ܐܘܠܨܢܐ ܘܕܐܘܘܐܢܐ ܐܫܟܚܬ

4ܘܒܫܡܗ ܕܡܪܝܐ ܩܪܝܬ ܐܘܢ ܡܪܝܐ ܦܨܗ̇ ܠܢܦܫܝ

5ܡܪܚܡܢ ܐܢܬ ܡܪܝܐ ܘܙܕܝܩ ܘܐܠܗܐ ܐܢܬ ܡܪܚܡܢܐ

6ܢܛܪ ܠܫܒܪ̈ܐ ܡܪܝܐ ܡܟܟܢܝ ܘܦܪܩܢܝ

7ܐܬܦܢܝ ܢܦܫܝ ܠܢܝܚܟܝ ܡܛܠ ܕܡܪܝܐ ܦܪܥܟܝ

8ܡܛܠ ܕܦܨܝܬ ܢܦܫܝ ܡܢ ܡܘܬܐ ܘܪ̈ܓܠܝ ܡܢ ܫܪ̈ܥܬܐ

9ܕܐܫܦܪ ܩܕܡܝܟ ܡܪܝܐ ܒܐܪܥܐ ܕܚ̈ܝܐ

10ܗܝܡܢܬ ܘܡܠܠܬ ܘܐܬܡܟܟܬ ܛܒ

11ܐܢܐ ܐܡܪܬ ܒܪܥܝܠܘܬܝ ܕܟܠ ܒܪܢܫ ܕܓܠ

12ܡܢܐ ܐܦܪܘܥ ܠܡܪܝܐ ܕܟܠܗܘܢ ܦܘܪ̈ܥܢܘܗܝ ܥܠܝ

13ܟܣܐ ܕܦܘܪܩܢܐ ܐܩܒܠ ܘܒܫܡܗ ܕܡܪܝܐ ܐܩܪܐ

14ܢܕܪ̈ܝ ܠܡܪܝܐ ܐܦܪܘܥ ܩܕܡ ܟܠܗ ܥܡܐ

15ܝܩܝܪ ܗܘ ܒܥܝ̈ܢܘܗܝ ܕܡܪܝܐ ܡܘܬܐ ܕܙܕܝܩ̈ܘܗܝ

16ܐܘ ܡܪܝܐ ܐܢܐ ܥܒܕܟ ܥܒܕܟ ܐܢܐ ܘܒܪܗ̇ ܕܐܡܬܟ ܫܪܝܬ ܡܢܝ ܐܣܘܪ̈ܝ

17ܠܟ ܐܕܒܚ ܕܒܚ̈ܐ ܕܫܘܒܚܐ ܘܒܫܡܗ ܕܡܪܝܐ ܐܩܪܐ

18ܢܕܪ̈ܝ ܠܡܪܝܐ ܐܦܪܘܥ ܩܕܡ ܟܘܠܗ ܥܡܗ

19ܒܕܪ̈ܐ ܕܒܝܬܗ ܕܡܪܝܐ ܘܒܓܘܟܝ ܐܘܪܫܠܡ

Chapter 117 ܡܙܡܘܪ̈ܐ

1ܫܒܚܘ ܠܡܪܝܐ ܟܠܟܘܢ ܥܡ̈ܡܐ ܫܒܚܝܗܝ ܟܠܗܝܢ ܐ̈ܡܘܬܐ

2ܡܛܠ ܕܥܫܢܬ ܥܠܝܢ ܛܝܒܘܬܗ ܫܪܝܪܐܝܬ ܡܪܝܐ ܗܘ ܠܥܠܡ

Chapter 118 ܡܙܡܘܪ̈ܐ

1ܐܘܕܘ ܠܡܪܝܐ ܕܛܒ ܗܘ ܘܠܥܠܡ ܪ̈ܚܡܘܗܝ

2ܢܐܡܪ ܐܝܣܪܝܠ ܕܠܥܠܡ ܪ̈ܚܡܘܗܝ

3ܢܐܡܪܘܢ ܕܒܝܬ ܐܗܪܘܢ ܕܠܥܠܡ ܪ̈ܚܡܘܗܝ

4ܢܐܡܪܘܢ ܕܚ̈ܠܘܗܝ ܕܡܪܝܐ ܕܠܥܠܡ ܪ̈ܚܡܘܗܝ

5ܡܢ ܐܘܠܨܢܐ ܩܪܝܬ ܠܡܪܝܐ ܘܥܢܢܝ ܡܪܝܐ ܒܐܪܘܚܬܐ

6ܡܪܝܐ ܡܥܕܪܢܝ ܠܐ ܐܕܚܠ ܡܢܐ ܥܒܕ ܠܝ ܒܪ ܐܢܫܐ

7ܡܪܝܐ ܡܥܕܪܢܝ ܘܐܢܐ ܐܚܙܐ ܒܣ̈ܢܐܝ

8ܛܒ ܠܡܬܬܟܠܘ ܥܠ ܡܪܝܐ ܛܒ ܡܢ ܕܠܡܬܬܟܠܘ ܥܠ ܒܪܢܫܐ

9ܛܒ ܠܡܬܬܟܠܘ ܥܠ ܡܪܝܐ ܛܒ ܡܢ ܕܠܡܬܬܟܠܘ ܥܠ ܫܠܝܛܐ

10ܟܠܗܘܢ ܥܡ̈ܡܐ ܚܕܪܘܢܝ ܘܒܫܡܗ ܕܡܪܝܐ ܐܣܝܦܬ ܐܢܘܢ

11ܐܬܟܪܟܘܢܝ ܘܚܕܪܘܢܝ ܘܒܫܡܗ ܕܡܪܝܐ ܐܣܝܦܬ ܐܢܘܢ

12ܚܕܪܘܢܝ ܐܝܟ ܕܒܘܪ̈ܐ ܘܕܥܟܘ ܐܝܟ ܢܘܪܐ ܕܓ̈ܠܐ ܘܒܫܡܗ ܕܡܪܝܐ ܐܣܝܦܬ ܐܢܘܢ

13ܐܬܕܚܝܬ ܕܐܣܬܚܦ ܘܐܦܠ ܘܡܪܝܐ ܥܕܪܢܝ

14ܚܝܠܝ ܘܫܘܒܚܝ ܡܪܝܐ ܗܘ ܘܗܘ ܗܘܐ ܠܝ ܦܪܘܩܐ

15ܩܠܐ ܕܫܘܒܚܐ ܘܕܦܘܪܩܢܐ ܒܡܫܟܢܐ ܕܙܕܝܩ̈ܐ ܝܡܝܢܗ ܕܡܪܝܐ ܥܒܕܬ ܚܝܠܐ

16ܝܡܝܢܗ ܕܡܪܝܐ ܐܪܝܡܬܢܝ ܝܡܝܢܗ ܕܡܪܝܐ ܥܒܕܬ ܚܝܠܐ

17ܘܠܐ ܐܡܘܬ ܐܠܐ ܐܚܐ ܘܐܫܬܥܐ ܥܒ̈ܕܘܗܝ ܕܡܪܝܐ

18ܡܪܕܐ ܪܕܢܝ ܡܪܝܐ ܘܠܡܘܬܐ ܠܐ ܐܫܠܡܢܝ

19ܦܬܚ ܠܝ ܬܪ̈ܥܐ ܕܙܕܝܩܘܬܐ ܕܐܥܘܠ ܒܗܘܢ ܘܐܘܕܐ ܠܡܪܝܐ

20ܗܢܘ ܬܪܥܗ ܕܡܪܝܐ ܕܙܕܝܩ̈ܐ ܥܐܠܝܢ ܒܗ

21ܐܘܕܐ ܠܟ ܕܥܢܝܬܢܝ ܘܗܘܝܬ ܠܝ ܦܪܘܩܐ

22ܟܐܦܐ ܕܐܣܠܝܘ ܒ̈ܢܝܐ ܗܝ ܗܘܬ ܠܪܝܫܗ ܕܒܢܝܢܐ

23ܡܢ ܩܕܡ ܡܪܝܐ ܗܘܬ ܗܕܐ ܘܬܕܡܘܪܬܐ ܗܝ ܒܥܝܢ̈ܝܢ

24ܗܢܘ ܝܘܡܐ ܕܥܒܕ ܡܪܝܐ ܬܘ ܢܕܘܨ ܘܢܚܕܐ ܒܗ

25ܐܘ ܡܪܝܐ ܦܪܘܩܝܢܝ ܐܘ ܡܪܝܐ ܦܨܢܝ

26ܒܪܝܟ ܗܘ ܕܐܬܐ ܒܫܡܗ ܕܡܪܝܐ ܒܪܟܢܟܘܢ ܡܢ ܒܝܬܗ ܕܡܪܝܐ

27ܡܪܝܐ ܐܠܗܢ ܐܢܗܪ ܠܢ ܘܐܣܘܪ ܥܕܥܐ̈ܕܝܢ ܒܫܫ̈ܠܬܐ ܥܕܡܐ ܠܩܪ̈ܢܬܗ ܕܡܕܒܚܐ

28ܐܠܗܝ ܐܢܬ ܐܘܕܐ ܠܟ ܐܠܗܝ ܐܢܬ ܐܫܒܚܟ

29ܐܘܕܘ ܠܡܪܝܐ ܕܛܒ ܗܘ ܘܠܥܠܡ ܛܝܒܘܬܗ

Chapter 119 ܡܙܡܘܪ̈ܐ

1ܛܘܒܝܗܘܢ ܠܐܝܠܝܢ ܕܕܠܐ ܡܘܡ ܐܢܘܢ ܒܐܘܪܚܐ ܘܡܗܠܟܝܢ ܒܢܡܘܣܗ ܕܡܪܝܐ

2ܛܘܒܝܗܘܢ ܠܐܝܠܝܢ ܕܢܛܪܝܢ ܣܗܕܘܬܗ ܘܒܟܠܗ ܠܒܗܘܢ ܒܥܝܢ ܠܗ

3ܠܐ ܥܒܕܘ ܥܘܠܐ ܘܗܠܟܘ ܒܐܘܪ̈ܚܬܗ

4ܐܢܬ ܦܩܕܬ ܕܢܛܪܘܢ ܦܘܩ̈ܕܢܝܟ ܪ̈ܘܪܒܐܝܬ

5ܐܫܬܘܦ ܕܝܢ ܡܬܩ̈ܢܢ ܐܘܪ̈ܚܬܝ ܕܐܛܪ ܦܘܩ̈ܕܢܝܟ

6ܘܠܐ ܐܒܗܬ ܡܐ ܕܢܛܪܬ ܟܘܠܗܘܢ ܦܘܩ̈ܕܢܝܟ

7ܐܘܕܐ ܠܟ ܒܬܪܝܨܘܬܗ ܕܠܒܝ ܡܐ ܕܝܠܦܬ ܕܝ̈ܢܐ ܕܙܕܝܩܘܬܟ

8ܦܘܩ̈ܕܢܝܟ ܢܛܪܬ ܠܐ ܬܪܦܝܢܝ ܠܥܠܡ

9ܒܡܢܐ ܡܕܟܐ ܛܠܝܐ ܐܘܪܚܗ ܕܢܛܪ ܦܘܩ̈ܕܢܝܟ

10ܒܟܠܗ ܠܒܝ ܥܩܒܬܟ ܠܐ ܬܛܥܝܢܝ ܡܢ ܦܘܩ̈ܕܢܝܟ

11ܒܠܒܝ ܛܫܝܬ ܡ̈ܠܝܟ ܕܠܐ ܐܚܛܐ ܠܟ

12ܒܪܝܟ ܐܢܬ ܡܪܝܐ ܐܠܦܝܢܝ ܦܘܩ̈ܕܢܝܟ

13ܒܣ̈ܦܘܬܝ ܬܢܝܬ ܟܠܗܘܢ ܕܝܢ̈ܐ ܕܙܕܝܩܘܬܟ

14ܠܐܘܪܚܐ ܕܣܗܕܘܬܟ ܪܚܡܬ ܛܒ ܡܢ ܟܠܗ ܥܘܬܪܐ

15ܒܦܘܩ̈ܕܢܝܟ ܪܢܝܬ ܘܝܕܥܬ ܐܘܪ̈ܚܬܟ

16ܒܢܡܘܣܟ ܪܢܝܬ ܕܠܐ ܐܛܥܐ ܡ̈ܠܝܟ

17ܥܢܝ ܠܥܒܕܟ ܕܐܚܐ ܘܐܛܪ ܡ̈ܠܝܟ

18ܓܠܝ ܥܝܢ̈ܝ ܕܐܚܙܐ ܬܕܡܪ̈ܬܐ ܕܒܢܡܘܣܟ

19ܥܡܘܪܐ ܐܢܐ ܥܡܟ ܠܐ ܬܛܫܐ ܡܢܝ ܦܘܩ̈ܕܢܝܟ

20ܨܒܬ ܢܦܫܝ ܘܐܬܪܓܪܓܬ ܠܕܝܢ̈ܝܟ ܒܟܠܙܒܢ

21ܟܐܝܬ ܒܥܡ̈ܡܐ ܘܠܝܛܝܢ ܐܢܘܢ ܐܝܠܝܢ ܕܛܥܝܢ ܡܢ ܦܘܩ̈ܕܢܝܟ

22ܐܥܒܪ ܡܢܝ ܚܣܕܐ ܡܛܘܠ ܕܣܗܕܘܬܟ ܢܛܪܬ

23ܝܬܒܝܢ ܗܘܘ ܥܘ̈ܠܐ ܘܪܢܝܢ ܗܘܘ ܒܝ ܘܐܢܐ ܒܦܘܩ̈ܕܢܝܟ ܪܢܐ ܗܘܝܬ

24ܒܣܗܕܘܬܟ ܪܢܝܬ ܘܒܬܪܥܝܬܟ ܛܒܬܐ

25ܢܩܦܬ ܢܦܫܝ ܠܥܦܪܐ ܐܚܢܝ ܐܝܟ ܡܠܬܟ

26ܐܘܪ̈ܚܬܝ ܚܘܝܬܟ ܘܥܢܝܬܢܝ ܐܠܦܝܢܝ ܢܡܘܣܟ

27ܐܘܪܚܐ ܕܦܘܩ̈ܕܢܝܟ ܚܘܢܝ ܘܐܪܢܐ ܒܬܕܡܪ̈ܬܟ

28ܐܬܛܪܦܬ ܢܦܫܝ ܒܪܢܝܐ ܐܚܢܝ ܐܝܟ ܡܠܬܟ

29ܐܘܪܚܐ ܕܥܘ̈ܠܐ ܐܥܒܪ ܡܢܝ ܘܢܡܘܣܟ ܐܠܦܝܢܝ

30ܐܘܪܚܐ ܕܗܝܡܢܘܬܟ ܓܒܝܬ ܘܒܕܝܢ̈ܝܟ ܨܒܝܬ

31ܢܩܦܬ ܠܣܗܕܘܬܟ ܡܪܝܐ ܠܐ ܬܒܗܬܝܢܝ

32ܒܐܘܪܚܐ ܕܦܘܩ̈ܕܢܝܟ ܗܠܟܬ ܡܛܠ ܕܚܕܝܬܢܝ

33ܐܠܦܝܢܝ ܡܪܝܐ ܐܘܪܚܐ ܕܦܘܩ̈ܕܢܝܟ ܘܐܛܪ ܐܢܘܢ

34ܣܟܠܝܢܝ ܕܐܛܪ ܢܡܘܣܟ ܘܐܛܪܝܘܗܝ ܡܢ ܟܠܗ ܠܒܝ

35ܗܠܟܝܢܝ ܒܫܒܝܠܐ ܕܦܘܩ̈ܕܢܝܟ ܡܛܠ ܕܒܗ ܨܒܝܬ

36ܐܦܢܐ ܠܒܝ ܠܣܗܕܘܬܟ ܘܠܐ ܠܡܬ̈ܠܐ

37ܐܥܒܪ ܥܝܢ̈ܝ ܕܠܐ ܢܚ̈ܙܝܢ ܕܓܠܘܬܐ ܘܒܐܘܪ̈ܚܬܟ ܐܚܢܝ

38ܐܫܪ ܡܠܬܟ ܠܥܒܕܟ ܕܕܚܠ ܠܟ

39ܐܥܒܪ ܡܢܝ ܚܣܕܐ ܡܛܠ ܕܕܝܢ̈ܝܟ ܫܦܝܪܝܢ ܐܢܘܢ

40ܨܒܝܬ ܒܦܘܩ̈ܕܢܝܟ ܘܒܙܕܝܩܘܬܟ ܐܚܢܝ

41ܢܐܬܘܢ ܥܠܝ ܪ̈ܚܡܝܟ ܡܪܝܐ ܘܦܘܪܩܢܟ ܕܐܡܪܬ

42ܘܐܬܠ ܦܬܓܡܐ ܠܡܚܣ̈ܕܢܝ ܡܛܘܠ ܕܐܬܬܟܠܬ ܥܠ ܡ̈ܠܝܟ

43ܠܐ ܬܥܢܕ ܡܢ ܦܘܡܝ ܡܠܬܐ ܕܩܘܫܬܐ ܡܛܠ ܕܠܕܝܢ̈ܝܟ ܣܟܝܬ

44ܐܛܪ ܢܡܘܣܟ ܠܥܠܡ ܥܠܡܝܢ

45ܘܐܗܠܟ ܒܐܪܘܚܬܐ ܡܛܠ ܕܒܦܘܩ̈ܕܢܝܟ ܨܒܝܬ

46ܐܡܠܠ ܒܙܕܝܩܘܬܐ ܩܕܡ ܡ̈ܠܟܐ ܘܠܐ ܐܒܗܬ

47ܘܐܪܢܐ ܒܦܘܩ̈ܕܢܝܟ ܕܪܚܡܬ

48ܘܐܪܝܡ ܐܝ̈ܕܝ ܠܘܬ ܦܘܩ̈ܕܢܝܟ ܕܪܚܡܬ ܘܐܪܢܐ ܒܗܘܢ ܒܦܘܩ̈ܕܢܝܟ ܘܐܫܬܒܚ ܒܗܝܡܢܘܬܟ

49ܥܗܕ ܡܠܬܟ ܠܥܒܕܟ ܗܝ ܕܐܬܟܠܬܝܗܝ

50ܘܒܗ̇ ܐܬܒܝܐܝܬ ܒܡܘܟܟܝ ܡܛܠ ܕܡܐܡܪܟ ܐܚܝܢܝ

51ܥܘ̈ܠܐ ܐܠܨܘܢܝ ܘܡܢ ܢܡܘܣܟ ܠܐ ܣܛܝܬ

52ܐܬܕܟܪܬ ܕܝܢ̈ܝܟ ܡܪܝܐ ܕܡܢ ܥܠܡ ܘܐܬܒܝܐܝܬ ܘܗܘܘ ܠܝ ܠܡܪܕܘܬܐ

53ܟܡܝܪܘܬܐ ܐܚܕܬܢܝ ܡܢ ܚ̈ܛܝܐ ܕܫܒܩܘ ܢܡܘܣܟ

54ܙܡܝܪܬܐ ܗܘܘ ܠܝ ܦܘܩ̈ܕܢܝܟ ܒܝܬ ܬܘܬܒܘܬܝ

55ܥܗܕܬ ܒܠܠܝܐ ܫܡܟ ܡܪܝܐ ܘܢܛܪܬ ܢܡܘܣܟ

56ܘܐܬܒܝܐܝܬ ܡܛܠ ܕܢܛܪܬ ܦܘܩ̈ܕܢܝܟ

57ܒܦܠܓܘܬܗ ܕܡܪܝܐ ܪܢܝܬ ܕܐܛܪ ܦܘܩ̈ܕܢܝܟ

58ܣܟܝܬ ܠܐ̈ܦܝܟ ܡܢ ܟܠܗ ܠܒܝ ܐܚܢܝ ܐܝܟ ܡܠܬܟ

59ܐܬܚܫܒܬ ܐܘܪ̈ܚܬܝ ܘܐܗܦܟܬ ܪ̈ܓܠܝ ܠܫܒܝ̈ܠܝܟ

60ܐܬܛܝܒܬ ܘܠܐ ܐܫܬܘܚܪܬ ܕܐܛܪ ܦܘܩ̈ܕܢܝܟ

61ܚܒ̈ܠܐ ܕܥܘ̈ܠܐ ܥܪܙܠܘܢܝ ܘܡܢ ܢܡܘܣܟ ܠܐ ܣܛܝܬ

62ܒܦܠܓܗ ܕܠܠܝܐ ܩܡܬ ܕܐܘܕܐ ܠܟ ܥܠ ܕܝܢܝ̈ܟ ܙܕܝܩܐ

63ܪܚܡܐ ܐܢܐ ܕܟܠܗܘܢ ܕܚ̈ܠܝܟ ܘܕܐܝܠܝܢ ܕܢܛܪܝܢ ܦܘܩ̈ܕܢܝܟ

64ܪ̈ܚܡܝܟ ܡܪܝܐ ܡܠܝܐ ܐܪܥܐ ܐܠܦܝܢܝ ܦܘܩ̈ܕܢܝܟ

65ܛܒܬܐ ܥܒܕ ܥܡ ܥܒܕܟ ܡܪܝܐ ܐܝܟ ܕܐܡܪܬ

66ܛܥܡܐ ܘܛܝܒܘܬܐ ܘܡܕܥܐ ܐܠܦܝܢܝ ܡܛܠ ܕܗܝܡܢܬ ܒܦܘܩ̈ܕܢܝܟ

67ܥܕܠܐ ܐܬܡܟܟܬ ܗܝܡܢܬ ܘܡܐܡܪܟ ܢܛܪܬ

68ܛܒ ܐܢܬ ܡܪܝܐ ܘܡܛܐܒ ܐܠܦܝܢܝ ܦܘܩ̈ܕܢܝܟ

69ܣܓܝ ܥܘܠܐ ܕܫܒܗܪ̈ܢܐ ܘܐܢܐ ܒܟܠܗ ܠܒܝ ܢܛܪܬ ܦܘܩ̈ܕܢܝܟ

70ܐܬܓܒܢ ܠܒܗܘܢ ܐܝܟ ܚܠܒܐ ܘܐܢܐ ܢܛܪܬ ܢܡܘܣܟ

71ܛܒ ܠܝ ܕܐܬܡܟܟܬ ܕܐܠܦ ܦܘܩ̈ܕܢܝܟ

72ܛܐܒ ܠܝ ܢܡܘܣܗ ܕܦܘܡܟ ܡܢ ܐ̈ܠܦܐ ܕܕܗܒܐ ܘܕܣܐܡܐ

73ܐ̈ܝܕܝܟ ܥܒܕܢܝ ܘܐܬܩܢܢܝ ܐܠܦܝܢܝ ܢܡܘܣܟ

74ܕܢܚܙܘܢ ܕܚ̈ܠܝܟ ܘܢܚܕܘܢ ܕܠܡܠܬܟ ܣܒܪܬ

75ܝܕܥܬ ܕܙܕܝܩ̈ܝܢ ܐܢܘܢ ܕܝܢ̈ܝܟ ܡܪܝܐ ܘܗܝܡܢܘܬܟ ܡܟܟܬܢܝ

76ܢܗܘܘܢ ܪ̈ܚܡܝܟ ܠܒܘܝܐܝ ܐܝܟ ܕܐܡܪܬ ܠܥܒܕܟ

77ܢܐܬܘܢ ܥܠܝ ܪ̈ܚܡܝܟ ܘܐܚܐ ܡܛܘܠ ܕܒܢܡܘܣܟ ܐܬܝܠܦܬ

78ܢܒܗܬܘܢ ܥܘ̈ܠܐ ܕܒܥܘܠܐ ܡܟܟܘܢܝ ܘܐܢܐ ܪܢܝܬ ܒܦܘܩ̈ܕܢܝܟ

79ܢܬܦܢܘܢ ܠܘܬܝ ܕܚ̈ܠܝܟ ܘܐܝܠܝܢ ܕܝܕܥܝܢ ܣܗܕܘܬܟ

80ܢܪܢܐ ܠܒܝ ܒܦܘܩ̈ܕܢܝܟ ܘܠܐ ܐܒܗܬ

81ܪܓܬ ܢܦܫܝ ܠܦܘܪܩܢܟ ܘܠܡܠܬܟ ܣܒܪܬ

82ܣܟܝ ܥܝܢ̈ܝ ܠܡܐܡܪܟ ܕܐܡܬܝ ܬܒܝܐܝܢܝ

83ܡܛܠ ܕܗܘܝܬ ܐܝܟ ܙܩܐ ܒܐܓܠܝܕܐ ܘܦܘܩ̈ܕܢܝܟ ܠܐ ܛܥܝܬ

84ܟܡܐ ܐܢܘܢ ܝܘܡ̈ܬܗ ܕܥܒܕܟ ܘܐܡܬܝ ܥܒܕ ܐܢܬ ܠܝ ܕܝܢܐ ܡܢ ܪ̈ܕܘܦܝ

85ܚܦܪܘ ܠܝ ܓܘܡܨܐ ܥܘ̈ܠܐ ܕܠܐ ܡܢ ܢܡܘܣܟ

86ܟܠܗܘܢ ܦܘܩ̈ܕܢܝܟ ܡܗܝܡܢܝܢ ܘܥܘ̈ܠܐ ܪܕܦܘܢܝ

87ܥܕ ܩܠܝܠ ܡܘܒܕܝܢ ܗܘܘ ܠܝ ܒܐܪܥܐ ܘܐܢܐ ܠܐ ܫܒܩܬ ܦܘܩ̈ܕܢܝܟ

88ܐܝܟ ܪ̈ܚܡܝܟ ܐܚܢܝ ܕܐܛܪ ܣܗܕܘܬܗ ܕܦܘܡܟ

89ܠܥܠܡ ܐܢܬ ܗܘ ܡܪܝܐ ܘܡܠܬܟ ܩܝܡܐ ܒܫܡܝܐ

90ܘܠܕܪܕܪܝܢ ܗܝܡܢܘܬܟ ܬܩܢܬ ܐܪܥܐ ܘܐܩܝܡܬܗ̇

92ܐܠܘ ܠܐ ܢܡܘܣܟ ܕܗܘܐ ܠܝ ܪܢܝܐ ܐܒܕ ܗܘܝܬ ܒܡܘܟܟܝ

93ܠܥܠܡ ܠܐ ܐܛܥܐ ܦܘܩ̈ܕܢܝܟ ܡܛܠ ܕܒܗܘܢ ܐܢܘܢ ܚ̈ܝܝ

94ܕܝܠܟ ܐܢܐ ܦܨܢܝ ܡܛܠ ܕܦܘܩ̈ܕܢܝܟ ܢܛܪܬ

95ܥܠܝ ܣܟܝܘ ܥܘ̈ܠܐ ܕܢܘܒܕܘܢܢܝ ܘܣܗܕܘܬܟ ܐܣܬܟܠܬ

96ܠܟܠ ܣܘܦܐ ܚܙܝܬ ܩܨܐ ܘܛܒ ܪܘܝܚ ܦܘܩܕܢܟ

97ܡܐ ܪܚܡܬ ܢܡܘܣܟ ܘܟܘܠܗ ܝܘܡܐ ܗܘܝܘ ܪܢܝܝ

98ܚܟܡܝܢܝ ܡܢ ܒ̈ܥܠܕܒܒܝ ܡܛܠ ܕܦܘܩ̈ܕܢܝܟ ܢܛܪܬ

99ܡܢ ܟܠܗܘܢ ܡ̈ܠܦܢܝ ܣܟܠܝܢܝ ܡܛܠ ܕܣܗܕܘܬܟ ܗܘܬ ܠܝ ܪܢܝܐ

100ܝܬܝܪ ܡܢ ܩܫܝ̈ܫܐ ܐܣܬܟܠܬ ܡܛܠ ܕܦܘܩ̈ܕܢܝܟ ܢܛܪܬ

101ܡܢ ܟܠܗ̇ ܐܘܪܚܐ ܒܝܫܬܐ ܟܠܝܬ ܪ̈ܓܠܝ ܕܐܛܪ ܦܘܩ̈ܕܢܝܟ

102ܡܢ ܕܝܢ̈ܝܟ ܠܐ ܣܛܝܬ ܡܛܠ ܕܐܢܬ ܐܠܦܬܢܝ

103ܚܠܝܢ ܡ̈ܠܝܟ ܠܫܡ̈ܝ ܚܟܝ ܛܒ ܡܢ ܕܒܫܐ ܠܦܘܡܐ

104ܒܦܘܩ̈ܕܢܝܟ ܪܢܝܬ ܡܛܠ ܗܢܐ ܣܢܝܬ ܟܘܠܗ̇ ܐܘܪܚܐ ܕܥܘ̈ܠܐ

105ܫܪܓܐ ܗܝ ܡܠܬܟ ܠܪ̈ܓܠܝ ܘܢܘܗܪܐ ܠܫܒܝ̈ܠܝ

106ܐܝܡܝܬ ܘܐܫܪܬ ܕܐܛܪ ܕܝܢ̈ܐ ܕܙܕܝܩܘܬܟ

107ܐܬܡܟܟܬ ܪܘܪܒܐܝܬ ܡܪܝܐ ܐܚܢܝ ܐܝܟ ܡܠܬܟ

108ܒܡ̈ܠܘܗܝ ܕܦܘܡܝ ܨܒܝ ܡܪܝܐ ܘܡܢ ܕܝܢ̈ܝܟ ܐܠܦܝܢܝ

109ܢܦܫܝ ܒܐ̈ܝܕܝܟ ܗܝ ܒܟܠܙܒܢ ܘܢܡܘܣܟ ܠܐ ܛܥܝܬ

110ܣܡܘ ܠܝ ܚ̈ܛܝܐ ܦܚ̈ܐ ܘܡܢ ܦܘܩ̈ܕܢܝܟ ܠܐ ܣܛܝܬ

111ܝܪܬܬ ܣܗܕܘܬܟ ܠܥܠܡ ܡܛܠ ܕܒܘܣܡܐ ܗܝ ܕܠܒܝ

112ܐܦܢܝܬ ܠܒܝ ܕܐܥܒܕ ܦܘܩ̈ܕܢܝܟ ܠܥܠܡ ܒܫܪܪܐ

113ܣܢܝܬ ܠܥܘ̈ܠܐ ܘܢܡܘܣܟ ܪܚܡܬ

114ܣܬܪܝ ܘܒܝܬ ܓܘܣܝ ܐܢܬ ܗܘ ܘܠܡܠܬܟ ܣܒܪܬ

115ܥܒܪܘ ܡܢܝ ܥܘ̈ܠܐ ܕܐܛܪ ܦܘܩ̈ܕܢܘܗܝ ܕܐܠܗܝ

116ܐܫܪܝܢܝ ܒܡܠܬܟ ܘܐܚܐ ܘܠܐ ܬܒܗܬܝܢܝ ܡܢ ܣܒܪܝ

117ܣܝܥܝܢܝ ܘܐܬܦܪܩ ܘܐܬܝܠܦ ܒܦܘܩ̈ܕܢܝܟ ܒܟܠܙܒܢ

118ܐܣܠܝܬ ܠܟܠ ܕܛܥܝܢ ܡܢܟ ܡܛܠ ܕܥܘܠܐ ܗܘ ܪܢܝܗܘܢ

119ܣܡܟܝܢܝ ܘܐܬܦܪܩ ܘܐܪܢܐ ܒܟܘܠ ܙܒܢ ܒܦܘܩ̈ܕܢܝܟ

120ܩܦܘܕ ܒܣܪܝ ܡܢ ܕܚܠܬܟ ܘܡܢ ܕܝܢ̈ܝܟ ܕܚܠܬ

121ܥܒܕ ܕܝܢܐ ܘܙܕܝܩܘܬܐ ܠܐ ܬܫܒܘܩܝܢܝ ܒܐܝܕܐ ܕܛܠܘ̈ܡܝ

122ܒܣܡܝܗܝ ܠܥܒܕܟ ܒܛܒܬ̈ܐ ܘܠܐ ܢܥܫܩܘܢܢܝ ܫܒܗܪ̈ܢܐ

123ܥܝܢ̈ܝ ܣܟܝ ܠܦܘܪܩܢܟ ܘܠܡܐܡܪܐ ܕܙܕܝܩܘܬܟ

124ܥܒܕ ܠܥܒܕܟ ܐܝܟ ܪ̈ܚܡܝܟ ܘܐܠܦܝܢܝ ܢܡܘܣܟ

125ܥܒܕܟ ܐܢܐ ܣܟܠܝܢܝ ܘܐܕܥ ܣܗܕܘܬܟ

126ܙܒܢܐ ܗܘ ܠܡܦܠܚܗ ܠܡܪܝܐ ܘܗܐ ܒܛܠܘ ܢܡܘܣܟ

127ܡܛܠ ܗܢܐ ܪܚܡܬ ܦܘܩ̈ܕܢܝܟ ܛܒ ܡܢ ܕܗܒܐ ܘܛܒ ܡܢ ܟܐ̈ܦܐ ܛܒ̈ܬܐ

128ܟܠܗܘܢ ܦܘܩ̈ܕܢܝܟ ܪܚܡܬ ܘܟܠܗ̇ ܐܘܪܚܐ ܕܥܘ̈ܠܐ ܣܢܝܬ

129ܪ̈ܘܪܒܢ ܐܢܝܢ ܣܗܕ̈ܘܬܟ ܡܛܠ ܗܢܐ ܢܛܪܬ ܐܢܝܢ ܢܦܫܝ

130ܦܬܚ ܡܠܬܟ ܘܐܢܗܪ ܘܣܟܠ ܠܫܒܪ̈ܐ

131ܦܘܡܝ ܦܬܚܬ ܘܣܩܬ ܪܘܚܐ ܘܣܟܝܬ ܠܦܘܪܩܢܟ

132ܐܬܦܢ ܥܠܝ ܘܪܚܡ ܥܠܝ ܡܛܘܠ ܕܪܚܡܬ ܫܡܟ

133ܐܬܩܢ ܗ̈ܠܟܬܝ ܒܫ̈ܒܝܠܝܟ ܘܠܐ ܢܫܬܠܛ ܒܝ ܥܘܠܐ

134ܦܪܘܩܝܢܝ ܡܢ ܛܠܘܡܝܗ ܕܒܪܢܫܐ ܕܐܛܪ ܦܘܩ̈ܕܢܝܟ

135ܐܢܗܪ ܐ̈ܦܝܟ ܥܠ ܥܒܕܟ ܘܐܠܦܝܢܝ ܢܡܘܣܟ

136ܬ̈ܦܐ ܕܡ̈ܝܐ ܐܬܘ ܡܢ ܥܝܢ̈ܝ ܥܠ ܕܠܐ ܢܛܪܘ ܢܡܘܣܟ

137ܙܕܝܩ ܐܢܬ ܡܪܝܐ ܘܛܒ ܬܪ̈ܝܨܝܢ ܕܝܢ̈ܝܟ

138ܦܩܕܬ ܣܗܕܘܬܟ ܒܙܕܝܩܘܬܐ ܘܒܗܝܡܢܘܬܐ

139ܫܢܩܢܝ ܚܣܡܐ ܒܟܠܙܒܢ ܡܛܠ ܕܛܥܘ ܡܠܬܟ ܒ̈ܥܠܕܒܒܝܟ

140ܓܒܝܐ ܗܝ ܡܠܬܟ ܛܒ ܘܥܒܕܟ ܪܚܡܗ̇

141ܙܥܘܪ ܐܢܐ ܘܫܝܛ ܘܦܘܩ̈ܕܢܝܟ ܠܐ ܛܥܝܬ

142ܙܕܝܩܘܬܟ ܩܝܡܐ ܠܥܠܡ ܘܢܡܘܣܟ ܒܫܪܪܐ

143ܐܘܠܨܢܐ ܘܥܩܬܐ ܡܛܝܘܢܝ ܘܒܦܘܩ̈ܕܢܝܟ ܪܢܝܬ

144ܙܕܝܩܐ ܗܝ ܣܗܕܘܬܟ ܠܥܠܡ ܣܟܠܝܢܝ ܘܐܚܐ

145ܩܪܝܬܟ ܡܢ ܟܠܗ ܠܒܝ ܡܪܝܐ ܥܢܝܢܝ ܘܐܛܪ ܦܘܩ̈ܕܢܝܟ

146ܩܪܝܬܟ ܦܪܘܩܝܢܝ ܘܐܛܪ ܣܗܕܘܬܟ

147ܩܕܡܬ ܒܨܦܪܐ ܘܓܥܝܬ ܘܣܟܝܬ ܠܡܠܬܟ

148ܩܕܡ ܥܝܢ̈ܝ ܠܡܛܪܬܐ ܕܐܪܢܐ ܒܡܠܬܟ

149ܫܡܥ ܩܠܝ ܡܪܝܐ ܐܝܟ ܪ̈ܚܡܝܟ ܘܒܕܝܢ̈ܝܟ ܐܚܢܝ

150ܩܪܒܘ ܪ̈ܕܘܦܝ ܕܥܘܠܐ ܘܡܢ ܢܡܘܣܟ ܐܬܪܚܩܘ

151ܩܪܝܒ ܐܢܬ ܡܪܝܐ ܘܟܠܗܘܢ ܦܘܩ̈ܕܢܝܟ ܒܩܘܫܬܐ

152ܡܢ ܩܕܝܡ ܝܕܥܬ ܣܗܕܘܬܟ ܡܛܠ ܕܡܢ ܥܠܡ ܬܩܢܬܗ̇

153ܚܙܝ ܡܘܟܟܝ ܘܦܨܢܝ ܡܛܠ ܕܢܡܘܣܟ ܠܐ ܛܥܝܬ

154ܕܘܢ ܕܝܢܝ ܘܦܨܢܝ ܘܒܡܠܬܟ ܐܚܢܝ

155ܪܚܝܩ ܗܘ ܦܘܪܩܢܐ ܡܢ ܥܘ̈ܠܐ ܡܛܠ ܕܠܐ ܒܥܘ ܦܘܩ̈ܕܢܝܟ

156ܣܓ̈ܝܐܝܢ ܐܢܘܢ ܪ̈ܚܡܝܟ ܡܪܝܐ ܘܒܕܝܢܝ̈ܟ ܐܚܢܝ

157ܣܓܝܘ ܪ̈ܕܘܦܝ ܘܒ̈ܥܠܕܒܒܝ ܘܡܢ ܣܗܕܘܬܟ ܠܐ ܣܛܝܬ

158ܚܙܝܬ ܠܥܘ̈ܠܐ ܘܝܕܥܬ ܕܡܐܡܪܟ ܠܐ ܢܛܪܘ

159ܚܙܝ ܕܪܚܡܬ ܦܘܩ̈ܕܢܝܟ ܡܪܝܐ ܒܛܝܒܘܬܟ ܐܚܢܝ

160ܪܝܫ ܡܠܬܟ ܩܘܫܬܐ ܘܠܥܠܡ ܟܠܗܘܢ ܕܝܢ̈ܐ ܕܙܕܝܩܘܬܟ

161ܪ̈ܘܪܒܢܐ ܪܕܦܘܢܝ ܣܪܝܩܐܝܬ ܘܡܢ ܡܠܬܟ ܕܚܠ ܠܒܝ

162ܚܕܝܬ ܒܡܐܡܪܟ ܐܝܟ ܗܘ ܕܐܫܟܚ ܒܙܬܐ ܣܓܝܐܬܐ

163ܥܘܠܐ ܣܢܝܬ ܘܐܣܠܝܬ ܘܢܡܘܣܟ ܪܚܡܬ

164ܫܒܥ ܒܝܘܡܐ ܫܒܚܬܟ ܥܠ ܕܝܢ̈ܝܟ ܙܕܝܩܐ

165ܣܓܝ ܗܘ ܫܠܡܐ ܕܐܝܠܝܢ ܕܪܚܡܝܢ ܢܡܘܣܟ ܘܠܝܬ ܠܗܘܢ ܟܪܝܗܘܬܐ

166ܣܒܪܬ ܠܦܘܪܩܢܟ ܡܪܝܐ ܘܦܘܩ̈ܕܢܝܟ ܥܒܕܬ

167ܢܛܪܬ ܢܦܫܝ ܣܗܕܘܬܟ ܘܪܚܡܬܗ̇ ܪܘܪܒܐܝܬ

168ܢܛܪܬ ܦܘܩ̈ܕܢܝܟ ܘܣܗ̈ܕܘܬܟ ܘܟܠܗܝܢ ܐܘܪ̈ܚܬܝ ܠܩܘܒܠܟ

169ܬܥܘܠ ܬܫܒܘܚܬܝ ܩܕܡܝܟ ܡܪܝܐ ܘܒܡܠܬܟ ܐܚܢܝ

170ܬܥܘܠ ܒܥܘܬܝ ܩܕܡܝܟ ܘܒܡܠܬܟ ܦܨܢܝ

171ܢܡ̈ܠܠܢ ܣܦܘ̈ܬܝ ܬܫܒ̈ܚܬܟ ܟܕ ܬܠܦܝܢܝ ܦܘܩ̈ܕܢܝܟ

172ܢܒܥ ܠܫܢܝ ܡܐܡܪܟ ܡܛܠ ܕܟܠܗܘܢ ܦܘܩ̈ܕܢܝܟ ܒܙܕܝܩܘܬܐ

173ܬܥܕܪܢܝ ܐܝܕܟ ܡܛܠ ܕܨܒܝܬ ܒܦܘܩ̈ܕܢܝܟ

174ܣܟܝܬ ܢܦܫܝ ܠܦܘܪܩܢܟ ܘܒܢܡܘܣܟ ܪܢܝܬ

175ܬܚܐ ܢܦܫܝ ܘܬܫܒܚܟ ܘܕܝܢܟ ܗܘ ܢܥܕܪܢܝ

176ܐܬܛܥܝܬ ܐܝܟ ܥܪܒܐ ܐܒܝܕܐ ܒܥܝܘܗܝ ܠܥܒܕܟ ܡܛܠ ܕܦܘܩ̈ܕܢܝܟ ܠܐ ܛܥܝܬ

Chapter 120 ܡܙܡܘܪ̈ܐ

1ܠܡܪܝܐ ܒܐܘܠܨܢܝ ܩܪܝܬ ܘܥܢܢܝ

2ܡܪܝܐ ܘܦܨܗ̇ ܠܢܦܫܝ ܡܢ ܣ̈ܦܘܬܐ ܕܥܘ̈ܠܐ ܘܡܢ ܠܫ̈ܢܐ ܢܟܘ̈ܠܬܢܐ

3ܡܢܐ ܢܬܠܘܢ ܠܟ ܘܡܢܐ ܢܘܣܦܘܢ ܠܟ ܠܫ̈ܢܐ ܢܟܘ̈ܠܬܢܐ

4ܓܐܪ̈ܘܗܝ ܕܓܒܪܐ ܫܢ̈ܝܢܝܢ. ܐܝܟ ܓܘܡܪ̈ܐ ܕܒܠܘܛܐ

5ܘܝ ܠܝ ܕܬܘܬܒܘܬܝ ܐܓܪܬ ܘܫܪܝܬ ܒܡܫܟܢܐ ܕܩܕܪ

6ܣܘܓܐܐ ܥܡܪܬ ܢܦܫܝ ܥܡ ܐܝܠܝܢ ܕܣܢܝܢ ܫܠܡܐ

7ܘܐܢܐ ܫܠܡܐ ܡܡܠܠ ܗܘܝܬ ܘܗܢܘܢ ܡܬܟܬܫܝܢ ܗܘܘ ܥܡܝ

Chapter 121 ܡܙܡܘܪ̈ܐ

1ܐܪܝܡ ܥܝܢ̈ܝ ܠܛܘܪܐ ܐܝܡܟܐ ܢܐܬܐ ܡܥܕܪܢܝ

2ܥܘܕܪܢܝ ܡܢ ܩܕܡ ܡܪܝܐ ܗܘ ܕܥܒܕ ܫܡܝܐ ܘܐܪܥܐ

3ܠܐ ܢܬܠ ܪܓܠܟ ܠܙܘܥܬܐ ܘܠܐ ܢܢܘܡ ܢܛܘܪܟ

4ܠܐ ܓܝܪ ܢܐܡ ܘܠܐ ܕܡܟ ܢܛܘܪܗ ܕܐܝܣܪܝܠ

5ܡܪܝܐ ܗܘ ܢܛܘܪܟ ܡܪܝܐ ܢܛܠ ܠܟ ܒܐܝܕܗ ܕܝܡܝܢܐ

6ܒܐܝܡܡܐ ܫܡܫܐ ܠܐ ܢܟܝܟ ܐܦ ܠܐ ܣܗܪܐ ܒܠܠܝܐ

7ܡܪܝܐ ܢܢܛܪܟ ܡܢ ܟܠܗܝܢ ܒܝܫܬ̈ܐ ܢܛܪ ܢܦܫܟ

8ܡܪܝܐ ܢܛܪ ܡܦܩܟ ܘܡܥܠܟ ܡܟܝܠ ܘܥܕܡܐ ܠܥܠܡ

Chapter 122 ܡܙܡܘܪ̈ܐ

1ܚܕܝܬ ܟܕ ܐܡܪܝܢ ܗܘܘ ܠܝ ܠܒܝܬܗ ܕܡܪܝܐ ܐܙܠܝܢܢ

2ܩܝ̈ܡܢ ܗ̈ܘܝ ܪ̈ܓܠܝ ܒܬܪ̈ܥܝܟܝ ܐܘܪܫܠܡ

3ܐܘܪܫܠܡ ܡܒܢܝܬܐ ܐܝܟ ܡܕܝܢܬܐ ܕܟܪܝܟ ܠܗ̇ ܫܘܪܐ

4ܠܬܡܢ ܣܠܩܘ ܫܪ̈ܒܬܐ ܫܪ̈ܒܬܗ ܕܡܪܝܐ ܣܗܕܘܬܐ ܠܐܝܣܪܝܠ ܠܡܘܕܝܘ ܠܫܡܗ ܕܡܪܝܐ

5ܡܛܠ ܕܬܡܢ ܐܪܡܝܘ ܟܘܪ̈ܣܘܬܐ ܠܕܝܢܐ ܟܘܪ̈ܣܘܬܐ ܕܒܝܬ ܕܘܝܕ

6ܫܐܠܘ ܒܫܠܡܗ̇ ܕܐܘܪܫܠܡ ܢܗܘܘܢ ܟܗܝܢܝܢ ܪ̈ܚܡܝܟܝ

7ܢܗܘܐ ܫܠܡܐ ܒܚܝܠܟܝ ܘܟܗܝܢܘܬܐ ܒܣܚܪ̈ܬܟܝ

8ܡܛܠ ܐܚ̈ܝ ܘܪ̈ܚܡܝ ܐܡܠܠ ܥܠܝܟܝ ܫܠܡܐ

9ܡܛܠ ܒܝܬܗ ܕܡܪܝܐ ܐܠܗܢ ܐܒܥܐ ܒܛܒ̈ܬܟܝ

Chapter 123 ܡܙܡܘܪ̈ܐ

1ܠܘܬܟ ܐܪܝܡܬ ܥܝܢ̈ܝ ܥܡܘܪܐ ܕܫܡܝܐ

2ܐܝܟ ܥܝܢ̈ܝ ܥܒ̈ܕܐ ܠܘܬ ܡܪ̈ܝܗܘܢ ܘܐܝܟ ܥ̈ܝܢܝܗ̇ ܕܐܡܬܐ ܠܘܬ ܡܪܬܗ̇ ܗܟܢ ܥܝܢ̈ܝܢ ܠܘܬܟ ܡܪܝܐ ܐܠܗܢ ܥܕܡܐ ܕܬܪܚܡ ܥܠܝܢ

3ܪܚܡ ܥܠܝܢ ܡܪܝܐ ܪܚܡ ܥܠܝܢ ܡܛܠ ܕܣܘܓܐܐ ܕܫܛܝܘܬܐ ܫܡܥܢܢ

4ܘܣܘܓܐܐ ܣܒܥܬ ܢܦܫܢ ܡܘܝܩܐ ܕܡܒܙܚ̈ܢܐ ܘܫܛܝܘܬܐ ܕܫܒܗܪ̈ܢܐ

Chapter 124 ܡܙܡܘܪ̈ܐ

1ܐܠܘ ܠܐ ܡܪܝܐ ܕܩܡ ܠܢ ܢܐܡܪ ܐܝܣܪܝܠ

2ܕܐܠܘ ܠܐ ܡܪܝܐ ܕܩܡ ܠܢ ܟܕ ܩܡܘ ܥܠܝܢ ܒܢܝܢܫ̈ܐ

3ܚܝܬ ܒܠܥܝܢ ܗܘܘ ܠܢ ܘܟܕ ܐܬܚܡܬ ܪܘܓܙܗܘܢ ܥܠܝܢ

4ܒܡ̈ܝܐ ܡܛܒܥܝܢ ܗܘܘ ܠܢ ܐܪܓܠܬܐ ܥܒܪܬ ܥܠ ܢܦܫܢ

5ܘܡ̈ܝܐ ܣ̈ܓܝܐܐ ܥܒܪܘ ܥܠ ܢܦܫܢ

6ܒܪܝܟ ܗܘ ܡܪܝܐ ܕܠܐ ܝܗܒܢ ܡܐܟܘܠܬܐ ܠܫܢܝ̈ܗܘܢ

7ܢܦܫܢ ܐܝܟ ܨܦܪܐ ܐܬܦܠܛܬ ܡܢ ܦܚܐ ܕܨܝܕܐ. ܦܚܐ ܐܬܬܒܪ ܘܚܢܢ ܐܬܦܨܝܢ

8ܘܥܘܕܪܢܢ ܒܫܡܗ ܕܡܪܝܐ. ܗܘ ܕܥܒܕ ܫܡܝܐ ܘܐܪܥܐ

Chapter 125 ܡܙܡܘܪ̈ܐ

1ܐܝܠܝܢ ܕܡܣܒܪܝܢ ܒܡܪܝܐ ܒܛܘܪܐ ܕܨܗܝܘܢ ܠܐ ܢܙܘܥܘܢ ܐܠܐ ܠܥܠܡ ܢܬܒܘܢ

2ܐܘܪܫܠܡ ܛܘܪ̈ܐ ܟܪܝܟܝܢ ܠܗ̇ ܘܡܪܝܐ ܟܪܝܟ ܠܥܡܗ ܡܟܝܠ ܘܥܕܡܐ ܠܥܠܡ

3ܡܛܠ ܕܠܐ ܢܬܬܢܝܚ ܫܒܛܐ ܕܥܘ̈ܠܐ ܒܡܢܬܐ ܕܙܕܝܩ̈ܐ ܘܠܐ ܢܘܫܛܘܢ ܙܕܝܩ̈ܐ ܐ̈ܝܕܝܗܘܢ ܒܥܘܠܐ

4ܐܛܐܒ ܡܪܝܐ ܠܛܒ̈ܐ ܠܐܝܠܝܢ ܕܬܪ̈ܝܨܝܢ ܒܠܒܗܘܢ

5ܘܐܝܠܝܢ ܕܡܥܩܡܝܢ ܫܒܝ̈ܠܝܗܘܢ ܢܕܒܪ ܐܢܘܢ ܡܪܝܐ ܥܡ ܥܒ̈ܕܝ ܥܘܠܐ ܫܠܡܐ ܠܐܝܣܪܝܠ

Chapter 126 ܡܙܡܘܪ̈ܐ

1ܟܕ ܡܦܢܐ ܡܪܝܐ ܫܒܝܬܐ ܕܨܗܝܘܢ ܗܘܝܢ ܐܝܟ ܗܢܘܢ ܕܚܕܝܢ

2ܗܝܕܝܢ ܢܬܡܠܐ ܦܘܡܢ ܓܘܚܟܐ ܘܠܫܢܢ ܬܫܒܘܚܬܐ ܗܝܕܝܢ ܢܐܡܪܘܢ ܒܝܬ ܥܡ̈ܡܐ ܕܐܣܓܝ ܡܪܝܐ ܠܡܥܒܕ ܥܡ ܗܠܝܢ

3ܐܣܓܝ ܡܪܝܐ ܠܡܥܒܕ ܠܢ ܘܗܘܝܢ ܒܚܕܘܬܐ

4ܐܗܦܟ ܡܪܝܐ ܫܒܝܬܢ ܐܝܟ ܦܨܝ̈ܕܐ ܕܒܬܝܡܢܐ

5ܐܝܠܝܢ ܕܙܪܥܝܢ ܒܕܡܥܬܐ ܒܚܕܘܬܐ ܢܚܨܕܘܢ

6ܡܗܠܟܘ ܡܗܠܟ ܘܒܟܐ ܐܝܢܐ ܕܫܩܝܠ ܙܪܥܐ ܡܐܬܐ ܐܬܐ ܒܚܕܘܬܐ ܐܝܢܐ ܕܫܩܝܠ ܟܦܐ

Chapter 127 ܡܙܡܘܪ̈ܐ

1ܐܢ ܡܪܝܐ ܠܐ ܒܢܐ ܒܝܬܐ ܣܪܝܩܐܝܬ ܠܐܝܢ ܒܢܝܘ̈ܗܝ ܘܐܢ ܡܪܝܐ ܠܐ ܢܛܪ ܩܪܝܬܐ ܣܪܝܩܐܝܬ ܫܗܪܝܢ ܢܛܘܪ̈ܝܗ̇

2ܣܪܝܩܝܢ ܐܢܘܢ ܐܝܠܝܢ ܕܡܩܕܡܝܢ ܠܡܩܡ ܘܡܘܚܪܝܢ ܠܡܬܒ ܐ̈ܟܠܝ ܠܚܡܐ ܒܟܐ̈ܒܐ ܗܟܢ ܢܬܠ ܠܚܒܝ̈ܒܘܗܝ ܫܢܬܐ

3ܝܪܬܘܬܗ ܓܝܪ ܕܡܪܝܐ ܒ̈ܢܝܐ ܐܢܘܢ ܐܓܪܐ ܕܦܐܪ̈ܐ ܕܒܡܪܒܥܐ

4ܐܝܟ ܓܐܪܐ ܒܐܝܕܗ ܕܚܝܠܬܢܐ ܗܟܢ ܐܢܘܢ ܒܢ̈ܝ ܥܠܝܡܘܬܐ

5ܛܘܒܘܗܝ ܠܓܒܪܐ ܕܢܡܠܐ ܩܛܪܩܗ ܡܢܗܘܢ ܘܠܐ ܢܒܗܬܘܢ ܟܕ ܡܡܠܠܝܢ ܥܡ ܒܥܠܕܒܒܐ ܒܬܪܥܐ

Chapter 128 ܡܙܡܘܪ̈ܐ

1ܛܘܒܘܗܝ ܠܟܠ ܕܕܚܠ ܡܢ ܡܪܝܐ ܘܡܗܠܟ ܒܫܒ̈ܝܠܘܗܝ

2ܥܡܠܐ ܕܐ̈ܝܕܝܟ ܟܕ ܬܐܟܘܠ ܒܪܢܫܐ ܛܘܒܝܟ ܘܛܒܬܐ ܠܢܦܫܟ

3ܐܢܬܬܟ ܐܝܟ ܓܦܬܐ ܫܒܝܚܬܐ ܒܫ̈ܦܘܠܝ ܒܝܬܟ ܒܢ̈ܝܟ ܐܝܟ ܢܨܒܬܐ ܕܙܝܬܐ ܟܪܝܟܝܢ ܠܦܬܘܪܟ

4ܗܟܢ ܢܬܒܪܟ ܓܒܪܐ ܕܕܚܠ ܡܢ ܡܪܝܐ

5ܢܒܪܟܟ ܡܪܝܐ ܡܢ ܨܗܝܘܢ ܘܬܚܙܐ ܒܛܒ̈ܬܗ̇ ܕܐܘܪܫܠܡ ܟܠ ܝܘܡ̈ܝ ܚܝܝ̈ܟ

6ܘܬܚܙܐ ܒܢ̈ܝܐ ܠܒܢܝ̈ܟ ܫܠܡܐ ܠܐܝܣܪܝܠ

Chapter 129 ܡܙܡܘܪ̈ܐ

1ܣܓܝܘ ܐ̈ܠܘܨܝ ܡܢ ܛܠܝܘܬܝ ܢܐܡܪ ܐܝܣܪܝܠ

2ܕܣܓܝܘ ܐ̈ܠܘܨܝ ܡܢ ܛܠܝܘܬܝ ܘܠܐ ܐܬܡܨܝܘ ܚܝܠܝ

3ܥܠ ܚܨܝ ܢܓܕܘ ܢ̈ܓܕܐ ܘܐܓܪܘ ܡܘܟܟܗܘܢ

4ܡܪܝܐ ܙܕܝܩ ܘܡܦܫܚ ܣܘܟܝ̈ܗܘܢ ܕܥܘ̈ܠܐ

5ܢܗܦܟܘܢ ܠܒܣܬܪܗܘܢ ܟܠܗܘܢ ܣܢ̈ܐܝܗ̇ ܕܨܗܝܘܢ

6ܢܗܘܘܢ ܐܝܟ ܥܡܝܪܐ ܕܐܓܪܐ ܕܡܐ ܕܢܫܒܬ ܒܗ ܪܘܚܐ ܫܠܦ ܘܝܒܫ

7ܘܠܐ ܡܠܐ ܡܢܗ ܟܦܗ ܚܨܘܕܐ ܐܦ ܠܐ ܩܦܠܗ ܡܩܒܪܢܐ

8ܘܠܐ ܐܡܪܘ ܐܝܠܝܢ ܕܥܒܪܝܢ ܕܒܘܪܟܬܗ ܕܡܪܝܐ ܥܠܝܟܘܢ ܒܪܟܢܟܘܢ ܒܫܡܗ ܕܡܪܝܐ

Chapter 130 ܡܙܡܘܪ̈ܐ

1ܡܢ ܥܘܡܩܐ ܩܪܝܬܟ ܡܪܝܐ

2ܘܫܡܥܬ ܒܩܠܝ ܢܗ̈ܘܝܢ ܐ̈ܕܢܝܟ ܨܝ̈ܬܢ ܠܩܠܐ ܕܟܘܫܦܝ

3ܐܢ ܚ̈ܛܗܐ ܢܛܪ ܐܢܬ ܡܪܝܐ ܡܢܘ ܡܫܟܚ ܠܡܩܡ

4ܡܛܠ ܕܡܢ ܠܘܬܟ ܗܘ ܫܘܒܩܢܐ

5ܣܒܪܬ ܒܡܪܝܐ ܘܣܟܝܬ ܢܦܫܝ ܠܡܠܬܗ ܣܟܝܬ

6ܠܡܪܝܐ ܡܢ ܡܛܪܬܐ ܕܨܦܪܐ ܘܥܕܡܐ ܠܡܛܪܬܐ ܕܨܦܪܐ

7ܢܣܟܐ ܐܝܣܪܝܠ ܠܡܪܝܐ ܡܛܠ ܕܡܢ ܠܘܬܗ ܐܢܘܢ ܪ̈ܚܡܐ ܘܣܓܝ ܠܘܬܗ ܦܘܪܩܢܐ

8ܗܘ ܢܦܪܩܝܘܗܝ ܠܐܝܣܪܝܠ ܡܢ ܟܠܗ ܥܘܠܗ

Chapter 131 ܡܙܡܘܪ̈ܐ

1ܡܪܝܐ ܠܐ ܐܬܬܪܝܡ ܠܒܝ ܘܠܐ ܐܬܬܪܝܡ ܥܝܢ̈ܝ ܘܠܐ ܗܠܟܬ ܒܕܪ̈ܘܪܒܢ ܡܢܝ

2ܐܠܐ ܡܟܟܬ ܢܦܫܝ ܐܝܟ ܚܣܝܠܐ ܥܠ ܐܡܗ ܘܐܝܟ ܚܣܝܠܐ ܗܘܬ ܥܠܝ ܢܦܫܝ

3ܢܣܟܐ ܐܝܣܪܝܠ ܠܡܪܝܐ ܡܟܝܠ ܘܥܕܡܐ ܠܥܠܡ

Chapter 132 ܡܙܡܘܪ̈ܐ

1ܐܬܕܟܪ ܡܪܝܐ ܠܕܘܝܕ ܘܠܟܠܗ ܡܘܟܟܗ

2ܕܝܡܐ ܠܡܪܝܐ ܘܢܕܪ ܠܐܠܗܗ ܕܝܥܩܘܒ

3ܕܠܐ ܐܥܘܠ ܠܡܛܠܠܗ ܕܒܝܬܝ ܘܠܐ ܐܣܩ ܠܬܫܘܝܬܗ̇ ܕܥܪܣܝ

4ܘܠܐ ܐܬܠ ܫܢܬܐ ܠܥܝܢ̈ܝ ܐܦ ܠܐ ܢܘܡܬܐ ܠܓܒܝܢ̈ܝ

5ܥܕܡܐ ܕܐܫܟܚ ܐܬܪܐ ܠܡܪܝܐ ܘܡܫܟܢܐ ܠܐܠܗܗ ܕܝܥܩܘܒ

6ܗܐ ܫܡܥܢܗ̇ ܒܐܦܪܬܐ ܘܐܫܟܚܢܗ̇ ܒܚ̈ܩܠܬܐ

7ܢܥܘܠ ܠܡܫܟܢܗ ܘܢܣܓܘܕ ܠܟܘܒܫܐ ܕܪ̈ܓܠܘܗܝ

8ܩܘܡ ܡܪܝܐ ܠܢܝܚܬܟ ܐܢܬ ܘܩܒܘܬܐ ܕܥܘܫܢܟ

9ܟܗ̈ܢܝܟ ܢܠܒܫܘܢ ܙܕܝܩܘܬܐ ܘܙܕܝܩ̈ܝܟ ܫܘܒܚܐ

10ܡܛܠ ܕܘܝܕ ܥܒܕܟ ܠܐ ܬܗܦܟ ܐ̈ܦܘܗܝ ܕܡܫܝܚܟ

11ܝܡܐ ܡܪܝܐ ܠܕܘܝܕ ܒܫܪܪܐ ܘܠܐ ܢܗܦܘܟ ܡܢܗ ܕܡܢ ܦܐܪ̈ܝ ܟܪܣܟ ܐܘܬܒ ܥܠ ܟܘܪܣܝܟ

12ܐܢ ܢܛܪܘܢ ܒ̈ܢܝܟ ܩܝܡܝ ܣܗܕܘܬܐ ܗܕܐ ܕܡܠܦ ܐܢܐ ܠܗܘܢ ܐܦ ܡܢ ܒܢܝ̈ܗܘܢ ܢܬܒܘܢ ܠܥܠܡ ܥܠܡܝܢ ܥܠ ܟܘܪܣܝܟ

13ܡܛܠ ܕܨܒܐ ܡܪܝܐ ܒܨܗܝܘܢ ܘܓܒܗ̇ ܠܗ ܠܒܝܬ ܡܥܡܪܐ

14ܗܕܐ ܗܝ ܢܝܚܬܝ ܠܥܠܡ ܥܠܡܝܢ ܗܪܟܐ ܐܬܒ ܡܛܠ ܕܪܓܬܗ̇

15ܘܠܨܝ̈ܕܝܗ̇ ܐܒܪܟ ܘܠܡܣ̈ܟܢܝܗ̇ ܐܣܒܥ ܠܚܡܐ

16ܠܟܘܡܪ̈ܝܗ̇ ܐܠܒܫ ܦܘܪܩܢܐ ܘܠܙܕܝ̈ܩܝܗ̇ ܫܘܒܚܐ

17ܬܡܢ ܐܕܢܚ ܩܪܢܐ ܠܕܘܝܕ ܘܐܢܗܪ ܫܪܓܐ ܠܡܫܝܚܗ

18ܘܠܒ̈ܥܠܕܒܒܘܗܝ ܐܠܒܫ ܒܗܬܬܐ ܘܥܠܘܗܝ ܢܥܦܐ ܩܘܕܫܝ

Chapter 133 ܡܙܡܘܪ̈ܐ

1ܡܐ ܛܒ ܘܡܐ ܫܦܝܪ ܠܐܚ̈ܐ ܡܐ ܕܥܡܪܝܢ ܐܝܟ ܚܕܐ

2ܐܝܟ ܡܫܚܐ ܕܢܚܬ ܥܠ ܪܝܫܐ ܘܥܠ ܕܩܢܐ ܕܩܢܗ ܕܐܗܪܘܢ ܕܢܚܬ ܥܠ ܒܪ ܨܘܪܐ ܕܟܘܬܝܢܗ

3ܐܝܟ ܛܠܐ ܕܚܪܡܘܢ ܕܢܚܬ ܥܠ ܛܘܪܐ ܕܨܗܝܘܢ ܡܛܠ ܕܬܡܢ ܦܩܕ ܡܪܝܐ ܒܘܪܟܬܐ ܘܚ̈ܝܐ ܥܕܡܐ ܠܥܠܡ

Chapter 134 ܡܙܡܘܪ̈ܐ

1ܒܪܟܘ ܠܡܪܝܐ ܟܠܟܘܢ ܥܒ̈ܕܘܗܝ ܕܡܪܝܐ ܐܝܠܝܢ ܕܩܝܡܝܢ ܒܒܝܬܗ ܕܡܪܝܐ ܒ̈ܠܝܠܘܬܐ

2ܐܪܝܡܘ ܐ̈ܝܕܝܟܘܢ ܠܩܘܕܫܐ ܘܒܪܟܘ ܠܡܪܝܐ

3ܢܒܪܟܟ ܡܪܝܐ ܡܢ ܨܗܝܘܢ ܗܘ ܕܥܒܕ ܫܡܝܐ ܘܐܪܥܐ

Chapter 135 ܡܙܡܘܪ̈ܐ

1ܫܒܚܘ ܠܫܡܗ ܕܡܪܝܐ ܫܒܚܘ ܥܒ̈ܕܘܗܝ ܕܡܪܝܐ

2ܐܝܠܝܢ ܕܩܝܡܝܢ ܒܒܝܬܗ ܕܡܪܝܐ ܘܒܕܪ̈ܐ ܕܒܝܬܗ ܕܐܠܗܢ

3ܫܒܚܘ ܠܡܪܝܐ ܡܛܠ ܕܛܒ ܗܘ ܙܡܪܘ ܠܫܡܗ ܡܛܠ ܕܒܣܝܡ ܗܘ

4ܡܛܠ ܕܠܝܥܩܘܒ ܓܒܐ ܠܗ ܡܪܝܐ ܘܐܝܣܪܝܠ ܠܟܢܫܗ

5ܡܛܠ ܕܐܢܐ ܝܕܥ ܐܢܐ ܕܪܒ ܗܘ ܡܪܝܐ ܡܪܢ ܡܢ ܟܠܗܘܢ ܐ̈ܠܗܐ

6ܘܟܠ ܕܨܒܐ ܡܪܝܐ ܥܒܕ ܒܫܡܝܐ ܘܒܐܪܥܐ ܘܒܝܡ̈ܡܐ ܘܒܟܠܗܘܢ ܬܗ̈ܘܡܐ

7ܡܣܩ ܥܢ̈ܢܐ ܡܢ ܣܘ̈ܦܝܗ̇ ܕܐܪܥܐ ܘܒܪ̈ܩܐ ܠܡܛܪܐ ܥܒܕ ܡܦܩ ܪ̈ܘܚܐ ܡܢ ܐܘܨܪ̈ܐ

8ܕܡܚܐ ܠܒܘܟܪ̈ܐ ܕܡܨܪܝܢ ܡܢ ܒܢ̈ܝ ܐܢܫܐ ܘܥܕܡܐ ܠܒܥܝܪܐ

9ܫܕܪ ܐ̈ܬܘܬܗ ܘܬܕܡܪ̈ܬܗ ܠܓܘܗ̇ ܕܡܨܪܝܢ ܥܠ ܦܪܥܘܢ ܘܥܠ ܟܠܗܘܢ ܥܒ̈ܕܘܗܝ

10ܕܡܚܐ ܠܥܡ̈ܡܐ ܣܓ̈ܝܐܐ ܘܩܛܠ ܡ̈ܠܟܐ ܥܫܝ̈ܢܐ

11ܠܣܝܚܘܢ ܡܠܟܐ ܕܐܡܘܪ̈ܝܐ ܘܠܥܘܓ ܡܠܟܐ ܕܒܝܫܢ ܘܠܟܠܗܝܢ ܡ̈ܠܟܘܬܐ ܕܟܢܥܢ

12ܝܗܒ ܐܪܥܗܘܢ ܝܪܬܘܬܐ ܠܐܝܣܪܝܠ ܥܡܗ

13ܡܪܝܐ ܫܡܟ ܠܥܠܡ ܡܪܝܐ ܕܘܟܪܢܟ ܠܕܪܕܪܝܢ

14ܡܛܠ ܕܕܐܢ ܡܪܝܐ ܠܥܡܗ ܘܒܥܒ̈ܕܘܗܝ ܡܬܒܝܐܐ

15ܦܬܟܪ̈ܐ ܕܥܡ̈ܡܐ ܣܐܡܐ ܘܕܗܒܐ ܥܒܕ ܐ̈ܝܕܝܐ ܕܒܪܢܫܐ

16ܦܘܡܐ ܐܝܬ ܠܗܘܢ ܘܠܐ ܡܡܠܠܝܢ ܥܝ̈ܢܐ ܐܝܬ ܠܗܘܢ ܘܠܐ ܚܙܝܢ

17ܐ̈ܕܢܐ ܐܝܬ ܠܗܘܢ ܘܠܐ ܫܡܥܝܢ ܘܠܝܬ ܪܘܚܐ ܒܦܘܡܗܘܢ

18ܐܟܘܬܗܘܢ ܢܗܘܘܢ ܥܒ̈ܘܕܝܗܘܢ ܘܟܘܠ ܕܬܟܝܠܝܢ ܥܠܝܗܘܢ

19ܕܒܝܬ ܐܝܣܪܝܠ ܒܪܟܘ ܠܡܪܝܐ ܕܒܝܬ ܐܗܪܘܢ ܒܪܟܘ ܠܡܪܝܐ

20ܕܒܝܬ ܠܘܝ ܒܪܟܘ ܠܡܪܝܐ ܕܚ̈ܠܘܗܝ ܕܡܪܝܐ ܒܪܟܘ ܠܡܪܝܐ

21ܒܪܝܟ ܗܘ ܡܪܝܐ ܡܢ ܨܗܝܘܢ. ܗܘ ܕܥܡܪ ܒܐܘܪܫܠܡ

Chapter 136 ܡܙܡܘܪ̈ܐ

1ܐܘܕܘ ܠܡܪܝܐ ܕܛܒ ܗܘ ܘܠܥܠܡ ܪ̈ܚܡܘܗܝ

2ܐܘܕܘ ܠܐܠܗ ܐ̈ܠܗܝܢ ܕܠܥܠܡ ܪ̈ܚܡܘܗܝ

3ܐܘܕܘ ܠܡܪܐ ܡܪ̈ܘܬܐ ܕܠܥܠܡ ܪ̈ܚܡܘܗܝ

4ܠܕܥܒܕ ܬܕܡܪ̈ܬܐ ܪ̈ܘܪܒܬܐ ܒܠܚܘܕܘܗܝ ܕܠܥܠܡ ܪ̈ܚܡܘܗܝ

5ܠܕܥܒܕ ܫܡܝܐ ܒܚܟܡܬܗ ܕܠܥܠܡ ܪ̈ܚܡܘܗܝ

6ܠܕܪܩܥ ܐܪܥܐ ܥܠ ܡ̈ܝܐ ܕܠܥܠܡ ܪ̈ܚܡܘܗܝ

7ܠܕܥܒܕ ܢܗܝܪ̈ܐ ܪ̈ܘܪܒܐ ܕܠܥܠܡ ܪ̈ܚܡܘܗܝ

8ܫܡܫܐ ܠܫܘܠܛܢܐ ܕܐܝܡܡܐ ܕܠܥܠܡ ܪ̈ܚܡܘܗܝ

9ܣܗܪܐ ܘܟ̈ܘܟܒܐ ܠܫܘܠܛܢܐ ܕܠܠܝܐ ܕܠܥܠܡ ܪ̈ܚܡܘܗܝ

10ܠܕܡܚܐ ܠܒܘܟܪ̈ܐ ܕܡܨܪܝܢ ܕܠܥܠܡ ܪ̈ܚܡܘܗܝ

11ܘܐܦܩ ܠܐܝܣܪܝܠ ܡܢ ܒܝܢܬܗܘܢ ܕܠܥܠܡ ܪ̈ܚܡܘܗܝ

12ܒܐܝܕܐ ܥܫܝܢܬܐ ܘܒܕܪܥܐ ܪܡܐ ܕܠܥܠܡ ܪ̈ܚܡܘܗܝ

13ܠܕܦܠܓ ܝܡܐ ܕܣܘܦ ܕܠܥܠܡ ܪ̈ܚܡܘܗܝ

14ܘܐܥܒܪ ܠܐܝܣܪܝܠ ܒܓܘܗ ܕܠܥܠܡ ܪ̈ܚܡܘܗܝ

15ܘܛܪܦ ܠܦܪܥܘܢ ܘܠܚܝܠܗ ܒܝܡܐ ܕܣܘܦ ܕܠܥܠܡ ܪ̈ܚܡܘܗܝ

16ܠܕܕܒܪ ܥܡܗ ܒܡܕܒܪܐ ܕܠܥܠܡ ܪ̈ܚܡܘܗܝ

17ܠܕܡܚܐ ܠܡ̈ܠܟܐ ܪ̈ܘܪܒܐ ܕܠܥܠܡ ܪ̈ܚܡܘܗܝ

18ܘܩܛܠ ܡ̈ܠܟܐ ܥܫܝ̈ܢܐ ܕܠܥܠܡ ܪ̈ܚܡܘܗܝ

19ܠܣܝܚܘܢ ܡܠܟܐ ܕܐܡܘܪ̈ܝܐ ܕܠܥܠܡ ܪ̈ܚܡܘܗܝ

20ܘܠܥܘܓ ܡܠܟܐ ܕܒܝܫܢ ܕܠܥܠܡ ܪ̈ܚܡܘܗܝ

21ܘܝܗܒ ܐܪܥܗܘܢ ܝܘܪܬܢܐ ܕܠܥܠܡ ܪ̈ܚܡܘܗܝ

22ܝܪܬܘܬܐ ܠܐܝܣܪܝܠ ܥܒܕܗ ܕܠܥܠܡ ܪ̈ܚܡܘܗܝ

23ܠܕܐܬܕܟܪܢ ܒܡܘܟܟܢ ܕܠܥܠܡ ܪ̈ܚܡܘܗܝ

24ܘܦܪܩܢ ܡܢ ܒ̈ܥܠܕܒܒܝܢ ܕܠܥܠܡ ܪ̈ܚܡܘܗܝ

25ܠܕܝܗܒ ܡܐܟܘܠܬܐ ܠܟܘܠܒܣܪ ܕܠܥܠܡ ܪ̈ܚܡܘܗܝ

26ܐܘܕܘ ܠܐܠܗܐ ܕܒܫܡܝܐ ܕܠܥܠܡ ܪ̈ܚܡܘܗܝ

Chapter 137 ܡܙܡܘܪ̈ܐ

1ܥܠ ܢܗܪ̈ܘܬܐ ܕܒܒܠ ܬܡܢ ܝܬܒܢ ܘܒܟܝܢ ܟܕ ܐܬܕܟܪܢܗ̇ ܠܨܗܝܘܢ

2ܥܠ ܥܪ̈ܒܐ ܕܒܓܘܗ̇ ܬܠܝܢ ܟܢܪ̈ܝܢ

3ܡܛܠ ܕܬܡܢ ܫܐܠܘܢ ܫ̈ܒܝܢ ܡ̈ܠܐ ܕܬܫ̈ܒܚܬܐ ܘܕܒܘܪ̈ܝܢ ܐܡܪܘ ܠܢ ܫܒܚܘ ܠܢ ܡܢ ܬܫܒܚ̈ܬܗ̇ ܕܨܗܝܘܢ

4ܐܝܟܢ ܢܫܒܚ ܠܟܘܢ ܬܫ̈ܒܚܬܗ ܕܡܪܝܐ ܒܐܪܥܐ ܢܘܟܪܝܬܐ

5ܐܢ ܐܛܥܝܟܝ ܐܘܪܫܠܡ ܬܛܥܝܢܝ ܝܡܝܢܝ

6ܘܢܕܒܩ ܠܫܢܝ ܠܫܡ̈ܝ ܚܟܝ ܐܠܐ ܐܬܕܟܪܟܝ ܐܠܐ ܐܣܩܝܗ̇ ܠܐܘܪܫܠܡ ܒܪܝܫ ܚ̈ܕܘܬܝ

7ܐܬܕܟܪ ܡܪܝܐ ܠܒܢ̈ܝ ܐܕܘܡ ܒܝܘܡܗ̇ ܕܐܘܪܫܠܡ ܕܐܡܪܝܢ ܓܠܘ ܓܠܘ ܥܕܡܐ ܠܫܬܐ̈ܣܝܗ̇

8ܒܪܬ ܒܒܠ ܒܙܘܙܬܐ ܛܘܒܘܗܝ ܠܡܢ ܕܢܦܪܥܟܝ ܦܘܪܥܢܐ ܕܦܪܥܬܝܘܗܝ

9ܛܘܒܘܗܝ ܠܡܢ ܕܢܐܚܘܕ ܝ̈ܠܘܕܝܟܝ ܘܢܫܩܦ ܠܟܐܦܐ

Chapter 138 ܡܙܡܘܪ̈ܐ

1ܐܘܕܐ ܠܟ ܡܪܝܐ ܡܢ ܟܠܗ ܠܒܝ ܘܩܕܡ ܡ̈ܠܟܐ ܐܙܡܪ ܠܟ

2ܐܣܓܘܕ ܒܗܝܟܠܐ ܕܩܘܕܫܟ ܘܐܘܕܐ ܠܫܡܟ ܥܠ ܛܝܒܘܬܟ ܘܥܠ ܩܘܫܬܟ ܡܛܠ ܕܐܘܪܒܬ ܥܠ ܟܠ ܫܡ ܡܐܡܪܟ

3ܒܝܘܡܐ ܕܩܪܝܬܟ ܥܢܝܬܢܝ ܘܐܣܓܝܬ ܥܘܫܢܗ̇ ܕܢܦܫܝ

4ܢܘܕܘܢ ܠܟ ܡܪܝܐ ܟܠܗܘܢ ܡ̈ܠܟܐ ܕܐܪܥܐ ܡܛܠ ܕܫܡܥܘ ܡܐܡܪܗ ܕܦܘܡܟ

5ܘܢܫܒܚܘܢ ܐܘܪ̈ܚܬܗ ܕܡܪܝܐ ܡܛܠ ܕܪܒ ܗܘ ܐܝܩܪܗ ܕܡܪܝܐ

6ܘܪܡ ܗܘ ܡܪܝܐ ܕܒܥܘܡܩܐ ܚܙܐ ܘܐܝܢܐ ܕܡܬܬܪܝܡ ܡܢ ܪܘܚܩܐ ܝܕܥ

7ܐܢ ܐܗܠܟ ܒܐܘܠܨܢܐ ܬܐܚܝܢܝ ܒܪܘܓܙܐ ܕܒ̈ܥܠܕܒܒܝ ܬܘܫܛ ܐܝܕܟ ܘܬܦܪܩܢܝ ܝܡܝܢܟ

8ܡܪܝܐ ܐܓܢ ܥܠܝ ܡܪܝܐ ܪ̈ܚܡܝܟ ܠܥܠܡ ܘܥܒܕ ܐ̈ܝܕܝܟ ܠܐ ܬܪܦܐ

Chapter 139 ܡܙܡܘܪ̈ܐ

1ܡܪܝܐ ܒܨܝܬܢܝ ܘܝܕܥܬܢܝ

2ܐܢܬ ܝܕܥ ܐܢܬ ܡܘܬܒܝ ܘܡܩܡܝ ܐܣܬܟܠܬ ܡܚ̈ܫܒܬܝ ܡܢ ܪܘܡܐ

3ܐܘܪܚܝ ܘܫܒܝ̈ܠܝ ܝܕܥ ܐܢܬ ܘܟܘܠܗܝܢ ܐܘܪ̈ܚܬܝ ܥܩܒܬ

4ܐܢ ܐܝܬ ܫܘܚܠܦܐ ܒܠܫܢܝ ܐܢܬ ܡܪܝܐ ܝܕܥ ܐܢܬ ܟܠܗܝܢ

5ܕܡܢ ܩܕܝܡ ܘܠܚܪܬܐ ܓܒܠܬܢܝ ܘܣܡܬ ܥܠܝ ܐܝܕܟ

6ܡܢܝ ܗܘܬ ܝܕܥܬܐ ܘܬܕܡܘܪܬܐ ܐܬܚܝܠܬ ܘܠܐ ܡܨܐ ܐܢܐ ܚܝܠܐ

7ܠܐܝܟܐ ܐܙܠ ܡܢ ܪܘܚܟ ܘܐܝܟܐ ܐܛܫܐ ܡܢ ܩܕܡܝܟ

8ܐܢ ܐܣܩ ܠܫܡܝܐ ܬܡܢ ܐܢܬ ܘܐܢ ܐܚܘܬ ܠܫܝܘܠ ܐܦ ܬܡܢ ܐܝܬܝܟ

9ܘܐܢ ܐܪܝܡ ܟܢ̈ܦܝ ܐܝܟ ܕܢܝܫܪܐ ܘܐܫܪܐ ܒܚܪܬܗ ܕܝܡܐ

10ܐܦ ܬܡܢ ܐܝܕܟ ܬܐܚܕܢܝ ܘܬܕܒܪܢܝ ܝܡܝܢܟ

11ܐܡܪܬ ܕܚܫܘܟܐ ܢܢܗܪ ܠܝ ܘܠܠܝܐ ܢܢܗܪ ܒܐ̈ܦܝ

12ܘܚܫܘܟܐ ܠܐ ܢܚܫܟ ܡܢܟ ܘܠܠܝܐ ܐܝܟ ܐܝܡܡܐ ܢܢܗܪ ܘܚܫܘܟܐ ܐܝܟ ܢܗܝܪܐ

13ܡܛܠ ܕܐܢܬ ܬܩܢܬ ܟܘ̈ܠܝܬܝ ܘܩܒܠܬܢܝ ܡܢ ܟܪܣܗ̇ ܕܐܡܝ

14ܐܘܕܐ ܠܟ ܡܛܠ ܬܕܡܘܪܬܐ ܕܥܒܕܬ ܡܪܡܪܡܝܢ ܐܢܘܢ ܓܝܪ ܥܒ̈ܕܝܟ ܘܢܦܫܝ ܛܒ ܝܕܥܐ

15ܘܠܐ ܟܣܝܢ ܓܪ̈ܡܝ ܡܢܟ ܕܥܒܕܬ ܒܣܬܪܐ ܢܚܬܬ ܠܬܚ̈ܬܝܬܗ̇ ܕܐܪܥܐ

16ܘܦܘܪܥܢܝ ܚ̈ܙܝ ܥܝܢ̈ܝ ܥܠ ܟܬܒ̈ܝܟ ܟܠܗܝܢ ܢܬܟܬ̈ܒܢ ܗܐ ܝܘܡ̈ܬܐ ܐܬܟܪܝܘ ܘܠܝܬ ܒܗܘܢ ܐܢܫ

17ܠܝ ܕܝܢ ܛܒ ܝܩܪܘ ܪ̈ܚܡܝܟ ܐܠܗܐ ܘܛܒ ܥܫܢܘ ܫ̈ܠܝܛܢܝܗܘܢ

18ܐܡܢܐ ܐܢܘܢ ܘܝܬܝܪ ܡܢ ܚܠܐ ܢܣܓܘܢ ܐܬܬܥܝܪܬ ܘܬܘܒ ܥܡܟ ܐܢܐ

19ܐܢ ܬܩܛܘܠ ܐܠܗܐ ܠܚ̈ܛܝܐ ܘܓܒܪ̈ܐ ܕܕܡܐ ܢܥܒܪܘܢ ܡܢܝ

20ܡܛܠ ܕܡܠܠܘܟ ܘܢܣܒܘ ܒܣܪܝܩܘܬܐ ܡܕܝܢܬܟ

21ܠܣܢܐ̈ܝܟ ܡܪܝܐ ܣܢܝܬ ܘܥܠ ܐܝܠܝܢ ܕܩܝܡܝܢ ܠܩܘܒܠܟ ܐܬܚܡܬܬ

22ܣܢܐܬܐ ܡܫܡܠܝܬܐ ܣܢܝܬ ܐܢܘܢ ܘܗܘܘ ܠܝ ܒ̈ܥܠܕܒܒܐ

23ܒܨܝܢܝ ܐܠܗܐ ܘܕܥ ܠܒܝ ܘܒܚܘܪܝܢܝ ܘܕܥ ܗ̈ܠܟܬܝ

24ܘܚܙܝ ܐܢ ܐܝܬ ܒܝ ܐܘܪܚܐ ܕܫܘܩܪܐ ܕܒܪܝܢܝ ܒܐܘܪܚܟ ܕܠܥܠܡ

Chapter 140 ܡܙܡܘܪ̈ܐ

2ܦܨܢܝ ܡܪܝܐ ܡܢ ܒܪ ܐܢܫܐ ܒܝܫܐ ܘܡܢ ܓܒܪ̈ܐ ܥܘ̈ܠܐ ܢܛܪܝܢܝ

3ܕܐܬܚܫܒܘ ܒܝܫܬܐ ܒܠܒܗܘܢ ܘܟܠܗ ܝܘܡܐ ܓܪܓܘ ܗܪܬܐ

4ܕܠܛܫܘ ܠܫܢܗܘܢ ܐܝܟ ܕܚܘܝܐ ܘܚܡܬܐ ܕܐܣܦܣ ܬܚܝܬ ܠܫܢܗܘܢ

5ܢܛܪܝܢܝ ܡܪܝܐ ܡܢ ܐܝܕܐ ܕܥܘ̈ܠܐ ܘܡܢ ܓܒܪ̈ܐ ܚ̈ܛܘܦܐ ܢܛܪܝܢܝ ܕܐܬܚܫܒܘ ܠܡܕܚܐ ܗ̈ܠܟܬܝ

6ܘܛܡܪܘ ܠܝ ܫܒܗܪ̈ܢܐ ܦܚ̈ܐ ܘܚ̈ܒܠܐ ܕܡܨܝ̈ܕܬܗܘܢ ܦܪܣܘ ܥܠ ܫܒ̈ܝܠܝ ܘܡܨܝܕܬܐ ܫܕܘ ܥܠܝ

7ܐܡܪܬ ܠܡܪܝܐ ܕܐܠܗܝ ܐܢܬ ܨܘܬ ܠܩܠܐ ܕܒܥܘܬܝ

8ܡܪܝܐ ܦܪܘܩܝ ܥܫܝܢܐ ܡܛܠܠܗ ܕܪܝܫܝ ܒܝܘܡܐ ܕܩܪܒܐ

9ܠܐ ܬܬܠ ܡܪܝܐ ܪܓܬܗ ܠܥܘܠܐ ܘܬܪܥܝܬܗ ܠܐ ܬܣܩ

10ܠܪܝܫܝ ܢܟܣܐ ܐܢܘܢ ܥܘܠܐ ܕܣ̈ܦܘܬܗܘܢ

11ܘܢܚ̈ܬܢ ܥܠܝܗܘܢ ܓܘܡܪ̈ܐ ܘܢܦܠܘܢ ܒܢܘܪܐ ܘܠܐ ܢܫܟܚܘܢ ܠܡܩܡ

12ܒܪܢܫܐ ܠܫܢܢܐ ܠܐ ܢܬܩܝܡ ܒܐܪܥܐ ܓܒܪܐ ܥܘܠܐ ܒܝܫܬܐ ܬܨܘܕܝܘܗܝ ܠܐܒܕܢܐ

13ܝܕܥܬ ܕܥܒܕ ܡܪܝܐ ܕܝܢܐ ܕܡܣ̈ܟܢܐ ܘܕܝܢܐ ܕܒܝܫ̈ܐ

14ܒܪܡ ܙܕܝܩ̈ܐ ܢܘܕܘܢ ܠܫܡܟ ܘܢܬܒܘܢ ܬܪ̈ܝܨܐ ܩܕܡ ܐ̈ܦܝܟ

Chapter 141 ܡܙܡܘܪ̈ܐ

1ܡܪܝܐ ܩܪܝܬܟ ܐܢܬ ܥܢܝܢܝ ܨܘܬ ܡ̈ܠܝ ܘܩܒܠ

2ܨܠܘܬܝ ܐܝܟ ܥܛܪܐ ܩܕܡܝܟ ܩܘܪܒܢܐ ܕܐܝ̈ܕܝ ܐܝܟ ܩܘܪܒܢܐ ܕܪܡܫܐ

3ܐܩܝܡ ܡܪܝܐ ܢܛܘܪܐ ܠܦܘܡܝ ܘܢܛܘܪܐ ܠܣ̈ܦܘܬܝ

4ܕܠܐ ܢܣܛܐ ܠܒܝ ܠܡܠܬܐ ܒܝܫܬܐ ܘܐܥܒܕ ܥܒ̈ܕܐ ܕܥܘܠܐ ܥܡ ܓܒܪ̈ܐ ܪ̈ܫܝܥܐ ܠܐ ܐܬܡܠܚ ܥܡܗܘܢ

5ܢܠܦܢܝ ܙܕܝܩܐ ܘܢܟܣܢܝ ܡܫܚܐ ܕܪ̈ܫܝܥܐ ܠܪܝܫܝ ܠܐ ܢܕܗܢ ܡܛܠ ܕܨܠܘܬܝ ܥܠ ܒܝܫܘܬܗܘܢ

6ܘܐܬܟܠܝܘ ܒܐܝܕܐ ܕܟܐܦܐ ܕܝܢ̈ܝܗܘܢ ܘܫܡܥ ܡ̈ܠܝ ܕܒܣ̈ܝܡܢ

7ܐܝܟ ܣܟܬܐ ܕܨܪܝܐ ܐܪܥܐ ܐܬܒܕܪܘ ܓܪ̈ܡܝܗܘܢ ܥܠ ܦܘܡܗ̇ ܕܫܝܘܠ

8ܘܐܢܐ ܠܘܬܟ ܡܪܝܐ ܐܪܝܡܬ ܥܝܢ̈ܝ ܘܥܠܝܟ ܐܬܬܟܠܬ ܠܐ ܬܫܕܝܗ̇ ܠܢܦܫܝ

9ܢܛܪܝܢܝ ܡܢ ܐܝܕܐ ܕܫܒܗܪ̈ܢܐ ܕܛܡܪܘ ܠܝ ܦܚ̈ܐ

10ܢܦܠܘܢ ܥܘ̈ܠܐ ܐܟܚܕܐ ܒܡܨܝ̈ܕܬܗܘܢ ܥܕܡܐ ܕܐܥܒܪ ܐܢܐ

Chapter 142 ܡܙܡܘܪ̈ܐ

2ܒܩܠܝ ܠܡܪܝܐ ܩܪܝܬ ܒܩܠܝ ܠܡܪܝܐ ܐܬܟܫܦܬ

3ܘܐܪܡܝܬ ܩܕܡܘܗܝ ܬܟܫܦܬܝ ܘܐܘܠܨܢܝ ܩܕܡܘܗܝ ܚܘܝܬ

4ܟܕ ܐܬܛܪܦܬ ܪܘܚܝ ܐܢܬ ܝܕܥ ܐܢܬ ܫܒܝ̈ܠܝ ܒܐܘܪܚܐ ܕܗ̈ܠܟܬܝ ܛܡܪܘ ܠܝ ܦܚ̈ܐ

5ܚܪܬ ܠܝܡܝܢܐ ܘܚܙܝܬ ܘܠܝܬ ܕܚܟܡ ܠܝ ܐܒܕ ܡܢܝ ܒܝܬ ܡܥܪܩܐ ܘܠܝܬ ܬܒܘܥܐ ܠܢܦܫܝ

6ܘܓܥܝܬ ܠܘܬܟ ܡܪܝܐ ܘܐܡܪܬ ܕܐܢܬ ܗܘ ܣܒܪܝ ܘܡܢܬܝ ܒܐܪܥܐ ܕܚ̈ܝܐ

7ܨܘܬ ܠܒܥܘܬܝ ܡܛܠ ܕܐܬܡܟܟܬ ܛܒ ܦܨܢܝ ܡܢ ܪ̈ܕܘܦܝ ܡܛܠ ܕܥܫܢܘ ܡܢܝ

8ܐܦܩ ܢܦܫܝ ܡܢ ܒܝܬ ܚܒܘܫܝܐ ܕܐܘܕܐ ܠܫܡܟ ܠܝ ܢܣܟܘܢ ܙܕܝܩ̈ܝܟ ܟܕ ܬܦܪܥܢܝ

Chapter 143 ܡܙܡܘܪ̈ܐ

1ܫܡܥ ܡܪܝܐ ܨܠܘܬܝ ܘܨܘܬ ܠܒܥܘܬܝ ܒܡܐܡܪܟ ܥܢܝܢܝ ܘܒܙܕܝܩܘܬܟ

2ܠܐ ܬܥܠܝܘܗܝ ܠܥܒܕܟ ܒܕܝܢܐ ܡܛܠ ܕܠܐ ܙܟܐ ܩܕܡܝܟ ܟܠ ܕܚܝ

3ܡܛܠ ܕܪܕܦ ܒܥܠܕܒܒܐ ܠܢܦܫܝ ܘܡܟܟ ܚܝ̈ܝ ܒܐܪܥܐ ܐܘܬܒܢܝ ܒܚܫܘܟܐ ܐܝܟ ܡܝܬܐ ܠܥܠܡ

4ܐܬܛܪܦܬ ܥܠܝ ܪܘܚܝ ܘܙܥ ܠܒܝ ܒܓܘܝ

5ܘܐܬܕܟܪܬܟ ܡܪܝܐ ܡܢ ܩܕܝܡ ܘܪܢܝܬ ܒܟܠܗܘܢ ܥܒ̈ܕܝܟ ܘܪܢܝܬ ܒܥܒܕ ܐ̈ܝܕܝܟ

6ܘܦܫܛܬ ܐ̈ܝܕܝ ܠܘܬܟ ܢܦܫܝ ܨܗܝܐ ܗܝ ܠܟ ܐܝܟ ܐܪܥܐ

7ܥܢܝܢܝ ܒܥܓܠ ܡܪܝܐ ܡܛܠ ܕܓܡܪܬ ܪܘܚܝ ܠܐ ܬܗܦܟ ܐ̈ܦܝܟ ܡܢܝ ܕܠܐ ܐܫܬܠܡ ܥܡ ܢܚ̈ܬܝ ܓܘܒܐ

8ܐܫܡܥܝܢܝ ܒܨܦܪܐ ܛܝܒܘܬܟ ܡܛܠ ܕܥܠܝܟ ܗܘ ܬܟܝܠ ܐܢܐ ܚܘܢܝ ܐܘܪܚܟ ܕܐܙܠ ܒܗ̇ ܡܛܠ ܕܠܘܬܟ ܡܪܝܐ ܐܪܝܡܬ ܢܦܫܝ

9ܦܨܢܝ ܡܢ ܒ̈ܥܠܕܒܒܝ

10ܘܐܠܦܝܢܝ ܠܡܥܒܕ ܨܒܝܢܟ ܡܛܠ ܕܐܢܬ ܗܘ ܐܠܗܝ ܪܘܚܟ ܡܒܣܡܬܐ ܬܕܒܪܢܝ ܒܐܘܪܚܐ ܕܚ̈ܝܐ

11ܡܛܠ ܫܡܟ ܡܪܝܐ ܒܝܐܝܢܝ ܘܡܛܠ ܙܕܝܩܘܬܟ ܐܦܩ ܢܦܫܝ ܡܢ ܐܘܠܨܢܐ

12ܘܒܛܝܒܘܬܟ ܫܬܩ ܠܣ̈ܢܐܝ ܘܐܘܒܕ ܠܒ̈ܥܠܕܒܒܝܗ̇ ܕܢܦܫܝ ܡܛܠ ܕܐܢܐ ܐܢܐ ܥܒܕܟ

Chapter 144 ܡܙܡܘܪ̈ܐ

1ܒܪܝܟ ܗܘ ܡܪܝܐ ܕܐܠܦ ܐܝ̈ܕܝ ܠܩܪܒܐ ܘܨܒ̈ܥܬܝ ܠܩܪܒܐ

2ܒܝܬ ܓܘܣܝ ܘܡܦܨܝܢܝ ܡܣܝܥܢܝ ܕܥܠܘܗܝ ܬܟܝܠ ܐܢܐ ܘܫܥܒܕ ܠܥܡ̈ܡܐ ܬܚ̈ܘܬܝ

3ܡܪܝܐ ܡܢܘ ܒܪܢܫܐ ܕܝܕܥܬܝܗܝ ܘܒܪܢܫܐ ܕܚܫܒܬܝܗܝ

4ܒܪܢܫܐ ܠܠܗܓܐ ܕܡܐ ܘܝܘܡ̈ܬܗ ܥܒܪܝܢ ܐܝܟ ܛܠܠܐ

5ܐܪܟܢ ܫܡܝܐ ܡܪܝܐ ܘܚܘܬ ܘܟܐܝ ܒܛܘܪ̈ܐ ܘܢܬܢܘܢ

6ܐܒܪܩ ܒܪ̈ܩܝܟ ܘܕܠܚ ܐܢܘܢ. ܫܕܪ ܓܐܪ̈ܝܟ ܘܒܕܪ ܐܢܘܢ

7ܐܘܫܛ ܐܝܕܟ ܡܢ ܡܪܘܡܐ ܘܫܠܝܢܝ ܡܢ ܡ̈ܝܐ ܣ̈ܓܝܐܐ ܘܡܢ ܐܝܕܐ ܕܥܘ̈ܠܐ

8ܕܦܘܡܗܘܢ ܡܡܠܠ ܣܪܝܩܘܬܐ ܘܝܡܝܢܗܘܢ ܝܡܝܢܐ ܗܝ ܕܥܘܠܐ

9ܐܠܗܐ ܬܫܒܘܚܬܐ ܚܕܬܐ ܐܫܒܚ ܠܟ ܘܒܟܢܪܐ ܕܥܣܪ ܡܢܝ̈ܢ ܐܙܡܪ ܠܟ

10ܕܝܗܒ ܦܘܪܩܢܐ ܠܡܠܟܐ ܘܦܨܝ ܠܕܘܝܕ ܥܒܕܗ ܡܢ ܚܪܒܐ ܒܝܫܬܐ

11ܦܨܢܝ ܡܢ ܐܝܕܐ ܕܥܘ̈ܠܐ ܕܦܘܡܗܘܢ ܡܡܠܠ ܣܪܝܩܘܬܐ ܘܝܡܝܢܗܘܢ ܝܡܝܢܐ ܗܝ ܕܥܘܠܐ

12ܒܢܝ̈ܢ ܐܝܟ ܢܨܒܬܐ ܡܬܪܒܝܢ ܡܢ ܛܠܝܘܬܗܘܢ ܘܒܢܬ̈ܢ ܐܝܟ ܟ̈ܠܠܬܐ ܕܡܨܒܬܢ ܒܕܡܘܬܐ ܕܗܝ̈ܟܠܐ

13ܬܘ̈ܘܢܝܢ ܡܠܝܢ ܘܡܬܐܫܕܝܢ ܚܕ ܠܚܕ ܥܢܢ ܝ̈ܠܕܢ ܘܡܪ̈ܒܝܢ ܒܫ̈ܘܩܝܢ

14ܒܩܪ̈ܝܢ ܥܫܝ̈ܢܢ ܘܠܝܬ ܒܗܝܢ ܕܥܩܪ̈ܢ ܠܝܬ ܬܘܪܥܬܐ ܐܦܠܐ ܐܝܠܠܬܐ ܒܫ̈ܘܩܝܢ

15ܛܘܒܘܗܝ ܠܥܡܐ ܕܗܟܢ ܐܝܬ ܠܗ ܛܘܒܘܗܝ ܠܥܡܐ ܕܡܪܝܐ ܗܘ ܐܠܗܗ

Chapter 145 ܡܙܡܘܪ̈ܐ

1ܐܪܡܪܡܟ ܡܪܝ ܡܠܟܐ ܘܐܒܪܟ ܫܡܟ ܠܥܠܡ ܥܠܡܝܢ

2ܒܟܠ ܝܘܡ ܐܒܪܟܟ ܘܐܫܒܚ ܫܡܟ ܠܥܠܡ

3ܪܒ ܗܘ ܡܪܢ ܘܡܫܒܚ ܛܒ ܘܠܝܬ ܣܟܐ ܠܪܒܘܬܗ

4ܕܪܐ ܠܕܪܐ ܢܫܬܥܘܢ ܥܒ̈ܕܝܟ ܘܓܢܒܪܘܬܟ ܢܚܘܘܢ

5ܘܥܘܫܢܐ ܕܕܚܝܠܘܬܟ ܢܐܡܪܘܢ ܘܪ̈ܘܪܒܬܟ ܢܫܬܥܘܢ

6ܘܕܚܝܠܘܬ ܥܘܫܢܟ ܢܐܡܪܘܢ ܘܪܒܘܬܟ ܐܫܬܥܐ

7ܕܘܟܪܢܐ ܕܛܝܒ̈ܘܬܟ ܣܓܝܐ̈ܬܐ ܢܒܥܘܢ ܙܕܝܩ̈ܝܟ ܘܢܫܟܚܘܢ

8ܡܪܚܡܢ ܗܘ ܡܪܝܐ ܘܡܪܚܦܢ ܢܓܝܪܐ ܪܘܚܗ ܘܣܓܝܐܐ ܛܝܒܘܬܗ

9ܛܒ ܗܘ ܡܪܝܐ ܘܪ̈ܚܡܘܗܝ ܥܠ ܟܠܗܘܢ ܥܒ̈ܕܘܗܝ

10ܢܘܕܘܢ ܠܟ ܡܪܝܐ ܥܒ̈ܕܝܟ ܘܙܕܝܩ̈ܝܟ ܢܫܒܚܘܢܟ

11ܫܘܒܚܐ ܕܡܠܟܘܬܟ ܢܐܡܪܘܢ ܘܒܥܘܫܢܟ ܢܡܠܠܘܢ

12ܕܢܚܘܘܢ ܠܒ̈ܢܝ ܐܢܫܐ ܓܢܒܪܘܬܟ ܘܫܘܒܚܐ ܕܡܠܟܘܬܟ

13ܡܠܟܘܬܟ ܡܠܟܘܬ ܟܠ ܥܠܡܝܢ ܘܫܘܠܛܢܟ ܒܟܠ ܕܪܕܪܝܢ ܡܗܝܡܢ ܗܘ ܡܪܝܐ ܒܡ̈ܠܘܗܝ ܘܙܕܝܩ ܒܟܠܗܘܢ ܥܒ̈ܕܘܗܝ

14ܣܡܟ ܡܪܝܐ ܠܟܠ ܕܢܦܠܝܢ ܘܬܪܨ ܠܟܠ ܕܟܦܝܦܝܢ

15ܥܝ̈ܢܐ ܕܟܠܢܫ ܠܘܬܟ ܬ̈ܠܝܢ ܝܗܒ ܐܢܬ ܠܗܘܢ ܡܐܟܘܠܬܐ ܒܙܒܢܗܘܢ

16ܦܬܚ ܐܢܬ ܐܝܕܟ ܘܡܣܒܥ ܐܢܬ ܨܒܝܢܐ ܕܟܠ ܕܚܝ

17ܙܕܝܩ ܗܘ ܡܪܝܐ ܒܟܠܗܝܢ ܐܘܪ̈ܚܬܗ ܘܡܪܚܡܢ ܒܟܠܗܘܢ ܥܒ̈ܕܘܗܝ

18ܩܪܝܒ ܗܘ ܡܪܝܐ ܠܐܝܠܝܢ ܕܩܪܝܢ ܠܗ ܒܩܘܫܬܐ

19ܘܥܒܕ ܨܒܝܢܐ ܕܕܚ̈ܠܘܗܝ ܫܡܥ ܒܥܘܬܗܘܢ ܘܦܪܩ ܠܗܘܢ

20ܢܛܪ ܡܪܝܐ ܠܟܠܗܘܢ ܕܚ̈ܠܘܗܝ ܘܠܟܠܗܘܢ ܥܘ̈ܠܐ ܡܘܒܕ

21ܬܫܒܚ̈ܬܗ ܕܡܪܝܐ ܐܡܠܠ ܒܦܘܡܝ ܘܢܒܪܟܘܢ ܟܠ ܒܢ̈ܝ ܒܣܪܐ ܠܫܡܐ ܕܩܘܕܫܗ ܠܥܠܡ ܥܠܡܝܢ

Chapter 146 ܡܙܡܘܪ̈ܐ

1ܫܒܚܝ ܢܦܫܝ ܠܡܪܝܐ

2ܐܫܒܚ ܠܡܪܝܐ ܒܚܝ̈ܝ ܘܐܙܡܪ ܠܐܠܗܝ ܥܕ ܩܝܡ ܐܢܐ

3ܠܐ ܬܬܟܠܘܢ ܥܠ ܫܠܝܛܐ ܘܥܠ ܒܪܢܫܐ ܕܠܝܬ ܒܐܝܕܗ ܦܘܪܩܢܐ

4ܕܢܦܩܐ ܪܘܚܗ ܘܗܦܟ ܠܐܪܥܗ ܘܒܗܘ ܝܘܡܐ ܐ̈ܒܕܢ ܟܘܠܗܝܢ ܡܚ̈ܫܒܬܗ

5ܛܘܒܘܗܝ ܠܡܢ ܕܐܠܗܗ ܕܝܥܩܘܒ ܒܥܕܪܗ ܘܣܒܪܗ ܥܠ ܡܪܝܐ ܐܠܗܗ

6ܕܥܒܕ ܫܡܝܐ ܘܐܪܥܐ ܘܝܡ̈ܡܐ ܘܟܠ ܕܐܝܬ ܒܗܘܢ ܢܛܪ ܩܘܫܬܐ ܠܥܠܡ

7ܘܥܒܕ ܕܝܢܐ ܠܛܠܝܡ̈ܐ ܝܗܒ ܠܚܡܐ ܠܟܦܢ̈ܐ ܡܪܝܐ ܫܪܐ ܐܣܝܪ̈ܐ

8ܡܪܝܐ ܦܬܚ ܥܘܝܪ̈ܐ ܡܪܝܐ ܬܪܨ ܟܦܝ̈ܦܐ ܡܪܝܐ ܪܚܡ ܙܕܝܩ̈ܐ

9ܡܪܝܐ ܘܡܢܛܪ ܠܡܣ̈ܟܢܐ ܡܬܪܣܐ ܠܝ̈ܬܡܐ ܘܠܐܪ̈ܡܠܬܐ ܘܐܘܪܚܐ ܕܥܘ̈ܠܐ ܡܛܒܥ

10ܐܡܠܟ ܡܪܝܐ ܠܥܠܡ ܘܐܠܗܟܝ ܨܗܝܘܢ ܠܕܪܕܪܝܢ

Chapter 147 ܡܙܡܘܪ̈ܐ

1ܛܒ ܠܡܙܡܪ ܠܐܠܗܢ ܘܒܣܝܡ ܘܠܗ ܗܘ ܝܐܝܐ ܬܫܒܘܚܬܐ

2ܒܢܐ ܠܐܘܪܫܠܡ ܡܪܝܐ. ܘܠܡܒܕܪ̈ܐ ܕܐܝܣܪܐܝܠ ܡܟܢܫ

3ܡܐܣܐ ܠܬܒܝܪ̈ܝ ܠܒܐ ܘܥܨܒ ܟܐ̈ܒܝܗܘܢ

4ܡܢܐ ܡܢܝܢܐ ܠܟ̈ܘܟܒܐ ܘܠܟܠܗܘܢ ܩܪܐ ܫܡ̈ܗܐ

5ܪܒ ܗܘ ܡܪܢ ܘܥܫܝܢ ܚܝܠܗ ܘܠܝܬ ܣܟܐ ܠܣܘܟܠܗ

6ܡܪܝܡ ܡܪܝܐ ܠܡܣ̈ܟܢܐ ܘܡܡܟܟ ܠܥܘ̈ܠܐ ܥܕܡܐ ܠܐܪܥܐ

7ܫܒܚܘ ܠܡܪܝܐ ܒܫܘܒܚܐ ܙܡܪܘ ܠܡܪܝܐ ܒܟܢܪ̈ܐ

8ܕܡܟܣܐ ܫܡܝܐ ܒܥܢ̈ܢܐ ܝܗܒ ܡܛܪܐ ܥܠ ܐܪܥܐ ܘܡܘܥܐ ܥܡܝܪܐ ܥܠ ܛܘܪ̈ܐ

9ܘܝܗܒ ܠܒܥܝܪܐ ܡܐܟܘܠܬܐ ܘܠܒܢ̈ܝ ܢܥܒܐ ܕܩܪܝܢ

10ܠܐ ܨܒܐ ܡܪܝܐ ܒܚܝܠܗ ܕܣܘܣܝܐ ܐܦ ܠܐ ܒܫ̈ܩܘܗܝ ܕܓܢܒܪܐ ܨܒܐ

11ܐܠܐ ܨܒܐ ܡܪܝܐ ܒܕܚ̈ܠܘܗܝ ܘܒܐܝܠܝܢ ܕܡܣܟܝܢ ܠܛܝܒܘܬܗ

12ܫܒܚܝ ܐܘܪܫܠܡ ܠܡܪܝܐ ܫܒܚܝ ܠܐܠܗܟܝ ܨܗܝܘܢ

13ܡܛܠ ܕܥܫܢܘ ܡ̈ܘܟܠܐ ܕܬܪ̈ܥܝܟܝ ܘܒܪܟ ܠܒܢܝ̈ܟܝ ܒܓܘܟܝ

14ܣܡ ܬܚ̈ܘܡܝܟܝ ܒܫܠܡܐ ܘܒܫܘܡܢܐ ܕܚ̈ܛܐ ܣܒܥܟܝ

15ܡܫܕܪ ܡܠܬܗ ܥܠ ܐܪܥܐ ܘܒܥܓܠ ܪܗܛ ܦܬܓܡܗ

16ܝܗܒ ܬܠܓܐ ܐܝܟ ܥܡܪܐ ܘܐܓܠܝܕܐ ܐܝܟ ܩܛܡܐ ܡܒܕܪ

17ܪܡܐ ܐܓܠܝܕܐ ܐܝܟ ܦܬ̈ܐ ܘܩܕܡ ܥܪܝܗ ܡܢܘ ܡܫܟܚ ܠܡܩܡ

18ܡܫܕܪ ܡܠܬܗ ܘܡܦܫܪ ܠܗܘܢ ܡܫܒ ܪ̈ܘܚܐ ܘܡܪܕܝܢ ܡ̈ܝܐ

19ܡܚܘܐ ܡܠܬܗ ܒܝܥܩܘܒ ܢܡܘܣ̈ܘܗܝ ܘܦܘܩ̈ܕܢܘܗܝ ܒܐܝܣܪܝܠ

20ܠܐ ܥܒܕ ܗܟܢ ܠܟܠܗܘܢ ܥܡ̈ܡܐ ܘܕܝ̈ܢܘܗܝ ܠܐ ܚܘܝ ܐܢܘܢ

Chapter 148 ܡܙܡܘܪ̈ܐ

1ܫܒܚܘ ܠܡܪܝܐ ܡܢ ܫܡܝܐ ܫܒܚܘܗܝ ܒܡܪ̈ܘܡܐ

2ܫܒܚܘܗܝ ܟܠܗܘܢ ܡܠܐ̈ܟܘܗܝ ܫܒܚܘܗܝ ܟܠܗܘܢ ܚ̈ܝܠܘܬܗ

3ܫܒܚܘܗܝ ܫܡܫܐ ܘܣܗܪܐ ܫܒܚܘܗܝ ܟܠ ܟܘ̈ܟܒܐ ܘܢܘܗܪܐ

4ܫܒܚܘܗܝ ܫܡ̈ܝ ܫܡܝܐ ܡ̈ܝܐ ܕܠܥܠ ܡܢ ܫܡܝܐ

5ܢܫܒܚܘܢ ܠܫܡܗ ܕܡܪܝܐ. ܡܛܠ ܕܗܘ ܐܡܪ ܘܗܘܘ ܘܗܘ ܦܩܕ ܘܐܬܒܪܝܘ

6ܐܩܝܡ ܐܢܘܢ ܠܥܠܡ ܥܠܡܝܢ ܢܡܘܣܐ ܝܗܒ ܘܠܐ ܥܒܪ

7ܫܒܚܘ ܠܡܪܝܐ ܡܢ ܐܪܥܐ ܬܢܝ̈ܢܐ ܘܟܠܗܘܢ ܬܗ̈ܘܡܐ

8ܢܘܪܐ ܘܒܪܕܐ ܘܬܠܓܐ ܘܓܠܝܕܐ ܪ̈ܘܚܐ ܘܥ̈ܠܥܠܐ ܥܒܕܐ ܕܡܠܬܗ

9ܛܘܪ̈ܐ ܘܟܠܗܝܢ ܪ̈ܡܬܐ ܐܝ̈ܠܢܐ ܕܦܐܪ̈ܐ ܘܟܠܗܘܢ ܐܪ̈ܙܐ

10ܚܝܘܬܐ ܘܟܠܗ̇ ܒܥܝܪܐ ܪܚܫܐ ܘܛܝܪܐ ܘܦܪܚܬܐ

11ܡ̈ܠܟܐ ܕܐܪܥܐ ܘܟܠܗܝܢ ܐܡ̈ܘܬܐ ܪ̈ܘܪܒܢܐ ܘܟܠܗܘܢ ܕܝ̈ܢܐ ܕܐܪܥܐ

12ܓܕܘ̈ܕܐ ܘܒܬ̈ܘܠܬܐ ܣ̈ܒܐ ܘܥ̈ܠܝܡܐ

13ܢܫܒܚܘܢ ܠܫܡܗ ܕܡܪܝܐ ܡܛܠ ܕܪܒ ܗܘ ܫܡܗ ܒܠܚܘܕܘܗܝ ܫܘܒܚܗ ܒܐܪܥܐ ܘܒܫܡܝܐ

14ܡܪܝܡ ܩܪܢܐ ܕܥܡܗ ܘܬܫܒܘܚܬܐ ܠܟܠܗܘܢ ܙܕܝܩ̈ܘܗܝ ܘܠܒܢ̈ܝ ܐܝܣܪܝܠ ܥܡܐ ܕܩܪܝܒ ܠܗ

Chapter 149 ܡܙܡܘܪ̈ܐ

1ܫܒܚܘ ܠܡܪܝܐ ܬܫܒܘܚܬܐ ܚܕܬܐ ܬܫܒܘܚܬܗ ܒܥܕܬܐ ܕܙܕܝܩ̈ܐ

2ܢܚܕܐ ܐܝܣܪܝܠ ܒܥܒܘܕܗ ܘܒܢ̈ܝ ܨܗܝܘܢ ܢܪܘܙܘܢ ܒܡܠܟܗܘܢ

3ܘܢܫܒܚܘܢ ܠܫܡܗ ܒ̈ܦܠܓܐ ܘܒܐܪ̈ܒܝܥܐ ܘܒܟܢܪ̈ܐ ܢܙܡܪܘܢ ܠܗ

4ܡܛܠ ܕܨܒܐ ܡܪܝܐ ܒܥܡܗ ܘܝܗܒ ܠܡ̈ܣܟܢܐ ܦܘܪܩܢܗ

5ܢܬܥܫܢܘܢ ܙܕܝܩ̈ܐ ܒܐܝܩܪܐ ܘܢܫܒܚܘܢܝܗܝ ܥܠ ܥܪ̈ܣܬܗܘܢ

6ܢܪܡܪܡܘܢ ܠܐܠܗܐ ܒܓܝܓܪ̈ܬܗܘܢ ܣܝܦܐ ܕܬܪ̈ܝܢ ܦܘܡ̈ܘܗܝ ܒܐ̈ܝܕܝܗܘܢ

7ܠܡܥܒܕ ܦܘܪܥܢܐ ܡܢ ܥܡ̈ܡܐ ܘܡܟܣܢܘܬܐ ܡܢ ܐ̈ܡܘܬܐ

8ܠܡܐܣܪ ܡ̈ܠܟܝܗܘܢ ܒܣ̈ܘܛܡܐ ܘܝܩܝܪ̈ܝܗܘܢ ܒܫܫ̈ܠܬܐ ܕܦܪܙܠܐ

9ܠܡܥܒܕ ܠܗܘܢ ܕܝܢܐ ܕܟܬܝܒ ܫܘܒܚܐ ܠܟܠܗܘܢ ܙܕܝܩ̈ܘܗܝ

Chapter 150 ܡܙܡܘܪ̈ܐ

1ܫܒܚܘ ܠܡܪܝܐ ܒܩܘܕܫܗ ܫܒܚܘܗܝ ܒܐܪܩܝܥܐ ܕܥܘܫܢܗ

2ܫܒܚܘܗܝ ܒܚܝܠܬܢܘܬܗ ܫܒܚܘܗܝ ܒܣܘܓܐܐ ܕܪܒܘܬܗ

3ܫܒܚܘܗܝ ܒܩܠܐ ܕܩܪܢܐ ܫܒܚܘܗܝ ܒܩܝܬܪ̈ܐ ܘܒܟܢܪ̈ܐ

4ܫܒܚܘܗܝ ܒ̈ܦܠܓܐ ܘܒܐܪ̈ܒܝܥܐ ܫܒܚܘܗܝ ܒܡ̈ܢܐ ܚ̈ܠܝܬܐ

5ܫܒܚܘܗܝ ܒܨ̈ܨܠܝ ܫܡܥܐ ܫܒܚܘܗܝ ܒܩܠܐ ܘܒܩܥܬܐ

6ܟܠ ܢܫܡܐ ܬܫܒܚ ܠܡܪܝܐ

Psalms.

Psalms.